¿Bin yuʼun ma xyakʼbey sujtib Dios spisil te orasionetike?
Te jTatik Jehová te ay ta chʼulchan, ya smulan yaʼiyel te kʼalal ya jkʼopontike. Pero te Dios ma xyakʼbey sujtib spisil te orasionetike. ¿Binwan yuʼun? ¿Bin ya skʼan ya kichʼtik ta wenta te kʼalal ya jkʼopontike? Ilawil te bin ya yal te Biblia.
«Te cʼalal ya acʼoponic Dios te jaʼexe, ma me jpʼaluc nax cʼop te bayal buelta ya awalulayic» (Mateo 6:7, TZOXCH).
Te Jehová ma skʼan te jun-nax te bin ya kalulantik o te ya jkʼopontik ta jun libro te bin ya kalbeytike. Jaʼ ya smulan te yakuk xlokʼ ta koʼtantike. Nopa awaʼiy te ay jtul awamigo te jun-nax te bin ya yalulanbat skʼoplal ta jujun kʼajkʼal. ¡Kʼax mel-oʼtantik sba! Te lekil amigoetik smelelil te bin ya scholbey sbaik. Te kʼalal jaʼ ya kalbeytik Dios te bintik ay ta koʼtantik, ya kakʼtik ta ilel te jich ya kiltik bitʼil jtul amigo.
«Teme ya acʼanique, jaʼucmeto, ma xʼacʼbotex, yuʼun ma lecuc awoʼtanic ta scʼanel» (Santiago 4:3, TZOXCH).
Mame sjakʼbotik jkʼoptik te Dios teme ya jkʼanbeytik te bin ma smulane. Nopa awaʼiy te ay machʼa ya yaʼiy tajimal yuʼun ya spas ganar takʼin sok ya skʼanbey Dios te yakuk xkoltayote. Te Jehová ma sut te orasion ini, melel yaloj te ma lek te ay sbikʼtal koʼtantik sok te ya jchʼuuntik te ay suertee (Isaías 65:11; Lucas 12:15). Yuʼun ya sutbotik jkʼoptik-a te Diose, jaʼ ya skʼan ya kiltik teme yakotik ta spasel te bin ya yal te Bibliae.
«Te machʼa ma scʼan ya yaʼiy te ley, ha nix hich ihlaybil te bin ya scʼopon Dios yuʼune» (Proverbios 28:9).
Ta namey kʼinal, te Dios ma la yaʼiybey skʼop te machʼatik ya skʼaxuntayik te ley yuʼune, jaʼnix jich ta ora ini (Isaías 1:15, 16; Malaquías 3:6). Teme ya jkʼantik te ya sjakʼbotik te jkʼoptike, ya skʼan ya jpastik tulan ta schʼuunbeyel te mantaliletik yuʼune. ¿Jaxan teme ay bin chopol jpasojtike? ¿Yabal skʼan ya yal-abi te maʼyuk bin-ora ya yaʼiybotik jkʼoptik te Jehovae? Maʼuk. Melel te Jehová ya spasbotik perdon teme ya kakʼtik ta ilel te jsujtesojix koʼtantik sok teme ya jpastik te skʼanojel yoʼtane (Hechos 3:19).
