TE SAKAPUNTA pasbil ta slokʼomba barko te ay ta skʼab te Jordan maʼyuk lek skʼoplal yilel, jaʼukmeto jaʼ te bin kʼax mukʼ skʼoplal ta yoʼtan. Jich la yal: «Jaʼ la skʼebanbon te Russell te kʼalal tutonto-ae, jaʼ te machʼa lek la yil sba sok te jfamiliae». Te kʼalal lajemix-a te Russell te Jordan la snaʼ stojol te bintik kʼax lek la spas ta stojol te smamuch sok te smeʼ stat te kʼalal ay la staik wokolile. Jich la yal te Jordan: «Jich bitʼil te ya jnaʼix te bintik la spas te Russell, kʼax bayalxan skʼoplal ta koʼtan te majtʼanil la yakʼbone».

Ta swenta te bin la yal te Jordan ya yakʼ kiltik te ayniwan machʼa maʼyuk lek skʼoplal ta yoʼtan jun majtʼanil o jkʼaxel maʼyuk skʼoplal ta yoʼtan, jaʼukmeto te machʼa ya snaʼ yalel wokol ya xjuʼ te bayal skʼoplal ya xkʼot ta yoʼtan te majtʼanile. Te Biblia ya yalbey skʼoplal jun majtʼanil te maʼyuk bin ya spajbey skʼoplale, jich ya yal: «Como hich cʼux ta yoʼtan Dios te bahlumilal te la sticon tal te hip jtuhl Snichʼan, scuenta yuʼun spisil te machʼatic ya schʼuhunic ma ba ya xchʼayic, ay scuxlejalic sbahtel qʼuinal yuʼun» (Juan 3:16).

¡Jun majtʼanil te ya x-akʼbot skuxlejal sbajtʼelkʼinal te machʼa ya stsake! ¿Aybal yan majtʼanil te kʼax jich mukʼ skʼoplal-abi? Manchukme ay chaʼoxtul ants winiketik te maʼyuk skʼoplal ta yoʼtanike, yan te smelelil jchʼuunjeletike kʼax chʼultesbil ya yil stukelik (Salmo 49:8; 1 Pedro 1:18, 19). Jaʼukmeto, te Diose la yakʼ ta majtʼanil te skuxlejal te sNichʼan ta stojol te ants winiketike, ¿bin yuʼun?

Te jpuk-kʼop Pablo jich la yal: «Ha yuʼun hich te bin utʼil och mulil ta bahlumilal ta scuenta jtuhl winic soc te och lajel ta scuenta mulil, hich cʼoht lajel ta stojol spisil ants-winiquetic» (Romanos 5:12). Te sbabial winik, te Adane, la sta smul te kʼalal spasemal yoʼtan la skʼaxuntaybey smantal te Diose, jich yuʼun te kastigo la yichʼe jaʼ te lajele. Ta swenta smul te Adán spisil ya xlaj te ants winiketike.

«Te stojol te mulil, ha te lajele, yan te mahtanil yuʼun Dios, ha te cuxlejal sbahtel qʼuinal ta scuenta te Cajwaltic Cristo Jesús» (Romanos 6:23). Swenta ya sta skolelik te ants winiketik yuʼun te lajele, te Diose  la stikun tal ta Balumilal te sNichʼane, jaʼ te Jesucristo yuʼun la yakʼ sba ta lajel ta stojol spisil te ants winiketike. Te majtʼanil-abi, naʼbil sba jich bitʼil «stojel mulil» o stojol kolel, te machʼatik ya yakʼ schʼuunel yoʼtan ta stojol te Jesús yame sta skuxlejalik ta sbajtʼelkʼinal (Romanos 3:24).

Te bendisionetik ya yakʼ te Dios ta swenta te Jesucristo ta stojol te machʼatik yakik ta abatinel ta stojole, te jpuk-kʼop Pablo jich la yal: «¡Wocol yal Dios yuʼun te smahtan te mayuc bin cʼan spajbe yutsil stuquele!» (2 Corintios 9:15). Ta melel, te stojol kolele jaʼ jun majtʼanil te kʼax mukʼ skʼoplal te maʼyuk bin ya spaje. Jaʼukmeto ta spisil te majtʼaniletik yakʼojbotik te Diose, ¿bin yuʼun te jaʼ kʼax mukʼ skʼoplal te stojol kolele? ¿Bin yuʼun te ma spaj te yantik majtʼanil yakʼojbotik te Diose? * ¿Bin-utʼil ya skʼan ya kaltik wokol yuʼun-abi? Te yantik cheb articulo yame yakʼbey sujtib te jojkʼoyeletik-abi.