Ta yantik artículo la jnoptik te nopol ya slajinix Dios te machʼatik ma lek stalelik sok te wokoliletik. ¿Bin yuʼun ya jnaʼtik te jich ya xkʼot ta pasele? Te Biblia jamal ya yal:

«Yak ta kʼaxel bael te balumilal» (1 JUAN 2:17).

Pero jnaʼojtik ta lek te ay ants winiketik ya xkolik jilel, melel jaʼnix te texto ini jich ya yal:

«Te machʼa ya spasbey te skʼanojel yoʼtan te Dios yame xkuxin ta sbajtelkʼinal».

Yuʼun kuxul ya xjilotik ya skʼan ya jchʼuunbeytik skʼop te Dios, pero ta nail ya skʼan ya jnaʼbeytik sba.

Te Jesús jich la yal: «Jichme ya sta skuxlejalik sbajtelkʼinal te ants winiketik: te ya snaʼbat aba te jaʼatnax te smelelil Diosate» (Juan 17:3). Yuʼun ya xkolotik jilel ta slajibal kʼajkʼal sok ya xkuxinotik ta sbajtelkʼinal, ya skʼan ya jnaʼbeytik sba te Dios. Ma tikʼuknax-a te ya jnaʼtik te ay te Dios sok te ay bin-nax ya jnoptik ta stojol, ya skʼan ya kamigointik. Jich bitʼil te kʼalal ay machʼa ya kamigointik, ya skʼan ya jlokʼestik tiempo, jaʼnix jich ya jpastik ta stojol te Dios. Kiltik te bintik ya yal te Biblia te ya skoltayotik ta yamigoinel ta lek te Diose.

Yuʼun kuxulotik-a ya skʼan ya xweʼotik ta jujun kʼajkʼal, pero te Jesús jich la yal: «Mame jaʼuknax ta pan ya xkuxin te winike, jaʼ ya xkuxin ta swenta schʼuunbeyel skʼop te Jehovae» (Mateo 4:4).

Ta ora ini ya jtatikix ta Biblia te bin ya yal te Jehová. Te kʼalal ya jnopilantik te libro ini, ya jnoptik te bin la spas te Jehová ta namey kʼinal, te bin yak ta spasel ta ora ini sok te bin yato xbajt spas ta pajel chaʼbej.

¿Bin ya xjuʼ ya jpastik teme ya jkʼan ya jchʼuunbeytik smantal te Dios pero wokol ya kaʼiytik yijkitayel te bin ma smulane? Teme jiche, jaʼ ya skoltayotik teme ya jnaʼbeytikxan sba ta lek te Diose.

Kiltik te bin kʼax ta stojol jtul ants te Sakura sbiil. Ya yaʼiy mulwej-a, pero te kʼalal jajch snop te Biblia la snop te jich ya yal te Dios: «¡Ananik ta stojol te mulweje!» (1 Corintios 6:18). Te Sakura la skʼanbey yip yoʼtan te Dios sok juʼ yuʼun sjelontesel te skuxlejale. Manchukme jich-abi, ya skʼan te ya spas tulan yuʼun ya spas te bin leke, jich ya yal: «Kʼalal ya xtal ta jpensar spasel te mulwej, ya kalbey ta jamal te Jehová te bin yaʼiyel ya kaʼiy jba, melel ma xjuʼ kuʼun stsalel ta jtukelnax. Te oración skoltayojon yuʼun ya xnoptsajonxan ta stojol te Jehová». Jich bitʼil te Sakura ay bayal millón ta tul ants winiketik yakik ta snaʼbeyel sba te Dios sok yakik ta akʼbeyel yip yoʼtanik yuʼun jich ya sjelontes te skuxlejalik sok te jaʼuk ya spasik te bin lek ya yil te Jehová (Filipenses 4:13).

Teme ya jnaʼbeytikxan sba te Dios jich ya snaʼbotikxan jbatik-euk sok jich ya yilotik bitʼil lekil amigo (Gálatas 4:9; Salmo 25:14). Jichme ya xjuʼ ya xkuxinotik jilel te kʼalal ya yichʼ lajinel te chopol balumilal ini sok ya xjuʼ ya xkuxinotik ta achʼ balumilal yuʼun Dios. ¿Binwan yilel te achʼ balumilale? Ta yan artículo ya scholbey skʼoplal.