1-3. ¿Bin ya skʼan ya yal te ya x-abatinotik sok spisil koʼtantik ta stojol Jehová? Ala junuk ejemplo.

JPISILTIK jmulawilotik sok ya xchʼayotik. Jaʼ yuʼun ya kalbeytik wokol te Jehová te la yakʼ stojol jkoleltik sok te jun yoʼtan ya spasbotik perdone. Teme pekʼel koʼtantik sok ya sujtes koʼtantik, ya xjuʼ ya jkʼanbeytik te ya spasbotik perdone. Ya xjuʼ ya schʼuun ta lek koʼtantik te ma jichuk ya spas ta jtojoltik te Jehová te bitʼil snujpʼ ya spasbotik ta skaj te jmulawilotike (Salmo 103:10). Jaʼukmeto te Jehová ya skʼan te ya x-abatinotik ta stojol sok spisil koʼtantik (1 Crónicas 28:9). ¿Bin-utʼil ya xjuʼ ya jpastik manchukme maba tojotike?

² Swenta ya jtabeytik sujtib te jojkʼoyel-abi, ya jpajbeytik skuxlejal te ajwalil Asa sok te skuxlejal te ajwalil Amasías. Schebalik ay bintik lek la spasik, jaʼukmeto aynix chʼayik, melel jmulawiletik. Manchukme jich-abi, te Biblia ya yal te bitʼil «te Asa jun yoʼtan [la yakʼ sba] ta stojol Jehová te jayeb cʼahcʼal cuxul» (2 Crónicas 15:16, 17; 25:1, 2; Proverbios 17:3). Spisil-ora te Asa sok spisil yoʼtan la spas tulan swenta lek ya x-ilot yuʼun te Jehová  (1 Crónicas 28:9). Yan te Amasías ma jichuk la spas stukel. Maba la yichʼ ta mukʼ Dios sok spisil yoʼtan. Patil te kʼalal te Amasías la stsal te skontratak te Diose, la yichʼ bael te lokʼombaetik yuʼunik sok jajch yichʼtiklan ta mukʼ (2 Crónicas 25:11-16).

³ Te machʼa ya yichʼ ta mukʼ te Jehová sok spisil yoʼtan kʼux ya yaʼiy ta yoʼtan ta spisil yip sok yoʼtanuk ya yichʼ ta mukʼ ta sbajtʼelkʼinal. Ta Biblia te kʼopil oʼtanil jaʼ bayal buelta ya yalbey skʼoplal te bin yilel jtaleltik ta jkʼubuliltik. Tey ochem skʼoplal te jpensartik, bin ya jmulantik, bin ya jnoptik spasel ta pajel chaʼbej sok te bintik ya stij koʼtantik ta swenta te bin ya jpastike. Manchukme jmulawilotik ya xjuʼ ya kichʼtik ta mukʼ te Jehová sok spisil koʼtantik. Ya x-abatinotik ta stojol yuʼun jich ya skʼan koʼtantik, ma yuʼunuk sujbilotik o yuʼun-nax kʼayemotik ta spasel (2 Crónicas 19:9).

4. ¿Bin ya jnopbeytik skʼoplal ta articulo ini?

⁴ Swenta ya xkʼotxan ta koʼtantik bin ya skʼan ya yal te ya x-abatinotik sok spisil koʼtantik ta stojol Jehová ya kiltik bin la spas te Asa, Josafat (Jehosafat), Ezequías sok te Josías. Te winiketik-abi, jaʼik ajwaliletik yuʼun Judá te jun yoʼtan la yakʼ sbaik ta stojol te Diose. Lek ilotik yuʼun Dios manchukme ay banti chʼayik. Te Dios jich la yil te abatinik ta stojol sok spisil yoʼtanik. ¿Bin yuʼun te jich la yile? ¿Bin-utʼil ya xjuʼ ya jtʼunbeytik stalel te ajwaliletik-abi? Kiltik.

5. ¿Bin la spas te Asa te kʼalal och ta ajwalile?

⁵ Te Asa jaʼ te yoxebal ajwalil och te kʼalal sxatojix sba-a te nasion Israel te jich lokʼ te mantaltesel yuʼun Israel sok te mantaltesel yuʼun Judá. Kʼalal te Asa och ta ajwalil ta Judá la slajin te lotil yichʼel ta mukʼ dios sok spisil te mulwej ya spasik te kʼax ilobtik sba ta spisil te kʼinal te bantito kʼalal swentainoje. La slajin te lokʼombaetik te ichʼbil ta mukʼ yuʼun te ants winiketik sok la slokʼes ta templo te winiketik te ya spasbey sbaik mulile. Jaʼnix jich «la sloqʼues ta snan-ajwalil te Maaca te schuchuʼmeʼel, yuʼun spasoj slocʼomba Asera» te xiʼbantik sbae (1 Reyes 15:11-13). Jaʼnix jich te Asa la stijbey yoʼtan te slumal «te acʼa slehic te Jehová» sok te «acʼa scʼohtesic ta spasel te mandariletic yuʼune». La spas te bantito kʼalal juʼ yuʼun ta skoltayel te yantik ta yichʼel ta mukʼ te Diose (2 Crónicas 14:4).

6. ¿Bin la spas te Asa kʼalal te etiopiaetik la yochintayik te Judá?

⁶ Ta sjajchibal te yaʼtel bitʼil ajwalil te Asa, ayin lamalkʼinal ta Judá lajuneb jaʼbil. Patil tal yochintayik Judá jun miyon soldado etiopiaetik te schajpanoj sbaik ta lek sok 300 karretaetik yuʼun guerra (2 Crónicas 14:1, 6, 9, 10). ¿Bin la spas te Asa? La skʼanbey koltayel te Jehová swenta ya stsalawanik ta guerra, melel schʼuunej sok spisil yoʼtan te ya skoltay te lum yuʼune (kʼopona te 2 Crónicas 14:11). Ta cheʼoxeb buelta te Jehová la yakʼ tsalawan ta guerra te lum yuʼune, manchukme te ajwaliletik yuʼun maba jun yoʼtan la yakʼ sbaik ta stojol. Jich la yakʼ ta ilel Jehová te jaʼ te smelelil Diose (1 Reyes 20:13, 26-30). Jaʼukmeto ta  yorail-abi, te Jehová la skoltay te lum yuʼun ta skaj te bitʼil te Asa la yakʼ smukʼul yoʼtan ta stojol. Te Jehová la yaʼiybey skʼop, melel la skoltay ta stsalel te etiopiaetike (2 Crónicas 14:12, 13). Ta patil bael, te Asa ay bin kʼax maba lek la spas, jaʼ la skʼanbey koltayel te ajwalil yuʼun Siria ma jaʼuk la skʼanbey koltayel te Jehová (1 Reyes 15:16-22). Manchukme jich la spas, te Jehová la yil te kʼux aʼiybil ta oʼtanil yuʼune. «Te Asa jun yoʼtan [la yakʼ sba] ta stojol Jehová te jayeb cʼahcʼal cuxul». ¿Bin-utʼil ya xjuʼ ya jkʼayinbeytik te lekil ejemplo yuʼune? (1 Reyes 15:14).

7, 8. ¿Bin-utʼil ya xjuʼ ya jtʼuntik te ejemplo yuʼun te Asa?

⁷ ¿Bin-utʼil ya jnaʼtik teme yakotik ta abatinel ta stojol Jehová sok spisil koʼtantik? Ya xjuʼ ya jojkʼoybey jbatik ini: ¿Yabal jchʼuunbey skʼop te Jehová manchukme wokol ya kaʼiy spasele? ¿Aybal bin ya jkʼan ya jpas-euk swenta maʼyuk yabakul te kongregasione? Akʼa jnop kaʼiytik te la skʼan te ma xiw yoʼtan te Asa te kʼalal la slokʼes te schuchuʼ ta yaʼtel jich bitʼil «snan-ajwalil». Ay baeltik ya skʼan te ma xiw koʼtantik jich bitʼil te Asa. Jich bitʼil ¿bin ya jpastik teme ay jtul ta jfamiliatik o jtul kamigotik la spas jun mulil te ya yichʼ lokʼesel ta kongregasion ta skaj te ma la sujtes yoʼtane? ¿Yatobal jkʼopon jbatik sok? ¿Binwan ya yalbotik te koʼtantik te ya jpastike?

⁸ Jich bitʼil te Asa, ayniwan ya kaʼiytik te spisilik ayik ta jkontratik. Te joʼtaktik ta nop jun o maestroetik yaniwan slabanotik ta skaj te testigootik yuʼun Jehová. O te joʼtaktik ta aʼtel yaniwan slabanotik ta skaj te ya jkʼantik bakasion swenta ya xbootik ta mukʼul tsoblej o te ma x-aʼtejotikxan bayal hora yuʼun spaselxan ganar takʼin. Te kʼalal jich ya xkʼot ta pasele, akʼa smukʼulin koʼtantik Dios jich bitʼil la spas te Asa. Jkʼopontik te Jehová, mame xiw koʼtantik sok jpastikxan te bin leke. Juluk ta koʼtantik te ya yakʼbotik yip koʼtantik te Jehová jich bitʼil la spas ta stojol te Asa.

9. ¿Bin yuʼun lek ya yilotik te Jehová te kʼalal ya jcholtik te skʼope?

⁹ Te Asa ma jaʼuknax bajtʼ ta yoʼtan yilel te bin yak ta kʼaxel ta stojol. Jaʼnix jich la snop bin-utʼil ya xjuʼ ya stijbey yoʼtan te yantik ta sleel te Jehová. Jaʼnix jich te joʼotik ya jtijbeytik yoʼtan te ants winiketik ta yichʼel ta mukʼ te Jehovae. Ya yilotik te kʼalal ya kalbeytik skʼoplal ta stojol te yantike. Ta melel te Jehová ya x-akʼbot bayal stseʼelil yoʼtan kʼalal ya jcholtik te skʼop ta skaj te kʼux ta koʼtantik sok te ay skʼoplal ta koʼtantik te ants winiketik sok te bin ya xkʼot ta stojolik ta pajel chaʼbeje.

10, 11. ¿Bin-utʼil ya xjuʼ ya jtʼuntik te ejemplo yuʼun te Josafat?

¹⁰ Te Asa ayin jtul snichʼan te Josafat sbiil. Te Biblia ya yal ta stojol te Josafat te «la stʼumbe sbe te Asa te state» (2 Crónicas 20:31, 32). ¿Bin-utʼil la spas? La stʼunbey stalel te state sok la stijbey yoʼtan te lum yuʼun Dios te manchuk ya skom sbaik ta yichʼel ta mukʼ te Jehovae. La stikun chaʼoxtul winiketik ta lumetik yuʼun te mantaltesel yuʼun Judá swenta ya yakʼbeyik snop te lum yuʼun Dios bin ya yal «te libro yuʼun te ley yuʼun Jehová» (2 Crónicas 17:7-10). Te Josafat jaʼnix  jich bajtʼ ta norte yuʼun te skʼinal te mantaltesel yuʼun Israel, jaʼto kʼalal ta wits Efraín swenta ya skoltay te ants winiketik ta yichʼel ta mukʼ yan buelta te Jehová (2 Crónicas 19:4). Te Josafat jaʼ jun ajwalil te sok «spisil yoʼtan la sle te Jehová» (2 Crónicas 22:9).

¹¹ Ta ora ini te Jehová ya skʼan te ya xnaʼbot sba yuʼun spisil te ants winiketik ta swolol Balumilal, te joʼotik ya xjuʼ ya jkoltaylantik ta snaʼbeyel sba. Akʼa jojkʼoybey jbatik ini: «¿Yabal jpas tulan ta scholel skʼop Dios ta jujun u? ¿Yabal jkʼan te ay machʼa ya jnojptes ta skʼop Dios yuʼun jaʼnix jich ya x-abatin ta stojol te Diose? ¿Yabal jkʼopon Dios yuʼun ya skoltayon ta stael?». Te Jehová ya xjuʼ ya skoltayotik teme ya jpastik tulan ta sjachel jun nojptesel yuʼun Biblia. ¿Yabal jkʼantik te ay machʼa ya kakʼbeytik nojptesel yuʼun Biblia manchukme maʼyukix lek tiempo ya xjil kuʼuntik-a? Juluk ta koʼtantik te la spas tulan te Josafat ta skoltayel te yantik ta yichʼel ta mukʼ yan buelta te Jehovae. Jaʼnix jich te joʼotik ya xjuʼ ya jpastik tulan ta skoltayel te machʼatik yijkʼitayojik scholel skʼop Dios. Te ancianoetik ya schap sbaik ta yulaʼtayel sok skoltayel te machʼatik lokʼesbilik ta kongregasion te laniwan yijkʼitayikix spasel te mulile.

12, 13. 1) ¿Bin la spas te Josafat te kʼalal xiwe? 2) ¿Bin yuʼun ya skʼan te ya jtʼuntik te ejemplo yuʼun te Josafat?

¹² Ta jun buelta, ipal soldadoetik kʼan yakʼbeyik guerra te Judá. Te Josafat la stʼun te lekil ejemplo yuʼun stat sok la smukʼulin yoʼtan te ya xkoltayot yuʼun te Jehová (kʼopona te 2 Crónicas 20:2-4). Te Josafat bayal xiw yuʼun. Jaʼ yuʼun la skʼanbey koltayel te Jehová sok la yalbey te ma xjuʼ yuʼun sok te slumal stsalbelik te skontratakike. Jaʼnix jich la yalbey te ma snaʼik bin ya spasik. Te Josafat schʼuunej sok spisil yoʼtan te ya xkoltayotik yuʼun Jehová. Jich la yalbey te Jehová: «Cacʼoj jsitcotic ta atojol» (2 Crónicas 20:12).

¹³ Jich bitʼil te Josafat ayniwan bin-ora ma jnaʼtik bin-utʼil ya kakʼbeytik schajpajibal jun kʼop sok yato xiwotik yuʼun (2 Corintios 4:8, 9). Jaʼukmeto juluk ta koʼtantik te bin la spas te Josafat. La stejkʼan sba ta yolil te lum yuʼun ta skʼoponel Dios, la yalbey ta jamal te Jehová te ma xjuʼ ya sitintayik ta stukelik te skontratakike (2 Crónicas 20:5). Te machʼatik jolol ta familia ya xjuʼ ya stʼunbeyik te ejemplo yuʼun te Josafat. Kʼalal ayat ta wokolil sok ma xa anaʼ bin ya apas, kʼanbeya te Jehová te yakuk skoltayat sok te afamilia. Mame xkʼexawat ta skʼanbeyel koltayel te Jehová ta sit te afamiliae, melel jich ya yilik te jkʼaxel ya smukʼulin awoʼtan te Jehová. Te Josafat koltayot yuʼun te Jehová, jaʼnix jich ya skoltayat-euk.

14, 15. ¿Bin-utʼil la yakʼ ta ilel te Ezequías te jkʼaxel ya smukʼulin yoʼtan Jehová?

¹⁴ Jaʼnix jich te ajwalil Ezequías la spas tulan ta yamigoinel ta lek te Jehová. Jich la spas manchukme te stat la schʼuun lokʼombaetik te jich maba lek ejemplo akʼbot yil yuʼun. Te Ezequías «la sloqʼueslan te toyol awilaletic, la swuyticlan te chʼultesbil tonetic, la stsʼeticlan te slocʼomba Asera, soc la slajin te slocʼomba chan pasbil ta bronce te spasoj te Moisés», melel te israeletik yakik ta yichʼel ta mukʼ. Te Ezequías abatin ta stojol Jehová sok spisil yoʼtan sok «la schʼuhun te mandariletic aʼbot yuʼun Jehová te Moisés» (2 Reyes 18:1-6).

¹⁵ Te kʼalal ay ta ajwalil-a te Ezequías, te ipal soldadoetik yuʼun Asiria la yochintayik te Judá sok la yalik te ya slajinik ta jkʼaxel te Jerusalén. Te ajwalil yuʼun Asiria la slaban te Jehová sok la spas tulan yuʼun ya yakʼ sba  ta kʼabal te Ezequías. Ta yorail-abi te kʼax xiʼbantik sba te bin yak ta kʼoel ta pasele, te Ezequías la smukʼulin yoʼtan ta jkʼaxel te Jehová sok la skʼanbey koltayel. Snaʼoj te jaʼ bayalxan yuʼel te Dios te bitʼil te asiriaetike sok te ya xjuʼ ya skoltay te lum yuʼune (kʼopona te sjun Isaías 37:15-20). Te Dios la yaʼiybey skʼop te Ezequías te jich la stikun tal jtul chʼul-abat ta smilel te 185,000 mil ta tul soldadoetik asiriaetike (Isaías 37:36, 37).

16, 17. ¿Bin-utʼil ya xjuʼ ya jtʼuntik te ejemplo yuʼun te Ezequías?

¹⁶ Ta patil bael, tsakot ta chamel te Ezequías sok kʼan lajuk yuʼun. Ta swenta te bin tulan yak ta kʼaxel ta stojole, la skʼanbey wokol te Jehová te akʼa juluk ta yoʼtan te bitʼil jun yoʼtan yakʼoj sba ta stojol sok te yakuk xkoltayot yuʼune (kʼopona te 2 Reyes 20:1-3). Te Jehová la yaʼiybey skʼop te Ezequías te jich la slekubtes. Ta swenta te bin jnopojtik ta Biblia, ya jnaʼtik te ma spasix milagro te Jehová ta ora ini swenta ya slekubtesotik o swenta ya snajtʼubtes te jkuxlejaltike. Jaʼukmeto jich bitʼil Ezequías, ya xjuʼ ya smukʼulin koʼtantik te ya skoltayotik te Jehová. Ya xjuʼ ya kalbeytik: «Ya calbat wocol, Jehová, te yacuc anaʼ te ta smelelil behenemon ta atojol soc ta spisil coʼtan, soc jpasoj te bintic lec awoʼtan yuʼun». ¿Schʼuunejbal koʼtantik te spisil-ora ya skanantayotik te Jehová, jaʼnix jich te kʼalal ayotik ta chamele? (Salmo 41:3).

¹⁷ Jaʼnix jich te ejemplo yuʼun te Ezequías ya xjuʼ ya skoltayotik ta yilel teme ay bin ya skʼan ya kijkʼitaytik spasel te ya yakʼ xnamajotik ta stojol Jehová sok te ma xyakʼbotikix tiempo ta spasel te yaʼtele. Jich bitʼil, bayal ants winiketik ya stuuntesik te redes sociales o yantikxan ta Internet yuʼun ya skʼopon sbaik. Bayal ta tul ya xjelawik ta yichʼel ta mukʼ yantik te jich ya yilik bitʼil diosetik yuʼunik. Jkʼaxel ya yichʼik ta mukʼ te machʼatik kʼax naʼbilik sba ta balumilal sok yantik ants winiketik te maba ya snaʼbeyik sbae. Ya skʼasesik bayal tiempo ta skʼoponel ta swenta skuxlejal te ants winiketik-abi sok ta yilel te fotoetik yuʼunike. Ta melel, manix chopoluk-a te ya jtuuntestik te aʼtejibaletik-abi yuʼun ya xkʼopojotik sok jfamiliatik o kamigotaktik. Jaʼukmeto te redes sociales ya xjuʼ ya yakʼ te ya jchʼaytik bayal tiempo. Yaniwan xjuʼ te kʼax mukʼ jkʼoplal ya kaʼiy jbatik teme bayal machʼatik ya yalik te ya smulanik te bin ya jtsʼibaytik sok te fotoetik ya kakʼtik ta Internet. O ya xjuʼ x-ilinotik teme ya kiltik te ay chaʼoxtul te maba ya yilikix te bin ya kakʼtik ta Internet. Te kʼalal jich ya xkʼot ta pasel, te ejemplo yuʼun te jpuk-kʼop Pablo, Aquila sok te Priscila ya xjuʼ ya skoltayotik. ¿Jichbal ya jkuytik te la skʼasesik bayal tiempo ta jujun kʼajkʼal ta snaʼel spisil te bin ya spasik te yantik, jaʼtoxan te machʼatik maba ya yichʼik ta mukʼ te Diose? Te Biblia ya yal ta stojol te Pablo te «yaʼtelinej yalel scʼop Dios a». Jaʼnix jich ya yal ta stojol te Aquila sok te Priscila te yakʼoj sbaik ta yakʼel ta naʼel ta stojol yantik ants winiketik «bin utʼil ay te be yuʼun Dios» (Hechos 18:4, 5, 26). Ya xjuʼ jich ya jojkʼoybey jbatik: «¿Yabal jtsajtay jba swenta maba ya xjelawon ta yichʼel ta mukʼ yantik ants winiketik te jich ya kil bitʼil diosetik kuʼun? ¿Yabal jpas tulan swenta maba bayal tiempo ya jkʼases ta spasel te bin maʼyuk skʼoplale?» (kʼopona te sjun Efesios 5:15, 16).

18, 19. ¿Bin-utʼil ya xjuʼ ya jtʼuntik te ejemplo yuʼun te Josías?

¹⁸ Te ajwalil Josías jaʼnix jich la schʼuunbey smantal te Jehová sok «spisil yoʼtan»  (2 Crónicas 34:31). Te Josías talem ta stsʼumbal te Ezequías. Kʼalal jchʼielto-ae «hahch ta slehel te Dios yuʼun te David». Te kʼalal jtab yaʼbilal-a, jajch slajin te lokʼombaetik ta Judá (kʼopona te 2 Crónicas 34:1-3). Te Josías jaʼ la spasxan tulan te bitʼil yantik ajwaliletik ta Judá yuʼun lek ya x-ilot yuʼun te Jehová. Ta jun buelta, te mukʼul sacerdote la sta ta templo te libro yuʼun te Ley yuʼun Dios. Jaʼniwan te libro te jaʼnix stsʼibayoj te Moisés. Kʼalal te secretario la skʼoponbey yaʼiy te Josías, kʼot ta yoʼtan te aytoxan bin ya skʼan ya spas swenta lekxan ya x-abatin ta stojol te Jehová. Te Josías jaʼnix jich la yalbey te yantik te jichuk ya spasik-euke. Te bin lokʼ yuʼun-ae, jaʼ te jayeb kʼajkʼal kuxine, «ma ba la yihquitayic te Jehová» te ants winiketik (2 Crónicas 34:27, 33).

¹⁹ Te Josías jaʼ smam te ajwalil Manasés te la sujtes yoʼtan yuʼun te smule. Te Josías laniwan snop ta swenta te bin kʼax ta skuxlejal smamuch te bitʼil te Jehová ya skʼan ya spas perdon. Jaʼnix jichat achʼix kerem ya xjuʼ ya atʼunbey stalel te Josías sok ya juʼ ya anaʼbeyxan sba ta lek te Jehovae. Jaʼnix jich ay bin ya xjuʼ ya anop ta stojol te machʼatik ayix skolelik ta afamilia sok ta kongregasion. Ya xjuʼ ya yalbatik spisil te bintik lek spasoj te Jehová ta stojolik. Jultesa ta awoʼtan bin-utʼil la yaʼiy sba te Josías te kʼalal la yaʼiy bin ya yal te Ley yuʼun te Diose. Ta oranax ay bintik la sjel, melel yoʼtan ya spas te bin lek ya yil te Jehová. Jaʼnix jich te jaʼat awoʼtanuk ya achʼuunbey skʼop te Jehová teme ya akʼopon te Biblia. Spasel-abi ya yakʼbey yip te bitʼil awamigoinej aba sok te Diose sok ya yakʼbat stseʼelil awoʼtan. Jaʼnix jich ya stijbat awoʼtan ta yalbeyel skʼoplal te Jehová ta stojol yantik (kʼopona te 2 Crónicas 34:18, 19). Te kʼalal ya anop te Biblia yaniwan xkʼot ta awoʼtan te ya skʼan te ay bin ya ajel yuʼun lekxan ya x-abatinat ta stojol te Diose. Teme jiche, pasa tulan ta sjelontesel te bin jich ya skʼan pasel jich bitʼil la spas te Josías.

20, 21. 1) ¿Aybal banti pajal la spasik te chaneb ajwaliletik te la kilbeytik skʼoplale? 2) ¿Bin ya jnoptik ta yan articulo?

²⁰ ¿Bin ya yakʼ jnoptik te ejemplo yuʼun te chaneb ajwaliletik yuʼun Judá te abatinik sok spisil yoʼtanik ta stojol te Jehová? Te la spasik tulan ta yichʼel ta mukʼ te Jehová te jayeb kʼajkʼal kuxinike, sok te la spasik tulan swenta lek ya x-ilotik yuʼun. La yakʼ smukʼul yoʼtanik ta stojol te kʼalal la sitintay sbaik sok skontratakik te bayal yipik. Te bin mukʼxan skʼoplal jaʼ te abatinik ta stojol Jehová ta skaj te kʼux ta yoʼtanike.

²¹ Manchukme jmulawiletik sok ay chʼayik te chaneb ajwaliletik-abi, lek ilotik yuʼun te Jehová. La yil te bin ay ta yoʼtanik sok la yil te kʼux aʼiybil ta yoʼtanik. Jaʼnix jich te joʼotik jmulawilotik sok ya xchʼayotik. Jaʼukmeto te Jehová tseʼel yoʼtan te kʼalal ya yil te sok spisil koʼtantik ya x-abatinotik ta stojol. Ta yan articulo ya kiltik bin ya xjuʼ ya jnoptik ta swenta te banti chʼayik te ajwaliletik-abi.