1. ¿Bin yuʼun jchʼuunejtik sok spisil koʼtantik te ay yuʼel te sKʼop Diose? (Ilawil te lokʼombaetik ta sjajchibal te articulo).

TE J-ABATOTIK yuʼun Jehová jchʼuunejtik sok spisil koʼtantik te «cuxul te sc’op Dios soc ay yu’el ya x’a’tej» (Hebreos 4:12). Kilojtik te ay yuʼel te bin ya yal te Dios ta Biblia ta sjeltayel jkuxlejaltik sok skuxlejal yantik. Ay machʼatik te kʼalal mato ochemik ta Testigo ya x-elkʼajik, ya stuuntesik droga sok ya xyalik ta spasel mulil. Yantik kʼax naʼbil sbaik ta balumilal o bayal stakʼinik-a, jaʼukmeto maʼyuk bin ay yuʼunik ya yaʼiyik (Eclesiastés 2:3-11). Ta swenta yuʼel te Biblia bayal te machʼatik chʼayemik-a ayix bin lek yakik ta smaliyel sok ayix skʼoplal te skuxlejalike. Ta melel, jmulanojtik skʼoponel te bin kʼaxem ta skuxlejal chaʼoxtul hermanoetik ta La Atalaya ta sección «La Biblia les cambió la vida». Jaʼnix jich jtaojtik ta ilel te manchuk Testigootikix, jpisiltik ya jkʼantik te ya skoltayotik te Biblia yuʼun ya stsakxan yip te bitʼil kamigoinej jbatik sok te Jehová.

2. ¿Bintik chopol juʼ yijkʼitaybelik spasel chaʼoxtul jchʼuunjeletik ta sbabial siglo ta swenta yuʼel te sKʼop Diose?

² Maba yan ya kiltik te bitʼil ta ora ini bayal ants winiketik ya xjuʼ ya yijkʼitayik spasel te bin kʼax chopol te kʼalal ya snopik te sKʼop Diose. Jichnix la spasik-euk te jchʼuunjeletik ta sbabial siglo te jaʼ smukʼulinej yoʼtanik te ya xbajtʼik ta chʼulchan (kʼopona te 1 Corintios 6:9-11). Te jpuk-kʼop Pablo la yal bin yilel skuxlejal te machʼatik maba ya yichʼik te Ajwalinel o te Wentainel yuʼun te Diose,  patil jich la yalbey te jchʼuunjeletike: «Ay hich ayex ta namey». Jaʼukmeto koltayotik yuʼun te sKʼop Dios sok te chʼul espiritu ta sjeltayel skuxlejalik. Kʼalal j-abatetikix yuʼun Dios-a ay machʼatik lato spasik tulan muliletik te jich jin te bitʼil jun ayik sok te Jehovae. Jich bitʼil, te Biblia ya yal te ay jtul jchʼuunjel te tsabil yuʼun ya xbajtʼ ta chʼulchan la yichʼ lokʼesel ta kongregasion. Jaʼukmeto ta patil la sjeltay skuxlejal jich juʼ sujt talel yan buelta ta kongregasion (1 Corintios 5:1-5; 2 Corintios 2:5-8). Ya yakʼ yip koʼtantik te kʼalal ya kiltik te bin juʼem yijkʼitaybelik spasel bayal hermanoetik ta swenta te koltayel yuʼun te sKʼop Dios.

3. ¿Bin ya kiltik ta articulo ini?

³ Jich bitʼil yakʼojbotik te Jehová te sKʼop te bayal yuʼel, ya jkʼantik stuuntesel ta lek (2 Timoteo 2:15). Jaʼ yuʼun ta articulo ini ya kiltik oxeb te banti ya xjuʼ te lekxan ya jtuuntestik te yuʼel te Biblia. Te sbabial jaʼ ta jkuxlejaltik. Te schebal jaʼ te kʼalal ya jcholtik skʼop Dios. Te yoxebal jaʼ te kʼalal ya xnojpteswanotik ta kongregasion. Snopel ta lek te articulo ini ya skoltayotik yuʼun ya kakʼtik ta ilel te skʼuxul koʼtantik sok te ya kalbeytik wokol te jkʼuxul oʼtanil Tatil kuʼuntik te ya snojptesotik swenta lek ya xkʼootik ta lokʼel (Isaías 48:17).

4. 1) ¿Bin ya skʼan ya jpastik teme ya jkʼantik te ya x-aʼtej ta jkuxlejaltik te sKʼop te Diose? 2) ¿Bin ya apas te jaʼat swenta ya xjuʼ ya akʼopon te Bibliae?

⁴ Teme ya jkʼantik te ya x-aʼtej ta jkuxlejaltik te sKʼop te Diose ya skʼan te spisil-ora ya jkʼopontik, ta jujun kʼajkʼal teme ya xjuʼe (Josué 1:8). Jpisiltik bayal bin ya jpastik ta jujun kʼajkʼal, jaʼukmeto ma skʼan te ay bin ya kakʼ smakotik ta skʼoponel te Biblia ni jaʼuk te aʼteliletik te ay ta jwentatik spasele (kʼopona te sjun Efesios 5:15, 16). Ya xjuʼ ya jkʼopontik te Biblia ta sab, chikan jayeb ora ta kʼajkʼalel o ta ajkʼabal. Jich ya kaʼiy jbatik bitʼil la yaʼiy sba jtul te machʼa la stsʼibay te Biblia te jich la yal: «¡Mero cʼux ta coʼtan te ley awuʼun! Sjunal cʼahcʼal ya jnaʼulan» (Salmo 119:97).

5, 6. 1) ¿Bin yuʼun tulan skʼoplal te ya jnopilantik te bin ya jkʼopontike? 2) ¿Bin-utʼil ya xjuʼ xtuun kuʼuntik ta lek te snopilanel ta koʼtantik te bin ya yal te Bibliae? 3) ¿Bin-utʼil skoltayejat te jaʼat skʼoponel sok snopilanel te sKʼop Diose?

⁵ Mame tikʼuknax-a te ya jkʼopontik te Bibliae. Ya skʼan ya jnopilantik o ya jpensartaytik ta lek te bin ya jkʼopontike (Salmo 1:1-3). Jaʼnaxme jich ya xjuʼ ya jpastik ta jkuxlejaltik te pʼijilal ya jtatik ta sKʼop te Diose. Chikan teme ya jkʼopontik ta sjunil, ta selular o yan aparato, te bin ya jkʼantike jaʼ te yakuk xkʼot ta koʼtantike.

⁶ ¿Bin-utʼil ya xjuʼ xtuun kuʼuntik ta lek te snopilanel ta koʼtantik te bin ya yal te Bibliae? Bayal machʼatik kʼalal ya skʼoponik te Biblia ya yijkʼitayik skʼoponel jtsʼinuk sok jich ya sjojkʼoybey sbaik: «¿Bin ya snojpteson ta swenta Jehová? ¿Yakonixbal ta spasel ta jkuxlejal te  bin ya yal liʼi ini? ¿Aytobal bin ya skʼan ya jeltay ta jkuxlejal?». Teme ya jnopilan ta koʼtantik te sKʼop Dios sok teme ya jkʼopontik te Jehová yame stijotik koʼtantik ta spasel ta jkuxlejaltik te tsitseletik yuʼune. Jich ya jtuuntestik ta lekxan ta jkuxlejaltik te yuʼel te sKʼop te Diose (2 Corintios 10:4, 5).

7. ¿Bin-utʼil ya xjuʼ ya jtuuntestik ta lek te Biblia kʼalal ya jcholtik skʼop Dios?

⁷ ¿Bin-utʼil ya xjuʼ ya jtuuntestik ta lek te Biblia kʼalal ya jcholtik skʼop Dios sok te kʼalal ay machʼa ya kakʼbeytik nojptesel yuʼun te Bibliae? Jun te bitʼil ya xjuʼ jpastike jaʼ te spisiluk-ora jaʼ ya jtuuntestik. Jtul hermano jich la yal: «Te yakuk xlokʼat ta scholel skʼop Dios sok te Jehová, ¿jaʼatnaxbal spisil-ora ya xkʼopojat o ya awakʼ xkʼopoj-euk te Jehová?». ¿Bin la skʼan la yakʼ ta naʼel te hermanoe? Jaʼ te jich kʼoem te jaʼ yak ta kʼop te Jehová kʼalal ay machʼa ya jkʼoponbeytik te Biblia. Jun versiculo te tsabil ta lek jaʼ bayalxan yuʼel te bitʼil te jkʼoptike (1 Tesalonicenses 2:13). Jaʼ yuʼun jojkʼoybey jbatik: «Te kʼalal ya xlokʼon ta scholel skʼop Dios, ¿yabal jpas tulan ta skʼoponbeyel te Biblia te ants winik te kʼalal jich ya xjuʼ ya jpase?».

8. ¿Bin yuʼun te ma tikʼuknax-a te ya jkʼoponbeytik textoetik ta Biblia te ants winiketike?

⁸ Ta melel, ma tikʼuknax-a te ya jkʼoponbeytik textoetik ta Biblia te ants winiketike. Jich bitʼil ta sbabial siglo, jteb ma spisil te ants winiketik ma xyichʼbeyik swentail te bin ya yal te Bibliae (Romanos 10:2). Jaʼ yuʼun mame skʼan te ya kaltik te ya xkʼot ta yoʼtan te ants winiketik te bin ya skʼan ya yal te Biblia jaʼnax yuʼun te la jkʼoponbeytike. Ya skʼan te ya kakʼbeytik stiempoil ta yalbeyel cheʼoxeb buelta te kʼopetik o te bintik tulanxan skʼoplal ta versiculo te la jkʼopontik soknix ya skʼan te ya jcholtik ta lek te bin ya skʼan ya yale. Teme jich ya jpastike yame x-och ta spensar sok yame xkʼot ta yoʼtan te ants winiketik te bin ya yal te sKʼop Diose (kʼopona te sjun Lucas 24:32).

9. ¿Bin-utʼil ya xjuʼ te ya kakʼtik ta ichʼel ta mukʼ te bin ya yal te Biblia te kʼalal ay machʼa ya jkʼoponbeytik jun versiculo? Chola sok junuk ejemplo.

 ⁹ Kʼalal ay machʼa ya jkʼoponbeytik jun versiculo, ya skʼan te ya jpastik tulan yuʼun ya yichʼ ta mukʼ te Biblia. Ya xjuʼ jich ya kaltik: «Kiltik bin ya yal te Dios ta swenta ini». Jaʼukmeto teme ya xkʼopojotik sok te machʼa ma schʼuunejik Cristo ya xjuʼ jich ya kalbeytik: «Ilawil te bin ya yal te chʼul jun ini». Teme maʼyuk skʼoplal ta yoʼtan te relijion te machʼa ya xkʼopojotik soke ya xjuʼ jich ya jojkʼoybeytik: «¿Aybal awaʼiyoj te namey kʼopetik ini?». Jich bitʼil ma pajal skuxlejal te ants winiketik ya skʼan te ya jletik bin-utʼil ya jcholbeytik skʼop Dios ta jujuntul (1 Corintios 9:22, 23).

10. 1) Chola bin kʼot ta stojol jtul hermano te kʼalal yak ta scholel skʼop Dios-a. 2) ¿Bin-utʼil ataoj ta ilel te ay yuʼel ya x-aʼtej te Biblia kʼalal ya jcholtik skʼop Dios?

¹⁰ Bayal hermanoetik yilojik te ya xjuʼ xtijbot yoʼtanik ta jkʼaxel te ants winiketik teme ya yichʼik kʼoponbeyel te Biblia. Jich bitʼil, jtul hermano joy ya yulaʼtay jtul winik te mamalix te bayalix jaʼbil yak ta skʼoponel-a te revistaetik kuʼuntik. Jun kʼajkʼal te hermano la snop te ma jaʼuknax ya yijkʼitaybey jilel te revista Te J-ilkʼinal ta Toyol, jich yuʼun la skʼoponbey jun texto te teynix tsʼibaybil talel ta revistae. Te texto jaʼ te 2 Corintios 1:3, 4 te banti ya yal ta stojol Jehová te jaʼ «te Tatil yuʼun cʼuxultaywanej soc te Dios te ya yacʼ spisil mucʼul-oʼtanil» sok «te machʼa ya smucʼubtes qʼuinal caʼiytic ta spisil te jwocoltic». Jkʼaxel tijbot yoʼtan te winik yuʼun te versiculoetik te la skʼanbey te hermano te yakuk xchaʼkʼoponbot. Ta patil te hermano albot yuʼun te winik te ya skʼan bayal mukʼul oʼtanil sok te yiname sok te ya skʼan ya snaʼbeyxan swentail te Biblia. Jich bitʼil ya kiltik, te stuuntesel te Biblia te kʼalal ya jcholtik skʼop Dios ya xjuʼ ya stijbey yoʼtan te ants winiketike (Hechos 19:20).

11. ¿Bin tulan aʼtelil akʼbil ta swenta te machʼatik ya yakʼik nojptesel ta kongregasion?

¹¹ Jpisiltik jkʼaxel ya jmulantik te ya xbootik ta tsoblejetik sok ta mukʼul tsoblejetik. Te bin tulanxan skʼoplal ya xbajtʼ jpastik ta tsoblejetik jaʼ te ya kichʼtik ta mukʼ te Jehová. Jaʼukmeto jaʼnix jich ya xbootik yuʼun ya jkʼantik te ya skoltayotik te nojptesel te ya kichʼtik akʼbeyel tey-a. Ta melel, tʼujbil majtʼanil yichʼojik te machʼatik ya xnojpteswanik ta kongregasion, jaʼukmeto mame biluknax aʼtelil te akʼbil ta swentaike (Santiago 3:1). Jaʼ yuʼun ya skʼan ya spasik tulan te lokʼemuk ta Biblia spisil te bin ya yakʼik ta nopele. Teme jaʼat ya xnojpteswanat ta kongregasion, ¿bin ya xjuʼ ya apas swenta ay yuʼel ya x-aʼtej te sKʼop Dios ta stojol te machʼatik ya schʼam yaʼiyik te nojptesele?

12. ¿Bin ya skʼan ya spas te machʼa ya yakʼ nojptesel ta kongregasion swenta jaʼ tulanxan skʼoplal ya xkʼot yuʼun te Bibliae?

¹² Pasa tulan yuʼun jaʼuk mukʼ skʼoplal ya xkʼot te Biblia te kʼalal ya xnojpteswanat ta kongregasion (Juan 7:16). Pasa tulan swenta te bin yilel ya awakʼ te nojptesel o teme ya atuuntes aʼiyejetik o ejemploetik manchuk ya spejkʼanbey skʼoplal te versiculoetik te ya akʼopone. Jaʼnix jich mame xchʼay ta awoʼtan te ma pajaluk te ya jkʼopontik te Biblia sok te ya xnojpteswanotik ta Biblia. Ta melel, teme bayal texto yuʼun Biblia ya atuuntes bayal machʼatik ma xjil ta yoʼtanik. Jaʼ yuʼun tsaa ta lek te versiculoetik sok akʼbeya ta lek stiempoil yuʼun ya akʼopon, ya acholbey skʼoplal, ya atuuntes lokʼombakʼop sok yuʼun ya awal bin-utʼil ya xjuʼ ya jpas ta jkuxlejaltik (Nehemías 8:8). Teme ya atuuntes jun bosquejo te yakʼoj tal te organisasion nopa ta lek bin ya skʼan ya yal te jujun majkʼ kʼopetik sok te textoetik yichʼoj talel, jaʼnix jich pasa tulan yuʼun ya xkʼot ta awoʼtan bin-utʼil stsaktiklanoj sba skʼoplal. Patil tsaa bin versiculoetik ya atuuntes ta yakʼel ta nopel  te bin ya yal te bosquejo (yame ata bin-utʼil ya xjuʼ ya apas ta lek ta libro Benefíciese de la Escuela del Ministerio Teocrático ta lección 21 kʼalal ta sok 23). Jaʼukmeto te bin tulanxan skʼoplale jaʼ te ya akʼanbey koltayel te Jehová yuʼun ya awakʼ ta nopel te bin kʼax tulan skʼoplal ya yal te sKʼope (kʼopona te sjun Esdras 7:10; Proverbios 3:13, 14).

13. 1) ¿Bin-utʼil jtul hermana jkʼaxel tijbot yoʼtan yuʼun te Biblia ta swenta te bitʼil la yichʼ tuuntesel ta jun tsobleje? 2) Jaxan te jaʼate, ¿bin-utʼil skoltayejat te ya yichʼ tuuntesel te Biblia ta tsoblejetike?

¹³ Kiltik bin-utʼil jtul hermana ta Australia jkʼaxel tijbot yoʼtan yuʼun te Biblia ta swenta te bitʼil la yichʼ tuuntesel ta jun tsoblej. Te hermana ini jkʼaxel la yil wokol te kʼalal chiʼ talel, jaʼukmeto la schʼuun spasel te bin ya yal te Biblia sok la yakʼ sba ta stojol te Jehová. Manchukme jich-abi te hermana wokol ya xkʼot ta yoʼtan te kʼux aʼiybil yuʼun te Jehová. Jun buelta la yaʼiy ta tsoblej jun versiculo te kʼot ta yoʼtan. Te hermana la snopilan te versiculo-abi sok la skʼopon yan versiculoetik, jich kʼot ta yoʼtan te kʼux aʼiybil yuʼun te Jehová. * Jaxan te jaʼate, ¿aybal awaʼiyoj ta jun tsoblej o ta jun mukʼul tsoblej jun versiculo te jkʼaxel la stijbat awoʼtane? (Nehemías 8:12).

14. ¿Bin-utʼil ya kakʼtik ta ilel te bayal skʼoplal kuʼuntik te sKʼop Diose?

¹⁴ Ta melel jpisiltik ya kalbeytik wokol te jkʼuxul oʼtanil Dios kuʼuntik Jehová ta swenta te la yakʼbotik te sKʼop sok te skʼotesoj ta pasel te jamal yaloj te sbajtʼelkʼinal ya xjalaj te sKʼope (1 Pedro 1:24, 25). Jaʼ yuʼun jkʼopontik ta spisil-ora, jpastik ta jkuxlejaltik te bin ya yakʼ jnoptik sok jtuuntestik ta skoltayel yantik. Jich ya kakʼtik ta ilel te kʼux ta koʼtantik sok te bayal skʼoplal kuʼuntik te mukʼul majtʼanil ini. Jaʼukmeto, te bin tulanxan skʼoplal jaʼ te ya kakʼtik ta ilel te kʼux ta koʼtantik te Jehová te jaʼ lokʼem tal ta yoʼtan.