Jich bitʼil ya yal te doctor Rick Hanson te ya yilbey skʼoplal te jchinamtike ya yal te «aylaj ta gen kuʼuntik te ya xjuʼ ya kakʼtik ta ilel te bin yaʼiyel ya yaʼiy sba te yantike».

NOPA AWAʼIY INI: ¿Bin yuʼun te ya xjuʼ ya kakʼtik ta ilel te jich ya kaʼiy jbatik te bin-utʼil ya yaʼiy sba te yane pero ma xjuʼ jich ya spasik stukel te chambalametike? Te Biblia ya yal te pasbilotik jich te bin-utʼil yilel te Diose (Génesis 1:26). Te bin ya skʼan ya yal-abi, jaʼ te ya xjuʼ kuʼuntik skʼayinbeyel sok yakʼel ta ilel te tʼujbil taleliletik yuʼune. Jich yuʼun te kʼalal ay machʼa ya yakʼ ta ilel te jich ya yaʼiy sba te bitʼil ya yaʼiy sba te yane, jaʼ yak ta skʼayinbeyel stalel te Jehová te Jpaswanej kuʼuntik te ya snaʼ yoʼbolil jbatike (Proverbios 14:31).

Te Diose ya yaʼiy te bin yaʼiyel ya kaʼiy jbatik sok ma skʼan te ay jwokoltike. Ta swenta te tulan mosoinel kʼax ta stojol te israeletik ta Egipto sok te cuarenta jaʼbil beenik ta jochol takin kʼinale, te Biblia jich ya yal: «Ta spisil te swocolic, ha nix hich la yaʼiy wocol» (Isaías 63:9). Ilawil te ma jaʼuknax la snaʼ Dios te ay ta wokol te lum yuʼune, jaʼnix jich la yaʼiybey-euk te swokole. Jich ya yal te Diose: «Te machʼa ya spiquex, hich cʼohem te ya spicbe schʼuhlel jsit» (Zacarías 2:8). Jich yuʼun te kʼalal ay bin chopol ya kichʼtik pasbeyele, jich kʼoem te jaʼ yakik ta spasbeyel te Diose.

Manchukme ay bin ma lek ya yalbotik te koʼtantike o ma snujpʼuk ya kaʼiytik te ya snaʼ yoʼbolil jbatik te Diose, te Biblia jamal ya yal: «Ha cʼax mucʼ te Dios te bin utʼil te coʼtantic, soc ha ya snaʼ spisil stuquel» (1 Juan 3:19, 20). Jaʼnax te Dios ya snaʼbotik jbatik ta lek. Jaʼ yuʼun ya snaʼ te bin ya xkʼax ta jtojoltik, te bin ya jnoptik sok te bin yaʼiyel ya kaʼiy jbatike. Ta melel, jich ya yaʼiy sba-euk te bitʼil ya kaʼiy jbatike.

 Te Biblia jamal ya yalbotik:

• «Hich yac acʼopon Dios, ya me yaʼiybat acʼop te Jehová; yac awawtay ta scʼanel coltayel, hich me ya yalbat: Liʼ ayoni» (ISAÍAS 58:9).

• «Como ya jnaʼ te bin jnopoj ta acuentahic, xchi te Jehová, ha jnopoj te lec ya xcʼohex, ma haʼuc te ya xcʼax awocolic, ya caʼbeyex te bin yaquex ta smahliyele. Hich ya xtal acʼopononic; ya me xtal acʼopononic soc hoʼon ya caʼiybeyex acʼopic» (JEREMÍAS 29:11, 12).

• «Tsoba ta yawil awuʼun te yaʼlel jsit; ¿Ma bal tsʼihbabiluc ta libro awuʼun?» (SALMO 56:8).

¿Yabal skoltayotik ta sitintayel te jwokoltik kʼalal ya jnaʼtik te ya xkʼot ta yoʼtan Dios te bin yaʼiyel ya kaʼiy jbatike? Kiltik te ejemplo yuʼun te María.

«Te kʼalal la kil te woklaj cheb jaʼbil yuʼun cáncer sok laj te jkerem-al te aytonax 18 yaʼbilal-ae, lajon-nax la kaʼiy. ¿Bin yuʼun kʼax wokol sok kʼax tulan te kuxlejalile? Ilinon ta stojol Jehová ta skaj te maʼyuk bin la spas ta swenta-abi.

»Jich la kaʼiy te ma kʼuxon ta yoʼtan te Jehová. Wakeb jaʼbil ta patil, la jcholbey yaʼiy jtul kamiga ta congregación te lek yoʼtan sok te ya xkʼot ta yoʼtan te bin yaʼiyel ya kaʼiy jbatike. Te kʼalal kʼaxix cheʼoxeb ora ta schʼamel yaʼiy-a te jkʼope, la sjultesbon ta koʼtan jun texto te la stijbon koʼtane, jaʼ te 1 Juan 3:19, 20 te ya yal te ‹cʼax mucʼ te Dios te bin utʼil te coʼtantic, soc ha ya snaʼ spisil stuquel›. Ta patil, la scholbon te ya xkʼot ta yoʼtan Jehová te bin yaʼiyel ya kaʼiy jbatike.

»Manchukme jich-abi, ilinemonto-a. Jich yuʼun la jkʼopon te Salmo 94:19 te jich ya yal: ‹Te cʼalal ay bayel bintic ya xcʼopoj coʼtan yuʼun, te smucʼubtesel-oʼtanil awuʼun la yaʼbon stseʼelil coʼtan›. Mero la stijbon koʼtan te texto-abi. Ta patil, juʼ kuʼun scholbeyel yaʼiy Jehová te jwokole, melel ya jnaʼix-a te ya yaʼiybon te jkʼope sok te ya xkʼot ta yoʼtan te bin yaʼiyel ya kaʼiy jbae. Jaʼ-abi, la yakʼbon bayal slamalil koʼtan».

¡Bayal smukʼul kʼinal ya kaʼiytik yuʼun te ya xkʼot ta yoʼtan Dios te jwokoltike sok te jich ya yaʼiy sba-euk te bitʼil ya kaʼiy jbatike! Pero, ¿bin yuʼun te ay bayal wokolile? ¿Yuʼunbal yak ta yakʼbelotik castigo te Dios ta swenta jun mulil te jpasojtike? ¿Yabal sta yorail te ya slajin te wokolile? Te jojkʼoyeletik ini yame yichʼ tabeyel sujtib ta yantik artículo.