Te Rosi jich ya yal: «Ay kʼopetik kuʼun-a te jaʼnax ya jnopilan ta koʼtan-a sok te jich ya jkuy te ay bin tulan ya xkʼot ta pasele». ¿Bintik textoetik koltayot yuʼun? Jaʼ te Mateo 6:34: «Ha yuʼun ma me haʼuc ya xbaht ta awoʼtanic snaʼel te pajele, como te pajel, ha ya yil sba stuquel. Ticʼuc a te wocol ta jujun cʼahcʼal». Te bin la yal te Jesús jaʼ koltayot yuʼun te Rosi yuʼun ma smel bayal yoʼtan ta swenta te bintik ya xkʼot ta pasel ta yan kʼajkʼale. Sok la yalxan: «Bayalix-a te kʼopetik kuʼun sok yato jmel koʼtan yuʼun-a te bintik mato kʼoemuk ta pasele sok maniwan ayuk bin-ora ya xkʼot ta pasel».

Te Yasmín jaʼnix jich la yaʼiy te ma xjuʼix yuʼun ta stsʼikel te bin ya snaʼulan yoʼtane. Jich ya yal: «Spisil-ora ya x-okʼon-a sok ay ajkʼabaltik te ma x-och jwayel-ae. Yak ta slajinbelon-a te bintik maba lek ya jnope». ¿Bin texto koltayot yuʼun? Jaʼ te 1 Pedro 5:7, te jich ya yal: «Aʼbeya ta stojol spisil te bintic yac amel awoʼtanic yuʼun, como ayex ta canantayel yuʼun». Jich ya yalxan te Yasmín: «Maʼyuk la jkom jba ta skʼoponel te Jehová sok la kil te bin-utʼil la sujtbon te jkʼope. Jich la kaʼiy te la slokʼesbon te kijkats te kʼax al kʼoeme. Aytonix baeltik ma lek te bintik ya jnope, pero ya jnaʼix te bin-utʼil ya jkanantay jbae».

Jtul ants te sbiil Isabella jich ya yal: «Te bitʼil kʼayemon-a te patilto ya jpas te kaʼtele jaʼniwan yuʼun  te jaʼ jich te jtate. Ay jaʼ patilto ya jpas te bintik mukʼxan skʼoplale, ta skaj te maʼyuk bin ya jkʼan ya jpase, ya x-ochon ta yilel telebision o ta skuxel koʼtan. Maba lek ta pasel-abi, melel ya yakʼ xlujbotik sok ma leknax kʼinal ya kaʼiytik yuʼun, ma lek ya xlokʼix ta pasel-a te kaʼteltike». Te texto te bayal koltayot yuʼune jaʼ te 2 Timoteo 2:15, te jich ya yal: «Ayuc bin utʼil lec acʼoblal te cʼalal yac atehcʼan aba ta stojol Dios, hich te bin utʼil machʼa ya xʼaʼtej te mayuc bin ya xqʼuexaw yuʼun». Te Isabella jich ya yal: «Ma jkʼan te ya xkʼexaw te Jehová ta swenta te kaʼtel ta skajnax te maba la jpas ta oranaxe».

Jich ya yal-euk te Kelly: «Te kʼalal ay ya skʼan ya kakʼ jun aʼtelile, patilto ya jpas-a. Jich yuʼun ya xjajchon ta okʼel, ma xwayonix lek yuʼun-a sok ya spichʼ sba koʼtan-a. Ma la skoltayon te jich la jpase». Te tsitsel koltayot yuʼune jaʼ te Proverbios 13:16: «Spisil te machʼatic pʼij yoʼtanic ya xʼaʼtejic soc spʼijil yoʼtanic, yan te machʼa ma snaʼ qʼuinal, ya yacʼ ta ilel te ma snaʼ qʼuinal». Jich ya schol te bin-utʼil koltayot te kʼalal la snopilan ta yoʼtan te texto-abi: «Ya skʼan te ayuk spʼijil koʼtantik sok te nailukto ya jchaptik te bin ya jpastike. Ta ora ini ay jwel jun ta mesa te banti ya jtsʼibay te bintik ya jpase, jaʼ-abi ya skoltayon yuʼun jnaʼojix-a te bin ya jpase».

Jich ya yal te Cristina: «La yijkʼitayon te jmamlal sok ay jilel chantul alaletik kuʼun». ¿Bin texto koltayot yuʼun? Jaʼ te Proverbios 17:17 te jich ya yal: «Te machʼa jun yoʼtan sbahic, spisil ora ay scʼuxul yoʼtan, soc hich cʼohem te bin utʼil sbanquil ta yorahil wocol». La sle koltayel ta stojol yantik j-abatetik yuʼun Dios. ¿Bin lokʼ yuʼun-a? Jich ya yal: «Bayal te bintik-utʼil la skoltayonik te kamigotake. Ay la yichʼbonik tal jweʼelkotik sok jnichimkotik ta jnakotik. Te oxeb buelta la jelkotik te banti nainemon sok te kalatake bayal ta tul kamigotak tal skoltayonkotik. Jaʼnix jich ay jtul te la skoltayon ta stael kaʼtele. Spisil-ora la skoltayonik».

Te Diana te la yichʼ alel ta sjajchibale, jaʼnix jich ay stukel la yaʼiy sba. Yato xjul ta yoʼtan te bin yaʼiyel la yaʼiy sba te kʼalal kʼaxemix-a te swokole: «Ya kil te ya smulanbeyik yutsilal te skuxlejalik te yantike, pero te joʼone jtukelnax ya kaʼiy jba-a sok ya jmel koʼtan-a». Te bin textoil koltayot yuʼune jaʼ te Salmo 68:6: «Te machʼatic ihquitaybilic, Dios ya yacʼ nahinuquic soc machʼatic junax na banti ayinemic». Te Diana jich ya yal: «Ta swenta te versiculo-abi jnaʼoj te ma jaʼuknax ya xjuʼ ya yakʼbotik jwol jnatik te Dios te banti ya xnainotike, jaʼnix jich ya xjuʼ ya yakʼbotik lamalkʼinal sok te jun-nax ya yakʼ x-ayinon sok te hermanoetik te kʼux ta yoʼtanik te Jehová soknix te kʼuxon ta yoʼtanik-euke. Pero jnaʼoj te ma xjuʼ ya xnoptsajon ta stojol yantik teme ma jaʼuk nail ya xnoptsajon ta stojol te Diose. Jaʼ jich la yakʼbon kil te Salmo 37:4 te ya yal: “Acʼa smulan awoʼtan te Jehová, hich ya yaʼbat te bintic ya scʼan te awoʼtane”».

Te Diana jich la yal ta slajibal: «La kil te mukʼ skʼoplal te ya skʼan ya jtsak jba ta lek ta stojol te Jehová, melel maʼyuk machʼa yan te jich kʼax lekxane. La jpas jun lista te bintik ya xjuʼ ya jpas sok te yantike swenta ya jta kamigotak te pajal schʼuunel koʼtan soke. La jpas tulan ta yilel te lekil taleliletik yuʼun te yantike sok te ma kichʼ ta wenta te bintik ma lek ya spasike».

Te machʼatik ya x-abatinik ta stojol te Diose jaʼnix jich jmulawiletik-euk. Te bitʼil testigootik yuʼun Jehová jaʼnix jich ay jwokoltik jich bitʼil te ants winiketike. Te machʼatik ya spas ta skuxlejalik te bin ya yakʼ ta nopel te Bibliae ya spasik tulan ta skoltayel te yantike. Kʼax lek te ay jich kamigotaktik-abi. Pero ¿yabal skoltayotik te mantaliletik yuʼun te Biblia ta stsʼikel te kʼopetik te maʼyukix schajpajibal ta ora ini, jich bitʼil chamel te ma xchojpix o teme ay machʼa laj kuʼuntike?