AY MACHʼATIK YA YALIK TE MAʼUKE. Ay jtul doktor la yal te sleel tojobtesel ta Biblia jichlaj kʼoem bitʼil stuuntesel jun libro te lokʼ ta 1920 ta yakʼel clase yuʼun Química. Te machʼa ma schʼuun te bin ya yal te Biblia yaniwan xjuʼ sjojkʼoybat teme ya atuuntesbey sjunil jun komputadora te antiguoix yuʼun tey ya anop-a te bin-utʼil ta tuuntesel te yachʼile. Te bin ya skʼan ya yalike jaʼ te jkʼaxel ma xtuunix te bin ya yal te Bibliae.

¿Aybal machʼa ya skʼan ya stuuntes te libro te kʼax antiguoix jich bitʼil te ayix bayal bintik yachʼil sok te bayalix tecnología? Ayix bayal pajinaetik ta Internet te banti ya xjuʼ ta tael tsitsel sok tojobtesel ta spisil-ora. Jaʼnix jich ay programaetik yuʼun telebision te banti ya yalik te bin ya snopik te psicólogos sok te machʼatik ya stsʼibay libroetik. Te machʼatik ya stsʼibay libroetik ya snojesotik ta junetik te ya yakʼik koltayel sok te yakik ta stael skʼulejalik yuʼune.

Jich bitʼil te ayix bayal informasion te ya yichʼ achʼubtesel ta oranaxe, ¿bin yuʼun ya jletik koltayel ta Biblia te jteb ma sta chaʼmil jaʼbil la yichʼ tsʼibayele? Te machʼatik ma schʼuunik te bin ya yal te Biblia, ¿aybal rason yuʼunik te ya yalik te jich kʼoem te Biblia te bitʼil jun libro yuʼun química te kʼaxemix skʼoplal o te bitʼil sjunil komputadora te antiguoixe? Ma jichuk te bitʼil ya spajbeyik skʼoplale. Te siensia sok te tecnología oranax ya xjelon, pero ¿jelonembal te bin ya skʼan te ants winiketike? Te ants winiketik ya skʼan te ayuk stseʼelil yoʼtanik, te junuk yoʼtanik, te yichʼojuk swentail te skuxlejalik, te junuknax ay te sfamiliaike sok te ayuk lek yamigotakike.

Manchukme kʼax antiguoix te Biblia ya yalbey skʼoplal-abi sok yantikxan. Jaʼnix jich jamal ya yalbotik te lokʼem tal ta yoʼtan te Jpaswanej kuʼuntik te bintik ya yale. Sok ya yakʼ tojobtesel ta swenta te bintik ya jpas ta jkuxlejaltik sok ya schajpanotik ta sitintayel te bintik ya xtal ta jtojoltike (2 Timoteo 3:16, 17). Soknix jamal ya yal te sbajtʼelkʼinal ya xjalaj te tsitsel yuʼune sok te spisilnanix-ora ya xtuun-ae. Te Biblia ya yal: «Cuxul te scʼop Dios» (Hebreos 4:12).

¿Melelbal spisil-abi? ¿Yuʼun-nixbal ma xtuunix-a te Biblia o jaʼbal jun libro te ya stojobtesotik ta leke, te yuʼun-nix kuxul-ae? Te J-ilkʼinal ta toyol ini jaʼ sbabial ta swenta chaʼoxchajp revistaetik te ya xlokʼ yuʼun ya skoltayat ta stabeyel sujtib te jojkʼoyeletik-abi.