1, 2. ¿Bin yuʼun yananix x-ayin pobreetik te jayebto tiempo ya xjalaj te balumilal te ay ta skʼab te Satanase?

TA ORA ini ma stojiluk sok kʼax chopol te bitʼil yichʼoj chajpanel te stuuntesel te takʼin. Te achʼix keremetik ma staik aʼtel. Bayal machʼatik manchukme snaʼojik te ya xjuʼ ya staik lajel ta be, ya xbajtʼik ta yan nasion te ayxan stakʼine. Ta kʼulej nasionetik jaʼnix jich ay bayal pobreetik. Te jkʼulejetik jujun kʼajkʼal yak ta moel te stakʼinike, te pobreetik jujun kʼajkʼal yakik ta pobreubelxan. Yachʼilto la yichʼ ilel skʼoplal te 1% yuʼun te yajwal te Balumilal jaʼ ayxan stakʼinik bitʼil te 99% yajwal te Balumilale. Ta melel ma xjuʼ ya kaltik ta jamal te yuʼun-nix jich-ae. Jaʼukmeto chikan ta ilel te bayal ta miyon jkʼaxel maʼyuk bin ay yuʼunik, ay yantik te ay bayal stakʼinik te ya xjuʼ ya smakʼlinik bayal ta kajalkaj stsʼumbalik. Te Jesús la yal te jichnix ya xkʼot ta pasel-a, jaʼ yuʼun jich la yal: «Spisil ora ay ta awohlilic [...] te pobrehetic» (Marcos 14:7). ¿Bin yuʼun te ma pajal ayotike?

² Te Jesús snaʼoj te ya xlaj skʼoplal te bitʼil ma stojiluk ya yichʼ tuuntesel te bintik ay te kʼalal ya xtal te Ajwalinel yuʼun Dios. Te Apocalipsis 18:3 ya yalbey skʼoplal «te jchombajeletic» te jaʼ ya skʼan ya yal spisil te niwak chonbajel sok te niwak manbajel te ya yichʼ pasel sok bikʼtal-oʼtanil. Jaʼ-abi sok te politika soknix te lotil relijionetik ochem skʼoplalik ta balumilal yuʼun te Satanás. Te j-abatetik yuʼun Dios jkʼaxel ma schʼik sbaik ta politika sok ta lotil relijion. Jaʼukmeto jteb ma spisilik ma xjuʼ xlokʼik ta jkʼaxel ta stojol te chonbajel sok te manbajel te ya yichʼ pasel ta balumilal ini te ay ta skʼab te Satanás.

3. ¿Bin jojkʼoyeletik ya kakʼbeytik sujtib?

 ³ Te j-abatotik yuʼun Dios ya skʼan ya jnoptik bin-utʼil ya kiltik te niwak chonbajel sok te niwak manbajel. Akʼa jojkʼoybey jbatik: «¿Bin-utʼil ya xjuʼ ya jtuuntes te bin ay kuʼun swenta ya kakʼ ta ilel te jun koʼtan ta stojol te Diose? ¿Bin ya xjuʼ ya jpas yuʼun ma jkʼaxel ya kakʼ jba ta swenta te chonbajel sok te manbajel yuʼun te balumilale? ¿Bin ejemploetik ya yakʼik ta ilel te jkʼaxel ya kakʼ smukʼul koʼtantik ta stojol te Diose?».

4, 5. 1) ¿Bin kʼot ta stojol te «jcanan-biluc» te la yalbey skʼoplal te Jesuse? 2) ¿Bin tsitsel la yakʼtiklanbey Jesús te jnopojeletik yuʼune?

⁴ (Kʼopona te sjun Lucas 16:1-9). Te bin la yal te Jesús ta swenta te «jcanan-biluc» te ma stojiluk te bin la spase, ay bin ya yakʼ jpastik pensar. Te winik-abi kʼan chʼayuk yaʼtel ta skaj te lebot smul te yak ta slajinel te bin ay yuʼun te yajwale. * Jich yuʼun ay bin la spas te la yakʼ ta ilel spʼijil yoʼtan, la yamigoin te machʼatik ya xjuʼ xkoltayot yuʼun te kʼalal ya xchʼay te yaʼtele. Te Jesús maba yak ta yalbeyel te jnopojeletik yuʼun te yakuk spasik te bin ma stojiluk yuʼun ya x-ayin te bin ya xtuun yuʼunik ta skuxlejalik. Ta melel, te Jesús la yaltiklanbey te jaʼ jich ya spasik «te machʼatic» ayik ta «scuenta bahlumilal». La scholbey skʼoplal te «jcanan-biluc» yuʼun ay bin kʼax tulan skʼoplal ya yakʼ jnoptik.

⁵ Wokol te bin kʼax ta stojol te «jcanan-biluc». Te Jesús snaʼoj te jteb ma spisiluk te jnopojeletik yuʼune wokol ya yilik-euk te ya staik te bin ya xtuun yuʼunik ta chopol balumilal ini. Jaʼ yuʼun jich la yaltiklanbey: «Lehahic machʼatic yac acʼuxultay abahic soc ta scuenta te cʼuhlejalil yuʼun te bahlumilale». Jich kʼalal te kʼulejalil ya xlaj, te Jehová sok te Jesús ya yikʼtiklanik te banti ya x-ayinik ta «sbahtel qʼuinal». ¿Bin ya jnoptik yuʼun te tsitsel la yakʼ te Jesuse?

6. ¿Bin yuʼun ya kaltik te maba ochem skʼoplal ta skʼanojel yoʼtan Dios te jaʼ ya xbajtʼ koʼtantik ta chonbajel sok ta manbajel?

⁶ ¿Bin yuʼun la yal te Jesús ta swenta te kʼulejalil te jaʼ yuʼun «te bahlumilale»? Te Biblia maba ya yal, jaʼukmeto ya yal ta jamal te maba ochem skʼoplal ta skʼanojel yoʼtan Dios te jaʼ ya xbajtʼ koʼtantik ta chonbajel sok ta manbajel. ¿Bin yuʼun jich ya kaltik? Melel ta tsʼumbil kʼinal ma pʼisbiluk la yakʼbey Jehová te Adán sok te Eva te bin ya xtuun yuʼunike (Génesis 2:15, 16). Jaʼnix jich ta sbabial siglo kʼalal te Dios la yakʼ talel ta stojol te machʼatik tsabilik te ya xbajtʼik ta chʼulchan chʼul espiritu «mayuc machʼa la yal te ha stuquel yuʼun te sbiluque, ta spisilic junax sbiluc cʼohtic» (Hechos 4:32). Te j-alwanej Isaías la yal te ya xkʼot yorail te ya smulanik spisil te ants winiketik te bin ya yakʼ te lume (Isaías 25:6-9; 65:21, 22). Jich bitʼil mato kʼoem yorail, te jnopojeletik yuʼun te Jesús ya skʼan te sokuk spʼijilik ya stuuntesik «te cʼuhlejalil yuʼun te bahlumilale» yuʼun ya staik te bin ya xtuun yuʼunik sok te jaʼnix jich ya spasik tulan yuʼun lek ya x-ilotik yuʼun te Diose.

7. ¿Bin tsitsel la yakʼ te Jesús ta Lucas 16:10-13?

⁷ (Kʼopona te sjun Lucas 16:10-13). Te «jcanan-biluc» te la yalbey skʼoplal te Jesús la sle yamigotak yuʼun jaʼnix ya sta slekilal. Yan stukel te Jesús la stijbey yoʼtan te jnopojeletik yuʼun te ayuk yamigotakik ta chʼulchan, jaʼukmeto ma ta skaj sbikʼtal yoʼtanik. Te bin la skʼan te Jesús jaʼ te ya xkʼot ta koʼtantik te ya xchiknaj ta ilel teme jun koʼtantik ta stojol Dios o maʼuk ta swenta te bin-utʼil ya jtuuntestik «te cʼuhlejalil yuʼun te bahlumilale».

8, 9. ¿Bin-utʼil yak stuuntesbelik chaʼoxtul hermanoetik «te cʼuhlejalil yuʼun te bahlumilale»?

⁸ Jchajp te bin-utʼil ya kakʼtik ta ilel te jun koʼtantik ta stojol Dios jaʼ te kʼalal ya jtuuntestik te bin ay kuʼuntik ta skoltayel te scholel skʼop Dios ta swolol Balumilal te la yalbel jilel skʼoplal te Jesuse (Mateo 24:14). Kiltik bin-utʼil jich ya spasik chaʼoxtul hermanoetik. Ta jpam lum te India sbiil, jtul tut achʼix ay stut kaja banti ya skʼej bael stakʼin.  Lato yijkʼitay smanel yixtaʼ yuʼun. Kʼalal noj te kaja, la yakʼ te stakʼin ta majtʼanil yuʼun ya yichʼ tuuntesel ta scholel skʼop Dios. Teynix ta lum-abi, jtul hermano te stsʼunoj bayal coco jaʼnix jich ya yakʼ ta ilel spʼijil yoʼtan. Ay la skʼebanbey ipal coco te machʼatik ya x-aʼtejik ta ofisinaetik yuʼun skʼasesel kʼop ta kʼopil malayálam. Ya yal te hermano te jich bitʼil ya xtuun yuʼunik te hermanoetik ta ofisinaetik, jaʼ lek la yaʼiy te la yakʼtiklanbey coco te bitʼil takʼin yuʼun ya smanik. Jaʼnix jich te hermanoetik ta Grecia kʼayemik ta yakʼbeyel aceite de oliva, queso sok yantik weʼeliletik te machʼatik ya x-aʼtejik ta Betel ta slumalike.

⁹ Kiltik bin ya spas jtul hermano te manchukme jaʼ slumal Sri Lanka ay ta nainel ta yan nasion. Te banti mero slumale, ay sna sok skʼinal te ya yakʼbey smajan te hermanoetik yuʼun ya spasik tsoblejetik sok mukʼul tsoblejetik soknix yuʼun ya xjilik tey-a hermanoetik te yakʼoj sbaik ta abatinel ta spisil-ora ta stojol Dios. Manchukme ya slajin takʼin yuʼun, jaʼ jich ya skoltay te hermanoetik te maʼyuk stakʼinike. Ta jun lugar te banti makal te scholel te skʼop Diose, te hermanoetik ya yakʼik ta majanel snaik yuʼun tey ya yichʼ pasel-a te tsoblejetike. Te bitʼil jich ya spasike, bayal precursoretik sok jcholkʼopetik te maʼyuk lek stakʼinik ay banti ya xjuʼ ya spasik te tsoblejetik te jich ma puersa ya stojikix na yuʼun.

10. ¿Bin ya jtatik te kʼalal ya kakʼtik te bin ay kuʼuntike?

¹⁰ Te ejemploetik-abi ya yakʼik ta ilel ta swenta te j-abatetik yuʼun Dios te jun yoʼtan ya yakʼ sbaik ta stojol te «binti pequʼel scʼoblal», te jaʼ ya skʼan ya yal te ya snaʼik stuuntesel te bintik ay yuʼunik te jaʼ pekʼelxan skʼoplal te bitʼil te kʼulejalil te talemik ta stojol te Diose (Lucas 16:10, Tsʼihbaybil sChʼulcʼop jTatic Dios ta tseltal). ¿Bin-utʼil ya yilik te hermanoetik ini te bin ya spasik yuʼun ya yamigoinik te Jehovae? Snaʼojik te yakik ta stael smelelil kʼulejalil ta stojol Dios te kʼalal ya yakʼbeyik yantik te bin ay yuʼunike (Lucas 16:11). Jtul hermana te kʼayem ta yakʼel majtʼan takʼin ta swenta spaselxan yaʼtel te Diose ya yal te yichʼoj mukʼul bendision ta spisil te jayeb jaʼbil yakʼoj takʼin ta skaj te yutsil yoʼtane. Jich ya yal: «Jich jtaoj ta ilel te kʼalal ya kakʼxan te bin ay kuʼune, jich ya kakʼxan ta ilel yutsil koʼtan ta stojol yantik ta spasbeyel perdon, yuʼun ma x-ilinon ta ora sok yuʼun ma xchebaj koʼtan kʼalal ay bin ma lekuk ya xlokʼ soknix yuʼun lek ya kaʼiy te kʼalal ya kichʼ tsitsel». Bayalikxan staojik ta ilel te ya xlekubxan stalelik bitʼil j-abatetik yuʼun Dios te kʼalal ya yakʼik te bin ay yuʼunike (Salmo 112:5; Proverbios 22:9).

11. 1) ¿Bin yuʼun ya kaltik te ya kakʼtik ta ilel te pʼij koʼtantik teme ya kakʼtik te bin ay kuʼuntike? 2) ¿Bin yak spasbel te lum yuʼun Dios yuʼun jich «pajaluc» bin ay kuʼuntik-a? (Ilawil te lokʼomba ta sjajchibal te articulo).

¹¹ Yan te bin-utʼil ya xjuʼ ya kakʼtik ta ilel te ay spʼijil koʼtantik ta stuuntesel te bin ay kuʼuntike, jaʼ te kʼalal ya jtuuntestik ta skoltayel te yantike. Ay hermanoetik te ay stakʼinik, jaʼukmeto ma xjuʼ x-abatinik ta spisil-ora ta stojol Dios o te ya x-abatinik ta yan nasion. Manchukme jich-abi ya xjuʼ ya skoltayik yantik hermanoetik te jich ya xjuʼ ya spasik stukel (Proverbios 19:17). Ta swenta te majtʼan takʼin te ya kakʼtike, ya xkoltaywanotik ta spasel sok ta spukel junetik, jaʼnix jich ya xkoltaywanotik yuʼun ya yichʼ cholel skʼop Dios ta lugaretik te maʼyuk lek stakʼinik banti bayal ants winiketik ya schʼuunik te smelelil kʼop. Ta bayal jaʼbil talel ta nasionetik jich bitʼil te Congo, Madagascar sok te Ruanda te hermanoetik jaʼ ya stsaik teme ya smanbeyik sweʼel te machʼatik ay yuʼunik o teme ya sman sBibliaik, te ay jich ya xlokʼ stojol bitʼil te takʼin te ya yichʼ pasel ganar ta jun semana o ta jun u.  Jaʼukmeto, te majtʼan takʼin yakʼojik bayal hermanoetik yakʼoj «te pajaluc» ya xkʼot te majtʼan takʼine. Ta swenta te jich yichʼoj pasele, te organisasion yuʼun te Jehová skʼasesoj ta skʼopik te Biblia sok yakʼbeyoj spisilik ta jujun familia soknix te machʼatik ya skʼan ya snaʼbeyik sba te Diose (kʼopona te sjun 2 Corintios 8:13-15). Jich ya xjuʼ ya yamigoinik Jehová te machʼatik ay bin ya yakʼik sok te machʼatik ay bin ya yichʼike.

12. ¿Bin-utʼil la yakʼ ta ilel te Abraham te la yakʼ smukʼul yoʼtan ta stojol te Diose?

¹² Yan bin-utʼil ya xjuʼ ya kamigointik te Jehová jaʼ teme ma jkʼaxeluk ya kakʼ jbatik ta swenta te niwak chonbajel sok te niwak manbajel yuʼun te balumilal, sok te ya jtuuntestik te bin yilel ay te jkuxlejaltik ta sleel te smelelil kʼulejalil. Jaʼ jich la spas te Abraham te jaʼ jtul winik te la yakʼ ta ilel schʼuunel yoʼtan. Ta skaj te la skʼan ya yamigoin te Jehová la schʼuunbey skʼop, la yijkʼitay te kʼulej lum Ur sok kuxin ta nailpakʼetik (Hebreos 11:8-10). Snaʼoj te talem ta stojol Jehová te smelelil kʼulejalil. Jaʼ yuʼun maʼyuk bin-ora la skʼan la sta skʼulejal te kʼalal jich juʼ la spase, te jichuk la spase la yakʼ ta ilel te maʼyuk schʼuunel yoʼtan (Génesis 14:22, 23). Ta patil bael, te Jesús la yalbey jtul jkʼulej kerem te jichuknix schʼuunel yoʼtan: «Teme yac acʼan te mayuc bin ya spasat falta, bahan, chona hilel te bintic ay awuʼun, qʼuebembeya hilel te pobrehetic, hich me ay acʼuhlejal ta chʼulchan; soc laʼ, tʼunawon» (Mateo 19:21). Te kerem-abi, ma jichuk schʼuunel yoʼtan bitʼil te Abrahame, jaʼukmeto ay yantik te yakʼojik ta ilel smukʼul yoʼtanik ta stojol Jehová.

13. 1) ¿Bin la yalbey te Pablo te Timoteo? 2) ¿Bin-utʼil ya xjuʼ ya jpastik ta jkuxlejaltik ta ora ini te bin la yal te Pabloe?

¹³ Te Timoteo jaʼ yan winik te la yakʼ ta ilel te ay schʼuunel yoʼtan. Te Pablo la yalbey te jaʼ «lequil soldado yuʼun Jesucristo», ta patil jich la yalbeyxan: «Mayuc machʼa te ochem ta soldadohil te ya xchuc sba ta spasel te bintic yan ay ta pasel ta cuxlejalil liʼ ta bahlumilal, yuʼun ya scʼan te lec yoʼtan yuʼun te machʼa cuentahimbil yuʼune» (2 Timoteo 2:3, 4). Ta kʼajkʼal ini spisil te jnopojeletik yuʼun te Jesuse te teynix ochem skʼoplalik te kʼaxem ta jun miyon te machʼatik yakik ta abatinel ta stojol Dios ta spisil-ora, ya spasik te bantito kʼalal ya xjuʼ yuʼunik ta schʼuunel te bin la yal te Pablo. Te j-abatetik yuʼun Dios ya spasik tulan yuʼun maba ya smanik spisil te bin ya yichʼ pukbeyel skʼoplal soknix ma xyakʼ sbaik ta wentainel yuʼun te balumilal, melel ma xchʼay ta yoʼtanik ini: «Te machʼa ay bin ya smajan, ha aʼbat ya xcʼoht yuʼun te machʼa la yacʼ ta majanel» (Proverbios 22:7). Te Satanás yoʼtanuk te tojolnax ya jkʼasestik jtiempotik sok te ya jlajintik kiptik yuʼun ya kakʼ jbatik ta moso yuʼun te niwak chonbajel sok te niwak manbajel yuʼun te balumilale. Ay machʼatik ya slokʼesik ta majanel bayal takʼin yuʼun ya sman snaik, skarroik sok yuʼun ya spasik kʼax mukʼul kʼin swenta nujpunel. Teme maba ya jnoptik ta lek te bin ya jpastike ya xjuʼ te ay jbetik ya xkʼot bayal jaʼbil. Yan teme ya kakʼtik ta ilel spʼijil koʼtantik, maba ya jle bayal jbiluktik, maba ya x-ayin bayal jbetik sok maʼyuk lek takʼin ya jlajintik. Jich libre ya x-ayinotik yuʼun jaʼ ya kakʼ jbatik ta abatinel ta stojol Dios, ma jaʼuk ta stojol te niwak chonbajel sok te niwak manbajel yuʼun te balumilale (1 Timoteo 6:10).

14. ¿Bin ya skʼan te jtaojtik ta nopel ta lek te ya jpastike? Chola bin spasojik chaʼoxtulik.

¹⁴ Teme ya jkʼantik te maʼyuk bayal jbiluktik, yame skʼan te nail ya kakʼtik ta jkuxlejaltik te bintik tulanxan skʼoplale. Jtul hermano sok yinam ay jun snegosioik te bayal takʼin ya staik yuʼun. Jaʼukmeto yoʼtanukik ya xchaʼabatinik ta spisil-ora ta stojol Dios. Jich yuʼun la schonik te negosio, te lancha yuʼunik sok yantikxan sbilukik. La sjap sbaik yuʼun ya xkoltaywanik ta spasel te yachʼil lugar te banti ya yichʼ ilel spisil te aʼtelil ya yichʼ pasel ta swolol Balumilal (Warwick, Nueva York). Kʼax mukʼul majtʼanil la yaʼiyik, melel bajtʼik ta aʼtel ta Betel sok te snialik soknix te yal snichʼanik. Jaʼnix jich bayal semana aʼtejik ta Warwick sok te smeʼ stat te hermanoe. Ta Colorado (Estados Unidos) jtul precursora la sta yaʼtel ta jun banco te banti cheʼoxebnax kʼajkʼal ta semana ya x-aʼtej. Te patronetik yuʼun kʼax tseʼel yoʼtanik ta stojol te jich kʼan yakʼbeyik yan aʼtelil banti  ya x-aʼtej sjunal semana te oxebtoxan buelta ya yichʼ tojel te bitʼil te yaʼtel te yak ta spasel-ae. Jaʼukmeto te hermana la spʼaj te lekil aʼtelil-abi, melel teme ya stsake ya xmakot yuʼun ta scholel skʼop sok spisil yoʼtan. Te ejemploetik-abi jaʼnax cheb ta spisil te bin ya slokʼes sba ta yoʼtanik spasel te j-abatetik yuʼun Jehová swenta jaʼ ya xbajtʼ yoʼtanik ta abatinel ta stojol. Teme jtaojtik ta nopel te jaʼ nail ya kakʼtik ta jkuxlejaltik te Ajwalinele, yame kakʼtik ta ilel te jaʼ bayalxan skʼoplal ta koʼtantik te bitʼil kamigoinej jbatik sok te Jehová soknix te jaʼ bayalxan skʼoplal kuʼuntik te kʼulejalil te talemik ta stojol te bitʼil te bin ya yakʼ te niwak chonbajel sok te niwak manbajel yuʼun te balumilale.

15. ¿Bin kʼulejalil ya yakʼbotikxan sbujtsʼ koʼtantik?

¹⁵ Ma spisilik te machʼatik ya sta skʼulejalik yichʼojik te bendision yuʼun te Diose. Te Jehová ya yakʼbey bendision te machʼatik jaʼ «scʼuhlejalic te lequil aʼteliletic» (kʼopona te 1 Timoteo 6:17-19). Kiltik bin la spas jtul hermana te Lucia sbiil te jaʼ slumal Italia. * Kʼalal la yaʼiy stojol te ya skʼanik koltayel ta scholel skʼop Dios te hermanoetik ta Albania, la yakʼ smukʼul yoʼtan ta jkʼaxel ta stojol Dios sok bajtʼ tey-a ta jaʼbil 1993 manchukme maʼyuk yaʼtel-a. La snop te kʼopil albanés, kʼalalto ta ora ini kʼaxem ta 60 ta tul skoltayoj yuʼun ya yichʼik jaʼ. Melelnix-a te ma jpisiltikuk te kʼax lek ya xkʼot ta lokʼel te kaʼteltik ta scholel skʼop Dios. Jaʼukmeto chikan bin ya jpastik ta skoltayel yantik ta snaʼbeyel sba te Jehová sok ta yamigoinel, ya xjuʼ xkʼot ta jkʼulejaltik ta sbajtʼelkʼinal (Mateo 6:20).

16. 1) ¿Bin ya xkʼot ta swenta te niwak chonbajel sok te niwak manbajel yuʼun te balumilale? 2) Jich bitʼil ya jnaʼtik bin ya xkʼot ta swenta te kʼulejalil yuʼun te balumilal, ¿bin-utʼil ya skʼan ya jtuuntestik?

¹⁶ Te Jesús maba la yal te ya xjuʼ xlaj «te cʼuhlejalil yuʼun te bahlumilale», la yal te yananix xlaj-a (Lucas 16:9). Bayal bancoetik lajem stakʼinik sok bayal nasionetik yakik ta kʼaxel ta wokol ta skaj te koem ta jkʼaxel stakʼinik, jaʼukmeto ma spaj te bin yato xkʼot ta pasel ta swolol Balumilal. Ya xlaj spisil te bin schajpanoj ta balumilal te Satanás, te niwak chonbajel sok te niwak manbajel, te politika sok te lotil relijionetik. Te j-alwanej Ezequiel sok Sofonías la yalik ta namey talel te maʼyuk skʼoplal ya xkʼot te oro sok te plata, manchukme ta bayal siglo jaʼ yiptajib kʼot yuʼun te niwak chonbajel sok te niwak manbajele (Ezequiel 7:19; Sofonías 1:18). Jnop kaʼiytik te ya xlajotikixe, ¿binwan yaʼiyel ya kaʼiy jbatik kʼalal ya kiltik te ma la jtatik smelelil kʼulejalil ta skaj te la kakʼ jkuxlejaltik ta sleel «te cʼuhlejalil yuʼun te bahlumilale»? Jichniwan ya kaʼiy jbatik bitʼil te machʼa ya yakʼ skuxlejal ta stsobel bayal takʼin te patil ya yil te lotil takʼin te la spas ganare (Proverbios 18:11). Yananixme xlaj yip-a te skʼulejal te balumilale. Jaʼ yuʼun jtuuntestik te bin ay kuʼuntik te bantito kʼalal ya xjuʼ ta pasel, yuʼun ya x-ayin kamigotaktik ta chʼulchan. Biluk-a te bin ya jpastik ta skoltayel te aʼtelil yuʼun Dios te yak ta pasele yame skoltayotik yuʼun ya kamigointikxan ta lek te Jehová.

17, 18. ¿Bin yakik ta smaliyel te ya xkʼot ta stojolik te j-abatetik yuʼun te Diose?

¹⁷ Kʼalal tsʼakal ya swentainotik te Ajwalil stsaoj te Diose, maʼyuk machʼa ya stojix renta, takʼin te skʼanoj ta majanel, doktoretik sok poxetik. Jpisiltik ya jta bayal jweʼeltik te ma tojbilukixe. Te yal snichʼnab Jehová liʼ ta Balumilal ya xbajtʼ smulanbeyik yutsil spisil te bintik lekxan ya yakʼ te lume. Maba ya jtsobtikix oro, plata sok tʼujbil tonetik sok maba ya kakʼix jtakʼintik ta biluketik-abi, jaʼnax ya jtuuntestikix yuʼun ya jchʼal jbatik sok. Jpisiltik ya xjuʼ kuʼuntik spasel tʼujbil jnatik ta teʼ, ton soknix lekil sok tʼujbil takʼin. Te kamigotaktik ya skoltayotik ta spasel, ma yuʼunuk ya jtojtik, jaʼ yuʼun te jich ya xlokʼ ta yoʼtanik spasel. Ta sbajtʼelkʼinal ta pajalnax ya jtuuntestik te bin ya yakʼ te lume.

¹⁸ Spisil-abi jaʼnax jtebuk ta spisil te bin ya yichʼik akʼbeyel te machʼatik ya spasik tulan yuʼun ya x-ayin yamigotakik ta chʼulchan. Spisil te j-abatetik yuʼun Dios jelawen yutsil ya yaʼiyik kʼalal jich ya x-albotik yuʼun te Jesús: «Laʼic, haʼex te aʼbotex bendición yuʼun te Jtat, ichʼahic hilel te cuentahinel yuʼun Dios te chahpambotex ta shachel to tal bahlumilal» (Mateo 25:34).