Te María, Raúl, Arne sok yantikxan, jich ya yilik te jaʼ jun mukʼul majtanil te orasione. Te kʼalal ya skʼoponik, jich ya yaʼiyik te ya xjuʼ ya xkʼopojik sok te Diose, te ya yalbeyik wokol sok ya skʼanbeyik koltayel. Akuerdo ayik-a te bin ya yal te Biblia ta swenta te skʼoponel Dios: «Ha smucʼul coʼtantic ini ta stojol Dios: teme hich ya jcʼambetic te bin ya scʼan yoʼtan stuquel, ya yaʼiyotic» (1 Juan 5:14).

Jaʼukmeto, bayal ants winiketik wokol ya yaʼiyik schʼuunel te bin ya yal te Biblia ta swenta te orasion. Te Steve jich ya yal: «Te kʼalal 17 kaʼbilal-ae, laj oxtul kamigotak: te jtule laj ta jun aksidente ta karro, te yantik chaʼtule, la sjikʼik jaʼ ta mar». ¿Bin la spas te Steve? «La jkʼopon te  Dios, la jojkʼoybey bin yuʼun te jich kʼot ta pasele, pero ma la sutbon. Jaʼ yuʼun la jojkʼoybey jba: ‹¿Yabal yaʼiybotik jkʼoptik te Diose?›». Bayal machʼatik jich yaʼiyoj sbaik sok sjojkʼoybeyoj sbaik teme ay swentail te skʼoponel Diose.

Pero ay yantik swentail te bin yuʼun ya yalik te ants winiketik te ma puersauk ya yichʼ kʼoponel te Dios. Ay ya yalik te bitʼil snaʼojix spisil te Diose, ya yil te jwokoltik sok te bin ya xtuun kuʼuntik. Jaʼ yuʼun ¿Aybal swentail te ya jcholbeytikxan te bin ya xkʼax ta jtojoltike?

Ay yantik ya yalik te ma x-aʼiybotik te skʼopik ta skaj te ay bintik chopol spasojike. Jich ya yal te Jenny: «Te jproblemae, jaʼ te maʼyuk jkʼoplal ya kaʼiy jba. Ay bintik ma lek jpasoj te ya jmel koʼtan yuʼune, jaʼ yuʼun ya jnaʼ te ma snujpʼuk te ya yaʼiybon jkʼop te Diose».

¿Te jaʼate bin ya anop? ¿Aybal jich awaʼiyoj aba? Teme jiche, yame yakʼbat stseʼelil awoʼtan snaʼel te ya xjuʼ ya yakʼbat sujtib te Bibliae. Ya xjuʼ ya smukʼulin awoʼtan te bin ya yal te Biblia ta swenta te orasion. * Te Biblia ya skoltayat ta stabeyel sujtib te jojkʼoyeletik ini:

• ¿Yanixbal yaʼiy Dios-a te orasionetik?

• ¿Bin yuʼun ay orasionetik te ma xyakʼbey sujtibe?

• ¿Bin-utʼil ya skʼan ya jkʼopontik yuʼun ya yaʼiybotik-a te jkʼoptike?

• ¿Bin-utʼil ya xjuʼ ya skoltayat te orasione?