Teme ma jaʼuk smul te Diose, ¿machʼa smulix-a? ¿Bin yuʼun te ay bayal ants winiketik ya xlajik ta wiʼnal o te jkʼaxel maʼyuk bin ay yuʼunike? ¿Bin yuʼun te ay bayal guerra, chamel sok te bintik ya xkʼax te bayal bintik ya sjin jilele? Te Biblia ya yal te ay oxchajp te bin yuʼun ay swokol te ants winiketike:

1. Jaʼnax kʼux ya yaʼiy sba, ay sbikʼtal yoʼtan sok ya xpʼajawan. «Jtuhl winic ya smosohin yan winic yuʼun ya yaʼbe swocol» (Eclesiastés 8:9). Te ants winiketik spisil-ora yichʼojik utsʼinel sok akʼbil swokolik yuʼun yantik te ay sbikʼtal yoʼtanike.

2. Te bin ajkʼnax ya xkʼot ta jtojoltike. Te Biblia ya yal te ya xkʼax swokol te ants winiketik ta skaj te ay bin «ajcʼnax te jich ya xcʼot ta swentaique» (Eclesiastés 9:11, XCD). Jaʼ ya skʼan ya yal te ya xjuʼ ya jtatik wokol ta skaj te ayotik ta jun lugar te ma naʼbiluk kuʼuntik te ay bin ya xkʼot ta pasel tey-ae o ta skaj te ma jtsajtay jbatik o yuʼun ay bin ma lek la jpastik.

3. Te chopol ajwalil yuʼun te balumilale. Te Biblia ya yal te machʼa smul te ay swokol te ants winiketike: «Ay ta scʼab pucuj swohlol te bahlumilale» (1 Juan 5:19). Te Pukuj jaʼ jun espiritu te ay yuʼele, lekil chʼul-abat ta sjajchibal, pero «mayuc bin ora melel te scʼope» (Juan 8:44). Ay yantik chʼul-abatetik te la stʼunik te Pukuj ta spasel te bin ya skʼan yoʼtanike, jaʼ yuʼun kʼatpʼujik ta chopol espirituetik (Génesis 6:1-5). Jaʼto tal te la stoy sbaik ta stojol Dios, te Satanás sok te chopol espirituetik stuuntesojik te yuʼel yuʼun ay bintik chopol ya yakʼ xkʼot ta pasel ta swolol Balumilal, kʼax chikanxan ta ilel ta jkʼajkʼaleltik. Te Pukuj bayal ilinem sok «ya sloʼloy spisil te bahlumilale», jaʼ yuʼun te Biblia jich ya yal: «¡Pero ay me swocolic te machʼatic nahinemic ta bahlumilal soc ta mar!» (Apocalipsis 12:9, 12). Te Satanás bayal ya x-utsʼinwan, kʼax chopol sok ya smulan yilbeyel swokol te ants winiketike. Jaʼ smul te ay wokolile, ma jaʼuk te Diose.

NOPA AWAʼIY INI: Jaʼnax te machʼa kʼax chopol sok te jkʼaxel maʼyuk skʼuxul yoʼtan ya yakʼbey swokol te machʼa maʼyuk bin chopol spasoje. Yan stukel te Biblia ya yal te «jcʼuxultaywanej stuquel te Diose» (1 Juan 4:8). Jaʼ yuʼun ma xjuʼ ta alel te ay bin chopol ya spas te smelelil Diose sok te ma stojiluk te bin ya spase (Job 34:10).

Jaʼ yuʼun yaniwan ajojkʼoybey aba: «¿Bin-ora ya slajin Dios te bintik chopol ya spas te Satanase?». Jich bitʼil la jnoptikix, te Dios ya yilay te bin chopole sok kʼux ya yaʼiy ta yoʼtan te jwokoltike. Te Biblia ya yal te akʼa kalbeytik te bin ya jmel koʼtantik yuʼune, melel ay jkʼoplaltik ta yoʼtan (1 Pedro 5:7). Ta yan artículo ya kiltik cheʼoxeb prueba te ya yakʼ ta ilel te bayal kʼuxotik ta yoʼtan te Diose sok te ay yuʼel yuʼun ya slajin te wokolil sok te bintik ma stojiluk ta pasele. *