¿Akʼoponojbal ta lek te articuloetik yuʼun Te J-ilkʼinal ta toyol te mato jaluk slokʼelike? Ilawil teme ya xjuʼ ya awakʼbey sujtib te jojkʼoyeletik ini:

¿Bin ya skʼan ya spasik te superintendenteetik yuʼun circuito, te ancianoetik sok yantik te kʼalal ya yichʼik albeyel yuʼun te organisasion yuʼun Dios te ay bin ya skʼan pasele?

Yame skʼan ya schʼuunik spasel ta oranax te bin ya yal te organisasion yuʼun te Diose. Ya xjuʼ jich ya sjojkʼoybey sbaik: «¿Yabal jtijbey yoʼtan te hermanoetik swenta junuk yoʼtanik ya yakʼ sbaik ta stojol te Jehovae? ¿Yabal jchʼuun ta oranax te bintik ya yal te organisasion yuʼun Dios?» (w16.11, pajina 14).

¿Bin-ora la yichʼik chukel yuʼun Babilonia te j-abatetik yuʼun Dios?

Patil te lajik bael te jpuk-kʼopetike. Kʼunkʼun jajch ta chiknajel jtsojb winiketik te jaʼ ya swolik relijion. Te ajwalil sok te Iglesia la spasik tulan yuʼun ya xjil yuʼunik te relijion te schʼuunel Cristo ta skʼopik te kapal ta lotil. Jaʼnix jich la spasik tulan yuʼun ma xchiknaj yaʼtel te smelelil j-abatetik yuʼun Dios te jich kʼoemik bitʼil te trigo. Jaʼukmeto te kʼalal nopol ya sta te jaʼbil 1914 te smelelil j-abatetik yuʼun Dios jajchik ta lokʼel ta libre (w16.11, pajina 24 kʼalal ta 26).

¿Bin-a te «snaʼulanel te bintic scuenta chʼichʼ-baqʼuet» sok te «snaʼulanel bintic scuenta Espíritu»? (Romanos 8:6)

Te machʼa ya snaʼulan «te bintic scuenta chʼichʼ-baqʼuet» jaʼ te machʼa ya xbikʼtaj yoʼtan ta spasel te bin ya skʼan yoʼtan sok te spisil-ora jaʼ ya yalbey skʼoplal, jaʼ-abi ya x-akʼawan ta lajel. Te machʼa ya snaʼulan «bintic scuenta Espíritu» jaʼ ya xbajtʼ yoʼtan ta spasel te bin swenta Dios sok ya spas tulan yuʼun pajaluk spensar soke. Ya yakʼ te jaʼ ya xtojobtesbot spensar yuʼun te chʼul espiritu, jaʼ-abi ya yakʼ kuxlejalil sok lamalkʼinal (w16.12, pajina 11 kʼalal ta 14).

¿Bintik ya xjuʼ ya jpastik swenta ya jlamantestik te bitʼil ay bin ya snaʼulan koʼtantike?

Te nailuk ya jpastik te bin tulanxan skʼoplal, snaʼel bantito kʼalal ya xjuʼ kuʼuntik spasel, slokʼesel tiempo ta jujun kʼajkʼal yuʼun ya jkux koʼtantik jtebuk, smulanel te bintik pastiklanbil, te tseʼeluk koʼtantik spisil-ora, spasel ejercicio sok te ya xwayotik ta lek (w16.12, pajina 18 sok 19).

¿Bin yuʼun tulanto skʼoplal te pekʼel ya kakʼ jbatike?

Teme pekʼel ya kakʼ jbatik, joʼotiknix ya kil jbatik ta lek sok ya jnaʼtik te ay bintik ma xjuʼ kuʼuntik spasel. Ya skʼan ma xchʼay ta koʼtantik te ya xjuʼ ya kutsʼintik te yantik ta swenta te bin ya jpastik sok ma skʼan te ya x-och jnoptik te jaʼ kʼax mukʼxan jkʼoplaltik te bitʼil te yantike (w17.01, pajina 16).

¿Bin ya yakʼ ta ilel te la yichʼik tojobtesel yuʼun Dios te jtsojb jwolwanejetik ta sbabial siglo, jichnix bitʼil yak ta stojobtesel te machʼatik ochemik ta Jtsojb Jwolwanejetik ta ora ini?

Koltayotik yuʼun te chʼul espiritu ta yichʼbeyel swentail te bintik smelelil ya yal te Biblia, la yichʼik koltayel yuʼun te chʼul-abatetik ta swenta te scholel skʼop Dios sok jaʼ la smukʼulin yoʼtanik te tojobtesel yuʼun te sKʼop Dios. Jichnix ya xkʼot ta pasel ta ora ini (w17.02, pajina 24 kʼalal ta 26).

¿Bin ma skʼan ya xchʼay ta koʼtantik ta swenta te stojol kolel yuʼun spisil-ora mukʼ skʼoplal ya kiltik?

Chanchajp jaʼ ini: 1) machʼa la yakʼ te majtʼanile, 2) bin yuʼun la yakʼ, 3) bin la slokʼes ta yoʼtan yuʼun sok 4) bin yuʼun tuun kuʼuntik ta melel. Ya skʼan ya jnopilantik spisil-abi (wp17.1, pajina 4 kʼalal ta 6).

¿Yabal xjuʼ ya sjel te j-abat yuʼun Dios te bin staojix ta nopele?

Ya skʼan ya jkʼotestik ta pasel te bin ya kaltike, jaʼukmeto ayniwan bin-ora lek te ya jchaʼiltik te bin jtaojtikix ta nopel sok te ya kiltik teme ya skʼan ya jeltike. Kʼalal te yajwal Nínive la sujtes yoʼtan, te Dios la sta ta nopel te maba ya slajinix te lume. Teme ay bin ya xjelon o ay bin yachʼil ya kaʼiybeytik skʼoplal, yaniwan skʼan te ya jeltik te bin jtaojtikix ta nopele (w17.03, pajina 13 sok 14).

¿Bin ya xlokʼ kuʼuntik teme ya jpukbeytik skʼoplal te yantike?

Teme jich ya jpastik jaʼnax ya xbatsʼej te kʼope, te jkʼaxel ma lekuk te jich ya xkʼot ta pasele. Chikan teme ay rason kuʼuntik o maʼuk, teme ay bin ya kaltik te kʼux ta aʼiyel ta stojol yantik maʼyuk bin-ora ya xchajpaj te bin yak ta kʼoel ta pasele (w17.04, pajina 19).