Te Diana te la yichʼ albeyel skʼoplal ta yan tal articulo jaʼ la yaʼiy te jaʼ tenot ta yuchʼel bayal trago yuʼun te swokole. Te Biblia maba ya skomotik te ya kuchʼtik jtebuk te tragoe, pero jich ya yal ini: «Ma me xajoquin te machʼatic bayel ya yuchʼic vino» (Proverbios 23:20). Te machʼa kʼax bayal ya yuchʼ trago ya stsakot ta tulan chamel yuʼun, ya sjin te bitʼil ay machʼa lek yiloj sba soke, jaʼnix jich ta jujun jaʼbil bayal miyon te machʼatik oranax ya xlajik yuʼune. Te jaʼuk ya stʼunik te lekil tsitsel ya yakʼ te Biblia ma sta swokolik te jichuke.

Jaʼ jich la spas te Diana sok jich ya yal: «La kil te ma jaʼuk ya slamantesbon te wokolil kuʼun te yuchʼel te tragoe. Jaʼ la jpas ta jkuxlejal te bin ya yal te Filipenses 4:6, 7: “Ma me ayuc bin ya snaʼulan awoʼtanic yuʼun [...] aʼbeya snaʼ Dios spisil te bintic yac acʼambeyic”. Ta jujun ajkʼabal te kʼalal ay bayal te bintik ya jnope, la jkʼopon te Jehová sok la jcholbey yaʼiy te bin yaʼiyel ya kaʼiy jbae, jich bitʼil ta swenta te slab koʼtane, te bitʼil ya jmel koʼtane sok te ma jnaʼix te bin ya jpase... soknix la jkʼanbey te yakuk skoltayon yuʼun lekuk ya kaʼiy jba. Ta yan kʼajkʼal ya jpas tulan yuʼun ma jaʼuk ya jnop te bintik maba leke. Te skʼoponel te Jehová jaʼ la skoltayon yuʼun jaʼ ya kil te bin ay kuʼun-ae ma jaʼuk te bin maʼyukix kuʼune. Bayal skʼoplal ta koʼtan te lamalkʼinal la jtae, jich yuʼun la jnop te maba ya kuchʼixe».

Te yalel ta mulweje jaʼ te bin ya yakʼ bayal wokolil sok mel-oʼtan. Pero te bintik smelelil ya xtojobteswan ta Biblia jaʼ ya skoltayotik yuʼun maba ya kakʼ jbatik ta wokol, melel ya yakʼbey schajpajibal te bantito ya xjajch tal te kʼope, jich bitʼil smonel oʼtanil sok yilel pornografía. Jtul kerem te Samuel sbiile jich ya yal: «Maba kʼax tulan-a te smonel oʼtanile... Ay ma jmulan-a te machʼa jich la jpasbeye, pero te kʼalal la kil te ya smulanon stukele, jaʼ-abi te bin lek la kaʼiy jba yuʼune». Jich bitʼil te naʼbilix sba te ya smon oʼtanile, manchukme ma jichuk snopoj ya spas-a, te Samuele yoloj kaj spas, pero ma lekuk la yaʼiy sba yuʼun-a. Ta ora ini jich ya yal: «Maba lek te smonel oʼtanile ya yakʼ te jaʼnax ya jletik te bin ya jkʼantik te joʼotike».

Te Samuel la skʼopon jun articulo yuʼun jchʼieletik ta pajina yuʼun Internet ta jw.org. Jaʼnix jich la snop te bin ya yal te Proverbios 20:11, te jich ya yal: «Aunque tut querem, naʼbil sba yuʼun te bintic ya spas, teme lec soc toj te bin ya spase». ¿Bin-utʼil koltayot te tsitsel ini? Te Samuel la yil te ma lek te smonel oʼtanile sok te ma stojiluk te jich ya spase. Jich ya yalxan: «Kʼot ta koʼtan te machʼa jich ya spase maba lekil mamlalil ya xkʼot. La jnop ta koʼtan te binwan yaʼiyel ya xbajtʼ yaʼiy sba te machʼa ya xbajtʼ nujpunon soke teme ya yil te ya jmon yan antse. Jaʼ-abi la yakʼbon kil te ma lek te jich ya jpastike. Manchukme maba wokol te smonel oʼtanile maba ya skʼan ya yal te lek ta pasele». Te Samuel maba yal ta mulwej ta swenta te la sjel te stalele.

Te machʼa kʼax tulanxan wokolil yak ta kʼaxel ta stojol-ae jaʼ te Antonioe, melel ya smulan yilel-a te pornografía. Manchukme kʼax kʼux ta yoʼtan-a te yiname, pero bayal buelta la yil pornografía. Te mantalil te koltayot yuʼune jaʼ te 1 Pedro 5:8: «Pʼijanic me soc wicʼsitaya me abahic, como te acontrahic, ha te pucuj, bayuc yac ta behel, hich te bin utʼil choj, ta slehel machʼa ya slajin». Jich ya yal te Antonio: «Joytaybilotik ta lokʼombaetik yuʼun pornografía te ma xjuʼ ya jlokʼestik ta oranax ta joltike. Te versiculo-abi la skoltayon ta snaʼel te banti talem te loʼlayel-abi. La jpas tulan yuʼun oranax ya kalbey te jol te machʼa yuʼun te chopol lokʼombaetik-abi. Ta ora ini ya jnaʼix te jaʼnax Jehová te ya xjuʼ ya yakʼbon jpʼijil sok te chapalukon ta skanantayel te jpensar, te koʼtane soknix te nujpunel kuʼune». Te Antonio la yichʼ koltayel sok juʼ yuʼun yijkʼitayel ta yilel te pornografía. Ta swenta-abi jaʼ koltayot yuʼun ma mukʼub te swokole.

Jamal chikan ta ilel te nojel ta lekil tsitsel te Biblia te ya xtuun kuʼuntik yuʼun maba ya jchʼik jbatik ta tulan kʼopetik. ¿Jaxan teme ya xtulanaj te kʼope sok te maba ya jtabeytik schajpajibale? Akʼa kiltik bin-utʼil te sKʼop Dios ya xjuʼ ya skoltayotik.