Te stojol kolel jaʼ kʼax «lequil mahtanil» la yakʼ te Tatile
«Spisil te bin lec aʼbibilotic soc spisil lequil mahtanil talem [...] ta stojol te Tatil» (SANTIAGO 1:17).
KʼAYOJIL 148 SOK 109
1. ¿Bin lekilaletik ya yakʼ te stojol kolele?
TA SWENTA te la yakʼ sba ta lajel te Jesucristo ya xjuʼ ya jtatik bayal bendision. Jich bitʼil, ya yakʼ te ay bin-ora ya xjuʼ xchaʼochik ta sfamilia Dios te yal snichʼnab te Adán te ya smulanik te bin toj ta pasele (ilawil te recuadro «¿Bin ya skʼan ya yal?»). Te stojol kolele jaʼnix jich ya yakʼ te ya xjuʼ xkuxinotik sok stseʼelil koʼtantik ta sbajtʼelkʼinal. Jaʼukmeto te stojol kolel bayalxan bin smakojbey skʼoplal. Snitojbey sba skʼoplal sok te bintik kʼoemik ta pasel te mukʼ skʼoplal yuʼunik spisil te machʼatik ayik ta chʼulchan sok ta Balumilale (Hebreos 1:8, 9).
2. 1) ¿Bintik-a te mukʼ skʼoplal ta swenta te chʼulchan sok te Balumilal la yal te Jesús ta skʼoponel Dios? (Ilawil te lokʼomba ta sjajchibal te articulo). 2) ¿Bin ya kilbeytik skʼoplal ta articulo ini?
2 Aytoniwan ya skʼan cheb jaʼbil ya xlaj-a te Jesús, la yakʼtiklanbey snop te jnopojeletik yuʼun bin-utʼil ya skʼoponik Dios, jich ini: «Jtatic te ayat ta chʼulchan, acʼa ichʼotuc ta mucʼ [o chʼultesel] achʼul bihil. Acʼa taluc te cuentahinel awuʼun; acʼa yichʼ pasel ta bahlumilal te bin ya scʼan awoʼtan, hich te bin utʼil yac ta pasel ta chʼulchan» (Mateo 6:9, 10). Ta articulo ini ya kiltik bin-utʼil snitojbey sba skʼoplal te stojol kolel sok te bitʼil ya yichʼ chʼultesel sbiil te Jehová, te Ajwalinel yuʼun Dios sok te ya xkʼot ta pasel te skʼanojel yoʼtan te Diose.
AKʼA YICHʼ CHʼULTESEL TE ABIILE
3. 1) ¿Machʼanix ya yalbey skʼoplal te sbiil te Diose? 2) ¿Bin-utʼil la sbolkʼoptaybey sbiil Jehová te Satanase?
3 Te bin sbabial la skʼan ta skʼoponel Dios te Jesús jaʼ te ya yichʼ chʼultesel sbiil te Diose. Te bin ya skʼan ya yal-abi, jaʼ te la skʼan te akʼa ichʼotuk ta mukʼ te sbiil Dios melel chʼultesbil. Te biilil-abi jaʼnix skʼoplal te Jehová sok ya yakʼ ta naʼel bin yilel te stalele. Jaʼ te Machʼa kʼax bayal yuʼel sok te kʼax toj ta chʼulchan sok ta Balumilal. Te Jesús jich la yal ta stojol te Jehová: «Jchʼul Tat» (Juan 17:11). Jich bitʼil chʼul Dios te Jehová, spisil te bin ya spas chʼultesbil, jaʼnix jich te leyetik yuʼune. Jaʼukmeto ta tsʼumbil kʼinal Edén te Satanás la sle ta lek bin-utʼil la yal ta stojol Dios te maʼyuk ta swenta yakʼel leyetik ta stojol te ants winiketike. La yal lotil ta stojol te Jehová sok la sbolkʼoptaybey sbiil o la sbolobtesbey skʼoplal (Génesis 3:1-5).
4. ¿Bin-utʼil la schʼultes Jesús sbiil te Diose?
4 Te Jesús bayal skʼoplal ta yoʼtan te sbiil te Jehová, ma jichuk bitʼil te Satanase. Jaʼ yuʼun te Jesús la spas te bantito kʼalal juʼ yuʼun ta schʼultesbeyel sbiil te Diose (Juan 17:25, 26). ¿Bin-utʼil la schʼultes? Jaʼ ta swenta te bin la spas sok te bin la yakʼ ta nopele. Jaʼ jich la skoltay te yantik ta yilel te tojik te mantaliletik yuʼun Jehová sok te jaʼ ta swenta jlekilaltik spisil te bin ya skʼanbotik te ya jpastike (kʼopona te sjun Salmo 40:8-10). Te Jesús jun yoʼtan la yakʼ sba manchukme te Satanás la yakʼbey tulan wokol te bitʼil laje. Te Jesús la yakʼ ta ilel te bitʼil jtul tojil winik ya xjuʼ ya schʼuunbey ta tsʼakal te skʼop Jehová.
5. ¿Bin-utʼil ya xjuʼ ya jchʼultesbeytik sbiil te Jehovae?
5 Jaxan te joʼotike, ¿bin-utʼil ya kakʼtik ta ilel te ay skʼoplal ta koʼtantik te sbiil te Jehovae? Jaʼ ta swenta te bin ya jpastike. Te Jehová ya skʼan te chʼultesbilukotik (kʼopona te 1 Pedro 1:15, 16). Jaʼ yuʼun jaʼnax stukel ya kichʼtik ta mukʼ sok ya jchʼuunbeytik skʼop sok spisil koʼtantik. Manchukme ya kichʼtik nutsele, ya jpastik tulan ta spasel ta jkuxlejaltik te bin ya yakʼ jnoptik te Jehová. Kʼalal ya jchʼuuntik spasel te mantaliletik yuʼune, ya kalbeytik yutsil skʼoplal te sbiile (Mateo 5:14-16). Jaʼnix jich ya kakʼtik ta ilel te lek te leyetik yuʼune sok te jaʼ jpaslot te Satanase. Ta melel, ay ya xchʼayotik, melel maba tojil ants winikotik. Jaʼukmeto, ya sujtes koʼtantik sok ya jpastik tulan ta spʼajel spisil te bin ya xjuʼ ya yakʼ ta bolkʼoptayel te sbiil te Jehová (Salmo 79:9).
6. ¿Bin yuʼun te Jehová ya xjuʼ ya yal te tojotik manchukme jmulawilotik?
6 Chikan teme tsabilotik swenta ya xbootik ta chʼulchan o tey ochem jkʼoplaltik ta «yantic tuminchijetic», te Jehová ya spasbotik perdon yuʼun jmultik teme ya kakʼtik schʼuunel koʼtantik ta swenta te stojol kolele. Te Jehová lek ya yil te ya x-ichʼot ta mukʼ yuʼun te machʼatik ya yakʼ sbaik ta abatinel ta stojol. Ya yal te tojik te machʼatik tsabilik ya xbajtʼik ta chʼulchan sok ya yikʼtiklan ta stojol jich bitʼil snichʼnab. Jaʼnix jich ya yal te tojik-euk te «yantic tuminchijetic» sok ya yikʼtiklan ta stojol jich bitʼil yamigotak (Juan 10:16; Romanos 5:1, 2; Santiago 2:21-25). Ta swenta te stojol kolele, jaʼnix jich ta ora ini ya xjuʼ te lek ya x-ayinotik ta stojol te jTatik sok te ya jchʼultesbeytik te sbiile.
«ACʼA TALUC TE CUENTAHINEL AWUʼUN»
7. ¿Bin bendisionetik ya yakʼ te Ajwalinel yuʼun Dios ta swenta te stojol kolele?
7 Kʼalal la yakʼ ta nopel te Jesús bin-utʼil ta skʼoponel Dios, jich la yal: «Acʼa taluc te cuentahinel awuʼun». ¿Bin-utʼil snitojbey sba skʼoplal te stojol kolel sok te wentainel, o Ajwalinele? Jnaʼojtik te machʼatik ya x-aʼtejik ta Ajwalinel yuʼun te Diose, jaʼ te Jesús sok te 144,000 te la yichʼik tsael ta yolil te ants winiketike. Te stojol kolel ya yakʼ te ya yichʼik chaʼkuxajtesel swenta ya xkuxinik ta chʼulchan (Apocalipsis 5:9, 10; 14:1). Tey ya x-ochik ta ajwalil, sacerdoteil sok ya xmantalteswanik ta stojol te Balumilal sok te Jesús ta 1,000 jaʼbil. Ta yorail-abi te Jehová ya stuuntes te mantaltesel yuʼune swenta ya skʼatpʼun ta nichimal kʼinal te Balumilal sok ya skoltay te ants winiketik swenta toj ya xkʼotik. Jaʼto-abi, te j-abatetik yuʼun te Jehová te ayik ta chʼulchan sok ta Balumilal jun-nax familia ya xkʼotik (Apocalipsis 5:13; 20:6). Te Jesús ya slajin te Satanás sok ya slajin spisil te wokolil yakʼoje (Génesis 3:15).
8. 1) ¿Bin-utʼil la skoltay Jesús te jnopojeletik yuʼun te yakuk xkʼot ta yoʼtanik te tulan skʼoplal te Ajwalinel yuʼun te Diose? 2) ¿Bin-utʼil ya kakʼtik ta ilel te ya jkoltaybeytik skʼoplal te Ajwalinel yuʼun te Diose?
Lucas 4:43). Soknix la yalbey te jnopojeletik yuʼun te ya skʼan ya xbajtʼik «cʼalal ta stiʼil bahlumilal» swenta testigo ya xkʼotik yuʼun (Hechos 1:6-8). Ta ora ini, ta swenta te scholel skʼop Dios te ants winiketik ya xjuʼ ya snopbeyik skʼoplal te stojol kolel sok ya xjuʼ te ya yichʼik wentainel yuʼun te Ajwalinel yuʼun te Diose. Te joʼotik ya kakʼtik ta ilel te jun koʼtantik ta stojol te Ajwalinel kʼalal ya jkoltaytik te machʼatik ya xbajtʼik ta chʼulchan ta scholel te lek yachʼil kʼop ta swolol Balumilal (Mateo 24:14; 25:40).
8 Te Jesús la skoltay te jnopojeletik yuʼun te yakuk xkʼot ta yoʼtanik te kʼax tulan skʼoplal te Ajwalinel yuʼun te Diose. ¿Bin-utʼil la spas? Kʼalal la yichʼ jaʼ, oranax jajch schol ta bayuk «te lec yachʼil cʼop scʼoblal te cuentahinel yuʼun Dios» («ACʼA YICHʼ PASEL TA BAHLUMILAL TE BIN YA SCʼAN AWOʼTAN»
9. ¿Bin yuʼun ya xjuʼ smukʼulin koʼtantik te ya xkʼot ta pasel te skʼanojel yoʼtan te Dios ta stojol te ants winiketike?
9 Kʼalal la yakʼ ta nopel te Jesús bin-utʼil ta skʼoponel Dios, jaʼnix jich la yal: «Acʼa yichʼ pasel ta bahlumilal te bin ya scʼan awoʼtan». ¿Bin la skʼan la yal? Jaʼ te bitʼil te kʼalal te Jehová ya yal te ay bin ya xkʼot ta pasele, yuʼun-nanix jich ya xkʼot ta pasel-a (Isaías 55:11). Manchukme te Satanás la skontrain te Jehová, maba juʼem yuʼun sjelonel te skʼanojel yoʼtan te Jehovae. ¿Bin-a te skʼanojel yoʼtan Dios ta swenta te Balumilal-ae? Jaʼ te ya xnoj ta stojil yal snichʼnab te Adán sok te Evae (Génesis 1:28). Te manchuk alnichʼnajik te Adán sok te Eva te kʼalal lajik baele, maba noj ta yal snichʼnabik te Balumilal jich bitʼil snopoj-a te Diose. Jaʼ yuʼun te Jehová la yakʼ te alnichʼnajike. Ta swenta te stojol kolele ya xjuʼ xkʼotik ta tojil ants winiketik sok ya xjuʼ xkuxinik ta sbajtʼelkʼinal te machʼatik ya yakʼik ta ilel te ay schʼuunel yoʼtanik. Te Jehová kʼuxotik ta yoʼtan sok ya skʼan te ya jtatik te tʼujbil kuxlejalil jich bitʼil skʼanoj ta sjajchibale.
10. ¿Bin lekilal ya staik ta swenta te stojol kolel te ants winiketik te lajemike?
10 Bayal ta mil miyonetik ants winiketik te lajemike maba juʼ la snaʼbeyik sba te Jehová. ¿Bin ya xkʼot ta pasel ta stojolik? Jich bitʼil ya skʼan te Jehová te ya xkuxinik te ants winiketik, ya schaʼkuxajtes te machʼatik lajemikixe. Te chaʼkuxajel jaʼnax ya xkʼot ta pasel ta swenta te stojol kolele. Kʼalal ya xchaʼkuxajik tal te ants winiketike, yame xjuʼ ya snaʼbeyik sba te Jehová sok te ya xkuxinik ta sbajtʼelkʼinal (Hechos 24:15). Jich bitʼil te Jehová jaʼ J-akʼ-kuxlejalil, yame xkʼot ta Tatil yuʼun te machʼatik ya xchaʼkuxajike (Salmo 36:9). Jaʼ yuʼun te Jesús la yal te kʼalal nojpteswan bin-utʼil ta skʼoponel Dios te jaʼ jTatik te Jehová te ay «ta chʼulchan» (Mateo 6:9). Te Jehová yakʼojbey ta skʼab te Jesús te tulan aʼtelil ta schaʼkuxajtesel te machʼatik lajemike, jaʼ yuʼun te Jesús la yal: «Hoʼon te chaʼcuxajelon soc hoʼon te cuxlejalone» (Juan 6:40, 44; 11:25).
11. ¿Bin-a te skʼanojel yoʼtan Dios ta swenta te «ipal ants winiketik»?
11 Te Jesús jaʼnix jich la yal: «Spisil machʼa ya spas te bin ya scʼan yoʼtan te Diose, ha jnan soc ha quihtsʼin cʼohem» (Marcos 3:35). Jaʼ skʼanojel yoʼtan Dios te spisil ants winiketik te talemik ta spisil nasion, tsʼumbalil sok kʼopil ya x-ichʼot ta mukʼ yuʼune. Te Biblia ya yal te jaʼik te «ipal ants winiketik» te maʼyuk machʼa ya xjuʼ ya yajtay. Ay schʼuunel yoʼtanik ta swenta te stojol kolel sok ya skʼan ya schʼuunbeyik skʼop te Diose. Jaʼnix jich ya yutsil kʼoptayik sok jich ya yalik: «Ay colel ta scuenta te Dios cuʼuntic te hucul ta mucʼul-huctajibal, soc ta scuenta te Jcolel Tuminchij» (Apocalipsis 7:9, TNM; 7:10).
12. Te skʼoponel Dios te la yakʼ ta nopel te Jesuse, ¿bin ya yakʼ ta nopel ta swenta te skʼanojel yoʼtan te Jehová ta stojol te ants winiketike?
12 Te skʼoponel Dios te la yakʼ ta nopel te Jesuse, bayal bintik ya snojptesotik ta swenta te Jehová sok ta swenta te skʼanojel yoʼtan ta stojol te ants winiketike. Te bin sbabial ya jnoptike, jaʼ te ya skʼan ya jpastik te bantito kʼalal ya xjuʼ kuʼuntik ta schʼultesbeyel sbiil te Dios sok ta yichʼel ta mukʼ (Isaías 8:13). Te stojol kolele ya yakʼ jtatik jkoleltik sok ya yakʼ ta ichʼel ta mukʼ sbiil te Diose. Ta melel te sbiil te Jesús ya skʼan ya yal: «Jaʼ Kolel te Jehová». Ta schebal, ya jnoptik te ya stuuntes Jehová te Ajwalinel yuʼun swenta ya yakʼbey yichʼ te ants winiketik te ya schʼuunik mantal spisil te lekilal ya yakʼ te stojol kolele. Ta yoxebal, ya jnoptik te maʼyuk bin ya xjuʼ ya smak te ya xkʼot ta pasel te skʼanojel yoʼtan te Jehovae (Salmo 135:6; Isaías 46:9, 10).
KALTIK WOKOL YUʼUN TE STOJOL KOLELE
13. ¿Bin yuʼun te la kichʼtik jaʼe?
13 Jun te bitʼil tulan skʼoplal te ya kakʼtik ta ilel te ya kaltik wokol yuʼun te stojol kolele, jaʼ te ya kakʼ jbatik ta abatinel ta stojol Jehová sok te ya kichʼtik jaʼ. Jich ya kakʼtik ta ilel te ay schʼuunel koʼtantik ta swenta te stojol kolele sok te «ha yuʼunotic te Cajwaltique [Jehová]» (Romanos 14:8). Jaʼnix jich ta swenta te ichʼ-jaʼe ya jkʼanbeytik te Jehová te «mayuc bin ya yalbotic te coʼtantique» (1 Pedro 3:21). Te Dios jich ya yakʼ ta ilel te ya yichʼ ta wenta te bin ya jkʼanbeytik te kʼalal ya yakʼbotik te bendisionetik te ya yakʼ te stojol kolele. Jaʼ yuʼun schʼuunej ta lek koʼtantik te ya yakʼbotik spisil te bin jamal yaloje (Romanos 8:32).
¿Bin-utʼil ya kakʼtik ta ilel te ya kaltik wokol yuʼun te stojol kolele? (Ilawil te parrafo 13 sok 14).
14. ¿Bin yuʼun ya yalbotik ta mantal Dios te kʼuxuk ta koʼtantik te yantike?
14 Spisil te bin ya spas te Jehová, jaʼ ta skaj te skʼuxul yoʼtan. Jaʼ ya skʼan te ya xkʼayinbot stalel yuʼun te machʼatik ya x-ichʼot ta mukʼ yuʼune sok te talel kʼaxel kʼuxuk ya yaʼiy sbaik (1 Juan 4:8-11). Te kʼalal kʼux ya kaʼiytik te ants winiketik, jamal ya kakʼtik ta ilel te ya jkʼantik te ya xkʼootik ta alnichʼanil yuʼun jTatik te ay ta chʼulchan (Mateo 5:43-48). Ta Biblia, te mantalil te tulanxan skʼoplale jaʼ te kʼuxuk ta koʼtantik te Jehovae. Jaʼukmeto te schebal mantalil, jaʼ te kʼuxuk ta koʼtantik te yantike (Mateo 22:37-40). Jun te bitʼil ya kakʼtik ta ilel te kʼux ta koʼtantik te ants winiketik, jaʼ te kʼalal ya jcholbeytik yaʼiyik te lek yachʼil kʼop ta swenta te Ajwalinele. Teme ya jchʼuuntik te mantalil yuʼun Dios te kʼuxuk ta koʼtantik te yantike, kʼaxemtoxan-a te kermanotaktike jich «tsʼacal» ya xkʼot te skʼuxul koʼtantik ta stojole (1 Juan 4:12, 20).
YA KICHʼTIK BENDISIONETIK TA SWENTA TE STOJOL KOLELE
15. 1) ¿Bin bendisionetik ya kichʼtik akʼbeyel yuʼun Jehová ta ora ini? 2) ¿Bin bendisionetik ya kichʼtik akʼbeyel ta pajel chaʼbej?
15 Te Jehová jamal ya yalbotik te ya xjuʼ «ya yichʼ tupʼel» te jmultik teme ay schʼuunel koʼtantik ta swenta te stojol kolele. Jaʼ-abi ya skʼan ya yal te ya xjuʼ ya stupʼ ta jkʼaxel te jmultike (kʼopona te sjun Hechos 3:19-21). Jich bitʼil la kiltikix ta nail, ta swenta te stojol kolel te Jehová ya yakʼ xkʼot ta yal snichʼnab chaʼoxtul ants winiketik swenta ya xkuxinik ta chʼulchan. Jaʼik-abi te machʼatik tsabilik yuʼun ya xbajtʼik ta chʼulchan (Romanos 8:15-17). Jaʼnix jich te Jehová ya yikʼ te «yantic tuminchijetic» te yakuk x-ochik ta sfamilia liʼ ta Balumilal. Te kʼalal tojikix-ae, yato sitintay sbaik sok slajibal prueba. Teme jun yoʼtan ya yakʼ sbaik ta stojol te Jehová, jaʼnix jich ya xkʼotik ta yal snichʼnab (Romanos 8:20, 21; Apocalipsis 20:7-9). Te Jehová ta sbajtʼelkʼinal kʼux ya xbajtʼ yaʼiy ta yoʼtan te yal snichʼnabe. Ta swenta te stojol kolele, yato kichʼtikxan bendisionetik ta sbajtʼelkʼinal (Hebreos 9:12). Jaʼnix te Jehová yakʼojbotik te majtʼanil ini te mukʼ skʼoplale, maʼyuk machʼa ya xjuʼ ya spojbotik.
16. ¿Bin-utʼil ya yakʼotik ta libre te stojol kolele?
16 Teme ya sujtes koʼtantik ta swenta te jmultike, te Pukuj maʼyuk bin ya xjuʼ ya spas swenta ya smakotik yuʼun ma x-ochotik ta sfamilia te Jehová. Te Jesús «jmehl nax xtaluc yacʼ sba ta lajel». Jaʼ-abi ya skʼan ya yal te ma puersaukix te ya yichʼ tojel yan buelta te stojol kolele (Hebreos 9:24-26). Te Adán la skʼasesbotik jilel te lajele, yan stukel te slajel te Jesús ya yakʼbotik te kuxlejalil ta sbajtʼelkʼinal. Te stojol kolel ya xjuʼ ya yakʼotik ta libre ta swenta te bintik yuʼun te Satanás sok ya yakʼ te ma jxiʼtikix te lajele (Hebreos 2:14, 15).
17. ¿Bin yaʼiyel ya kaʼiy jbatik kʼalal ya jnop ta koʼtantik te kʼax kʼuxotik ta yoʼtan te Jehovae?
17 Ya xjuʼ ya jchʼuuntik ta spisil koʼtantik te yananix xkʼot ta pasel te bintik jamal yaloj Jehová te ya spase. Jich bitʼil maʼyuk bin-ora ya xjelon te leyetik te ya swentain te bin-utʼil ya x-aʼtej te bintik pastiklanbil, jaʼnix jich maʼyuk bin-ora ya xjelon stukel. Maʼyuk bin-ora ya yakʼ xchebaj koʼtantik ta swenta te ma xkʼot ta pasel te bin ya yalbotike (Malaquías 3:6). Ma jaʼuknax ya yakʼbotik ta majtʼanil te kuxlejalile, jaʼnix jich ya yakʼbotik te skʼuxul yoʼtane. «Jich jnaʼojtic stojol, soc xchʼuunej coʼtantic te cʼuxotic ta yoʼtan te Diose. Jaʼ Jcʼuxul-oʼtanil te Diose» (1 Juan 4:16, XCD). Jich bitʼil te Jehová spisil-ora ya xkʼot ta pasel yuʼun te bin jamal yaloje, nopolixme ya xpastaj ta jun tʼujbil nichimal kʼinal te Balumilale. Spisil te ants winiketik yame slokʼtaybeyik stalel te Jehová sok talel kʼaxel kʼux ya yaʼiy sbaik. Te kʼalal jich ya xkʼot-abi, spisil te j-abatetik yuʼun Dios te ayik ta chʼulchan sok ta Balumilal yame yutsil kʼoptayik sok jich ya yalbeyik: «Acʼa yichʼ halbeyel yutsil scʼoblal, acʼa yichʼ yutsilal, pʼijil-oʼtanil, halbeyel wocol, yichʼel ta mucʼ, yuʼel soc yip te Dios cuʼuntic ta scuenta sbahtel qʼuinal. ¡Hichuc!» (Apocalipsis 7:12).