1, 2. ¿Bin-utʼil ya skoltayotik te sjun Romanos 5:12?

TA SJUN Romanos 5:12 ya yal: «Hich te bin utʼil och mulil ta bahlumilal ta scuenta jtuhl winic soc te och lajel ta scuenta mulil, hich cʼoht lajel ta stojol spisil ants-winiquetic ta scaj te spisilic stahoj smulic». Ya jnaʼtik lek skʼoplal te versiculo ini, melel ya jtuuntestik bayal buelta kʼalal ya jnojptestik te ants winiketik te bin ya yal te Bibliae.

² Te versiculo ini, bayal buelta ya yichʼ tuuntesel ta libro ¿Bin ya yakʼ ta nopel ta smelelil te Bibliae? Te kʼalal ya jnoptik te yoxebal, yoʼebal sok te swakebal kapitulo sok te kal jnichʼnabtik sok yantik ants winiketik, yaniwan jkʼopontik te Romanos 5:12. Ya jtuuntestik swenta ya xkʼot ta yoʼtanik bin yuʼun ma jaʼuk jun nichimal kʼinal te Balumilale, bin yuʼun ya jkʼantik te stojol kolele sok bin yuʼun ya xlajotike. Jaʼnix jich te versiculo ini ya skoltayotik te ayukxan skʼoplal kuʼuntik te bitʼil kamigoinej jbatik sok te Jehovae. Soknix ya xjuʼ ya skoltayotik te ya kakʼtikxan ta  koʼtantik te ya jchʼuunbeytik smantal te Diose sok te ya jmaliytik spisil te bintik yaloj ta jamal te ya spase.

3. ¿Bin ya skʼan te ayuk ta koʼtantik ta jpisiltik?

³ Jpisiltik ya skʼan te ayuk ta koʼtantik te jmulawilotike sok te ya xchʼayotik ta jujun kʼajkʼal. Te Jehová ya snaʼ te maba tojil ants winikotike, jaʼukmeto ya snaʼ yoʼbolil jbatik sok ya skʼan ya spasbotik perdon (Salmo 103:13, 14). Te Jesús la snojptesotik te akʼa jkʼanbeytik perdon te Diose (Lucas 11:2-4). Teme la spasbotikix perdon te Jehová yuʼun te jmultik te la jpastik ta nameye, mame skʼan te yato jnaʼulantik. Kiltik bin yuʼun te Jehová ya xjuʼ ya spasbotik perdon.

4, 5. 1) ¿Bin-a te ya skoltayotik swenta ya xkʼot ta koʼtantik te bin yuʼun ya xjuʼ ya spasbotik perdon te Diose? 2) ¿Bin ya skʼan ya yal te kʼopil «yutsil yoʼtan Dios» te maʼyuk ta jwentatik yichʼele?

⁴ Te karta yuʼun Romanos ya xjuʼ ya skoltayotik ta snaʼel bin yuʼun te Jehová ya spasbotik perdon, jaʼ ya skoltayotikxan te kapitulo 6. Ta Romanos 3:23, 24, te jpuk kʼop Pablo ya yal te jpisiltik ay jmultik, jich ya yalxan: «Ta scuenta yutsil yoʼtan Dios ta mahtanil halbotic te toj ayic, ta scuenta stojel mulil ta scuenta Cristo Jesús». Te kʼalal ya yichʼ albeyel skʼoplal te yutsil yoʼtan Dios te maʼyuk ta jwentatik yichʼel, te Pablo la skʼan yalbey skʼoplal te ay bin lek la spas te Dios ta jtojoltik, te maʼyuk bin ya skʼanbotik yuʼun sok te maʼyuk ta jwentatik yichʼel-abi.

⁵ Jtul te machʼa ya stʼunbey skʼoplal te Biblia ya yal te kʼalal yalbey skʼoplal te Biblia te yutsil yoʼtan Dios o Cristo te maʼyuk ta jwentatik yichʼel, jaʼ ya yalbey skʼoplal te bintik spasojik ta schebalik swenta ya yakʼbeyik skolel te ants winiketik ta swenta te mulil sok te lajele. Jich yuʼun te bin-nix ya skʼan ya yal-a ta griego kʼop jaʼ ya skʼan ya yal te «yutsil yoʼtan Dios» te ma xjuʼ ya jtatik ta jtukeltike. Kiltik te bintik spasoj Dios ta jtojoltik sok bin-utʼil ya jtatik jlekilaltik yuʼun te yutsil yoʼtan ta ora ini sok te ya yakʼ ay bin ya jmaliytik ta swenta te pajel chaʼbeje.

6. ¿Machʼatik te ya xjuʼ ya staik slekilalik ta swenta yutsil yoʼtan Dios te maʼyuk ta jwentatik yichʼel sok bin-a te ya staike?

⁶ Ta skaj smul te Adán, jpisiltik la kichʼtik jilel te mulil sok te lajele. Jaʼ yuʼun, te Biblia ya yal te och te lajel ta balumilal ta skaj te la skʼaxuntay mantal «jtuhl winic», jaʼ te Adán. Jaʼukmeto te Jehová la yakʼ ta ilel yutsil yoʼtan te maʼyuk ta jwentatik yichʼel sok la yakʼbey skolel te ants winiketik ta swenta «jtuhl winic, Jesucristo» (Romanos 5:12, 15, 17). Jich yuʼun ta jpisiltik ya xjuʼ ya jtatik jlekilaltik ta swenta yutsil yoʼtan Dios. Ta swenta te la schʼuun mantal te Jesucristoe, bayal machʼatik toj ya x-ilotik sok ya xjuʼ ya staik te kuxlejalil ta sbajtʼelkʼinal (Romanos 5:19, 21).

7. ¿Bin yuʼun te maʼyuk ta jwentatik yichʼel te majtʼanil yuʼun te stojol kolel sok te jich ya yakʼ kiltik Dios te yutsil yoʼtane?

⁷ Te stojol kolele jaʼ jun majtʼanil te maʼyuk ta jwentatik yichʼel sok jich ya yakʼ kiltik te yutsil yoʼtan te Diose. Jnop kaʼiytik ta swenta ini: Kʼax bayal yutsil yoʼtan te Jehová te la skoltayotik lokʼel ta swenta te mulil sok te lajele. Jaʼukmeto maʼyuk machʼa sujot yuʼun te la yakʼ te sNichʼan ta swenta te stojol kolele. Jaʼnix jich maʼyuk jtuluk ants winik ya snujpʼin stael te bin la spasik te Jehová sok te Jesús swenta ya spasbotik perdon sok te jich ya xkuxinotik ta sbajtʼelkʼinale. Ta swenta te bin-utʼil ya xkuxinotik ta jujun kʼajkʼal ya xjuʼ ya kakʼbeytik yil Dios te ya kalbeytik bayal  wokol yuʼun te yutsil yoʼtan te maʼyuk ta jwentatik yichʼele.

8. ¿Bin nopjibalil ya skʼan te ya jpʼajtike?

⁸ Jnaʼojtik te ya skʼan ya spasbotik perdon Dios yuʼun te jmultike, manchukme tulan te mulil jpasojtike. Jaʼukmeto ay jun nopjibalil te ya skʼan ya jpʼajtike. Maba lek te ya jnoptik te jich bitʼil te kʼax bayal yutsil yoʼtan te Dios ya xjuʼ ya jpastik te bin chopol sok te maʼyuk bin ya jtatik yuʼun, melel ya spasbotik perdon. Ay chaʼoxtul jchʼuunjeletik ta sbabial siglo jich la snopik-abi, manchukme ay chaʼoxtul jpuk-kʼopetik kuxulikto-a (kʼopona te sjun Judas 4). Jaʼnix jich ta kʼajkʼal ini, ya skʼan ya jtsajtay jbatik te ma xkakʼtik te ay machʼa jich ya skʼan te kʼunkʼun ya xjajch jnoptik-abi.

9, 10. ¿Bin yuʼun la yal te Pablo te lajemix soknix te yantik jchʼuunjeletik «ta stojol mulil»?

⁹ Te Pablo la yalbey te jchʼuunjeletik te maba lek te ya snopik te ya yichʼik pasbeyel perdon yuʼun Dios chikan te bin ya spasike. La yalbey te akʼa spʼajik te nopjibal-abi, melel lajemikix «ta stojol mulil» (kʼopona te sjun Romanos 6:1, 2). ¿Bin la skʼan la yal yuʼun-abi?

¹⁰ Ta swenta te stojol kolele, te Dios la spasbey perdon te Pablo yuʼun te smul sok te smul te yantik jchʼuunjeletik ta sbabial siglo. Te Jehová la stsatiklan sok schʼul espiritu swenta ya xkʼotik jich bitʼil snichʼnab. Teme jun yoʼtan ya yakʼ sbaik ta stojol Dios, ya xkuxinik ta chʼulchan sok ya xmantalteswanik sok te Cristo. Jaʼukmeto ayikto ta kuxinel ta Balumilal-a. Jich yuʼun, ¿bin yuʼun la yal te Pablo te lajemikix «ta stojol mulil»? Melel te skuxlejalike kʼax jelonemix-a. Te Pablo la stuuntes te bin kʼax ta stojol te Jesús swenta ya scholbey skʼoplal-abi. La yal ta swenta te lajele te maba uʼuninbilix yuʼun te Jesús, melel chaʼkuxajemix jich bitʼil jun espiritu te ma xlaje. Jaʼnix jich te jchʼuunjeletik lajemikix «ta stojol mulil», jaʼukmeto kuxulik «ta stojol Dios ta scuenta te Cajwaltic Cristo Jesús» (Romanos 6:9, 11). Kʼax jelonemix-a te skuxlejalik, melel maba yakʼojikix te ya yichʼik wentainel yuʼun te bin ya skʼan yoʼtanike. Tey-abi la spasik tulan te bantito kʼalal ya xjuʼ yuʼunik swenta lek ya x–ilotik yuʼun te Diose.

11. ¿Bin-utʼil lajemotik «ta stojol mulil» te jchʼuunjelotik ta kʼajkʼal ini?

¹¹ ¿Jaxan te joʼotike? ¿Bin-utʼil te lajemotikix «ta stojol mulil»? Ta nameye, ayniwan bayal bintik chopol la jpastik, melel maba jnaʼojtik-a te bin ya snop te Jehová ta swenta-abi. Ayotik ta «mosohil yuʼun a te mulile» (Romanos 6:19, 20). Jaʼukmeto kʼalal la jnoptik ta Biblia te bin-utʼil ya skʼan Dios te ya xkuxinotike, la jnoptik sjeltayel te jkuxlejaltik, te ya kakʼ jbatik ta abatinel ta stojol sok te ya kichʼtik jaʼe. La jkʼantik te ya jchʼuunbeytik smantal te Jehová sok spisil koʼtantik sok te ya xkuxinotik jich bitʼil ya skʼan stukele. La kichʼtik akʼel ta libre yuʼun te mulil sok j-abat kʼootik yuʼun te bintik toj ta pasele (Romanos 6:17, 18).

12. ¿Bin-a te ya skʼan ya jtatik ta nopele?

¹² Te Pablo la yal: «Ma me xawacʼ scuentahimbeyex abaqʼuetalic te mulil, yuʼun yac achʼuhunic spasel te bintic chopol ya smulan spasele» (Romanos 6:12). Jich yuʼun ya skʼan te ay bin ya jtatik ta nopel. Jaʼ te ya jpastik te bintik chopol ya jnop ta koʼtantike o jaʼ te ya xjuʼ ya jkom jbatike. Akʼa jojkʼoybey jbatik: «¿Yabal kakʼ te ya xjelaw te bin chopol ya skʼan koʼtan te jich ya xkʼot ta pasel kuʼune? ¿O oranaxbal ya jpʼaj?». Teme ta melel ya  kalbeytik wokol te Dios yuʼun te yutsil yoʼtan te maʼyuk ta jwentatik yichʼele, yame jpastik tulan swenta lek ya yilotik.

13. ¿Bin ejemploetik ta namey ya yakʼ schʼuun koʼtantik te ya xjuʼ kuʼuntik spasel te bintik leke?

¹³ Akʼa kiltik bayal ejemploetik te kʼax ta sbabial siglo te ya yakʼ schʼuun koʼtantik te ya xjuʼ kuʼuntik spasel te bintik leke. Ta lum yuʼun Corinto, ay chaʼoxtul te jaʼik j-elekʼetik-a, ay pajal antsetik o winiketik te ya sjokin sbaik ta wayele, te ya spasik antsiwej o antsinel, ya yichʼik ta mukʼ lokʼombaetik sok jyakubeletik-a. Jaʼukmeto kʼalal la snaʼbeyik sba te Jehová sok te kʼux la yaʼiyik ta yoʼtanike, la sjel te stalelik. Kʼexawik yuʼun te bintik la spasike (Romanos 6:21; 1 Corintios 6:9-11). Te jchʼuunjeletik yuʼun Roma, jaʼnix jich ay bin pajal la skʼan te la sjel te stalelike. Te Pablo jich la yal: «Ma me xawacʼ ta tuhunel yuʼun mulil te abaqʼuetalic ta spasel bintic chopol, ha me xawacʼ abahic ta stojol Dios, te bin utʼil cuxajemex loqʼuel tal ta yohlil machʼatic chamenic; ha me xawacʼ ta tuhunel yuʼun Dios te abaqʼuetalic ta spasel bintic toj» (Romanos 6:13). Te Pablo schʼuunej ta lek te ya xjuʼ yuʼun spasel te bintik leke sok te jich ya smulan te yutsil yoʼtan te Dios te maʼyuk ta jwentatik yichʼele.

14, 15. ¿Bin jojkʼoyeletik ayniwan ya jpasbey jbatik?

¹⁴ Jaʼnix jich ya xkʼax ta ora ini. Chaʼoxtul hermanoetik jich ayinem skuxlejalik-a jich bitʼil te machʼatik ayik ta Corinto. Jaʼukmeto te kʼalal la snaʼbeyik sba te Jehovae, la sjel stalelik jich la spok sbaik kʼoem. Jpisiltik ayniwan bin la jeltik ta jtaleltik swenta lek ya yilotik-a te Jehovae. Jaʼukmeto mame jkom jbatik ta yalbeyel wokol Dios ta swenta te yutsil yoʼtan te maʼyuk ta jwentatik yichʼele. ¿Bin-utʼil? Jaʼ te kʼalal ya jpastik tulan ta stsalel te bintik chopol ya skʼan te koʼtantike sok te kʼalal ya jtuuntestik te jkuxlejaltik ta abatinel ta stojol te Jehová.

¹⁵ Ta melel yame skʼan te ya jpastik tulan te manchuk ya jpastik tulan muliletik jich bitʼil la spasik te corintioetik-abi. Ma xjuʼ te yato jpastik tulan muliletik sok te yato jnoptik te jich ya yakʼbotik kiltik te yutsil yoʼtan te Jehová sok te ya spasbotik perdone. Jaʼukmeto ayniwan jich ya jojkʼoybey jbatik: «¿Bin yilel ya kiltik te mulil te ay maba tulanik skʼoplal ya yilik te yantike? ¿Kakʼojbal ta koʼtantik te ya jpastik tulan ta schʼuunbeyel smantal te Jehová ta spisil?» (Romanos 6:14, 17).

16. ¿Bin-utʼil ya yakʼ ta ilel te ejemplo yuʼun te Pablo te jaʼnix jich ya skʼan ya jpastik tulan ta maba ya jpastik te muliletik ya yal ta 1 Corintios 6:9-11?

¹⁶ Akʼa jnop kaʼiytik ta swenta te jpuk-kʼop Pablo. Jich la yalxan: «Chʼichʼ-baqʼueton, chombilon ta aʼbatinel yuʼun te mulile» (Romanos 7:14, 15). Manchukme maba yak ta spasel-a te bintik ya yal ta 1 Corintios 6:9-11, te Pablo la yal te yananix spas mulil-ae. La skʼan te lek ya x-ilot yuʼun te Diose, jich yuʼun la spas tulan swenta ya spas te bin leke (kʼopona te sjun Romanos 7:21-23). Yame skʼan te ya jtʼunbeytik stalel sok te ya jpastik tulan ta schʼuunbeyel smantal te Jehovae.

17. ¿Bin yuʼun te maba ya kaʼiytik lot te j-abatotik yuʼun te Diose?

¹⁷ Jich bitʼil, jnaʼojtik teme ya jkʼan ya x-abatinotik ta stojol te Jehová yame skʼan ya jpastik te bintik lek sok te spisiluk-ora ya kaltik te bin smelelile (kʼopona te sjun Proverbios 14:5 sok Efesios 4:25). Mame jkʼantik te jich pajalotik te bitʼil te Satanás te jaʼ te «tatil yuʼun lot». Jaʼnix jich juluk ta koʼtantik te la staik lajel-euk te Ananías sok te yinam ta skaj  te la yaʼiyik lote. Jich yuʼun te joʼotike maba ya kaʼiytik lot (Juan 8:44; Hechos 5:1-11). Jaʼukmeto te spasel te bintik leke, ma jaʼuknax te maba ya kaʼiytik lote. Teme melel te ya kaltik wokol yuʼun te yutsil yoʼtan Dios te maʼyuk ta jwentatik yichʼele, ay bayal te banti ya kakʼtik ta ilel te ya jpastik te bintik leke. Kiltik.

18, 19. ¿Bintik-a te maba ya skʼan ya jpastik swenta jich lek spisil te bintik ya jpastike?

¹⁸ Teme ya jkʼan ya jpastik te bintik leke, ay yantikxan te bin ya xjuʼ ya jpastik, ma jaʼuknax te maba ya kaʼiytik lote. Jich bitʼil, te Jehová la yalbey te israeletik: «Ma xawaʼiyic elecʼ; [ma] me xawaʼiyic lot, soc ma me talel cʼaxeluc xalotiy abahic». ¿Bin yuʼun te ma jichuk ya skʼan ya spasike? Jaʼ yuʼun te bin albotik yuʼun te Jehovae: «Chʼultesbiluquex me, como hoʼon, Jehovahon, te chʼul Dioson awuʼunique» (Levítico 19:2, 11). Manchukme maba ya jpastik lot, maba yakotik ta spasel te bintik lek teme ya kakʼtik te ay bin ya schʼuun te yantik te ma smeleliluke.

¹⁹ Jich bitʼil, jnop kaʼiytik te ay jtul winik te ya yalbey te patron yuʼun o te sjoʼtak ta aʼtel te ya skʼan te sab ya xlokʼ bael ta yaʼtel swenta ya xkʼax ta doktor. Jaʼukmeto ma jaʼuk swentail-abi. Te bin smelelile jaʼ te jajchix te  bakasion yuʼun te jich sab ya skʼan ya xlokʼ ta yaʼtel. Jaʼnax ya skʼan te ajkʼnax ya xkʼax ta farmacia o te jaʼnax ya stojbey te doktor yuʼun te kʼax ta consulta soke. ¿Yabal kaltik te smelelil-abi? ¿O yabal kaltik te laniwan skʼan spas lote? Te winik ini ay bin la yakʼbey schʼuun te yantik te ma smeleliluke. Ay baeltik te ya xloʼlaywanik te ants winiketik swenta jich ya staik te bin ya skʼanike o swenta maba ya yichʼik kastigo. Jaʼukmeto te joʼotike jaʼ ya jchʼuunbeytik skʼop te Jehová te jich ya yal: «Ma me xawaʼiyic lot». Jaʼme ya jkʼantik spasel te bintik ya yal te Dios te leke sok te bin chʼultesbile (Romanos 6:19).

20, 21. ¿Bin maba ya jpastik teme ya kaltik wokol yuʼun te yutsil yoʼtan Dios te maʼyuk ta jwentatik yichʼele?

²⁰ Jamal jnaʼojtik te maba ya kaʼiytik antsiwej o antsinel, maba ya xyakubotik sok maba ya jpastik yantik tulan mulil. Jaʼukmeto teme ya kaltik wokol yuʼun te yutsil yoʼtan Dios te maʼyuk ta jwentatik yichʼele, jaʼnix jich maba ya jpastik te bintik maba ya smulane. Jich bitʼil, ma jaʼuknax ma xyalotik ta mulil, jaʼnix jich maba ya jkʼasestik kʼajkʼal sok te bintik chopole. Ma jaʼuknax te maba ya xyakubotik, jaʼnix maba ya kuchʼtik jaʼto te kʼalal jtebxanix ya skʼan ya xyakubotike. Tulan-niwan ya kaʼiytik te sujel ta muliletik-abi, jaʼukmeto ya xjuʼ kuʼuntik te maba ya jpastike.

²¹ Jpastik tulan te bantito kʼalal ya xjuʼ kuʼuntik ta stʼunel te tsitsel yuʼun te Pabloe: «Ma me xawacʼ scuentahimbeyex abaqʼuetalic te mulil, yuʼun yac achʼuhunic spasel te bintic chopol ya smulan spasele» (Romanos 6:12; 7:18-20). Ta melel manix ya xjuʼ kuʼuntik te jkʼaxel ma jtatik mulile. Jaʼukmeto te kʼalal ya jpastik tulan te manchuk ya jpastik biluk mulil, jich ya kakʼtik ta ilel te ya kaltik bayal wokol yuʼun te yutsil yoʼtan te Jehová sok te Jesús te ma jichuk ay ta jwentatik yichʼele.

22. ¿Bin lek ya xlokʼ-a teme ya kaltik wokol yuʼun te yutsil yoʼtan Dios te maʼyuk ta jwentatik yichʼele?

²² Spasojbotik perdon te Jehová sok ya xjuʼ ya spasulan bael. Ya kalbeytik bayal wokol yuʼun te yutsil yoʼtan Dios te maʼyuk ta jwentatik yichʼele. Jpastik tulan te manchuk ya jpastik te bintik maba leke, manchukme maba chopol ya yilik stukel te yantik ants winiketike. ¿Bintik lek ya xlokʼ-a teme jich ya jpastik-abi? Te Pablo la yal: «Yoʼtic, te bin utʼil libre cʼohemex yuʼun te mulil soc te aʼbat cʼohemex yuʼun Dios, atahojic chʼultesel te ya yacʼ cuxlejal sbahtel qʼuinal» (Romanos 6:22).