TA SJUN Mateo 13:24-26, te Jesús jich la yal: «Te cuentahinel yuʼun te chʼulchan, hich cʼohem te bin utʼil jtuhl winic te la slihlin tsʼunubil ta sqʼuinal; pero wayal spisilic a tal te scontra, la slihlin ac ta yohlil te trigo, locʼ bahel. Cʼalal col tal te trigo soc sitin, tey chicnaj a te aque». Ay chaʼoxtul te machʼatik ay bin ya yilbeyik skʼoplal ma schʼuunik ta lek te yuʼun-nix ay jich ya yichʼ pasel-ae. Jaʼukmeto ay junetik yuʼun namey kʼinal te yichʼoj leyetik yuʼun Roma te ya yalik te ya xjuʼ ay machʼa jich ya spas-ae.

Jich bitʼil ya yal jpajk diccionario ta swenta Biblia, te ley yuʼun te romanoetik ya yal te jaʼ jun mulil teme ay machʼa ya sujtesbey spakol yan ants winik te kʼalal ya stsʼunbey ak ta yawal stsʼunube. Jich bitʼil ay ley ta swenta-abi, ya skʼan ya yal te yuʼun-nix ay machʼa jich ya spas-ae. Jtul te machʼa ya yilbey skʼoplal leyetik te Alastair Kerr sbiil ya scholbey skʼoplal te bitʼil ta jaʼbil 533 te kʼalal jaʼix jkʼajkʼaleltik-ae, te ajwalil romano Justiniano la slokʼes jpajk libro te sbiil Digesto.  Ta libro-abi tey yichʼoj tsobel-a te leyetik yuʼun te romanoetik te ay stsʼibayojik te machʼa pʼijubenik ta yilel te leyetik ta jaʼbil 100 kʼalalto ta 250 te kʼalal jaʼix jkʼajkʼaleltik-ae. Te libro Digesto ya sta ta alel jtul te machʼa ay bin ya yilbey skʼoplal te Ulpiano sbiile te la yal te ay machʼa la stsʼunbey ak ta skʼinal yan ants winiketik te jich la yutsʼinbey te yawal stsʼunube. Sok la yalxan te bitʼil te winik ya xjuʼ ya skʼanbey toyol stojol yuʼun te utsʼinbot te yawal stsʼunube.

Jich bitʼil la kiltikixe, ay jich ya xkʼot ta pasel ta lum yuʼun te romanoetike. Jich yuʼun ya yakʼ kiltik ta lek te bitʼil te ejemplo la stuuntes te Jesuse yuʼun-nix ay jich ya xkʼot ta pasel-a.