JICH la yutsil kʼoptay te ajwalil David ta namey Israel jtul ants te Abigail sbiil. ¿Bin yuʼun te jich la yalbeye? ¿Bin ya jnoptik ta stojol te Abigaile?

Te David la snaʼbey sba te Abigail kʼalal yak ta nutsel-a yuʼun te ajwalil Saúl. Te Abigail nujpunem sok jtul jkʼulej winik te Nabal sbiil te ay bayal tuminchijetik yuʼun te yakʼoj ta akiltik ta witsiltik ta sur yuʼun te Judá. Te David sok te winiketik yuʼun kʼotik «bin utʼil tsʼahc» ta stojol te jkanantuminchijetik sok te tuminchijetik yuʼun te Nabal. Jich yuʼun te David ay machʼatik la stikun bael ta skʼanbeyel biluk bin ya xjuʼ x-akʼbot talel yuʼun ya sweʼik (1 Samuel 25:8, 15, 16). Ma utsʼinel ta stojol Nabal te ay bin kʼanbot yuʼun te Davide, melel te David sok te winiketik yuʼune skanantaybeyojik te bin ay yuʼune.

Jaʼukmeto te Nabal jaʼ la yakʼ ta ilel te bin ya skʼan ya yal te sbiile te jaʼ «maʼyuk snopjibal yuʼun» o «te ma snaʼ kʼinal». Tulan la sutbey skʼop te David sok la sjachbey yilinba. Jich yuʼun te David la schajpan sba yuʼun ya yakʼbey kastigo ta skaj te jkʼaxel ma lekuk te bin la spas te Nabal sok te ma lek sutbot skʼop yuʼune. Te bitʼil ma la snaʼ kʼinal te Nabal yananix sta swokol yuʼun soknix te sfamiliae (1 Samuel 25:2-13, 21, 22).

Kʼalal te Abigail la yil te jkʼaxel ma lekuk te bin ya xkʼot ta pasel yuʼun te David ta skaj yilinba, ay bin la spas sok la yakʼ ta ilel te ay yip yoʼtane. La yalbey wokol te David sok slekil yoʼtan te yakuk x-akʼbot wenta te ma lekuk te bin ya spas sok te juluk ta yoʼtan te yamigoinej sba sok te Jehová. Jaʼnix jich la yakʼbey bayal ta chajp weʼelil te David te jaʼ te machʼa patil ya x-och ta ajwalil ta Israel sok la yakʼbey-euk te winiketik yuʼune. Te David jamal la yal te jaʼ tuuntesot yuʼun Dios te Abigail yuʼun ya xkomot ta spasel te bin jkʼaxel maba lek ya yil te Jehovae. Jich la yalbey te Abigail: «Bayeluc me yutsil te bin anopoj soc bayeluc me awutsil te haʼate, yuʼun la acomon te ma ba ya jmal chʼichʼ yoʼtic» (1 Samuel 25:18, 19, 23-35).

Kʼax chikan ta ilel te ma skʼan te ma jnaʼtik yalel wokol, jich bitʼil la spas te Nabale. Jaʼnix jich kʼalal ya kiltik te ay bin chopol ya xkʼotix ta pasel, jpastik tulan ta schajpanel te kʼope. Akʼa jkʼanbeytik Dios te bin la skʼanbey jtul te machʼa la stsʼibay te salmo te jich la yale: «Aʼbon jnop jtsahtayel jba soc pʼijil-oʼtanil» (Salmo 119:66).

Teme jich ya jpastike, te yantik yaniwan yilik te la jnaʼtik stsajtayel jbatik sok te la kakʼtik ta ilel spʼijil koʼtantik. Chikan teme ya yalik o maʼuke, jichniwan ya snopik bitʼil te David te jich la yale: «Bayeluc me yutsil te bin anopoj».