Te letra kʼax tut ta hebreo ay bin ya yakʼ schʼuun koʼtantik
¿Yabal schʼuun koʼtantik te ya skʼotes ta pasel te bintik jamal yaloj te Diose? Te Jesús schʼuunej yoʼtan ta lek-abi, jaʼ yuʼun la yakʼbey yip schʼuunel yoʼtan te ants winiketik ta swenta te bintik la yakʼtiklanbey snope. Nopa awaʼiy ta swenta te lokʼombakʼop la stuuntes te kʼalal pʼijubteswan ta wits te ya jtatik ta sjun Mateo 5:18: «Como jamal ya calbeyex, ha to teme ya xchʼay bahel te chʼulchan soc te bahlumilal, ma ba ya xchʼay ta Ley junuc jota o junuc punto ha to cʼalal tsʼacal ya xcʼoht ta pasel spisil».
Te letra te kʼax tut ta alfabeto hebreo jaʼ te י (yod), jaʼ te sbabial letra yuʼun te Tetragrámaton, te jaʼ schʼul sbiil te Diose, Jehová. * Te jtsʼibojometik sok te fariseoetik ma jaʼuknax bayal skʼoplal ta yoʼtanik-a te jujun jpʼal kʼopetik sok te letraetik yuʼun te Ley yuʼun te Diose, jaʼnix jich ma la yakʼ chʼayukik ni «junuc jota o junuc punto».
Te Jesús la yal te jaʼniwan ya xjuʼ ya xlaj te chʼulchan sok te Balumilal te bin-utʼil te ma xkʼot ta pasel te bintik ma mukʼuk skʼoplal yilel ta Leye. Jaʼukmeto te Biblia jamal ya yal te sbajtʼelkʼinal ay te chʼulchan sok te lumkʼinale (Salmo 78:69). Ta swenta te bin la yal te Jesuse, jich la yakʼ ta naʼel te yananix xkʼot ta pasel-a te bin ma mukʼuk skʼoplal yilel ta Leye.
¿Aybal skʼoplal ta yoʼtan Jehová te bintik maʼyuk lek skʼoplal yilele? Ay, ay skʼoplal ta yoʼtan. Nopa awaʼiy ini, te israeletik la yichʼik albeyel te ma swakʼbeyik junuk sbakel te jkolel tuminchij ta swenta pascua (Éxodo 12:46). Jaʼ-abi jich yilel te maʼyuk lek skʼoplale. ¿Kʼoembal ta yoʼtanik-a te bin yuʼun ma xjuʼ ya swakʼbeyik junuk sbakel te jkolel tuminchije? Maniwan. Jaʼukmeto te Jehová snaʼoj-a te jaʼ jun albilkʼop te ya xkʼot ta pasele, jaʼ te bitʼil maʼyuk junuk sbakel ya yichʼ wakʼbeyel te Mesías te kʼalal jipilix ta jchʼixnax teʼ-ae (Salmo 34:20; Juan 19:31-33, 36).
Ta swenta te bintik la yal te Jesuse, jaʼ ya skoltayotik yuʼun ya kakʼtik smukʼul koʼtantik-euk te yananix xkʼot ta pasel spisil-a te bintik jamal yaloj te Jehovae. Ta swenta te tut letra ta hebreo kʼope, ¡ya yakʼ jnaʼtik te yananix xkʼot ta pasel-ae!
^ parr. 3 Te letra kʼax tut ta alfabeto griego jaʼ ι (iota), jteb ma pajaluk sok te י (yod) ta hebreo kʼope. Jich bitʼil te ta hebreo kʼop la yichʼ tsʼibayel sok la yichʼ alel te Ley yuʼun Moisese, ta melel jaʼniwan yak ta yalbeyel skʼoplal-a te Jesús ta swenta te letra hebreo.
Yaniwan amulan-euk sk'oponel ini
JOJKʼOYELETIK TA SWENTA TE BIBLIA
¿Bin-utʼil ya x-ayin lamalkʼinal ta Balumilal?
Te Biblia ya yal te wentainel yuʼun Dios ya yakʼ lamalkʼinal ta Balumilal.
