TEMA TA SBABIAL PAJINA | TE MAJTʼANIL TE KʼAX MUKʼ SKʼOPLALE
Te majtʼanil te kʼax mukʼ skʼoplale
«Spisil te bin lec aʼbibilotic soc spisil lequil mahtanil talem ta toyol, ta stojol te Tatil yuʼun sacal qʼuinal» (Santiago 1:17). Te texto ini ya yakʼ ta ilel te slekil yoʼtan te jTatik Jehová te ay ta chʼulchane. Ta spisil te majtʼaniletik yakʼojbotike, ay jun majtʼanil te kʼax mukʼ skʼoplale. ¿Bin majtʼanil? Jaʼ te bin la yal te Jesús ta Juan 3:16: «Como hich cʼux ta yoʼtan Dios te bahlumilal te la sticon tal te hip jtuhl Snichʼan, scuenta yuʼun spisil te machʼatic ya schʼuhunic ma ba ya xchʼayic, ay scuxlejalic sbahtel qʼuinal yuʼun».
Te bitʼil la yakʼbotik te jip jtul sNichʼan te Diose, jaʼ jun lekil majtʼanil te kʼax mukʼ skʼoplal ta jkuxlejaltike. Ta swenta-abi, ya xjuʼ xlokʼotik ta mosoinel yuʼun te mulil, te meʼel mamalubel sok te lajele (Salmo 51:5; Juan 8:34). Manchukme ya jkʼan jkoltay jbatik lokʼel ta jtukeltik ta swenta te mosoinel-abi, ma xjuʼ kuʼuntik. Pero kʼax kʼuxotik ta yoʼtan te Diose, jaʼ yuʼun la sle te bin-utʼil la skoltayotike. Te bitʼil la yakʼbotik te jip jtul sNichʼan ta swenta te stojol mulil, te Jehová ya yakʼbotik kuxlejalil ta sbajtʼelkʼinal teme ya jchʼuuntik te mantale. Pero, ¿bin-a te stojol mulile? ¿Bin yuʼun te kʼax mukʼ skʼoplale? Sok ¿bin-utʼil ya xjuʼ ya jtatik lekilal ta swenta-abi?
¿Bin-a te stojol mulile? Jaʼ te kʼalal ay bin ya yichʼ tojel swenta ya jtatikxan yan buelta te bin chʼayeme o ta swenta te ay machʼa ya yichʼ lokʼesel ta chukel. Te Biblia ya yal te toj la yichʼik pasel yuʼun Dios te Adán sok te Evae, la yichʼik pasel yuʼun ya xkuxinik sbajtʼelkʼinal ta nichimal kʼinal sok te yal snichʼnabike (Génesis 1:26-28). Pero la schʼayik spisil-abi te kʼalal la skʼaxuntaybeyik smantal te Dios jaʼ yuʼun kʼatpʼujik ta jmulawiletik. ¿Bintik wokolil la staik? Te Biblia ya yal: «Ha yuʼun hich te bin utʼil och mulil ta bahlumilal ta scuenta jtuhl winic soc te och lajel ta scuenta mulil, hich cʼoht lajel ta stojol spisil ants-winiquetic ta scaj te spisilic stahoj smulic» (Romanos 5:12). Maba la skʼasesbeyik te yal snichʼnabik te tojil kuxlejalil ay yuʼunik-ae, jaʼ la skʼasesbeyik te mulil sok te lajele.
Te stojol jun mulil, jichnix ya skʼan tojel te jayebto stojol te bin chʼayeme. Te Adán la sta smul te kʼalal spasemal yoʼtan la skʼaxuntaybey smantal te Diose, jich la schʼay te tojil kuxlejalil akʼbile. Yuʼun ya kichʼtik koltayel ta swenta-abi, ya skʼan te ay machʼa ya xlaj te toj skuxlejal jich bitʼil te Jesuse (Romanos 5:19; Efesios 1:7). Te manchuk la yakʼ ta ilel skʼuxul yoʼtan te Diose, maʼyuk bin-ora ya xjuʼ ya jtatik yan buelta te bin la schʼayik te Adán sok te Evae, jaʼ te kuxlejalil sbajtʼelkʼinal ta nichimal kʼinal (Apocalipsis 21:3-5).
Te stojol mulile, jaʼ te «lekil majtʼanil» yakʼojbotik te Dios melel jich ya xjuʼ jtatik jkuxlejaltik ta sbajtʼelkʼinal. Swenta ya xkʼotxan ta koʼtantik te maʼyuk yan majtʼanil pajal sok-abi, te Dios la yichʼ ta wenta spisil te bin-utʼil ya skʼan akʼel te lekil majtʼanil jich bitʼil la kiltikix ta yan articulo. Akʼa kiltik te bin-utʼil la spas te Diose.
Ya yakʼbotik te bin ya jmulantike. Ta jpisiltik ay ta koʼtantik te ya jkʼan xkuxinotik ta sbajtʼelkʼinale (Eclesiastés 3:11). Ma xjuʼ kuʼuntik stael ta jtukeltik-abi, jaʼnax ya jtatik ta swenta te la yichʼ tojel te jmultike. Te Biblia ya yal: «Como te stojol te mulil, ha te lajele, yan te mahtanil yuʼun Dios, ha te cuxlejal sbahtel qʼuinal ta scuenta te Cajwaltic Cristo Jesús» (Romanos 6:23).
La yakʼbotik te bin-nix ya xtuun kuʼuntik-ae. Maʼyuk jtuluk ants winik ya xjuʼ ya stoj te jmultik melel te Biblia ya yal te kʼax toyol stojole (Salmo 49:8). La jkʼantik ta oranax te yakuk skoltayotik lokʼel te Dios ta swenta te mulil sok te lajele. Jaʼ yuʼun la yakʼbotik te bin-nix ya xtuun kuʼuntik ta «swenta bitʼil la stojbotic jmultic te Cristo Jesuse» (Romanos 3:23, 24, XCD).
Ta mero yorail. «Cham Cristo cuʼuntic te cʼalal ayotic to ta mulil a» (Romanos 5:8). Te Dios la stojbotik jmultik «te cʼalal ayotic to ta mulil a», jaʼ-abi ya yakʼ ta naʼel te kʼax kʼuxotik ta yoʼtan manchukme jmulawilotik. Manchukme yato xwoklajotik yuʼun te jmulawilotike, te bitʼil tojbilix te jmultike ya yakʼ smukʼul koʼtantik ta swenta bin ya jtatik ta pajel chaʼbeje.
Te bin tijbot yoʼtan yuʼune. ¿Bin tijbot yoʼtan yuʼun te Dios swenta la stojbotik te jmultike? Te Biblia ya yal: «Hich la yacʼ ta ilel te cʼuxotic ta yoʼtan te Dios, ha te la sticon tal ta bahlumilal te hip jtuhl Snichʼan scuenta yuʼun ya xcuxajotic ta scuenta. Hich ay te scʼuxul-oʼtanile: Ma haʼuc te cʼux la jcaʼiy ta coʼtantic te Diose, ha te cʼux la yaʼiyotic ta yoʼtan stuquel» (1 Juan 4:9, 10).
¿Bin-utʼil ya awakʼ ta ilel te ya awal wokol yuʼun te mukʼul majtʼanil-abi? Julukme ta awoʼtan te bin la yal te Jesús ta Juan 3:16, te jaʼnax «te machʼatic ya schʼuhunic» ya sta skolelik. Te Biblia ya yal bin-a te chʼuunel oʼtanile: «Ha te ya jnaʼtic te ya me xcʼoht ta pasel te bin yacotic ta smahliyel» (Hebreos 11:1). Swenta ya jnaʼtik te ya xkʼot ta pasele, ya skʼan ya xkʼot ta koʼtantik te smelelil kʼope. Jaʼ yuʼun lokʼesa tiempo ta snaʼbeyel sba ta lek te Dios te jaʼ la yakʼbotik te «lekil majtʼanile», sok nopa te bin ya skʼan ya apas yuʼun ya ata akuxlejal sbajtʼelkʼinal.
Ya xjuʼ ya anopxan te bin ya yal te Biblia ta swenta-abi teme ya x-ochat ta pajina kuʼunkotik ta Internet jw.org. Te testigoetik yuʼun Jehová tseʼelnaxme yoʼtan ya skoltayat. Te kʼalal ya anopxan ta swenta te majtʼanil ini sok te bitʼil ya ata lekilal yuʼune, yame stijbat awoʼtan yuʼun jich ya awal: «¡Wocol yal Dios, ta scuenta te Cajwaltic Jesucristo!» (Romanos 7:25).