TE KʼALAL ya kichʼtik akʼbeyel jun majtʼanil te mukʼ skʼoplal ta koʼtantike ya skʼan ya kaltik wokol yuʼun. Te Jesús la yak ta naʼel te bayal skʼoplal te ya skʼan ya kaltik wokole. Jich la yakʼ ta nopel te kʼalal la slekubtes te lajuntul winiketik te yichʼojik kʼaʼel chamel te maʼyuk spoxil-ae. Jaʼukmeto jtulnax «suht tal soc tulan yac yalbebel yutsilal te Diose». Te Jesús la yal: ¿Ma bal lajuntuhluc te lecubtesbilic? ¿Banti ay te baluntuhle?» (Lucas 17:12-17). Ta swenta te bin ya schol te versiculoetik ini ya yakʼ ta ilel te oranax ya xjuʼ xchʼay ta koʼtantik te bin lek ya spas ta jtojoltik te yantike.

Jich bitʼil la jnopbeytikix skʼoplale, te stojol jkoleltik maʼyuk yan majtʼanil te pajal soke. Jaʼ te majtʼanil  te kʼax mukʼ skʼoplal akʼbilotike. Jich yuʼun, ¿bin-utʼil ya skʼan ya kaltik wokol yuʼun te bin spasoj ta jtojoltik te Diose?

• Naʼbeya sba te machʼa yakʼoj te majtʼanile. Te stojol jkoleltike maba jichnax ya yakʼbey skuxlejal ta sbajtʼelkʼinal spisil te ants winiketike. Jich bitʼil la yal te Jesús ta skʼoponel te sTate: «Hich ay te cuxlejal sbahtel qʼuinal: ha te ya snaʼbat aba, te haʼat mero Diosat atuquel, soc te ya snaʼbe sba te Jesucristo te ticombil tal awuʼune» (Juan 17:3). Te ayuk bin-ora ya anaʼ stojol te ay jtul winik la skoltaybat akuxlejal te kʼalal alalat-to-ae, ¿mabal yakuk akʼan ya anaʼbey sba sok ya ajojkʼoybey bin yuʼun te jich la spase? Te Jehová ya skʼan te ya jnaʼbeytik sbae sok te ya kamigointike, melel jaʼ la yakʼbotik te stojol jkoleltike. Te Biblia ya yal: «Nohpojanic ta stojol Dios, hich ya xnohpoj ta atojolic» (Santiago 4:8).

• Akʼa schʼuunel awoʼtan ta swenta te stojol kolele. «Te machʼa ya schʼuhun te Nichʼanil ay scuxlejal sbahtel qʼuinal» (Juan 3:36). ¿Bin-utʼil ya xchiknaj te schʼuunel oʼtanile? Ya xchiknaj sok yaʼtelul. Jaʼnix jich te schʼuunel oʼtanil yuʼun te stojol kolel ya xchiknaj sok yaʼtelul (Santiago 2:17). Swenta awuʼun ya xkʼot jun majtʼanil ya skʼan ya ajach akʼab ta stsakel. Jaʼnix jich ya skʼan ya ajach akʼab kʼoem ta stsakel te majtʼanil yuʼun te stojol kolele. Jaʼ-abi ya skʼan ya yal te ya jnoptik sok ya jpas ta jkuxlejaltik te bin ya yal te Diose. * Kʼopona te Diose, kʼanbeya perdon sok te lekuk ya awaʼiy aba ta stojole. Mame xcheʼbetuk awoʼtan ya xnoptsajat ta stojol, te stojol kolele jaʼme ya yichʼ tal lamalkʼinal ta sbajtʼelkʼinal, banti maʼyukix utsʼinel sok chamel ta stojol te machʼatik ya yakʼ schʼuunel yoʼtanike (Hebreos 11:1).

• Baan ta tsoblej yuʼun Snaʼojibal slajel te Jesuse. Swenta ma xchʼay ta koʼtantik te stojol kolele, te Jesús la yakʼ ta ilel te bin ya skʼan ya jpastik ta jujun jaʼbile. Jich la yal: «Pasahic ta scuenta jnaʼojibal» (Lucas 22:19). Te jaʼbil ini te stestigotak Jehová yame spasik te Snaʼojibal slajel te Jesús ta martes 11 yuʼun abril te kʼalal yakix ta ijkʼubel-a te kʼinale. Te tsoblej te ma sta jun ora ya xjalaje, tey ya yichʼ cholbeyel skʼoplal-a te bin yuʼun laj te Jesús sok bintik lekilal ya jtatik yuʼun ta ora ini sok ta pajel chaʼbej. Te yan tal jaʼbile ayniwan 20 miyon ta tul ants winiketik la stsob sbaik ta swolol Balumilal. Yame kikʼatkotik yuʼun ya ajokinonkotik ta yalbeyel wokol te Dios ta swenta te mukʼul majtʼanil yakʼojbotike.