¡KʼAX BAYAL YUTSIL TE BIN YA JMALIYTIKE! Te Jpaswanej kuʼuntike jamal yaloj te ya yakʼ xkuxin ta sbajtelkʼinal te ants winiketik liʼnix ta Balumilal. Pero bayal machʼatik wokol ya schʼuunik-abi. Ya yalik te yananix xlajotik-ae sok te yuʼun-nanix jich-a te kuxlejalile. Ay yantik ya schʼuunik te ya xjuʼ xkuxinotik ta sbajtelkʼinal, pero jaʼtolaj teme lajotike yalaj xbootik ta chʼulchan. ¿Bin ya anop te jaʼate?

Mato xa awakʼbey sujtib. Ilawil nailuk te bin ya yal te Biblia ta swenta te oxeb jojkʼoyeletik ini: ¿Jayeb tiempo ya skʼan ya xkuxinotik ta swenta te bitʼil kʼax lek pasbilotike? ¿Bin-a te skʼanojel yoʼtan Dios te kʼalal la spas te Balumilal sok te ants winike? ¿Bin yuʼun te ya xlajotike?

Te kʼalal ya jpaj jbatik sok te bintik kuxajtik ta Balumilal te spastiklanoj te Diose, tey ya kiltik-a te yuʼun-nanix yan kileltik-ae. ¿Bin-utʼil-abi? Te Biblia ya yal te joʼotiknax jich la kichʼtik pasel te bin-utʼil yilel te Diose (Génesis 1:26, 27). ¿Bin ya skʼan ya yal-abi? Jaʼ te ya xjuʼ ya kakʼtik ta ilel-euk te lekil taleliletik yuʼune, jich bitʼil te kʼuxultaywanej sok spasel te bin toj ta pasele.

Jaʼnix jich la yakʼbotik jpʼijiltik te Dios ta swenta snaʼel te bin lek sok te bin ma leke. Sok la yakʼ ta koʼtantik te yakuk jnaʼbeytik sbae sok te ya kamigointike. Jaʼ yuʼun ya jmulantik yilel te sjamalul te chʼulchan, te bintik ay ta Balumilal, te bintik tʼujbil ya snaʼ spasel te ants winiketike, te música soknix te poesiae. Pero te bin yuʼun yan kileltik-ae, jaʼ te ya xjuʼ ya kichʼtik ta mukʼ te Jpaswanej kuʼuntike. Ta spisil-abi jaʼ ya yakʼ ta ilel te jkʼaxel ma pajalukotik sok te bintik kuxajtik ta Balumilale.

Nopa awaʼiy ini: te yuʼunuk jich la skʼan Dios te jaʼnax ya xkuxin 70, o 80 jaʼbil te ants winike, ¿bin yuʼun la yakʼbeyix-a te tʼujbil taleliletik-abi sok te maʼyuk slajibal te bin-utʼil ya xjuʼ ya slekubtesike? Yuʼun jaʼ ya skʼan te ya xkuxinotik ta sbajtelkʼinal liʼ ta Balumilal.

Ay machʼatik ya yalik te manixlaj yuʼunuk jich la skʼan-a te Dios te ya xkuxin ta sbajtelkʼinal te ants winiketik liʼ ta Balumilale. Ya yalik te jkʼaxelnaxlaj ayotik ta Balumilal yuʼun ya kichʼtik pasel ta prueba teme yuʼun-nix ya xjuʼ xkuxinotik ta chʼulchan sok-a te Diose. Te yuʼunuk smelelil-abi, ¿mabal jichuk te jaʼ smul ya xkʼot Dios te bintik chopol ya kʼax ta Balumilale? Jaʼ-abi ya skontrain te bin-nix yilel stalel stukel-a te Diose. Te Biblia jich ya yal: «Como toj spisil te behetic yuʼune. Ha Dios te stalel  jun yoʼtan soc mayuc schopolil; ha toj soc lec stuquel» (Deuteronomio 32:4).

Te Biblia jamal ya yal te bin yuʼun la spas Dios te Balumilale: «Yuʼun Jehová te chʼulchan, ha la yaʼbe te ants-winiquetic te lumqʼuinale» (Salmo 115:16). Ta melel, te Diose tʼujbil la spas te Balumilal yuʼun ya jnaintik ta sbajtelkʼinal. Jaʼnix jich kʼax lek la schajpan yuʼun ya jmulanbeytik yutsilal-a te jkuxlejaltik ta sbajtelkʼinale (Génesis 2:8, 9).

«Yuʼun Jehová te chʼulchan, ha la yaʼbe te ants-winiquetic te lumqʼuinale» (Salmo 115:16).

Te Diose jaʼnix jich ya schol ta schʼul sKʼop te bin yuʼun la spas te ants winiketike. Jich la yalbey ta mantal te sbabial ants winike: «Nojesahic ta swohlol te bahlumilal, soc tuhunahic te qʼuinale. Ajwalilat ya xcʼohat yuʼun [...] spisil te chambahlametic te ya xbehenic ta lumqʼuinal» (Génesis 1:28). Te skanantayel te Balumilal sok ta spasel ta nichimal kʼinal ¡jaʼ kʼax mukʼul majtanil! Te Adán sok Eva soknix te stsʼumbalike sbajtelkʼinal kʼan kuxinukik liʼ ta Balumilal, maba ta chʼulchan.

Te Biblia ya yal te ay jtul chʼul-abat te jajch stoy sba sok kʼan sjin te bintik schajpanoj ya spas te Dios ta tsʼunbil kʼinal Edén, jaʼ yuʼun la yichʼ naʼbeyel sba ta patil jich bitʼil Satanás. ¿Bin-utʼil la spas?

Te Satanás la sloʼlay te Adán sok Eva yuʼun ya skontrainik te Diose. La yal te aylaj bin ma x-akʼbotik spas yuʼun te Diose, jaʼ te ya stsaik ta stukelik te bin lek sok te bin ma lekuke. Jaʼ la schʼuunbeyik skʼop te Satanase sok jaʼ la swalakʼpatiyik te Diose. ¿Bin kʼot ta lokʼel? Te kʼalal kʼax bael te jaʼbile lajik, jich bitʼil albotik yuʼun te Diose. Jich la schʼayik te kuxlejalil ta sbajtelkʼinal ta Nichimal Kʼinal (Génesis 2:17; 3:1-6; 5:5).

Te jayebix tiempo kuxinem te ants winiketike staoj bayal swokolik ta skaj te la skʼaxuntaybeyik smantal Dios te Adán sok te Evae. Te sKʼop Diose jich ya yal: «Jich yuʼun, ta swenta jtul winik [Adán] och mulil ta balumilal sok ta swenta te mulil och te lajele, jich te lajele kʼax ta stojol spisil te ants winiketik, melel spisil la sta smulik» (Romanos 5:12). Jaʼ yuʼun ya xlajotik ta skaj te kichʼojtik te mulil sok te lajele, ma yuʼunuk ay bin smukoj ta yoʼtan te Dios te ma skʼan ya yalbotike.

Manchukme la yichʼ kʼaxuntaybeyel smantal te Dios ta Edén maba jelon te skʼanojel yoʼtan ta swenta te Balumilal sok ta stojol te ants winiketike. Ta swenta skʼuxul yoʼtan sok te toj spisil te bin ya spas te Diose la sle bin-utʼil la skoltayotik ta swenta te mosoinel yuʼun te mulil sok te lajele. Jich la yal te jpuk-kʼop Pablo: «Melel te stojol te mulile jaʼ te lajele, yan stukel te majtanil ya yakʼ te Diose jaʼ te kuxlejalil sbajtelkʼinal ta swenta te Kajwaltik Cristo Jesús» (Romanos 6:23). Ta swenta skʼuxul yoʼtan te Dios ta jtojoltike «la yakʼ te jip jtul sNichʼan [Jesucristo], swenta yuʼun te machʼa ya yakʼ schʼuunel yoʼtan ta stojole maba ya yichʼ lajinel, yame sta skuxlejal sbajtelkʼinal» (Juan 3:16). Jich bitʼil te jun yoʼtan la stoj jkoleltik te Jesús te kʼalal la yakʼ sba ta lajele, jich ya xjuʼ ya jtatik yan buelta te bintik la schʼay te Adane. a

Te Dios nopolme ya spas ta nichimal kʼinal te Balumilale, jich te bitʼil yaloje. Swenta ya amulanbey yutsilal te bintik tʼujbil ya xtal ta pajel chaʼbeje, jaʼme ya skʼan ya apas te bin la yal te Jesuse: «Ochanik te banti chʼin-nax sjamalel te tiʼnail, melel mukʼ sjamalel te tiʼnail sok mukʼ sjamalel te be te ya x-ikʼawan bael ta lajele, sok bayal te machʼatik ya x-ochik tey-ae; pero chʼin-nax sjamalel te tiʼnail sok chʼin-nax sjamalel te be te ya x-ikʼawan bael ta kuxlejalile, sok ma bayaluk te machʼatik ya x-ochik tey-ae» (Mateo 7:13, 14). Ta melel, jaʼme ay ta awenta stsael te bin kuxlejalil ya akʼan ta pajel chaʼbeje. ¿Bantiwan ya atsa?