Te Biblia maba pajal sok te yantik libroetik ta swenta relijion. Maʼyuk yan libro te jich schʼuunej bayal miyon ants winiketik ta bayal mil jaʼbil. Jaʼukmeto, maʼyuk yan libro te jich yichʼoj ilel ta lek swenta ya stabeyik sfalta sok te maba lek ya yichʼ albeyel skʼoplal.

Jich bitʼil ay chaʼoxtul te machʼatik pʼijubenik ta lek ya yalik te maniwan yichʼoj lokʼtayel ta lek te Bibliaetik te ayik ta ora ini. Jich la yal jtul winik te pʼijuben ta lek ta swenta relijion: «Manix jnaʼtik ta lek-a teme juʼem kuʼunkotik schaʼpasel ta lek spisil te bintik la yichʼ tsʼibayel ta namey kʼinale». Sok jich la yalxan: «Jaʼnax kichʼojtik te bin maba lek yichʼoj lokʼtayele, jteb ma spisiluk-abi la yichʼ pastiklanel te kʼalal kʼaxemix bayal ta cien jaʼbil yuʼun te bin la yichʼ tsʼibayel ta namey kʼinale, sok jich yaʼiyel te bayal te banti maba pajalike».

Ay yantik ma schʼuunik te tsʼakal te Biblia ta skaj te relijion ay yuʼunik wojey chaʼjey talele. Jich bitʼil, te Faizal chʼi ta jun familia te maba schʼuunejik te Cristoe. La yakʼbeyik snop ta swenta te Biblia te jaʼlaj jun chʼul libro, jaʼukmeto yichʼojlaj jeltayel te bin tsʼibaybil tey-a. Jaʼ yuʼun jich la yal te Faizal: «Ta swenta-abi, maʼyuk smukʼul koʼtan ta swenta te ants winiketik te kʼan scholbonik kaʼiy ta swenta te Bibliae. Sok manix ay yuʼunik-a te Biblia te tsʼibaybil ta namey kʼinale, yichʼoj jeltayel».

Jaʼukmeto, ¿yuʼun-nixbal ay skʼoplal-a teme yichʼoj jeltayel te Bibliae? Nopa awaʼiy ini: te Biblia bayal bin tʼujbil skʼoplal ya yal ta swenta te bintik ya xkʼot ta pasel ta pajel chaʼbeje. Teme maba ya achʼuun te jichnix tsʼibaybil ta namey kʼinal ta Bibliae, ¿yabal smukʼulin awoʼtan-abi? (Romanos 15:4). Teme manix lek lokʼtaybilik te Bibliaetik te ay ta ora ini, ¿yabal atuuntes te mantaliletik te ya xtojobteswan ta swenta snopel ta lek te bin ya akʼan ya apas ta swenta te awaʼtel, afamilia o te bitʼil ya awichʼ ta mukʼ te Diose?

Manchukme lajemix te junetik yuʼun te Biblia te la yichʼ tsʼibayel ta namey kʼinal, ya xjuʼ ya kiltik junetik te la yichʼ lokʼtayel ta namey sok yantik bayal ta mil junetik te la yichʼ tsʼibayel ta namey kʼinal. Manchukme laj bael te junetik sok yantikxan banti la yichʼ tsʼibayel te Biblia sok ay skontratak te kʼan sjeltayik te bintik tsʼibaybile, ¿bin yuʼun maba lajem skʼoplal? Teme ya anaʼbey sujtibe, ¿bin yuʼun ya skoltayat ta smukʼulinel awoʼtan ta swenta te Bibliaetik ay ta kʼajkʼal ini? Ilawil ta lek te sujtib te jojkʼoyeletik-abi ta yan articulo te ya scholbey skʼoplal te bitʼil maba juʼem ta lajinel te Bibliae.