Te kʼalal ya xkʼax te sesenta minuto yayinel-a te alale kʼax mukʼ skʼoplal. ¿Bin yuʼun? Melel teme jun-nax ya xkʼot te ants sok te yal te ayineltoe, jaʼme ya xkoltayot te alal yuʼun lek ya xchʼi bael. *

¿Bin yuʼun te ants sok yutsil yoʼtan ya skanantay te yal te ayineltoe? Te maestra Jeannette Crenshaw la schol ta The Journal of Perinatal Education te «kʼax moemlaj-a te hormona oxitocina sbiil te kʼalal ayinelto yal-a te antse sok jaʼlaj ya xtijbot yoʼtan yuʼun ya skʼan ya yil, ya spet sok ya yakʼbey schuʼ te yale». Ta yorail-abi jaʼnix jich ay yan hormona yuʼun te ants te ya xkaj ta aʼtel te jaʼ ya «xkoltayot yuʼun ya yakʼbey yil skʼuxul yoʼtan te yal» sok te ya skʼanxan ta bayale. ¿Bin yuʼun te tulan skʼoplal te bin la yichʼix alele?

Te bitʼil jun-nax ya yaʼiy sba sok yal te antsetike, jaʼ jich la yichʼik pasel yuʼun te Jehová * te Jpaswanej kuʼuntik te kʼuxotik ta yoʼtane. Te ajwalil David la yalbey wokol Dios yuʼun te lokʼesot tal ta schʼujtʼ te snan sok te bitʼil jun yoʼtan la yaʼiy sba ta skʼab te snane. La snaʼ te jaʼ kanantaybil yuʼun te Jehová jaʼto te kʼalal ayine. Jich la yal: «Te cʼalal ayon to ta schʼuht jnan a, haʼat Diosat cuʼun a» (Salmo 22:9, 10).

NOPA AWAʼIY INI: Teme kʼax lek la schajpan Dios te bitʼil ay ta yoʼtan yal te ants sok te ya skanantay sok skʼuxul yoʼtane, ¿mabal jichuk ya awaʼiy te jaʼnix jich ay jkʼoplaltik ta yoʼtan ta jujuntul te Dios jich bitʼil te jaʼ yal snichʼnabotike? (Hechos 17:29).

Te Jesucristo te ya snaʼbey sba ta lek te Jpaswaneje, jich la yal: «¿Ma bal ya schonic chaʼcoht tut mutetic ta asarion? Pero ma ba ya xchʼay cohel ta lum jcohtuc teme ma hichuc ya scʼan yoʼtan te Atatique. Ahtaybil spisil te stsotsel ajolique. Ha yuʼun ma me xiwex; cʼax hich acʼoblalic a te bin utʼil te tut mutetique» (Mateo 10:29-31).

Ma jpisiltik ya kichʼtik ta wenta te jaʼmal mutetike, jaʼuktobalix-a te ya xchʼay koel ta lume. Yan stukel te Diose ay ta yoʼtan ta jujunkojt te jaʼmal mutetike. Manchukme tsobolik ta kojt, mananix ayuk bin-ora jich mukʼ skʼoplal ta sit Dios-a te bitʼil jtul ants winike. Jamal chikan ta ilel: Ay akʼoplal ta yoʼtan te Diose.

 Te Biblia jamal ya yalbotik:

• «Te sit Jehová ya yil spisil te qʼuinal, yuʼun ya yaʼbe yip te machʼatic jun yoʼtanic ta stojol» (2 CRÓNICAS 16:9).

• «Te sit Jehová ay ta stojol te machʼatic toj yoʼtanic, tsʼehel schiquin ta yaʼiybeyel yawic» (SALMO 34:15).

• «Te xcʼuxul awoʼtan ya xjam qʼuinal ya caiy yuʼun, bin nax coʼtan yuʼun. Te jaʼat awilojbon te jmel-oʼtane, ya anaʼbon te jwocole» (SALMO 31:7, XCD).

¿Yabal skoltayotik te kʼalal ya jnaʼtik te bayal jkʼoplaltik ta yoʼtan te Diose sok te ya skanantayotik sok yutsil yoʼtane? Yak, ya skoltayotik. Te Hannah * ta Inglaterra, jich ya yal:

«Bayal buelta la jkuy te ma kʼuxon ta yoʼtan te Jehová sok te ma sutbon te kʼop ta skaj te maʼyuk schʼuunel koʼtane. La jnop te yak ta yakʼbelon castigoe o te maba ya yichʼon ta wentae. Jich la kaʼiy te maʼyuk jkʼoplal ta yoʼtane».

Ta ora ini, te Hannah kʼotix ta yoʼtan te kʼux ya x-aʼiyot sok te ay skʼoplal ya x-ilot yuʼun te Jehová. ¿Bin yuʼun te jelon te snopjibal yuʼune? Jich ya yal: «Ma orauknax jelon te snopjibal kuʼune. Ayix tal bayal jaʼbil te la kaʼiy ta jun tsoblej ta swenta te la yakʼ sba ta lajel te Jesucristoe, jaʼ-abi yan-nax la kaʼiy-a sok jaʼ la skoltayon yuʼun kʼot ta koʼtan te kʼuxon ta yoʼtan te Jehovae. Jaʼnix jich la kaʼiy te kʼuxon ta yoʼtan kʼalal la kil te ya sutbon te jkʼope, bayal buelta okʼon yuʼun. Te snopel te Biblia sok te ya xboon ta tsoblejetike, jaʼ skoltayejon ta snaʼbeyel sba ta lek te Jehová sok ta snaʼel te ay jkʼoplaltik ta yoʼtane. La kilix te kʼuxotik ta yoʼtan te Jehová, ya skoltayotik sok ya skʼan ya skanantayotik».

¡Kʼax bayal ya yakʼ smukʼul koʼtantik-abi! Pero, ¿bin-utʼil ya xjuʼ ya anaʼ teme ay skʼoplal ta yoʼtan Dios te bin yaʼiyel ya awaʼiy aba sok teme ya xkʼot ta yoʼtane? Yame atabey sujtib ta yan artículo.