Te Dios kʼax lek spasoj te jbakʼetaltik te ya xjuʼ ya slekubtes sba stukele. Te kʼalal ay machʼa ya sboj sba, ya yichʼ jotʼel o ay bin ya sjul sba-a, teme maʼyuk schamele, te sbakʼetale oranax ya xkaj ta aʼtel yuʼun ya smak te chʼichʼe, ya smak te ejchen sok ya yachʼubtes te snujkulele.

NOPA AWAʼIY INI: Teme jich la spas jbakʼetaltik te Jpaswanej kuʼuntik te stukelnax ya slekubtes sbae, ¿yabal schʼuun koʼtantik te ya xjuʼ xpoxtaybotik te koʼtantik teme ay ta wokole? Te machʼa la stsʼibay te Salmo kʼoem lek ta yoʼtan-a te jaʼnax stukel te Dios ya xjuʼ ya slekubtes te machʼa pichʼil yoʼtan sok te ya spotsbey te yejchene (Salmo 147:3). Jaxan teme ay tulan wokolil kʼaxem ta atojol te ma xchʼay ta awoʼtane, ¿bin jamal yaloj Dios te ya yakʼbat anaʼ te ya xjuʼ ya «spotsbat te awejchen» ta ora ini soknix ta pajel chaʼbeje?

Jich ya yalbotik te Diose: «Ma me xiwat, como joquinejat; ma me xamel awoʼtan, como hoʼon te Dioson awuʼune; ya caʼbat awip, ya jcoltayat» (Isaías 41:10). Te kʼalal ya jnaʼtik te kʼuxotik ta yoʼtan te Diose ya yakʼbotik lamal-oʼtanil sok ya yakʼbotik kiptik ta sitintayel te wokolile. Te j-alwanej Isaías jich la yal: «Ha ya yaʼbe yip te machʼa luhben, soc ya yaʼbe xan yip te machʼa mayuc yip» (Isaías 40:28, 29). Te lamal-oʼtanil-abi, te jpuk-kʼop Pablo la yal te jaʼ te «lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel[e]» (Filipenses 4:4-7, 9).

Te Biblia ya yakʼbeyxan yip te schʼuunel koʼtantik ta swenta te bin jamal yaloj Dios te ya spas ta stojol te ants winiketike. Jun ejemplo, te Apocalipsis 21:4, 5 ya yal bin-a te ya xbajtʼ spas te Diose sok te bin yuʼun ya xjuʼ ya smukʼulin koʼtantik te ya skʼotes ta pasele.

• «Ya me xcusticlambot yaʼlel sitic». Te Jehová yame slajin spisil te bintik ya yakʼbotik jwokoltike sok te bintik ya snaʼulan koʼtantike, manchukme jich yilel te maʼyuk lek skʼoplale.

• Te Ajwalil te spisil ya xjuʼ yuʼun te «hucul ta mucʼul-huctajibal» yame stuuntes te yuʼel yuʼun ya skom te wokolil ya kʼax ta jtojoltike sok yame skoltayotik te kʼalal ya jkʼantik koltayele.

• Te Jehová, te smelelil Diose, jamal yaloj te «ay ta ichʼel ta cuenta soc smelelil» te skʼope. Te kʼalal jich la yal-abi jaʼ yak ta yakʼel ta kʼabal-a te schʼul biil te yananix skʼotes ta pasel-a te skʼope.

«Ya me xcusticlambot yaʼlel sitic yuʼun te Diose; mayuquix lajel, mel-oʼtan, oqʼuel o te bin cʼux, como cʼaxix spisil te bintic ay ta nahil to, xchi. Hich la yal te machʼa hucul ta mucʼul-huctajibal: Ya jpas ta yachʼil spisil, xchi. Soc hich la yalbon: Tsʼihbaya ini, como te cʼop ini ay ta ichʼel ta cuenta soc smelelil» (Apocalipsis 21:4, 5).

Te Biblia sok te bintik pastiklanbile ya skoltayotik ta snaʼbeyel sba ta lek te jTatik te ay ta chʼulchane. Manchukme ma xkʼopoj te bintik pastiklanbile yak ta yalbelotik kʼoem te yakuk kamigointik te Diose, pero te Biblia jamal ya yalbotik stukel: «Nohpojanic ta stojol Dios, hich ya xnohpoj ta atojolic» (Santiago 4:8). Sok jich ya yalxan te Hechos 17:27: «Ma ba namal ay ta jtojoltic».

Te kʼalal ya alokʼes tiempo ta snaʼbeyel sba te Diose, jichme ya schʼuunxan awoʼtan te ay akʼoplal ta yoʼtane (1 Pedro 5:7). ¿Bintik lekilal ya jtatik te kʼalal ya smukʼulin koʼtantik te Jehovae?

Nopa awaʼiy ta swenta jtul winik ta Japón te Toru sbiile. Manchukme akʼbot snop skʼop Dios yuʼun te smamae, la schʼik sba sok te yakuza, jun grupo yuʼun mafia ta Japón. Jich ya yal: «La jkuy te ya spʼajon te Diose sok te yak ta yakʼbelon castigo ta swenta te machʼatik ya xlajik ta joyobal-ae, kʼaxemtoxan-a te kʼalal ya xlaj te machʼatik kʼux ta koʼtane». Te Toru la yil te jaʼ «tulantesbot yoʼtan sok te maʼyuk skʼuxul yoʼtan» ta skaj te la schʼik sba ta grupo-abi. Jich ya scholxan ta swenta te bintik ya skʼan yoʼtan-ae: «Swenta mukʼ jkʼoplal ya xkʼoon-a la skʼan la jmil te machʼa kʼax mukʼ skʼoplal manchukme jchʼielto ya xlajon bael».

 Pero te kʼalal jajch snop Biblia te Toru sok te Hannah te yiname, jajch sjel te skuxlejale sok te bin yilel-ae. Te Hannah jich ya yal: «Chajpnax-a te bintik la sjel ta skuxlejal te jmamlale». Te Toru jich jamal ya yal: «Ya jnaʼ te ay te Diose sok te ay jkʼoplaltik ta yoʼtan ta jujuntule. Ma skʼan te ay machʼa ya xlaje sok chapal yuʼun ya spasbey perdón te machʼa ya sujtes yoʼtan ta smelelile. Ay bintik te jaʼnax ya jcholbeytik yaʼiy stukel te maniwan ya kalbeytik yaʼiy te yantik sok te ma xkʼot ta yoʼtanike. Nopolme ya slajin Jehová te kʼopetik, te bintik kʼux sok te wokolile. Sok bayal bin-utʼil ya xjuʼ ya skoltayotik ta ora ini. Bayal jkʼoplaltik ta yoʼtan sok ya skanantayotik te kʼalal ya jmel koʼtantike» (Salmo 136:23).

Jich bitʼil kʼax ta stojol te Toru, te kʼalal ya xkʼot ta koʼtantik te ya slajin Dios spisil te bintik ya yakʼ x-okʼotik yuʼune sok te nopol ya spas-abi ay bin tʼujbil ya yakʼ jmaliytik ta pajel chaʼbej sok ya yakʼ jmulantik te kuxlejalil ta ora ini. Manchukme nojel ta wokolil te Balumilale, te jaʼate ya xjuʼ ya ata lekilal ta swenta skʼuxul yoʼtan te Diose.