1-3. 1) ¿Bin-a te tulanxan skʼoplal yuʼunik te j-abatetik yuʼun Diose? 2) ¿Bintik wokolil ay yuʼunik te hermanoetik te yakik ta snopel yan kʼopil? 3) ¿Bintik jojkʼoyel ya kakʼbeytik sujtib ta articulo ini? (Ilawil te lokʼomba ta sjajchibal te articulo).

TA ORA ini, bayal testigoetik yuʼun Jehová yakik ta koltaywanej swenta ya xkʼot ta pasel te bin albil jilel skʼoplal ta Apocalipsis 14:6. Te albilkʼop-abi ya yal te ya yichʼ cholbeyel skʼoplal ta «spisil nacionetic, tsʼumbaliletic, cʼopiletic soc pueblohetic» te lek yachʼil kʼop yuʼun te Ajwalinele. Bayal ta tul Testigoetik-abi yakik ta snopel yan kʼopil. Ay machʼatik yakik ta abatinel ta misioneroil, yantik baemik ta yan nasion te bantito ya skʼanxan cholel te skʼop Diose. Ay yantikxan te jajchikix ta kʼoel ta tsoblej yuʼun kongregasion ta yan kʼopil teynix ta slumalike.

² Te bin tulanxan skʼoplal kuʼuntik te j-abatotik yuʼun te Jehovae, jaʼ te ya jkanantaytik te schʼuunel koʼtantik soknix yuʼun te jfamiliatik (Mateo 5:3) (ilawil te recuadro «¿Bin ya skʼan ya yal?»). Ayniwan kʼax makalotik te maʼyuk jtiempotik ta snopel ta lek te Biblia ta jtukeltik. Jaʼukmeto te hermanoetik te ayik ta kongregasion ta yan kʼopil jaʼnix jich ay yantikxan swokolik-euk.

 ³ Manchukme wokol ya yaʼiyik snopel yan kʼopil, te hermanoetik-abi ya skʼan ya spasik tulan ta snopel ta spisil-ora te bintik kʼubul skʼoplal ayik ta sKʼop te Diose (1 Corintios 2:10). ¿Bin ya xjuʼ ya spasik te j-abatetik-abi swenta ya snopik te bintik kʼubul skʼoplal te ayik ta Biblia kʼalal maba ya xkʼot ta yoʼtanik ta lek te bin ya yichʼ alel ta kongregasione? ¿Bin yuʼun te meʼil tatiletik te ayik ta jun kongregasion ta yan kʼopil ya skʼan ya spasik tulan te ya xkʼot ta yoʼtanik te yal snichʼnabik te smelelil yuʼun te Bibliae? Kiltik.

4. ¿Bin ya xjuʼ ya yutsʼin te bitʼil kamigoinej jbatik sok te Jehovae? Chola sok junuk ejemplo.

⁴ Te bitʼil maba ya xkʼot ta koʼtantik ta lek te nojptesel yuʼun Biblia ta yan kʼopil ya xjuʼ ya yutsʼin te bitʼil kamigoinej jbatik sok te Jehovae. Kiltik jun ejemplo te jich kʼot ta pasel ta skʼajkʼalel te Nehemías, kʼalal sujt bael ta Jerusalén la yil te ay chaʼoxtul alaletik judioetik te maba la snopikix te kʼopil yuʼun te judioetike (kʼopona te sjun Nehemías 13:23, 24). Jaʼ yuʼun te alaletik-abi maba ya xkʼot ta yoʼtanik te sKʼop Diose. Te bin kʼot ta pasel ta swenta-abi, jaʼ te kʼunkʼun laj yip te bitʼil yamigoinej sbaik sok te Jehovae (Nehemías 8:2, 8).

5, 6. ¿Bin staojik ta ilel chaʼoxtul meʼil tatiletik te ayik ta kongregasion ta yan kʼopile, sok bin yuʼun te jich ya xkʼaxe?

⁵ Ay chaʼoxtul meʼil tatiletik te ayik ta kongregasion ta yan kʼopil staojik ta ilel te pejkʼajem yip te bitʼil yamigoinej sbaik sok te Jehová te yal snichʼnabike. ¿Bin yuʼun te jich ya xkʼaxe? Jaʼ ta skaj te bitʼil te yal snichʼnabik maba ya yichʼbeyik ta lek swentail te bin ya yichʼ alel ta tsoblejetike. Jaʼ yuʼun, te bintik ya yichʼ cholbeyel skʼoplal tey-ae maba ya xkʼot ta yoʼtanik sok maba ya xtijbot yoʼtanik ta spasel. Kiltik te bin ya yal jtul tatil te Pedro sbiil, te ay ta nainel-a sok sfamilia ta Sudamérica te bajtʼik ta nainel ta Australia: «Te bintik ya kalbeytik skʼoplal ta swenta skʼop Diose ya skʼan ya stijbey yoʼtanik sok te bin-utʼil ya yaʼiy sbaike» ^[1] (ilawil te nota ta slajibal te articulo) (Lucas 24:32).

⁶ Te bin ya xjuʼ ya smakotikxan te kʼalal ya jkʼopontik junetik ta yan kʼopil, jaʼ te maba ya stij koʼtantik jich bitʼil ta jkʼoptike. Jaʼnix jich wokol ya kaʼiytik skʼoponel yantik ta yan kʼopile. Jaʼ-abi ya xjuʼ ya slujbtesotik sok ya xjuʼ ya slajin kiptik swenta ya x-abatinotik ta stojol te Jehovae. Jaʼ yuʼun, ma jaʼuknax ya skʼan te ya jmulantik te ayotik ta kongregasion ta yan kʼopile, jaʼnix jich ya skʼan ya jkanantaytik te bitʼil kamigoinej jbatik sok te Jehovae (Mateo 4:4).

7. ¿Bin la spas te babilonioetik swenta te Daniel ya snopbey te bin yilel skuxlejalik soknix te ya x-och ta srelijionike?

⁷ Kʼalal ikʼotik bael ta Babilonia te Daniel sok te yamigotake, la yichʼik sujel swenta ya snopbeyik te bin yilel skuxlejalik te babilonioetik soknix te ya x-ochik ta relijion yuʼunike. ¿Bin-utʼil la spasik? La yakʼbey snopik te kʼopil yuʼunik sok akʼbotik sbiilik ta kʼopil-abi (Daniel 1:3-7). Te yachʼil biilil akʼbot te Daniel snitojbey sba skʼoplal sok te Bel te dios te jaʼ mukʼxan skʼoplal yuʼun te babilonioetike. Te bin laniwan skʼan te ajwalil yuʼun Babilonia jaʼ te ya schʼuun te Daniel te jaʼ bayalxan yuʼel te dios-abi te bitʼil te Dios yuʼun te jaʼ Jehovae (Daniel 4:8).

8. ¿Bin la spas te Daniel swenta spisiluk-ora stsakojuk yip te bitʼil yamigoinej sba sok te Jehovae?

⁸ Ta Babilonia, te Daniel japbot te bujtsʼan weʼeliletik te jaʼ yuʼun te ajwalile. Jaʼukmeto te Daniel yakʼojnanix ta yoʼtan-a te ya schʼuun te mantaliletik yuʼun te Diose (Daniel 1:8). Te Daniel la spas tulan swenta spisiluk-ora stsakojuk yip te bitʼil yamigoinej sba sok te Jehová manchukme ay ta nainel ta yan nasion. ¿Bin-utʼil juʼ  yuʼun? La snopilan te chʼul libroetik te ayik ta kʼopil hebreo (Daniel 9:2). Kʼalal jteb ma sta 70 jaʼbil te kʼot ta Babiloniae, yato yichʼ naʼbeyel sba jich bitʼil Daniel te jaʼ sbiil hebreo (Daniel 5:13).

9. ¿Bin stalel la yakʼ ta ilel ta stojol te sKʼop Dios te jtsʼibojom yuʼun te Salmo 119?

⁹ Jaʼnix jich ay yan ejemplo kuʼuntik te jaʼ te jtsʼibojom yuʼun te Salmo 119. Tsʼijk yuʼun bayal te bintik chopol albot yuʼun te machʼatik ayik ta sna te ajwalile. Jaʼukmeto la sle koltayel ta sKʼop Dios, te jaʼ te bin akʼbot yip swenta maba ya spajbey stalel te yantike (Salmo 119:23, 61). La yakʼ kʼotuk ta yoʼtan te bintik nojptesot yuʼun te Diose (kʼopona te sjun Salmo 119:11, 46).

10, 11. 1) ¿Bin ya jkʼantik te ya xlokʼ kuʼuntik-a te kʼalal ya jnoptik te sKʼop Diose? 2) ¿Bin-utʼil ya xjuʼ kuʼuntik spasel-abi? Chola sok junuk ejemplo.

¹⁰ Manchukme ay bayal bintik akʼbil ya jpastik ta jkongregasiontik o ta kaʼteltik, jpisiltik ya skʼan ya jlokʼestik tiempo ta snopel te Biblia ta jtukeltik sok ta yichʼel ta mukʼ Dios ta sjunal na (Efesios 5:15, 16). Te bin ya skʼan ya xlokʼ kuʼuntik kʼalal ya jnoptik te skʼop Dios ma jaʼuk te ya jkʼopontik bayal pajina yuʼun te Biblia sok te junetik o te ya jchajpantik jun komentario ta swenta te tsoblejetike. Te bin ya skʼan ya xlokʼ kuʼuntike jaʼ te ya xkʼot ta koʼtantik sok te ya yakʼbey yip schʼuunel koʼtantik te sKʼop Diose.

¹¹ Swenta ya jtatik te bin ya jkʼantik kʼalal ya jnoptik te skʼop Diose, ya skʼan te ya jtsajtay jbatik sok te ya jpastik pensar bin ya xtuun kuʼuntik, ma jaʼuknax te bin ya xtuun yuʼun te yantike (Filipenses 1:9, 10). ¿Bin yuʼun te jich ya kaltike? Melel te kʼalal ya jchajpan jbatik ta swenta scholel skʼop Dios, tsoblejetik, jun discurso o te bin ya xkʼax kakʼtik ta ilele, ay maba ya jpastik pensar bin-utʼil ya skoltayotik te bin ya jkʼopontike. Kalbeytik skʼoplal junuk ejemplo ta swenta jtul jpasweʼelil. Manchukme ya spas prueba yaʼiy te weʼelil kʼalal mato yichʼoj kʼasesel ta mesae, maba ya skʼan ya yal te yakix ta weʼel ta lek kʼalal ya spas prueba yaʼiye. Teme ya skʼan lek ya x-ayin te sbakʼetale ya skʼan te ya smakʼlin sba sok lekil weʼelil ta jujun kʼajkʼal. Jaʼnix jich, teme ya jkʼantik ya yichʼ yip te bitʼil kamigoinej jbatik sok te Jehovae, spisil-ora ya skʼan ya jnoptik te Biblia yuʼun jich ya jtatik-a te bintik ya xtuun kuʼuntike.

12, 13. ¿Bin yuʼun ya yalik bayal j-abatetik yuʼun Dios te jaʼ lek te ya skʼoponik te Biblia ta skʼopiknixe?

¹² Bayal ta tul j-abatetik yuʼun Dios te ayik ta jun kongregasion ta yan kʼopil yilojik te jaʼ lek te ya skʼaytes sbaik ta snopel te Biblia ta skʼopiknixe (Hechos 2:8). Jaʼnix jich te misioneroetik snaʼojik te yuʼun ma xlaj yipik ta asignasion yuʼunik maba tikʼuk-a te bin ya yaʼiyik ta tsoblejetike.

¹³ Jtul Hermano te Alain sbiil te ayix waxakeb jaʼbil yak ta snopel te kʼopil persa jich ya yal: «Kʼalal ya jchajpan jba ta swenta te tsoblejetik ta kʼopil persa, jaʼ ya xbajtʼ koʼtan ta kʼopil-abi. Jich bitʼil jaʼnax ya xbajtʼ ta koʼtan snopel bin-utʼil ta alel te kʼopetike, maba spisiluk-ora ya xkʼot ta koʼtan te skʼop Dios ya jkʼopone. Jaʼ yuʼun la jkʼaytes jba ta skʼoponel te Biblia sok te junetik ta jkʼopnixe».

14. ¿Bin ya skʼan ya snaʼik ta lek te meʼil tatiletik, sok bin yuʼun?

¹⁴ Te meʼil tatiletik ya skʼan ya snaʼik ta lek teme yak ta kʼoel ta yoʼtanik sok teme ay skʼoplal ta yoʼtanik te smelelil te yal snichʼnabike. ¿Bin yuʼun? Kiltik te bin kʼot ta stojolik te Serge sok te yinam te Muriel sbiile te kʼaxem ta oxeb jaʼbil ayinik ta jun kongregasion ta yan kʼopil. Ta jun buelta la yilik te bitʼil te yal snichʼanik te juklajuneb yaʼbilal ma smulanix te ya xlokʼ ta scholel skʼop Dios sok te ya xbajtʼ ta tsoblejetike. Te Muriel jich la yal: «Ma smulan scholel skʼop Dios-a ta yan kʼopil, ma jichukix te bitʼil ya smulan ta nailto ta francés te jaʼ sbatsʼil kʼope». Te Serge ya yal te bitʼil ayik ta jun kongregasion ta yan kʼopil pejkʼanbot yip te schʼuunel yoʼtan te snichʼane. Jaʼ yuʼun la snopik te ya sujtik bael ta kongregasion te banti ayik ta nailtoe.

15. 1) ¿Bin ya skʼan ya yichʼik ta wenta te meʼil tatiletik teme yakik ta snopel te ya sujtik ta yan kongregasione? 2) ¿Bin tsitsel ay ta stojol te meʼil tatiletik ta Deuteronomio 6:5-7?

¹⁵ Ay chaʼoxtul meʼil tatiletik te yakikniwan ta snopel te ya sujtik bael ta jun kongregasion ta kʼopil te ya snaʼik ta lek te yal snichʼnabike. ¿Bintik ya skʼan ya yichʼik ta wenta kʼalal jich ya skʼan ya spasike? Sbabial, ya skʼan ya yilik teme yuʼun-nix ay stiempoik sok yipik swenta ya snojptesik ta skʼuxultayel te Jehová soknix ta yakʼbeyel snopik te yan kʼopile. Schebal, ya skʼan ya yilik teme ya skʼan ya scholik skʼop Dios, te ya xbajtʼik ta tsoblejetik o teme ya skʼan x-abatinik ta kongregasion ta yan kʼopile. Kʼalal la yilikix spisil-abi, ay chaʼoxtul meʼil tatiletik ya snopik te  ya sujtik ta kongregasion ta kʼopil te ya yaʼiyik ta lek te yal snichʼnabike. Kʼalal te alnichʼanetik yamigoinejikix ta lek-a te Jehovae, te meʼil tatiletik yaniwan snopik te ya xchaʼbajtʼik ta kongregasion ta yan kʼopile (kʼopona te sjun Deuteronomio 6:5-7).

16, 17. ¿Bin spasojik chaʼoxtul meʼil tatiletik swenta ya snojptes te yal snichʼnabik ta stojol te Jehovae?

¹⁶ Ay chaʼoxtul meʼil tatiletik te staojik bintik-utʼil ya snojptesik te yal snichʼnabik ta stojol Jehová ta kʼopil yuʼunike, manchukme ayik ta jun kongregasion o grupo ta yan kʼopil. Kiltik skʼoplal jtul tatil te Charles sbiile. Ay oxtul yantsil snichʼan te ayik ta baluneb, lajchayeb sok oxlajuneb yaʼbilalik. Spisilik ayik ta jun grupo ta kʼopil lingala. Te Charles jich ya yal: «La kaltik te ya jnoptik te Biblia sok te tut achʼixetik sok te ya jpastik te yichʼel ta mukʼ Dios ta sjunal na ta jkʼoptike». Jaʼnix jich ya yal te ya spasik ensayo bin-utʼil ta kʼoponel te kʼopil lingala sok ya xtajinik swenta jich ya smulanik snopel te kʼopil-abi.

¹⁷ Kiltik te ejemplo yuʼun te Kevin. Ay chaʼtul yantsil snichʼan te joʼeb sok waxakeb yaʼbilalike. Te Kevin ya spas tulan swenta ya yakʼbey snopik te smelelil te ay ta Biblia te tut achʼixetik yuʼune, melel mato ya yaʼiyik ta lek te kʼopil ta kongregasion ayike. Jich ya yal: «Te joʼon sok te kiname ya jnoptik te Biblia sok te tut achʼixetik ta kʼopil francés, te jaʼ sbatsʼil kʼopike. Jaʼnix jich la jnoptik te ya xbootik junuk buelta ta tsoblejetik ta jujun u ta kʼopil francés. Sok ta bakasion kuʼuntik ya xbootik ta mukʼul tsoblej yuʼun oxeb kʼajkʼal ta jkʼoptike».

18. 1) ¿Bin-utʼil ya xjuʼ xkoltayotik yuʼun te sjun Romanos 15:1, 2 te meʼil tatiletik swenta ya skoltay te yal snichʼnabike? 2) ¿Bin yalojik chaʼoxtul meʼil tatiletik te ya xjuʼ ta pasele? (Ilawil te nota ta slajibal te articulo).

 ¹⁸ Ta jujun familia ya skʼan ya snopik te bin lekxan ta stojol te yal snichʼnabik ta swenta te bitʼil yamigoinej sbaik sok te Jehovae ^[2] (ilawil te nota ta slajibal te articulo) (Gálatas 6:5). Ta schanlajunebal parrafo la kalbeytik skʼoplal te Muriel sok te Serge. Te Muriel ya yal te la skʼanik sok te smamlal te ya x-abatinikxan ta kongregasion ta yan kʼopil te banti ayik-ae. Manchukme jich-abi bajtʼik ta yan kongregasion yuʼun ya skoltayik te yal snichʼanik swenta ya stsakxan yip te skʼuxul yoʼtan ta stojol te Jehovae (kʼopona te sjun Romanos 15:1, 2). Ta ora ini, te Serge kʼoem ta yoʼtan te jaʼ lek te jich la spasike. Soknix ya yal te kʼalal sujtik ta kongregasion ta kʼopil francés te snichʼan la stsak yip te bitʼil yamigoinej sba sok te Jehová sok la yichʼ jaʼ. Te snichʼane jaʼix precursor regular sok yak ta snopel te ya xchaʼbajtʼ ta abatinel ta jun grupo ta yan kʼopil.

19, 20. ¿Bin-utʼil ya kakʼtik ta ilel te ay skʼoplal ta koʼtantik te sKʼop Diose?

¹⁹ Te Jehová kʼux ta yoʼtan spisil te ants winiketike. Yakʼoj ta bayal ta chajp kʼopiletik te sKʼope swenta «spisil ants-winiquetic» ya xjuʼ ya snaʼik te bin smelelile (1 Timoteo 2:4). Te Jehová snaʼoj te ya stsakxan yip te bitʼil kamigoinej jbatik soke kʼalal ya jkʼopontik te Biblia ta jkʼoptiknixe.

²⁰ Jpisiltik ya skʼan ya jpastik tulan swenta ya kamigointik ta lek te Jehovae. Ta swenta-abi, ya skʼan ya jkʼaytes jbatik ta snopel te Biblia ta jkʼoptiknixe. Jich ya xjuʼ ya jkoltaytik te jfamiliatik ta skanantayel te schʼuunel yoʼtanik sok jich ya kakʼtik ta ilel te ay skʼoplal kuʼuntik te sKʼop Diose (Salmo 119:11).