Te Rosa ya yal: «Ay chamel te kichʼojnanix-a te spisil-ora ya yakʼbon bayal skʼuxule. Jich ya kaʼiy te yak slajinbelone». Te bin bayal la smel yoʼtan yuʼune jaʼ te ya xchʼaybot yoʼtan te kʼalal ya snop te Biblia sok te bintik smakoj te yichʼel ta mukʼ te Diose. Pero jaʼ akʼbot bayal smukʼul yoʼtan te bin la yal Jesús ta Mateo 19:26: «Te Dios spisil ya xhuʼ yuʼun stuquel». Te Rosa ay ma xjuʼ yuʼun te ya skʼopon te Biblia sok te junetik te lokʼemik ta Biblia ta skaj te skʼuxul te schamele, jaʼ yuʼun kaj ta yaʼiyel te bintik pasbil grabare. * La yil te ay bayal bin-utʼil ta nopel te skʼop Diose. Jich la yal: «Te manchuk ayuk-abi, maba juʼem kuʼun te bitʼil lek ya kil jba sok te Diose».

Te kʼalal ya xtal mel-oʼtan yaʼiy te Rosa ta swenta te maʼyuk bin bayal ya xjuʼix yuʼun spasel jich bitʼil ta sjajchibale, jaʼ ya x-akʼbot smukʼul yoʼtan te 2 Corintios 8:12: «Como teme nahil ay scʼanojel awoʼtanic te yac awaqʼuic te mahtanil, ay ta cuenta te bin ay awuʼunic, ma haʼuc te bin mayuc awuʼunique». Jich ya xjul ta yoʼtan te lek yoʼtan Dios yuʼun te bintik ya xjuʼ yuʼun spasele, melel jaʼ ya spas te bantito kʼalal ya xjuʼ yuʼune.

Te Diana te la kalbeytikix skʼoplale, jich ya xjul ta yoʼtan: «Kʼax kʼux la kaʼiy te kʼalal laj te kantsil-al te  aytonax 18 yaʼbilal-ae, jich la kaʼiy te ya xlajonix yaʼiyele. Sok te ma jichukix ya xkʼot te jkuxlejal jich bitʼil ta naile». Te bin akʼbot bayal smukʼul yoʼtan te Diana jaʼ te Salmo 94:19, te banti jich la skʼajintay Dios te machʼa la stsʼibay te salmoe: «Te cʼalal ay bayel bintic ya xcʼopoj coʼtan yuʼun, te smucʼubtesel-oʼtanil awuʼun la yaʼbon stseʼelil coʼtan». Jich la yalxan te Diana: «La jkʼanbey te Jehová te akʼa skoltayon ta sleel te bintik ya xjuʼ ya jpas yuʼun ya xchʼay ta koʼtan-a te jwokole».

Te Diana la sjap sba ta spasel aʼtelil ta swenta skoltayel te yantik te jaʼ akʼbot stseʼelil yoʼtan yuʼune. Te kʼalal kʼax te tiempoe jich la yaʼiy sba te bitʼil crayolaetik te yanyantik sbonil te ya stuuntes te alaletik yuʼun ay bin ya sbonik-ae, manchukme ay kʼasemikix yato xtuun. Jaʼnix jich kʼot ta stojol-euk manchukme kʼasemix kʼoem la yaʼiy sba jich bitʼil te crayolaetike la skoltay te yantike. Jich ya yal: «Te kʼalal la jtuuntes textoetik yuʼun Biblia ta smukʼubtesbeyel yoʼtan te machʼatik ya kakʼbey snop te skʼop Dios ta swenta te smelelil kʼop jich bitʼil te lajel sok te bin-utʼil ayik te machʼatik lajemikixe, la kil te jaʼnix jich yak ta smukʼubtesbelon koʼtan-euk te Jehovae». Jaʼnix jich la spas jun lista yuʼun te ants winiketik te ya yalbey skʼoplal te Biblia te kʼax swokolik-euke. ¿Bin la sta ta ilel? «Jaʼ te spisilik la skʼoponik te Diose». Jaʼnix jich kʼot ta yoʼtan «teme maba ya ajam te Biblia maba ya ata te koltayele».

Pero te Diana ay bin la snopxan ta Biblia, jaʼ te ya yakʼ ta yoʼtan te bin ya xtal ta pajel chaʼbeje ma jaʼuk te bin kʼaxemixe. Bayal tijbot yoʼtan yuʼun te Hechos 24:15: «Ay chaʼcuxajel yuʼun [...] te machʼatic toj yoʼtanic soc te machʼatic ma ba toj yoʼtanic». ¿Yuʼun-nixbal ya schʼuun yoʼtan-a te ya xchaʼkuxaj te yantsil-ale? Akʼa schol kaʼiytik: «Ya jnaʼ te yananix jchaʼil-a te kantsil-ale. Snaʼojix stukel te jTat te ay ta chʼulchan te bin-ora ya jchaʼil jba sok te kantsil-ale. Ya kil jbaix kʼoem sok te kantsil-al ta nichimaltik kuʼun te kʼalal chaʼkuxajemix tal-ae, jich bitʼil te sok sbujtsʼ koʼtan la kil te kʼalal bin-ora ayine».