1, 2. 1) ¿Machʼatik nail kʼot ta pasel ta stojolik te bin ya yal te Mateo 24:12? 2) ¿Bin-utʼil ya xchiknaj ta libro yuʼun Hechos te jteb ma spisiluk te jchʼuunjeletik ta sbabial siglo spisil-ora tulan ayin te skʼuxul yoʼtanike? (Ilawil te lokʼomba te sjajchibal te articulo).

KʼALAL xtaluk ta Balumilal te Jesús la yal bintik ya xkʼot ta pasel ta «slajibal te bintik swenta balumilale». Jich bitʼil, la yal te «bayel machʼatic ya xpehcʼaj te scʼuxul yoʼtanique» (Mateo 24:3, TNM; 24:12) (ilawil te recuadro «¿Bin ya skʼan ya yal?»). Te kʼopetik-abi, jaʼ nail kʼot ta pasel ta stojol te judioetik ta sbabial siglo. Jamal ya yalik stukelik te jaʼik slumal te Dios, jaʼukmeto jaʼiknix la yakʼik pejkʼajuk te skʼuxul yoʼtanik.

² Jaʼukmeto jteb ma spisil te yantik j-abatetik yuʼun Dios ta yorail-abi yan yilel la yakʼik ta ilel stalelik. Jun yoʼtanik la yakʼ sbaik «ta yalbeyel scʼoblal te Jesucristo» sok ta yakʼel ta ilel te kʼux ta yoʼtanik te Diose, te yermanotakik sok te machʼatik mato snopojik te smelelile. Te j-abatetik yuʼun Dios-abi spisil-ora tulan ayin te skʼuxul yoʼtanike (Hechos 2:44-47; 5:42). Mel-oʼtantik sba te bitʼil chaʼoxtul jchʼuunjeletik ta sbabial siglo maba la spasik tulan yuʼun ma xpejkʼaj te skʼuxul yoʼtanik ta stojol te Diose. ¿Bin-utʼil ya jnaʼtik?

3. ¿Binwan-a te la yakʼ pejkʼajuk te skʼuxul yoʼtanik chaʼoxtul jchʼuunjeletik?

 ³ Te Jesús la yakʼbey snaʼ te jchʼuunjeletik te nainemik ta Éfeso te yijkʼitayojik te skʼuxul yoʼtanik te ay yuʼunik ta sjajchibale (Apocalipsis 2:4). Jajchniwan snopbeyik stalel te ants winiketik te joytaybilik yuʼunike, te jaʼnax baem ta yoʼtanik stael o spasel te bin ya skʼanik ta stukelike (Efesios 2:2, 3). Te Éfeso jaʼ jpam lum-a te kʼuleje. Te yajwale bayal skʼoplal yuʼunik te yaʼiybeyel yutsilal lekil kuxlejalil sok stael te bintik bayal yutsile. Jaʼnix jich bayal machʼatik kʼayemik ta spasel mulwej sok maba ya yichʼik ta mukʼ te leyetik yuʼun te Diose. Jaʼ bayalxan skʼoplal ya yilik smulanel yutsil te kuxlejalile, ma jaʼuk te jun yoʼtanik ya yakʼik ta ilel skʼuxul yoʼtanik ta stojol Dios sok ta stojol yantik ants winiketik.

4. 1) ¿Bin yuʼun te pejkʼajem te kʼuxul oʼtanil ta jkʼajkʼaleltike? 2) ¿Bin ya xbajtʼ jnoptik?

⁴ Te bin la yal te Jesús te ya xkʼot ta pasel ta swenta te kʼuxul oʼtanile jaʼnix jich yak ta kʼoel ta pasel ta ora ini. Ta jujun kʼajkʼal yak ta pejkʼajel te skʼuxul yoʼtanik ta stojol Dios te ants winiketike. Ma jaʼuk ya sleik te Dios yuʼun ya schajpan te tulan wokoliletik ta balumilal, bayal miyon ta tul jaʼ ya sleik koltayel ta stojol organisasionetik yuʼun te winike. Te bitʼil jich ya spasike ya yakʼ xpejkʼajxan te skʼuxul yoʼtanike. Jaʼnix jich te skʼuxul yoʼtanik te j-abatetik yuʼun Dios ya xjuʼ xpejkʼaj jich bitʼil kʼot ta pasel ta stojol te jchʼuunjeletik ta namey ta Éfeso. Jaʼ yuʼun kiltik bin-utʼil ya xjuʼ te spisiluk-ora tulanuk te skʼuxul koʼtantik ta stojol Jehová, ta swenta te smelelil yuʼun te Biblia sok ta stojol te kermanotaktike.

5. ¿Bin yuʼun ya skʼan te kʼux ta koʼtantik te Diose?

⁵ ¿Machʼa ya skʼan te kʼuxukxan ya kaʼiy ta koʼtantik? Te Jesús jich la yal: «Cʼux laj me xawaʼiy te Cajwaltic Dios ta spisil awoʼtan, ta spisil achʼuhlel soc ta spisil apʼijil. Ha te shahchibal mandaril soc te ha mucʼ scʼoblal» (Mateo 22:37, 38). Te skʼuxul koʼtantik ta stojol Jehová ya stij koʼtantik ta schʼuunbeyel te mantaliletik yuʼune, te yakuk xkujch kuʼuntik te wokoliletik sok te ya jpʼajtik te bintik chopole (kʼopona te sjun Salmo 97:10). Jaʼukmeto te Satanás sok te balumilal yuʼune ya spasik tulan yuʼun ya spejkʼanbotik sok yuʼun ya slajinbotik te skʼuxul koʼtantik ta stojol Dios.

6. ¿Bin ya xkʼot ta pasel kʼalal te ants winiketik ma kʼuxukix ya yaʼiyik ta yoʼtanik te Diose?

⁶ Te ants winiketik te ayik ta swenta balumilal yan snopjibal yuʼunik ta swenta te kʼuxul oʼtanile. «Ay machʼatic te ha nix cʼux ya yaʼiy sbahic», ma jaʼuk kʼux ya yaʼiyik ta yoʼtanik te Diose (2 Timoteo 3:2). Jaʼ ya xbajtʼ ta yoʼtanik spasel «te bin ya smulan te baqʼuet scuenta mulil, te bin ya smulan yilel te jsitic, soc te toybahil» (1 Juan 2:16). Te jpuk-kʼop Pablo la yal ta jamal bin ya xjuʼ xkʼot ta jtojoltik teme jaʼ ya xbajtʼ ta koʼtantik spasel te bin joʼotiknax ya jkʼantike. Jich la yal: «Te snaʼulanel te bintic scuenta chʼichʼ-baqʼuet, ha ya xʼacʼotic ta lajel yuʼun». ¿Bin yuʼun te ya x-akʼawan ta lajele? Melel te machʼatik jaʼ ya xbajtʼ ta yoʼtanik spasel te bin ya skʼanik ta stukelike kontra ya xkʼotik ta stojol te Diose (Romanos 8:6, 7). Te machʼatik ya yakʼ sbaik ta sleel takʼin sok ta spasel te bin ya skʼan yoʼtanik ta swenta yalel ta mulil jkʼaxel maʼyuk bin ya staik yuʼun (1 Corintios 6:18; 1 Timoteo 6:9, 10).

7. ¿Bintik-a te ya snopik chaʼoxtul ants winiketik ya xjuʼ ya yutsʼin te j-abatetik yuʼun Dios ta jkʼajkʼaleltike?

⁷ Bayal te machʼatik ma schʼuunik te ay Dios, te machʼatik ya yalik te ma xjuʼ ta chʼuunel te yuʼun-nix ay-a te bin ma chikanuk ta ilel sok te machʼatik ya schʼuunik te evolución ya spasik tulan yuʼun jich ya xlaj te skʼuxul yoʼtanik te ants winiketik ta stojol Dios o maba ya schʼuunikix te yuʼun-nix ay-a te Diose. Ya yakʼik ta naʼel te jaʼnax te machʼa maba pʼijik o maba pʼijubtesbilik ya schʼuunik te ay Jpaswaneje. Jaʼnix jich ay machʼatik te jaʼ ya yichʼikxan ta mukʼ te pʼijil winiketik te bitʼil Jehová te jaʼ spasoj spisile (Romanos  1:25). Teme ya xjajch jchʼuuntik te bintik ya yakʼik ta nopel te winiketik-abi ya xjuʼ xlaj yip te bitʼil kamigoinej jbatik sok te Diose sok te skʼuxul koʼtantik ta stojole (Hebreos 3:12).

8. 1) ¿Bin ya xjuʼ ya schebajtesbey yoʼtan te j-abatetik yuʼun te Jehová? 2) ¿Bin mukʼul oʼtanil ya yakʼbotik te Salmo 136?

⁸ Ta skaj te wentainbil yuʼun Satanás te balumilale ya xjuʼ te ay bin-ora ya xchebaj koʼtantike (1 Juan 5:19). Jaʼukmeto teme ya kakʼ xchebaj koʼtantike, ya xjuʼ xpejkʼaj te schʼuunel koʼtantik sok te skʼuxul koʼtantik ta stojol te Diose. Ayniwan jwokoltik ta skaj te maʼyuk jtakʼintik, ayotik ta chamel o ta skaj te meʼel mamalotikix. O yaniwan jmel koʼtantik ta skaj te ay bintik maba ya xjuʼ kuʼuntik spasel ta lek te bitʼil ya jkʼantike. O ayniwan bin ya schebajtes koʼtantik ta skaj te maba jich kʼot ta lokʼel ta jkuxlejaltik te bitʼil jnopojtik-ae. Chikan bin-a te ya jsitintaytik, mame ayuk bin ora ya skʼan ya jnoptik te la yijkʼitayotikix te Jehová. Juluk ta koʼtantik te bin ya yal te Salmo 136:23 te ya yakʼ mukʼul oʼtanile. Jich ya yal ta stojol Jehová: «Te machʼa la snaʼotic te cʼalal ayotic ta wocol a, como sbahtel qʼuinal ay scʼuxul yoʼtan». Ya xjuʼ ya jchʼuuntik sok spisil koʼtantik te ya yaʼiy jkʼoptik te Jehová sok te ya sutbotik jkʼoptik te kʼalal ya kalbeytik wokol te yakuk skoltayotike (Salmo 116:1; 136:24-26).

9. ¿Bin koltayot yuʼun te Pablo swenta spisiluk-ora tulanuk te skʼuxul yoʼtan ta stojol te Diose?

⁹ Te jpuk-kʼop Pablo bayal ya snaʼulan-a bin-utʼil ya xkoltayot yuʼun te Jehová, jich la sta yip yoʼtan. Jich la stsʼibay: «Ha jcoltaywanej cuʼun te Cajwaltic; ma ba ya jxiʼ te bin ya xhuʼ ya spasbon te winique» (Hebreos 13:6). Te smukʼul yoʼtan ta stojol Jehová te Pablo koltayot ta sitintayel te wokoliletik la stae. Manchukme tulan wokolil kʼax ta stojol, maʼyuk bin-ora chʼay te smukʼul yoʼtan ta stojol Jehová. Te kʼalal chukul-ae la skoltay te yermanotak, la stsʼibaybey bael kartaetik te ya yakʼik mukʼul oʼtanil (Efesios 4:1; Filipenses 1:7; Filemón 1). Manchukme bayal wokolil kʼax ta stojol maba la yijkʼitay te bitʼil sok spisil yoʼtan kʼux ta yoʼtan te Jehová. La yakʼ smukʼul yoʼtan ta stojol «te Dios te ya yacʼ spisil mucʼul-oʼtanil, ha te machʼa ya smucʼubtes qʼuinal caʼiytic ta spisil te jwocoltic» (2 Corintios 1:3, 4). ¿Bin-utʼil ya xjuʼ ya jtʼuntik te ejemplo yuʼune?

10. ¿Bin ya xjuʼ ya jpastik swenta spisiluk-ora tulanuk te skʼuxul koʼtantik ta stojol te Jehová?

 ¹⁰ Te Pablo ay bin la yalbey skʼoplal te ya xjuʼ ya skoltayotik swenta tulanuk te skʼuxul koʼtantik ta stojol Dios. Jich la yal: «Aʼtelinahic me scʼoponel Dios». Ta patil jich la stsʼibay: «Ma me xquehchajex ta scʼoponel Dios» (1 Tesalonicenses 5:17; Romanos 12:12). ¿Bin yuʼun ya yakʼbey yip te bitʼil kamigoinej jbatik sok te Dios te skʼoponele? Jaʼ ta skaj te ya kakʼbeytik snaʼ te Jehová te bin ya jkʼantike (Salmo 86:3). Kʼalal ya kalbeytik te jTatik te ay ta chʼulchan bin ya jnoptik sok bin yaʼiyel ya kaʼiy jbatik ta skʼubulil koʼtantik ya xnoptsajotikxan ta stojol (Salmo 65:2). Jaʼnix jich te skʼuxul koʼtantik ta stojol ya yichʼxan yip kʼalal ya kiltik te ya sut te jkʼoptike. Jich ya jnaʼtik te «nopol ay te Jehová ta stojol spisil machʼatic ya scʼoponic» (Salmo 145:18). Teme ya smukʼulin koʼtantik te kʼuxotik ta yoʼtan te Jehová sok te ya skoltayotike jich ya xjuʼ kuʼuntik sitintayel te wokoliletik ya jtatik ta ora ini sok ta pajel chaʼbej.

11, 12. ¿Bin ya xjuʼ ya jpastik yuʼun kʼux-xan ta koʼtantik te smelelil yuʼun te Bibliae?

¹¹ Te j-abatotik yuʼun Dios kʼux ta koʼtantik te smelelile. Te smelelile ay ta sKʼop te Diose. Te Jesús jich la yalbey te sTate: «Ha smelelil cʼop te acʼope» (Juan 17:17). Jich yuʼun teme ya jkʼantik te kʼuxuk ta koʼtantik te smelelil yuʼun te Biblia ya skʼan ya jnaʼtik bin ya yakʼ ta nopel (Colosenses 1:10). Jaʼukmeto ay binxan ya skʼan ya jpastik. Te machʼa la stsʼibay te Salmo 119 ya skoltayotik ta snaʼel bin ya skʼan ya jpastikxan (kʼopona te sjun Salmo 119:97-100). Ta sjunal te kʼajkʼale ya skʼan ya jnopilantik ta koʼtantik te bin ya jkʼopontik ta Biblia. Teme ya jnoptik bin lekilal ya jtatik teme ya jpastik ta jkuxlejaltik te smelelil yuʼun te Biblia kʼux-xan ya kaʼiytik bael ta koʼtantik.

¹² Te machʼa la stsʼibay te Salmo 119 jaʼnix jich la yal: «¡Cʼax chiʼ ya caʼiy te acʼope, cʼax hich schiʼil ta que a te bin utʼil chab!» (Salmo 119:103). Te junetik te lokʼem ta Biblia te ya schajpan te organisasion yuʼun Dios jich kʼoem bitʼil bujtsʼan weʼelil. Kʼalal ay bin ya jweʼtik te mero ya jmulantik kʼunkʼun ya jweʼtik yuʼun ya kaʼiybeytik sbujtsʼ. Jaʼnix jich ya skʼan ya jpastik ta swenta te snopel te junetike, ya skʼan te maba animalnax ya jkʼopontik. Jich ya kaʼiybeytik sbujtsʼ te tʼujbil kʼopetik yuʼun te smelelil sok ya xjuʼ ya jultestik ta koʼtantik soknix ya xjuʼ ya jtuuntestik ta skoltayel yantik (Eclesiastés 12:10).

13. ¿Bin koltayot yuʼun te Jeremías swenta kʼux ya yaʼiy ta yoʼtan te bin akʼbot snop yuʼun te Diose, sok bin lokʼ yuʼun ta skaj te jich la spase?

¹³ Te j-alwanej Jeremías kʼux la yaʼiy ta yoʼtan-a te bin akʼbot snop yuʼun te Diose. Jich la yal: «La yichʼ tahel te acʼope, hoʼon la jweʼ; ha stseʼelil coʼtan cʼoht te acʼope soc ha yutsil coʼtan cʼoht, como quichʼojbat abihil, Jehová, Diosat te acuentahinej spisil» (Jeremías 15:16). Te Jeremías kʼux ya yaʼiy ta yoʼtan-a te bintik ya yal te skʼop Dios sok spisil-ora ya snaʼulan ta yoʼtan. Jaʼ yuʼun bayal skʼoplal ta yoʼtan te aʼtelil akʼbil yuʼun ya stejkʼan sba ta kʼop ta stojol Jehová ta swenta te lum yuʼune sok ta yalbeyel yantik te bin ya yal te Jehová. Jaʼnix jich te joʼotike, teme kʼux ta koʼtantik te smelelil yuʼun te Biblia mukʼ skʼoplal ya kiltik te testigootik yuʼun Jehová sok te scholbeyel skʼoplal te Ajwalinel ta slajibal kʼajkʼal ini.

14. ¿Bintikxan ya skʼan ya jpastik swenta ya yichʼxan yip te skʼuxul koʼtantik ta swenta te smelelil yuʼun te Bibliae?

¹⁴ ¿Bintikxan ya skʼan ya jpastik swenta ya yichʼxan yip te skʼuxul koʼtantik ta swenta te smelelil yuʼun te Bibliae? Ya skʼan te spisiluk-ora ya xbootik ta tsoblejetik yuʼun te kongregasion te jaʼ ya stuuntes te Jehová yuʼun ya snojptesotik. Te snopel te Biblia ta jujun semana ta swenta Te J-ilkʼinal ta toyol jaʼ jchajp te bin ya stuuntesxan te Jehová yuʼun ya snojptesotik. Teme ya jkʼantik te bayal bin-utʼil ya skoltayotik te tsoblej  ini, yame skʼan te nail ya jchajpan jbatik. Jich bitʼil, ya xjuʼ ya jkʼopontik spisil te textoetik te yichʼoj talele. Ta ora ini, bayal hermanoetik ya xjuʼ ya skʼoponik o ya spasik descargar te revista ta selularik o ta yantikxan. Te revista ini yak ta lokʼel ta bayal ta chajp kʼopil, ya jtatik ta pajina jw.org sok ta aplicación JW Library. Ay chajpanbilik te oranax ta tael tey-a te versiculoetik yuʼun te Biblia. Chikan bin ya jtuuntestik ta snopel te revista-abi, yame skʼan te lekuk ya jkʼopontik te textoetik sok te ya jnopilantik ta leke. Teme jich ya jpastike kʼux-xan ya kaʼiytik ta koʼtantik ta jujun kʼajkʼal te smelelil yuʼun te Biblia (kʼopona te sjun Salmo 1:2).

15, 16. 1) ¿Bin mantalil la yakʼ te Jesús ta Juan 13:34, 35? 2) Te skʼuxul koʼtantik ta stojol Jehová sok te Biblia, ¿bin yuʼun snitojbey sba skʼoplal sok te skʼuxul koʼtantik ta stojol te hermanoetike?

¹⁵ Te slajibal ajkʼabal te ayin ta Balumilal te Jesuse, jich la yalbey te jnopojeletik yuʼune: «Ay jun yachʼil mandaril ya calbeyex: Talel cʼaxel cʼux xawaʼiy aba ta awoʼtanic; hich te bin utʼil cʼux la jcaʼiyex ta coʼtan, ha nix hich talel cʼaxel cʼux xawaʼiy abahic ta awoʼtanic. Hich ya snaʼic spisil ants-winiquetic te haʼex jnopojelex cuʼun teme talel cʼaxel cʼux yac awaʼiy aba ta awoʼtanique» (Juan 13:34, 35).

¹⁶ Te skʼuxul koʼtantik ta stojol te kermanotaktike snitojbey sba skʼoplal sok te skʼuxul koʼtantik ta stojol te Jehová. Teme maba kʼux ta koʼtantik te Diose, ma xjuʼ te kʼux ya kaʼiytik te hermanoetike. Teme maba kʼux ta koʼtantik te kermanotaktike, ma xjuʼ te kʼux ya kaʼiytik te Diose. Te jpuk-kʼop Juan jich la stsʼibay: «Como te machʼa ma ba cʼux ta yoʼtan te yermano te yilbeyej sit, ¿bin utʼil cʼan cʼuxuc ta yoʼtan te Dios te ma ba yilbeyej sit stuquel?» (1 Juan 4:20). Jaʼnix jich te skʼuxul koʼtantik ta stojol te Jehová sok ta stojol te kermanotaktik snitojbey sba skʼoplal sok te skʼuxul koʼtantik ta stojol te Biblia. ¿Bin yuʼun? Melel teme kʼux ta koʼtantik te bin ya jnoptik ta Biblia ya jchʼuuntik te mantalil te ya yal te kʼuxuk akʼa kaʼiytik te Dios sok te kermanotaktike (1 Pedro 1:22; 1 Juan 4:21).

17. ¿Bin-utʼil ya kakʼtik ta ilel te kʼux ta koʼtantik te hermanoetike?

¹⁷ (Kʼopona te 1 Tesalonicenses 4:9, 10). ¿Bintik-utʼil ya xjuʼ ya kakʼtik ta ilel skʼuxul  koʼtantik ta stojol te kermanotaktik ta jkongregasiontike? Ayniwan jtul hermano te ayix bayal yaʼbilal te ya skʼan koltayel yuʼun ya xbajtʼ ta tsoblej. O jtul hermana te stukel jilemix ya skʼan te ya jkoltaytik ta schaʼpasel te bin jinem ta sna (Santiago 1:27). Te hermanoetik te chebajem yoʼtanik, te pichʼil yoʼtanik o ayik ta kʼaxel ta yan wokolil ya skʼanik te ya jkoltaytik, te ya kakʼbeytik yip yoʼtanik soknix smukʼul yoʼtanik (Proverbios 12:25; Colosenses 4:11). Ta swenta te bin ya kaltik o te bin ya jpastik ya kakʼtik ta ilel te kʼux ta koʼtantik «te machʼatic pajal ay schʼuhunel coʼtantic soque» (Gálatas 6:10).

18. ¿Bin ya skoltayotik ta schajpanel biluk kʼopil ya jtatik sok te kermanotaktike?

¹⁸ Te Biblia jich yalojix-a te jaʼnax ya spasik te ants winiketik te bin ya skʼan yoʼtanike sok te ya x-ayin sbikʼtal yoʼtanik te kʼalal yorail te «slajibal cʼahcʼal bahel» yuʼun te chopol balumilal ini (2 Timoteo 3:1, 2). Jaʼ yuʼun ya skʼan te jujun kʼajkʼal ya xtoyxan bael te skʼuxul koʼtantik ta stojol Jehová sok te sKʼope soknix te kʼux ya kaʼiy jbatik ta pajal sok te kermanotaktike. Ta skaj te maba tojotike, ay bin-ora ya jtatik jtebuk kʼop sok te kermanotaktike. Jaʼukmeto te skʼuxul koʼtantik te jun-nax ya yakʼ x-ayinotike ya stijbotik koʼtantik ta schajpanel sok yutsil koʼtantik ta oranax biluk kʼop ya jtatik (Efesios 4:32; Colosenses 3:14). Mame kijkʼitaytik te ay bin-ora ya xpejkʼaj o ya xlaj yip te skʼuxul koʼtantike. Kakʼtikxan ta ilel bael te kʼux ta koʼtantik te Jehová, te sKʼop sok te kermanotaktik ta spisil koʼtantik.