Ta skaj te maba lajem te Bibliae, ta ora ini ya xjuʼ ya ata jpajkuk sok ya xjuʼ ya akʼopon. Kʼalal ya atsa junuk te banti lek kʼasesbil te Escrituras ya xjuʼ schʼuun lek awoʼtan te yakat ta skʼoponel te bin lek kʼasesbil te lokʼtaybil ta junetik te la yichʼ tsʼibayel ta namey kʼinale. * Manchukme ay lajik te banti yichʼoj tsʼibayel te Biblia, yichʼoj kontrainel sok ay sjeltayojik te bintik ya yale, ¿bin yuʼun te maba lajeme? ¿Bin yuʼun te tulan skʼoplal te libro ini?

Bayal te machʼatik ya snopik te Biblia pajal kʼoem ta yoʼtanik te bitʼil te jpuk-kʼop Pablo te jich la yal: «Spisil te bila tsʼibubil ta Sjun te Diose, loqʼuem tel ta yoʼtan te Diose» (2 Timoteo 3:16, XCD). Schʼuunej yoʼtanik te maba yichʼoj lajinel te Biblia ta skaj te jaʼnix sKʼop Dios sok te jaʼnix yakʼoj te ayuk kuʼuntik ta ora ini. Te Faizal te la kalbeytik skʼoplal ta sbabial articuloe, la spas tulan ta snopel te Biblia yuʼun jich maba ya xchebajix yoʼtan ta stojol-a. Chamnax la yaʼiy yuʼun te bin la snope, melel oranax la yil te ay bayal te bintik ya yakʼ ta nopel te yantik relijionetik te ma jichuk ya yakʼ ta nopel te Bibliae. Jaʼnix jich tijbot yoʼtan kʼalal la snop te bin-a te skʼanojel yoʼtan Dios ta swenta te Balumilale, jich bitʼil ya yal te sKʼope.

Te Faizal jich ya yal: «Ta ora ini schʼuunej koʼtan ta lek te jaʼ jun majtʼanil te yakʼojbotik Dios te Bibliae. Jich bitʼil te jaʼnix Dios te la spas te chʼulchan, te Balumilal sok spisil te bintik aye, ¿mabal ayuk yuʼel swenta ya yakʼbotik te sKʼop sok te ya skanantaye? Teme ma jichuk ya kaltike, jaʼ jich kʼoem te ya kaltik te maʼyuk bayal yuʼel te Dios, te yuʼel te Machʼa toyol aye. ¿Machʼaon-a te jich ya kal-abi?» (Isaías 40:8).