Jich la yal jtul achʼix te 13 yaʼbilal te kʼalal kʼebanbot jkojt stsʼiʼe. Ay jtul empresaria te kʼebanbot jun komputadora yuʼun te stat te kʼalal achʼixto-ae, la yal te jaʼ jelbot te skuxlejale. Soknix jtul winik te ay bin tsʼibaybot ta tarjeta yuʼun te yinam ta swenta te lokʼ jun jaʼbil snujpunelike la yal te jaʼ te kʼax lekil majtʼanil akʼbile.

Bayal ants winiketik ya slokʼesik bayal tiempo ta sleel jun lekil majtʼanil ta stojol jtul yamigo o sfamilia ta swenta jun kʼajkʼal te kʼax mukʼ skʼoplale. Bayal machʼatik ya smulanik yakʼel majtʼanil te ya xbajtʼ yakʼbey stseʼelil yoʼtan te machʼa ya yakʼbeyike jich te bitʼil la yichʼ alel ta sjajchibale. ¿Yabal akʼan ya awakʼ jun majtʼanil o te ya awichʼ akʼbeyel junuke?

Kʼax lek ta aʼiyel te ya x-akʼbot stseʼelil yoʼtan te machʼa ya yakʼ te majtʼanil soknix te machʼa ya yichʼe. Te Biblia ya yal: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hechos 20:35). Bayal stseʼelil yoʼtan ya sta te machʼa ya yakʼ te majtʼanil te kʼalal ya yal bayal wokol te machʼa ya yichʼe.

¿Bin ya skʼan ya jpastik yuʼun ya kakʼtik jun majtʼanil te ya yakʼ stseʼelil koʼtantik soknix te machʼa ya yichʼe? Teme ma xjuʼ kuʼuntik yakʼel kʼax lekil majtʼanil, ¿bin-utʼil ya xbajtʼ jnaʼtik te bayal skʼoplal ya xkʼot ta yoʼtan te machʼa ya kakʼbeytike?