TE SFAMILIA te John nainemik-a ta jpam tut lum ta Gujarat (India). Te kʼalal nopol ya staix te jaʼbil 1960, te stat la yichʼ jaʼ bitʼil testigo yuʼun Jehová. Jaʼukmeto te John, te smeʼ sok te joʼtul yermanotak jkʼaxel catolicoetik sok skontrainejik-a te srelijion te statike.

Jun buelta te John albot yuʼun stat te yakuk yichʼbey bael jun sobre jtul yamigo ta kongregasion. Ta sab-abi, te John la sboj yal skʼab te kʼalal yak ta sjamel jun lata. Jaʼukmeto, ya skʼan ya schʼuunbey skʼop te state, jaʼ yuʼun la spots ta pakʼ te yal skʼabe, jich bajtʼ ta sna te yamigo te state.

Kʼalal kʼot tey-a, jaʼ la stsak te sobre te yinam yamigo te state, te jaʼnix jich testigo yuʼun Jehová. Kʼalal te hermana la yilbey te yejchʼen te John la yalbey te ya skʼan ya spoxtaybey. La slokʼes te yawil poxetik yuʼun, la spokbey te yejchʼene sok la spotsbey ta lek te yal skʼabe. Patil la spasbey yuchʼ te. Te jayeb tiempo jalaj tey-a te John, te hermana sok slekil yoʼtan la scholbey yaʼiy skʼop Dios.

Jich la yaʼiy te John te kʼunkʼun jajch ta pejkʼajel te slab yoʼtan ta stojol te Testigoetike. Jaʼ yuʼun la snop te ya spasbey cheb jojkʼoyele. Te John skuyoj te jaʼ Dios te Jesuse sok te ya skʼan te ya yichʼ kʼoponel te María, jaʼukmeto te state ma jichuk schʼuunej stukel. Te hermana te snopoj te kʼopil gujarati la sjambey yil te Biblia sok la yalbey yaʼiy ta skʼopnix te John bin ya yakʼ ta nopel te Biblia ta swenta te cheb temaetik la sjojkʼoye. Patil la yakʼbey te foyeto «Estas buenas nuevas del reino».

Kʼalal te John la skʼopon te foyeto, kʼot ta yoʼtan te jaʼ smelelil te bin ya yakʼ ta nopele. Bajtʼ skʼopon te cura yuʼun te Iglesia sok la sjojkʼoybey-euk te bin la sjojkʼoybey te hermanae. Jaʼukmeto ilin te cura, la schʼojbey jpajk Biblia sok jich la yalbey ta aw: «¡Kʼatpʼujematix ta Pukuj! ¿Banti ya yal te Biblia te ma Diosuk te Jesuse? ¿Banti ya yal te ma skʼan kʼoponel te Mariae? ¿Banti? ¡Akʼbon kil!». Ma schʼuun yaʼiyel te John te jich sutbot skʼop yuʼun te cura, jaʼ yuʼun jich la yalbey jilel: «Maʼyukix bin-ora ya xchaʼochon ta junuk iglesia católica». Jichnix la spas-a te John.

Te John jajch ta nojptesel ta Biblia yuʼun te Testigoetik, la schʼuun te smelelil kʼop sok jajch ta abatinel ta stojol Jehová. Jaʼnix jich ay machʼatik ta sfamilia la stʼunbeyik te stalele. Chikanto ta ilel ta yal swaʼel kʼab te banti la yejchʼentes sbae, kʼalal ya yil ya xjul ta yoʼtan te slekil yoʼtan akʼbot yil yuʼun te hermana sesenta jaʼbil ta nail talel te jich la snaʼbey skʼoplal te smelelil yichʼel ta mukʼ Dios (2 Corintios 6:4, 6).