TE JCHʼUUNJELETIK ta sbabial siglo la spasik tulan ta scholbeyel yaʼiyik «te lec yachʼil cʼop yuʼun te cuentahinel yuʼun Dios» chikan jich yipal ants winiketik juʼ yuʼunik (Mateo 24:14). Ay machʼatik bajtʼik ta yan nasionetik. Jich bitʼil, te jpuk-kʼop Pablo sol te banti jaʼ skʼinal Turquía ta ora ini sok tey bayal la schol skʼop Dios te kʼalal been ta nasionetik ta spukel ta alel te skʼop Dios. * Ta jaʼbil 2014 kʼalal kʼaxemixniwan dos mil jaʼbil-ae la yichʼ pasel ta Turquía jun kampaña espesial yuʼun scholel skʼop Dios. ¿Bin yuʼun la yichʼ chapel sok machʼatik aʼtejik ta kampañae?

Kʼaxem ta 2,800 jcholkʼopetik ayik ta Turquía, jaʼukmeto ayniwan 79 miyon ta tul yajwal te nasione. Jich yuʼun, ta 28,000 ta tul ants winiketik ay jtul testigo yuʼun Jehová. Jich bitʼil ya xtal ta koʼtantik, te hermanoetik maʼyuk bayal ants winiketik juʼem yuʼunik scholbeyel skʼop Dios yaʼiyik. Te skʼoplal te kampaña jaʼ te ya yichʼ cholbeyel skʼop Dios ta oranax chikan jayeb ants winiketik ya xjuʼe. Ta yorail te kampaña, 550 ta tul hermanoetik te ya xkʼopojik ta turco ta yan nasionetik bajtʼik ta Turquía yuʼun ya skoltayik ta scholel skʼop Dios te hermanoetik ta nasion-abi. ¿Bin lek lokʼ yuʼun te kampañae?

Bayal machʼa la yichʼik cholbeyel skʼop Dios. Jun kongregasion ta Estambul jich la stsʼibay: «Te ants winiketik la yilik bayal testigoetik yuʼun Jehová ta bayuk, jaʼ yuʼun la sjojkʼoybotik teme ay bin mukʼ skʼoplal jtsoboj jbatik yuʼune». Ta mukʼul lum Izmir jun kongregasion jich la stsʼibay: «Jtul winik te ya x-aʼtej te banti ya xlokʼ taxi noptsaj talel ta stojol jtul anciano sok jich la sjojkʼoybey: “¿Bin yakex ta spasel? ¿Yakexbal ta tulanxan aʼtel?”». Ta melel te kampaña la yikʼbey yoʼtan te ants winiketik.

Te hermanoetik te talemik ta yan nasionetik bayal la smulanik te scholel skʼop Dios ta nasion-abi. Te Steffen te talem ta Dinamarca, jich la yal: «Ta jujun kʼajkʼal la jta ants winiketik te maba yaʼiyojik skʼoplal te Jehová. Jich la kaʼiy te yakon ta yakʼel ta naʼel ta melel te sbiil te Jehová». Jtul hermano te talem ta Francia te Jean-David sbiil jich la stsʼibay: «Ay jalajotik bayal ora ta scholel skʼop Dios ta jun-nax kaye. ¡Kʼax bayal yutsil! Jteb ma spisil te ants winiketik maba ya snaʼbeyik sba-a te testigoetik yuʼun Jehová. Jteb ma spisil te ants winiketik juʼ jkʼoponbeltik kʼalal yakotik ta yulaʼtayel naetik, juʼ la kakʼbeytik yilik  junuk video sok ay la kijkʼitaybeytik jilel jlejch jun ta skʼabik».

Te 550 ta tul hermanoetik ta chebnax semana ayniwan 60,000 junetik la yijkʼitayik jilel ta skʼab te ants winiketike. Jich bitʼil chikan ta ilel, ta swenta te kampaña bayal ants winiketik la yichʼik cholbeyel yaʼiyik skʼop Dios.

La stsakxan yipik ta scholel skʼop Dios. Ta swenta te kampaña, te hermanoetik yuʼun Turquía la yichʼxan yipik ta scholel skʼop Dios. Bayal machʼatik jajch snopik te ya x-ochik ta precursor. Ta melel, te yajtalul te precursoretik mo 24% ta lajchayeb u bael te kʼalal kʼaxemix-a te kampañae.

Te hermanoetik te yan snasionik te talik ta Turquía la yalik bin-utʼil lekub la yaʼiyik te bitʼil ya scholik te skʼop Diose, jaʼnix jich te kʼalal sujtik bael ta snasionik. Jtul hermana te jaʼ slumal Alemania te Şirin sbiil jich la stsʼibay: «Te hermanoetik yuʼun Turquía maba wokol ya yaʼiyik scholel skʼop Dios chikan banti ayik. Te joʼone wokol ya kaʼiy, melel mero ya xkʼexawon ta kʼop. Jaʼukmeto juʼ kuʼun spasel ta swenta te kampaña, te ejemplo yuʼun te hermanoetik ta lugar-abi sok ta swenta te bayal la jkʼopon Dios yuʼun. ¡Lato jchol skʼop Dios sok la kijkʼitay junetik ta metro! Ma jichukix te jkʼaxel ya xkʼexawon te bitʼil ta nail talele».

Jtul hermano te Johannes sbiil te jaʼ slumal Alemania jich la yal: «Ay bintik la jnop talel te ya jpas ta scholel skʼop Dios. Te hermanoetik yuʼun Turquía yoʼtanukik ya scholbeyik skʼop Dios chikan jayeb ants winiketik ya xjuʼ yuʼunik, jaʼ yuʼun ya scholik skʼop Dios ta spisil-ora te jich ya xjuʼ ta pasele. La jnop ta koʼtan te jichnix ya jpas te kʼalal ya sujton bael ta Alemania. Ta melel, ta ora ini jaʼ bayalxan ants winiketik ya jcholbey yaʼiyik skʼop Dios te bitʼil ta nail talel».

Jtul hermana te Zeynep sbiil te jaʼ slumal Francia jich la yal: «Te kampaña bayal bin la yakʼbon jnop ta swenta te scholel skʼop Dios. La skoltayon yuʼun ayukxan yip koʼtan sok te yakuk smukʼulinxan koʼtan te Jehová».

Junxan la yaʼiy sbaik te hermanoetik. Te kʼuxul oʼtanil te la yakʼbey sbaik ta ilel te hermanoetik te yanyantik snasionik sok te bitʼil jun la yakʼ sbaike bayal bin kʼot ta oʼtanil yuʼun. Te Jean-David te la kalbeytikix skʼoplal jich la yal: «La kilkotik te slekil yoʼtan te hermanoetike. Jich la yilotik bitʼil yamigotakik sok bitʼil sfamiliaik. La yikʼtiklanotik ochel ta snaik. Te joʼon jnaʼoj te kermano jbatik ta jpisiltik, melel jich jkʼoponoj bayal buelta ta junetik  kuʼuntik. Jaʼukmeto ta ora ini, joʼonix la kil ta jsit. Kʼax tseʼelxan koʼtan la kaʼiy jba ta skaj te j-abaton yuʼun te Jehová. Ya kalbey wokol yuʼun te tʼujbil majtʼanil ini».

Jtul hermana te Claire sbiil te jaʼ slumal Francia jich la yal: «Jpisiltik jich kʼootik bitʼil jun familia, maʼyuk skʼoplal kʼot teme talemotik ta Alemania, Dinamarca, Francia o Turquía. Jich kʼoem yilel te la stuuntes Dios mukʼul borrador ta stupʼel te frontera yuʼun te nasionetike».

Te Stéphanie te jaʼ slumal Francia jich la yalxan: «Te kampaña espesial la yakʼ jnoptik te jaʼ te skʼuxul koʼtantik ta stojol Jehová te jun ya yakʼotike, ma jaʼuk te jtsʼumbaltik o te jkʼoptike».

Bayal hermanoetik te aʼtejik ta kampaña jajch snopik te ya xbajtʼik ta Turquía yuʼun ya xkoltaywanik ta spasel te bayal aʼtelil te yato skʼan pasele. Ay machʼatik baemikix, ya kalbeytik bayal wokol yuʼun te yaʼtelike.

Jich bitʼil, ta jun lugar ay jun grupo te banti 25 jcholkʼopetik aynax-a. Ta bayal jaʼbil jip jtulnax anciano yuʼunik. Jaʼukmeto ta 2015 waktul hermanoetik te talemik ta Alemania sok ta Países Bajos bajtʼik ta Turquía ta skoltayel te hermanoetik. ¡Jkʼaxel tseʼel yoʼtanik yuʼun te hermanoetik ta Turquía!

¿Bin-utʼil ya yaʼiy sbaik te hermanoetik te ayix jtebuk tiempo yakik ta abatinel ta Turquía? Jich bitʼil stalelnanix ay wokolil sitintayojik, jaʼukmeto staojik-euk bayal bendisionetik. Kiltik bin ya yalik chaʼoxtulik.

Jtul hermano te nujpunem te Federico sbiil te cuarentaniwan yaʼbilal te jaʼ slumal España bajtʼ ta abatinel ta Turquía. Jich ya yal: «Te bitʼil maʼyuk bayal jbiluk, jocholonxan ya kaʼiy jba, jich jaʼ ya xbajtʼ ta koʼtan spasel te bin mukʼxan skʼoplale». ¿Yabal stijbey yoʼtan te yantik yuʼun jichnix ya spasik-euk? Jich ya yal: «¡Ta melel yak! Kʼalal ya xbaat ta yan nasion yuʼun ya akoltay te ants winiketik ta snaʼbeyel sba te Jehová ta melel yak awakʼbel aba ta skʼab te Jehová. Jich ya awilxan ta lek bin-utʼil ya skanantayat».

Te Rudy te jaʼ jtul hermano te nujpunem te jaʼ slumal Países bajos te nopol ya staix 60 yaʼbilal jich ya yal: «Ya yakʼbotik bayal stseʼelil koʼtantik te nailijemotik ta scholel skʼop Dios sok te ya jkoltaykotik bayal ants winiketik te ma yaʼiyojik ta jkʼaxel te lek yachʼil kʼope.  Ya yakʼ bayal sbujtsʼ koʼtantik kʼalal sok stseʼelil yoʼtanik ya schʼuunik te smelelile».

Te Sascha jaʼ yan hermano te nujpunem-euk te kʼaxem jtebuk ta 40 yaʼbilal te jaʼ slumal Alemania te bajtʼ ta Turquía. Jich ya yal: «Spisil-ora te ya xlokʼon ta scholel skʼop Dios ya jta ants winiketik te jaʼ sbabial buelta te yakik ta yaʼiyel te lek yachʼil kʼope. Kʼax leknax ya kaʼiy jba ta swenta te ya jkoltaylan yuʼun ya xjuʼ ya snaʼbeyik sba te Jehová».

Jtul hermana te nujpunem te Atsuko sbiil te jaʼ slumal Japón te ayniwan 35 yaʼbilal jich ya yal: «Ta nail talel koʼtanuk te ya xtalix ta oranax te Armagedón. Jaʼukmeto ta swenta te bin yakon ta yilel ta Turquía, ya kalbey wokol te Jehová te yakto ta maliywanej. Te kʼalal ya kilxan ta lek bin-utʼil te Jehová leknax ya swentain spisil, ya jkʼan nopolxan ya kakʼ jba ta stojol».

Te Alisa jaʼ jtul hermana te jaʼ slumal Rusia te kʼaxem jtebuk ta 30 yaʼbilal, jich ya yal: «Te bitʼil jich yakon ta abatinel ta stojol Jehová skoltayejon yuʼun ya kil te kʼax lek yoʼtan ta melel» (Salmo 34:8). Sok jich ya yalxan: «Ma jaʼuknax jTat ya kaʼiy te Jehová, jaʼnix jich kamigo te nopol ay ta jtojol te ya jnaʼbeyxan sba ta lek ta spisil te bin ya jpase. Ta jkuxlejal bayal bintik yakʼojbon stseʼelil koʼtan, bayal bintik tʼujbil kʼaxem kuʼun sok nojel jkuxlejal ta bendision».

Ta swenta te kampaña espesial ta Turquía te lek yachʼil kʼop yuʼun te Ajwalinel kʼoem ta stojol bayalxan ants winiketik. Jaʼukmeto ayto bayal lugaretik banti maba cholbil te skʼop Diose. Te hermanoetik te baemik ta abatinel ta Turquía spisil-ora ya staik ants winiketik te maba yaʼiyojik skʼoplal te Jehová. Jaxan te jaʼate, ¿yabal akʼan ya xbaat ta abatinel ta jun lugar jich bitʼil ini? Teme jiche, juluk ta awoʼtan te bin ya yal te Juan 4:35: «Hacha asitic, ilawilic te bintic tsʼumbil ta qʼuinal, syijilix yuʼun ya yichʼix tsobel». ¿Yabal xjuʼ xkoltaywanat ta yan lugar te banti «syijilix yuʼun ya yichʼix tsobel» te awal tsʼunubil? Teme jiche, jachame spasel ta ora ini te bin ya skoltayat ta skʼotesel ta pasel. Chʼuuna sok spisil awoʼtan te ya xtal ta atojol bayal bendisionetik te ma jichuk maliybil awuʼun teme ya apas tulan yuʼun ya xtoyxan te awaʼtel ta scholel skʼop Dios «cʼalal ta stiʼil bahlumilal» (Hechos 1:8).