¿Bin yuʼun te ay bayal pʼajaw?
Yuʼun ya jnaʼtik bin yuʼun nojel ta pʼajaw te Balumilale, ya skʼan ya xkʼot ta koʼtantik bin yuʼun ya xpʼajawan te ants winiketik sok bin-utʼil ya xpujk.
¿Bin-a te pʼajaw?
Te pʼajaw jaʼ te kʼalal ay machʼa jkʼaxel maba lek ya yil te yantike.
¿BIN YUʼUN YA XPʼAJAWAN TE ANTS WINIKETIK?
Bayal swentail te bin yuʼun ya xpʼajawanik te ants winiketik, ay ma jaʼuk yuʼun ta swenta te bin ya spasik, jaʼ ta swenta te bin yilel stalelik. Melel, yaniwan snopik te jaʼ chopol ants winiketik o te maʼyuk bin-ora ya xjelonix te stalelike. O yaniwan snopik te jaʼ pekʼelxan skʼoplal te yantik, te ya xjuʼ ya x-utsʼinotik yuʼun o te jaʼnax ya sjachik kʼop. Jaʼnix jich ay machʼa ya xpʼajawan ta skaj te ay la yichʼ utsʼinel ta namey, te ay bin ma stojil la yichʼ pasbeyel o yantik wokoliletik te kʼax ta stojol.
¿BIN-UTʼIL YA SPUK SBA TE PʼAJAWE?
Ay baeltik te ants winiketik ya spʼaj te yantik manchukme maba ya snaʼbeyik sba. Jich bitʼil, te ayniwan machʼa ya xjajch ta pʼajaw ta skajnax te bin ya yal te yantik ta stojol te yane. Jich ya xpujk te pʼajawe.
Te kʼalal ya jnaʼtik te oranax ya xpujk te pʼajawe, ya xkʼot ta koʼtantik bin yuʼun ya xjajchik ta pʼajaw te ants winiketike. Swenta ya xlaj skʼoplal te pʼajaw, ya skʼan ya jnaʼtik banti jajch tal, pero te Biblia ya yalbey skʼoplal.
TE BIBLIA YA SCHOL TE BANTI JAJCH TAL TE PʼAJAWE
TE ANTS WINIKETIK MA JAʼUK NAIL JAJCHIK TA PʼAJAW. Te pʼajaw jajch talel ta chʼulchan kʼalal jtul chʼul-abat la stoy sba ta stojol te Dios, te chʼul abat-abi jaʼ te Satanás o te Diablo. Kʼalal la stoy sba, jich kʼatpʼuj ta jmilawal. «Como mero jlot stuquel soc ha tatil yuʼun lot», jaʼ yuʼun yakʼoj te ya xpʼolxan te pʼajaw sok te utsʼinwanej (Juan 8:44; 1 Juan 3:11, 12). Te Biblia ya yal te kʼax chopol stalel, te ya x-utsʼinwan sok te bayal yilinba (Job 2:7; Apocalipsis 12:9, 12, 17).
TA SKAJ TE JMULAWILOTIK AY TE PʼAJAW. Te Adán, te sbabial winik la stʼunbey stalel te Satanás, jaʼ yuʼun jpisiltik jmulawilotik (Romanos 5:12). Jaʼnix jich te Caín te sba snichʼan te Adán, la spʼaj te yijtsʼin Abel sok la smil (1 Juan 3:12). Manchukme ya jkʼuxultaytik sok ya jnaʼbeytik yoʼbolil sba te ants winiketik, aynix te jaʼnix kʼux ya yaʼiy sbaik, ay sbikʼtal yoʼtanik sok ya stoy sbaik ta skaj te jmulawilotike (2 Timoteo 3:1-5).
TE PʼAJAW YA YAKʼ TE MA XKICHʼ JBATIK TA WENTA. Te ants winiketik ya yakʼik ta ilel taleliletik te ya yakʼ chʼiuk te pʼajaw. Te bitʼil «ay ta scʼab pucuj swohlol te bahlumilale», te ants winiketik ma xyichʼ sbaik ta wenta, ya xpʼajawanik sok ya x-utsʼinwanik (1 Juan 5:19).
Pero, te Biblia ma jaʼuknax ya yal te banti jajch tal te pʼajaw, jaʼnix jich ya yal bin-utʼil ya xlaj skʼoplal te pʼajawe.
