«Te snaʼulanel bintic scuenta Espíritu, ha me cuxlejalil soc lamal qʼuinal»
«Te machʼatic ayic ta scuenta Espíritu, ha ay ta yoʼtanic te bin ya scʼan te Espíritu» (ROMANOS 8:5).
KʼAYOJIL 57 SOK 52
1, 2. ¿Bin yuʼun kʼax tulan skʼoplal yuʼunik te machʼatik ya xbajtʼik ta chʼulchan te kapitulo 8 yuʼun Romanos?
TE KʼALAL yorail Snaʼojibal slajel te Jesuse, laniwan jkʼopontik te Romanos 8:15-17. Te versiculoetik-abi ya yalbey skʼoplal te bin-utʼil te machʼatik tsabilik ya xbajtʼik ta chʼulchan ya snaʼik te ya xkuxinik ta sbajtʼelkʼinal ta chʼulchan. Te Romanos 8:1 ya yal ta swenta te machʼatik ya xbajtʼik ta chʼulchan jaʼik te machʼatik «ayic ta stojol te Cristo Jesús». Jaʼukmeto ¿jaʼnaxbal ta stojol te machʼatik ya xbajtʼik ta chʼulchan la yichʼ tsʼibayel te sjun Romanos? ¿Yabal xjuʼ ya skoltay-euk te machʼatik ya xkuxinik liʼ ta Balumilale?
2 Te bin la yichʼ tsʼibayel ta kapitulo 8 yuʼun Romanos jaʼ ayxan ta swenta te machʼatik tsabilik te ya xbajtʼik ta chʼulchane. Te kapitulo-abi ya yal te ya yichʼik te espiritu sok te yakik ta smaliyel «te iqʼuel ta al-nichʼan yuʼun Dios, ha te colel» yuʼun te sbakʼetalike (Romanos 8:23). Kʼalal ya xchaʼkuxajik ta chʼulchane, ya xkʼotik ta yal snichʼan Dios. Ta swenta te stojol kolele, te Jehová spasojbey perdon yuʼun smulik sok yaloj te tojike, te jich ya xjuʼ xkʼotik bitʼil alnichʼanetik yuʼun (Romanos 3:23-26; 4:25; 8:30).
3. ¿Bin yuʼun ya skʼan ya snopbeyik skʼoplal te kapitulo 8 yuʼun Romanos te machʼatik ya xkuxinik jilel liʼ ta Balumilale?
3 Ta kapitulo 4 yuʼun Romanos, te Pablo la stsʼibay ta swenta te Abraham. Te tojil winik-abi kuxin te kʼalal mato yakʼoj skuxlejal te Jesús jich bitʼil stojol jkoleltik. Manchukme maba tsabil te Abraham yuʼun ya xbajtʼ ta chʼulchan, te Jehová la yal te jaʼ tojil winik (kʼopona te sjun Romanos 4:20-22). Jaʼnix jich pajal yoʼtik, te Jehová ya xjuʼ ya yal te jaʼ tojil ants winiketik te machʼatik ya xkuxinik ta sbajtʼelkʼinal liʼ ta Balumilale. Te jchʼuunjeletik-abi jaʼnix jich ya skʼan ya snopbeyik skʼoplal te kapitulo 8 yuʼun te Romanos, melel ya xjuʼ xkoltayotik yuʼun te tsitsel yichʼoje.
4. ¿Bin ya skʼan ya jojkʼoybey jbatik te kʼalal ya jkʼopontik te Romanos 8:21?
4 Ta Romanos 8:21, te Jehová jamal ya yal te «ha nix hich te bin pasbile ya xʼacʼot ta libre yuʼun te mosohil» ta swenta te mulil sok te lajele. Jaʼ-abi ya skʼan ya yal te machʼatik ya xkuxinik ta Nichimal Kʼinal «pajal ya yichʼ yutsilal soc te al-nichʼanetic yuʼun Dios». Te kʼalal ya jkʼopontik te versiculo-abi ya skʼan ya jojkʼoybey jbatik ini: «¿Jichbal ya kaʼiy te tey ayonix-a ta yachʼil balumilale?». Kiltik te bin ya skʼan ya jpastik swenta ya xkuxinotik tey-a.
«SNAʼULANEL TE BINTIC SCUENTA CHʼICHʼ-BAQʼUET»
5. ¿Bin la yalbey skʼoplal te Pablo ta Romanos 8:4-13?
5 (Kʼopona te sjun Romanos 8:4-13). Ta kapitulo 8 yuʼun te Romanos, te Pablo la yalbey skʼoplal chaʼchajp ants winiketik. Jaʼ la yalbey skʼoplal te machʼatik «ayic ta scuenta te chʼichʼ-baqʼuet» sok te machʼatik «ayic ta scuenta Espíritu». Yaniwan kaltik te yak ta yalbeyel skʼoplal te jpuk-kʼop Pablo te machʼatik maba jchʼuunjeletik sok te machʼatik jaʼik jchʼuunjeletik. Jaʼukmeto te Pablo la stsʼibay te karta ini ta stojol te jchʼuunjeletike, te machʼatik ikʼbilik yuʼun chʼultesbil ya xkʼotik (Romanos 1:7). Jich yuʼun te machʼatik «ayic ta scuenta te chʼichʼ-baqʼuet» sok te machʼatik «ayic ta scuenta Espíritu» pajal jchʼuunjeletik-a. Jaʼukmeto, ¿banti te maba pajalike?
6, 7. 1) ¿Bintik ya skʼan ya yal te kʼopil chʼichʼbakʼet ta Biblia? 2) ¿Bin ya skʼan ya yal te kʼopil «chʼichʼ-baqʼuet» te la yalbey skʼoplal te Pablo ta Romanos 8:4-13?
6 Ta Biblia te kʼopil chʼichʼbakʼet bayal te bin ya skʼan ya yal. Ay jaʼ ya skʼan ya yal te sbakʼetal jtul ants winik (Romanos 2:28; 1 Corintios 15:39, 50). Jaʼnix jich ya skʼan ya yal te bitʼil ay machʼatik ay bin yutoj sbaike. Jich bitʼil te Biblia ya yal ta swenta te Jesús «te ha stsʼumbal David ta scuenta chʼichʼ-baqʼuet». Jaʼnix jich te Pablo jich la yal ta swenta te judioetik: «Ha te jmohlol-tsʼahquil ta scuenta chʼichʼ-baqʼuet» (Romanos 1:3; 9:3).
7 Jich yuʼun, ¿bin ya skʼan ya yal te kʼopil «chʼichʼ-baqʼuet» ta Romanos 8:4-13? Swenta ya xkʼot ta koʼtantik, kiltik te bin ya yal Romanos 7:5. Te Pablo la yal te kʼalal ay «ta scuenta chʼichʼ-baqʼuet a» sok te yantik jchʼuunjeletik kʼalal mato ochemik ta j-abat yuʼun Dios, la spasik te bin chopol ya smulan te bakʼetalil. Jich yuʼun te machʼatik ayik «ta scuenta chʼichʼ-baqʼuet» jaʼik te machʼatik ya yakʼ sbaik ta wentainel yuʼun te bin chopol ya skʼan yoʼtanik sok te ya spasik te bin ya skʼanike.
8. ¿Bin yuʼun te Pablo la sjultesbey ta yoʼtan te jchʼuunjeletik te ya xbajtʼik ta chʼulchan te manchuk ya x-ayinik «ta scuenta te chʼichʼ-baqʼuet»?
8 ¿Bin yuʼun te Pablo la sjultesbey ta yoʼtan te jchʼuunjeletik te ya xbajtʼik ta chʼulchan te manchuk ya x-ayinik «ta scuenta te chʼichʼ-baqʼuet»? Melel te j-abat yuʼun Dios ya xjuʼ ya yakʼ te jaʼ bayalxan skʼoplal ya xkʼot ta skuxlejal te bintik ya skʼan yoʼtane. Jich bitʼil te Pablo la yal te ay chaʼoxtul hermanoetik ta Roma te mosoinbilik yuʼun te bintik ya skʼan yoʼtanike. Te bin laniwan skʼan la yal jaʼ te jaʼ mukʼxan skʼoplal ta skuxlejalik te sjokinel ta wayel jtul ants winik, te weʼelil o yantikxan te bintik mulantik sba (Romanos 16:17, 18; Filipenses 3:18, 19; Judas 4, 8, 12). Ta lum Corinto, ay jtul jchʼuunjel te la sjokin sba ta wayel sok te «yihnam stat» (1 Corintios 5:1). Ta melel, te jchʼuunjeletik-abi puersa ya skʼan te ya yichʼik te jultesel oʼtanil yuʼun te Pablo te manchuk ya x-ayinik «ta scuenta te chʼichʼ-baqʼuet» (Romanos 8:5, 6). Ta ora ini, jaʼnix jich ya xtuun kuʼuntik te jultesel oʼtanil-abi.
9. ¿Bin maba ya skʼan ya yal te Romanos 8:6?
9 Te jultesel oʼtanil-abi jaʼnix jich ya skoltayotik ta kʼajkʼal ini. Jtul j-abat yuʼun Dios te yakʼoj sba ta abatinel ta stojol bayal jaʼbile ya xjuʼ te ya xjajch ayin «ta scuenta te chʼichʼ-baqʼuet». Jaʼukmeto te Romanos 8:6 maba ya skʼan ya yal te chopol skʼoplal te ya jpastik pensar ta swenta te weʼelil, aʼtelil, te bin ya jkʼasestik kʼajkʼal-ae o te ay machʼa ya jmulan jbatik soke. Stalel te jich ya jnoptik sok te ya jpastik ta jkuxlejaltik-abi. Te Jesús jaʼnix jich la smulan weʼel sok ay la smakʼlin bayal ta tul ants winiketik. Sok ay baeltik la skʼan te ya skux yoʼtane. Jaʼnix jich te Pablo la yal te tulan skʼoplal te ya sjokin sbaik ta wayel te machʼatik nujpunemike.
¿Bin-a te ya jmulantikxan yalbeyel skʼoplale? (Ilawil te parrafo 10 sok 11).
10. ¿Bin ya skʼan ya yal ta swenta te «snaʼulanel te bintic scuenta chʼichʼ-baqʼuet»?
10 ¿Bin la skʼan la yal te Pablo ta swenta te «snaʼulanel te bintic scuenta chʼichʼ-baqʼuet»? Jaʼ la yalbey skʼoplal te kʼalal jaʼ ya xbajtʼ jpensartik sok te bintik ya jnoptik spasel ta swenta te bin ya jkʼantike. Jtul te machʼa ya stʼunbey skʼoplal te Biblia la yal ta swenta te kʼopil-abi te jaʼ snitojbey sba skʼoplal sok te machʼatik ya xbikʼtaj yoʼtanik ta spasel te bin ya skʼan yoʼtanik sok te spisil-ora jaʼ ya yalbeyik skʼoplal. Te bin ya skʼan yoʼtanike jaʼ te bin mukʼxan skʼoplal ya yilik sok ta patil ya yichʼik mosoinel yuʼun te bin ya skʼan yoʼtanike.
11. ¿Bintik-a te mukʼxan skʼoplal ya xjuʼ xkʼot kuʼuntike?
11 Te jchʼuunjeletik yuʼun Roma la skʼan te ya yilik bin-utʼil ayik, jich ya snaʼik bintik-a te mukʼxan skʼoplal ta yoʼtanik. ¿Jaʼbal te «bintic scuenta chʼichʼ-baqʼuet»? Jaʼnix jich te joʼotike ya skʼan ya kiltik bin-a te mukʼxan skʼoplal kuʼuntik. ¿Bintik-a te mukʼxan skʼoplal ya xjuʼ xkʼot kuʼuntike? Swenta ya jnaʼtik, akʼa jojkʼoybey jbatik ini: «¿Bin-a te ya jmulanxan yalbeyel skʼoplale? ¿Bin-a te ya jmulanxan spasele?». Ay chaʼoxtul te ya xkʼot ta naʼel yuʼunik te spisil-ora yakik ta snopilanel te ya skʼan ya spasik prueba bayal ta chajp vino, chʼalel snaik, smanel kʼuʼul pakʼal, yilel bin-utʼil ya stuuntesik ta lek te stakʼinike o schapel te banti ya xbajtʼik ta bakasion. 1 Timoteo 5:23; Juan 2:3-11). Jaʼukmeto te vino ma jaʼuk te bin mukʼxan skʼoplal yuʼunik. ¿Jaxan te joʼotike? ¿Bin-a te mukʼxan skʼoplal ta jkuxlejaltike?
Spisil-abi maba chopol skʼoplal. Stalel te jichniwan ya jnoptike. Ta swenta te vinoe, juluk ta koʼtantik cheb ejemploetik. Te Jesús la skʼatpʼun ta vino te jaʼ ta jun nujpunel. Jaʼnix jich te Pablo la yalbey te Timoteo te akʼa yuchʼ «jtebuc vino» swenta ya xlekub yuʼun te schamele (12, 13. ¿Bin yuʼun ya skʼan ya kiltik ta lek bin-a te mukʼxan skʼoplal ta jkuxlejaltike?
12 ¿Bin yuʼun te ya skʼan ya kiltik ta lek bin-a te mukʼxan skʼoplal ta jkuxlejaltike? Te Pablo la yal: «Te snaʼulanel te bintic scuenta chʼichʼ-baqʼuet, ha ya xʼacʼotic ta lajel yuʼun» (Romanos 8:6). Teme ya x-ayinotik «ta scuenta te chʼichʼ-baqʼuet» ya xjuʼ xchʼay kuʼuntik ta ora ini te bitʼil lek kamigoinej jbatik sok te Diose sok ya xjuʼ xchʼay kuʼuntik te jkuxlejaltik ta pajel chaʼbeje. Jaʼukmeto ay bin ya xjuʼ ya jpastik swenta ma jichuk ya xkʼot ta pasel. Jpisiltik ya xjuʼ ya jeltik te jtaleltike. ¿Yatobal xjul ta koʼtantik te mulwej winik yuʼun te lum Corinto te la yichʼ lokʼesel ta kongregasione? La sjel te stalele, Maba la spasix te bin chopol ya skʼan yoʼtane, jich maʼyukix yabakul te bitʼil abatin yan buelta ta stojol te Jehovae (2 Corintios 2:6-8).
13 Manchukme te winik-abi kʼax tulan te mulil la spas te bitʼil ay «ta scuenta te chʼichʼ-baqʼuet», la sjeltay te stalele. Jaʼ yuʼun teme ay jtul j-abat yuʼun Dios jajch spas te bin chopol ya skʼan yoʼtan te ma jaʼukix ya stʼun te mantaliletik yuʼun te Jehovae, jaʼnix jich ya xjuʼ ya sjel stalel. Te ya snaʼulan ta yoʼtan te bin la yal te Pablo ya xjuʼ x-akʼbot yip te bantito kʼalal ya skʼan swenta ya stojobtes te stalele.
«SNAʼULANEL BINTIC SCUENTA ESPÍRITU»
14, 15. 1) ¿Bintik-a te ya skʼan ya jnaʼulantike? 2) ¿Bin maba ya skʼan ya yal te «snaʼulanel bintic scuenta Espíritu»?
14 Patil te kʼalal la yalbey skʼoplal te bintik chopol ya xlokʼ ta «snaʼulanel te bintic scuenta chʼichʼ-baqʼuet», te Pablo la yal: «Snaʼulanel bintic scuenta Espíritu, ha me cuxlejalil soc lamal qʼuinal». Ta melel, jaʼ jun tʼujbil majtʼanil-abi.
15 Jaʼukmeto «snaʼulanel bintic scuenta Espíritu» maba ya skʼan ya yal te spisil-ora ya skʼan ya jpastik pensar ta swenta te Jehová sok te Biblia sok te jaʼnax ya kalbeytik skʼoplalike. Jaʼnix jich te j-abatetik yuʼun Dios ya spasik te bin stalel ya yichʼ pasel ta kuxlejalile. Jich bitʼil, te jchʼuunjeletik ta sbabial siglo ya xweʼ uchʼik-a, ya xnujpunik, ayin sfamiliaik sok ya x-aʼtejik-a (Marcos 6:3; 1 Tesalonicenses 2:9).
16. ¿Bin-a te mukʼxan skʼoplal la yil ta skuxlejal te Pabloe?
16 Jaʼukmeto te Pablo sok te yantik jchʼuunjeletik ta sbabial siglo ma jaʼuk mukʼxan skʼoplal kʼot ta skuxlejalik-abi. Jich bitʼil, jnaʼojtik te Pablo aʼtej ta spasel nail pakʼ. Jaʼukmeto ma jaʼuk mukʼxan skʼoplal la yil te yaʼtele. Te bin mukʼxan skʼoplal la yil te Pablo jaʼ te ya x-abatin ta stojol te Diose. Jaʼ baem yoʼtan-a ta scholel skʼop Dios sok ta nojpteswanej (kʼopona te sjun Hechos 18:2-4; 20:20, 21, 34, 35). Te hermanoetik yuʼun te Roma la skʼan te ya stʼunbeyik stalel te Pablo, jaʼnix jich ya skʼan ya jpastik te joʼotike (Romanos 15:15, 16).
17. ¿Bin lekilal ya jtatik teme jaʼ ya xbajtʼ ta koʼtantik «snaʼulanel bintic scuenta Espíritu»?
17 ¿Bintik lekilal ya jtatik teme jaʼ ya xbajtʼ ta koʼtantik «snaʼulanel bintic scuenta Espíritu»? Te Romanos 8:6 ya yal: «Snaʼulanel bintic scuenta Espíritu, ha me cuxlejalil soc lamal qʼuinal». Te kʼopil-abi ya skʼan ya yal te ya kakʼtik te jaʼ ya stojobtes jpensartik te Jehová ta swenta te schʼul espiritu sok te ya kakʼtik te pajaluk te jpensartik soke. Te Dios ya yal ta jamal te ya yakʼ te tseʼeluk koʼtantik ta jkuxlejaltik ta ora ini sok ta pajel chaʼbej.
18. ¿Bintik-utʼil ya xjuʼ ya jtatik lamalkʼinal teme jaʼ ya xbajtʼ ta koʼtantik «snaʼulanel bintic scuenta Espíritu»?
18 Te Pablo jaʼnix jich la yal te «snaʼulanel bintic scuenta Espíritu» ya yakʼbotik lamalkʼinal. Ta jpisiltik ya jkʼantik lamalkʼinal kaʼiytik, jaʼ ya jkʼantikxan te lamal-oʼtanile. Jaʼukmeto chaʼoxtulnax te machʼatik ya staike. ¿Bintik-utʼil ya xjuʼ ya jtatik lamalkʼinal teme jaʼ ya xbajtʼ ta koʼtantik «snaʼulanel bintic scuenta Espíritu»? Wokol yal Jehová ta jpisiltik ya xjuʼ x-ayin lamal-oʼtanil kuʼuntik. Jaʼnix jich ya xjuʼ jmulantik lamalil kʼinal sok jfamiliatik soknix yantik hermanoetik. Jich bitʼil maba tojotik ta kʼinale, ay baeltik te ya xjajch kʼop kuʼuntik sok te kermanotaktike. Te kʼalal jich ya xkʼaxe, jaʼ ya jtʼuntik te tsitsel la yakʼ te Jesús te jich ya yal: «Neel xba achajban soc te awermanoe» (Mateo 5:24, XCD). Juluk ta koʼtantik te jaʼnix jich te kermanotaktik ya x-abatinik ta stojol Jehová, «te Dios yuʼun lamal qʼuinal» (Romanos 15:33; 16:20).
19. ¿Bin lamalil kʼinal te bayal yutsil ya xjuʼ ya jmulantik?
19 Teme jaʼ ya xbajtʼ ta koʼtantik «snaʼulanel bintic scuenta Espíritu», jaʼnix jich ya jtatik te lamalil kʼinal te bayal yutsile, jaʼ te lamalnax koʼtantik ayotik sok te Diose. Te j-alwanej Isaías la yal te ya skanantay Jehová te machʼatik jkʼaxel ya yakʼ smukʼul yoʼtanik ta stojol sok ya x-akʼbotik lamalil kʼinal te maʼyuk bin-ora ya xlaje (Isaías 26:3; kʼopona te sjun Romanos 5:1).
20. ¿Bin majtʼanil ya jtatik teme ya jtʼuntik spasel te tsitsel yuʼun te kapitulo 8 yuʼun Romanos?
20 Chikan teme jaʼ yakotik ta smaliyel te ya xkuxinotik sbajtʼelkʼinal ta chʼulchan o ta Balumilal, ta jpisiltik ya xjuʼ ya jta jlekilaltik ta swenta te tsitsel yuʼun te kapitulo 8 yuʼun Romanos. Ya kaltik wokol yuʼun te ya skoltayotik te Biblia swenta jaʼ ya xbajtʼ ta koʼtantik te abatinel ta stojol Jehová, ma jaʼuk spasel te bin ya skʼan koʼtantike. Teme jaʼ ya xbajtʼ ta koʼtantik «snaʼulanel bintic scuenta Espíritu», yame xjuʼ ya jtatik te tʼujbil majtʼanil ini: «Cuxlejal sbahtel qʼuinal ta scuenta te Cajwaltic Cristo Jesús» (Romanos 6:23).