BAYAL bintik ya yalik ta swenta te kuxlejalil sok te lajele. Ay machʼatik ya skuyik te ya xbootik ta kuxinel ta yan lugar te kʼalal ya xlajotike. Ay yantik ya schʼuunik te ya xchaʼayinik swenta ya xkuxinik yan buelta. Sok ay ya yalik te tey ya xlaj skʼoplal-a te kuxlejalile.

Yan-niwan-a te bin ya anop ta swenta te lajele, jaʼniwan ta swenta te bitʼil la awichʼ chʼitesel o te banti ayinate. Jich bitʼil te bayal bintik ya yichʼ chʼuunel ta swenta-abi, ¿yanixbal xjuʼ ta naʼel-a te bin ya xkʼot ta pasel te kʼalal lajemotikix-ae?

Ta bayal siglo te jwolwanejetik yuʼun te relijionetik, yakʼojik ta nopel te malaj xlaj te chʼulelale. Jteb ma spisiluk te relijionetik jich bitʼil te cristianismo, hinduismo, judaísmo, islam ya yalik ta jamal te aylaj jchʼuleltik te kuxul ya xjil te kʼalal ya xlajotike sok te ya xkuxin te banti stsoboj sbaik te espirituetike. Yan stukel te relijion budista ya schʼuunik te yalaj sta skolelik yuʼun te swokolik te kʼalal bayal buelta chaʼayinemikix-ae. Te utsilal ya schʼuunike, nirvana sbiil yuʼunik.

Ta swenta te nojptesel-abi jteb ma spisiluk te ants winiketik schʼuunejik te jaʼlaj ya yikʼotik bael ta yan kuxlejalil te lajele. Jich yuʼun bayal ants winiketik ya skuyik te lajele jaʼ te bin mukʼ skʼoplal ya xkʼax ta kuxlejalil sok te jichlaj skʼanojel yoʼtan te Diose. Jaʼukmeto ¿bin ya yal te Bibliae? Ya kikʼatkotik ta skʼoponel te yan articulo. Yan-naxniwan ya awil-a te sujtib ya yakʼe.