«Haʼat yac awaʼiybe scʼop te machʼa ya scʼoponat, spisilic ya xtalic ta atojol» (Salmo 65:2).

Bayal ants winiketik ya skʼoponik Dios swentanax yuʼun lek ya yaʼiy sbaik-a, pero ta smelelil ya skuyik te maʼyuk machʼa ya x-aʼiybotik te skʼopike. Te orasion ma jaʼuknax ya xkoltaywan yuʼun ya stsʼik kuʼuntik-a te jwokoltike. Te Biblia ya yal te «nopol ay te Jehová * ta stojol spisil machʼatik ya scʼoponic, spisil machʼatik ya scʼoponic ta smelelil [...]; ya yaʼiybe yawic soc ya scoltaylan» (Salmo 145:18, 19).

Jaʼ yuʼun, seguro ayotik te Jehová ya yaʼiybey skʼop te machʼatik ya x-ichʼot ta mukʼ yuʼune. Sok skʼuxul yoʼtan, jich ya yalbotik: «Hich ya xtal acʼopononic; ya me xtal acʼopononic sok hoʼon ya caʼiybeyex acʼopic» (Jeremías 29:12).

«Ma me xquehchajex ta scʼoponel Dios» (Romanos 12:12).

Te Biblia ya yalbotik te spisiluk-ora ya jkʼopontik Dios. Chikan ta ilel te Jehová ya skʼan te ya jkʼopontike (Mateo 26:41; Efesios 6:18).

¿Bin yuʼun te Dios ya smulan te yakuk akʼopone? Nopa awaʼiy ta swenta ini: ¿Aybal jtuluk tatil te ma smulan te ya xkʼanbot koltayel yuʼun te snichʼane? Te tatil snaʼojniwan te bin ya xtuun yuʼun o te bin yaʼiyel ya yaʼiy sba te snichʼane, pero te kʼalal ya xcholbot yaʼiy te bin ya skʼane, te tatil jich ya sta ta ilel te ay smukʼul yoʼtan sok te kʼux ya x-aʼiyot yuʼune. Jaʼnix jich, te kʼalal ya jkʼopontik te Jehová, ya kakʼtik ta ilel te ay smukʼul koʼtantik sok te ya jkʼan ya xnoptsajotik ta stojol (Proverbios 15:8; Santiago 4:8).

«Aʼbeya ta stojol spisil te bintic yac amel awoʼtanic yuʼun», melel kʼuxex ta yoʼtan (1 Pedro 5:7).

Te Dios ya skʼan te ya jkʼopontik, melel kʼuxotik ta yoʼtan sok ya smel yoʼtan ta jtojoltik. Ya yil te jwokoltik sok ya skʼan ya skoltayotik.

Te ajwalil David spisil-ora la skʼanbey koltayel te Jehová, la scholbey te bin ya spas pensare sok te bin yaʼiyel ya yaʼiy sbae (Salmo 23:1-6). ¿Bintik la snop Dios ta stojol te Davide? Kʼux ta yoʼtan sok ya yaʼiybey te skʼope (Hechos 13:22). Jaʼnix jich ya yaʼiybotik jkʼoptik te Dios, melel kʼuxotik ta yoʼtan.

Te kʼopetik ini, ya jtatik ta Biblia ta sjun salmo. Te machʼa la stsʼibaye, snaʼoj ta lek te ya x-aʼiybot skʼop yuʼun te Jehovae, jaʼ koltayot yuʼun. Nopol la yaʼiy sba ta stojol te Dios sok juʼ yuʼun stsʼikel te wokoliletik kʼax ta stojole (Salmo 116:1-9).

Teme ya schʼuun koʼtantik te ya yaʼiybotik jkʼoptik te Diose, ma x-kijkitaytik ta skʼoponel. Kiltik bin kʼot ta pasel ta stojol jtul winik te Pedro sbiil te kuxinem ta norte yuʼun España. Te snichʼan te 19 yaʼbilal laj ta jun aksidente yuʼun karro. Kʼalal la sta te wokolil ini, te Pedro la scholbey te Dios te bin yaʼiyel ya yaʼiy sba, la skʼanbey te yakuk xkoltayot sok te yakuk x-akʼbot smukʼul yoʼtane. ¿Bin kʼot ta pasel? Te Pedro jich ya yal: «Te Jehová la sutbon te jkʼope. Te kinam sok te joʼon la jtatik te koltayel yuʼun Dios ta swenta j-abatetik yuʼun, te la yakʼbotik smukʼul koʼtantik».

Te orasione, bayal koltayot te Pedro sok te sfamilia, Manchukme maba chaʼkuxaj te snichʼane. Te María del Carmen te yinam te Pedro, jich ya yal: «Te skʼoponel Dios la skoltayon ta stsʼikel te mel-oʼtane. Jnaʼoj-a te ya xkʼot ta yoʼtan te Jehová te bin yaʼiyel ya kaʼiy jbae, melel te kʼalal ya jkʼopone ya yakʼbon slamalil kʼinal».

Te Biblia sok te bintik kʼaxem ta skuxlejal te yantik ants winiketik, ya yakʼ ta ilel te Dios ya yaʼiy te orasionetike. Pero ma spisiluk ya yakʼbey sujtib. ¿Bin yuʼun te ay ya yaʼiy te orasionetik sok ay yantik te maʼuke?