4 | Te lekil consejoetik ya yakʼ te Biblia
TE BIBLIA JICH YA YAL: «Spisil te bin tsʼibaybil ta sJun Dios […] ya xtuun» (2 TIMOTEO 3:16).
Te bin ya skʼan ya yal
Manchukme te Biblia ma jaʼuk jun libro yuʼun poxiletik, ya yakʼ consejoetik ta stojol te machʼatik tsakbilik ta chamel te ya yutsʼin jpensartik. Kiltik cheʼoxebuk ejemplo.
¿Bin-utʼil ya skoltayotik?
«Te machʼatik lek ayike ma xtuun yuʼunik jpoxtaywanej, jaʼnax te machʼatik ayik ta chamele» (MATEO 9:12).
Te Biblia ya yakʼ jnaʼtik te ay baeltik ya skʼan ya jletik koltayel ta stojol te doctoretik te ya snaʼik ta swenta-abi. Bayal ants winiketik te tsakbilik ta chamel te ya yutsʼin jpensartik, lek yaʼiyoj sbaik te kʼalal ya xkoltayotik yuʼun te doctoretik te ya snaʼik ta swenta-abi.
«Melel te spasel ejercicio ay bin lek ya jtatik yuʼun» (1 TIMOTEO 4:8).
Teme ya jtuuntestik te jtiempotik sok te kiptik yuʼun ay bin lek ya jpastik ta jkuxlejaltik, ya xjuʼ ya skoltayotik teme tsakbilotik ta chamel te ya yutsʼin jpensartik. Ay cheʼoxeb te bin lek ya jpastike, jaʼ te spisil-ora ya jpastik ejercicio, te ya jmakʼlin jbatik ta lek sok te lek ta xwayotike.
«Te lequil poxil, jaʼ te bin nax coʼtantic spisil ora; yan te mel-oʼtane, ya spejcʼan yip coʼtantic stuquel» (PROVERBIOS 17:22, TZOXCH).
Teme ya jkʼopontik versiculoetik ta Biblia te ya yakʼbotik smukʼul koʼtantik sok teme jaʼ ya jpastik te bin ya xjuʼ kuʼuntik spasele, ya xjuʼ
ya skoltayotik yuʼun ayxan stseʼelil koʼtantik. Teme jaʼ ya xbajt ta koʼtantik snopel te bin ya xjuʼ kuʼuntik spasele, ya xjuʼ kuʼuntik sitintayel te wokolil jtaojtik ta swenta te chamel te ya yutsʼin jpensartik.«Pero te machʼatic peqʼuel ayic yichʼojic pʼijil-oʼtanil» (PROVERBIOS 11:2).
Yaniwan akʼan koltayel ta swenta te ay bin ya apase, jich yuʼun kʼaname. Te awamigotak sok te afamilia yaniwan skʼan ya skoltayat, pero ma snaʼik te bin-utʼil. Jaʼ yuʼun albeya ta jamal te bin ya akʼane, pero mame jaʼuk ya awakʼ ta chʼuunel te bin ya akʼane sok albeya wokol ta swenta te bin la spas ta atojole.
¿Bin-utʼil ya xjuʼ ya xkoltayotik yuʼun te consejoetik ay ta Biblia te machʼatik tsakbilik ta chamel te ya yutsʼin jpensartik?
Te Nicole, a te tsakbil ta jun chamel te transtorno bipolar sbiil, jich la yal: «Te kʼalal la kaʼiy te maba lek ayone, boon ta doctor. Te doctora la scholbon kaʼiy te bin chamel kichʼoje, jich kʼot ta koʼtan. Jaʼnix jich la yalbon te bin tratamiento ya xjuʼ ya skoltayone».
Te Peter, te tsakbil ta tulan mel-oʼtan, jich la yal: «Ta jujun kʼajkʼal ya jkʼopon te Biblia sok te kinam, jaʼ-abi bayal skoltayojon. Jich yuʼun te kʼalal ya xjajchon ta jujun sabe jich ya kaʼiy te ay yip koʼtan ta sitintayel te jwokole. Te kʼalal mero ayon ta mel-oʼtane, jtaoj ta ilel te aynanix jun versículo-a te ya stijbon koʼtane».
Te Ji-yoo, te tsakbil ta jun chamel te trastorno alimentario sbiil, jich ya yal: «Ya xkʼexawon ta yalbeyel-a te yantik te bin wokolil jtaoje. Pero ay jtul kamiga te mero ya xkʼot ta yoʼtan te bin yaʼiyel ya kaʼiy jba, jaʼ yuʼun sok yutsil yoʼtan ya skʼoponon, jaʼ-abi la skoltayon yuʼun jich lek ya kaʼiy jba sok te maba jtukel ayone».
Te Timothy, te tsakbil ta jun chamel te trastorno obsesivo compulsivo sbiil, jich ya yal: «Te Biblia la skoltayon yuʼun ma jaʼuknax ya xbajt ta koʼtan te aʼtel sok te jaʼnax ya xbajt ta koʼtan te kux-oʼtan. Te consejoetik ya yale skoltayojon ta sitintayel ta swenta te bin yaʼiyel ya kaʼiy jbae».
a Ay yichʼoj jelel te biililetike.