¿Yatobal xjul ta awoʼtan junuk buelta te yalat kʼalal tutat-to-ae? Ejchʼenajniwan te akʼab o te sjol awakane. ¿Bin-utʼil la skoltayat te ameʼe? Laniwan spokbat te awejchʼene sok la spotsbat. Yakat ta okʼel-a, jaʼukmeto te ameʼe la slamantesbat awoʼtan ta oranax ta swenta te bitʼil la skʼoponat sok te la spetat sok yutsil yoʼtan. Kʼalal tutotikto-ae, machʼauknax ya xjuʼ ya yakʼbotik smukʼul kʼinal kaʼiytik.

Kʼalal ya xkʼax bael te tiempoe, wokolxan ya kaʼiytik te jkuxlejaltik sok tulanikxan te bintik ya xkʼax ta jtojoltike. Ma xjuʼ ya jtatik ta ora te smukʼul koʼtantik. Mel-oʼtantik sba te bitʼil te wokolil ya staik te ants winiketik ma xchajpajix ta ora jich bitʼil te kʼalal ay la yichʼik potsbeyel yejchʼenik sok te la yichʼik petel yuʼun te smeʼike. Kiltik chaʼoxchajpuk.

• ¿Kʼaxbal yakat ta mel-oʼtan ta skaj te maʼyukix awaʼtele? Te Julian ya xjul ta yoʼtan te kʼalal lokʼesot ta yaʼtele, ma snaʼ bin ya spas yuʼun. Bayal buelta jich la sjojkʼoybey sba: «¿Bin-utʼil ya xbajtʼ jmakʼlinix-a te jfamiliae? Bayalix jaʼbil yakon ta aʼtel ta empresa ini, ¿bin yuʼun ya skuyik te ma xtuunonixe?».

• ¿Kʼax lajembal yip awoʼtan ta skaj te la alajinbeyik te sjunal nujpunel awuʼunike? Jtul ants te Raquel sbiil jich la yal: «Ayix waxaklajuneb u te la schʼojon jilel te jmamlale. Ochon ta mel-oʼtan ta jkʼaxel, ya xlajon la kaʼiy yuʼun. Kʼux la kaʼiy te jbakʼetal sok la yutsʼin te bitʼil ya kaʼiy jbae. Jkʼaxel ma la jnaʼ bin ya jpas yuʼun».

• ¿Stsakojatbal tulan chamel te maba ya xlekubat yilele? Jichniwan ya awaʼiy aba te bitʼil la yaʼiy sba te Job, te jich la yal ta skaj te swokole: «Ya quihlay te jcuxlejal, ma jcʼan ya xcuxajon spisil ora» (Job 7:16). O jichniwan ya awal-euk te bitʼil te Luis te ayix 80 yaʼbilal: «Ay jich ya kaʼiy te yakon ta smaliyel te ya xlajone».

• ¿Jaxan teme ya akʼan smukʼul kʼinal ya awaʼiy ta skaj te ay machʼa laj awuʼun te kʼux ta awoʼtane? Jtul winik te Robert sbiil jich la yal: «Kʼalal la jnaʼ te la sta lajel te jnichʼan ta abion, maba la jchʼuun yaʼiyel. Ta patil tal skʼuxul yuʼun te jich skʼuxul te bitʼil ya yal te Biblia te pajal sok te ya kichʼtik lowel ta espada» (Lucas 2:35).

Manchukme kʼax tulan swokolik-a, te Julián, Raquel, Luis sok te Robert la sta smukʼul kʼinal yaʼiyik, melel la staik te machʼa ya snaʼxan yakʼele, te Dios te spisil ya xjuʼ yuʼune. ¿Bin-utʼil ya yakʼ smukʼul koʼtantik? ¿Yabal yakʼbat smukʼul awoʼtan te jaʼat te kʼalal ya akʼane?