1, 2. 1) ¿Bin yuʼun la smel yoʼtanik te ants winiketik ta skʼajkʼalel te Pablo ta swenta te mosoinel sok te akʼel ta libre? 2) ¿Machʼa ya x-akʼawan ta libre ta smelelil la yal te jpuk-kʼop Pablo?

TE JAYEB machʼatik wentainbilik ta namey kʼinal yuʼun te Roma mero ya stoy sbaik ta skaj te ya spasik tulan ta skoltaybeyel skʼoplal te ley, te bin stojil sok te ayukik ta libre. Pero, spisil te yip sok te skʼulejal te Roma jteb ma spisiluk la yichʼ tael ta swenta te aʼtelil la spasik te mosoetik. Jun tiempo ayniwan 30% yajwal te Roma la yichʼik mosoinel. Chikan ta ilel te spisilik soknix te jchʼuunjeletik te tey nainemik-a tulan skʼoplal yuʼunik yalbeyel skʼoplal te mosoinel sok te ayinel ta libre.

² Te jpuk-kʼop Pablo bayal bin la stsʼibay ta swenta te akʼel ta libre. Pero ma pajaluk te bin ya skʼan ya xlokʼ yuʼun bitʼil te yantik ants winiketik te yoʼtanukik te ya yichʼ pasel yachʼil leyetik ta Roma swenta ya xlekub-a te skuxlejalik. Yan stukel te Pablo sok te yantik jchʼuunjeletik jaʼ bajtʼ yoʼtanik ta skoltayel te ants winiketik ta snaʼbeyel skʼoplal te Wentainel yuʼun Dios sok te ya xkʼot ta yoʼtanik te  bayal skʼoplal te stojol kolel te la yakʼ te Jesuse. Te jpuk-kʼop Pablo la yakʼbey snaʼ te yermanotak Machʼa ya x-akʼawan ta libre ta smelelil. Ta schebal karta te la stsʼibay ta stojol te corintoetik, jich la yal ta jamal: «Te Cajwaltic [Jehová], ha te Espíritu; soc te banti ay te Espíritu yuʼun te Cajwaltic, ayic ta libre tey a» (2 Corintios 3:17).

3, 4. 1) ¿Bin la yal ta nail te Pablo kʼalal la yal te bin tsʼibaybil ta 2 Corintios 3:17? 2) ¿Bin ya skʼan ya jpastik swenta ya jmulanbeytik yutsil te bitʼil libre ya yakʼotik te Jehová?

³ Te Pablo yalojix ta nail ta karta ta stojol te corintoetik bin kʼot ta pasel kʼalal te Moisés ko tal ta wits Sinaí te kʼalal la stejkʼan sba ta stojol jtul chʼul-abat yuʼun Jehová. Ay stsʼanabul te sit yelawe. La sxiʼik te israeletik kʼalal la yilik, jaʼ yuʼun la spots sit yelaw ta pakʼ te Moisés (Éxodo 34:29, 30, 33; 2 Corintios 3:7, 13). Te Pablo la yal te kʼalal ay machʼa ya sujt tal ta stojol Jehová «ya xloqʼuesbot te paqʼue» (2 Corintios 3:16). ¿Bin la skʼan la yakʼ ta naʼel?

⁴ Jich bitʼil la jnoptik ta yan articulo, te machʼanax libre ay ta jkʼaxel sok te maʼyuk bin ya xmakot yuʼune, jaʼ te Jehová te Jpaswanej yuʼun spisil te bin aye. Jaʼ yuʼun snujpʼ te ay akʼel ta libre te banti aye sok te banti ay te espiritu yuʼune. Pero swenta libre ayotik sok te ya jmulanbeytik yutsil ya skʼan te ya sujtotik ta stojol Jehová. Jaʼme ya skʼan ya yal te mero jun koʼtantik ya xkʼootik soke. Te israeletik te beenik ta jochol takʼin kʼinal maba ay ta yoʼtanik te bintik swenta Dios. Jich kʼoem te makal sitik sok yoʼtanik ta pakʼ. Jaʼnax ya skʼan ya stuuntesik te bitʼil libre ayik ta spasel te bin ya skʼan yoʼtanike (Hebreos 3:8-10).

5. 1) ¿Bin-utʼil ya yakʼotik ta libre te schʼul espiritu te Jehová? 2) ¿Bin-utʼil ya jnaʼtik te ya xjuʼ ya smulanbey yutsil-euk te akʼel ta libre te ya yakʼ Jehová te machʼa mosoinbil o ay ta chukel? 3) ¿Bin ya kilbeytik skʼoplal ta articulo ini?

⁵ Te akʼel ta libre ta swenta te schʼul espiritu te Jehová jaʼ lekxan te bitʼil te ay machʼa ya x-akʼot ta libre te kʼalal chukul-ae. Te schʼul espiritu te Jehová ya yakʼotik ta libre ta swenta te mulil sok te lajel, jaʼnix jich ta swenta te lotil relijion sok te kostumbreetik yuʼune. Ta melel ma xjuʼ jich ya x-akʼawanik ta libre stukel te ants winiketike (Romanos 6:23; 8:2). Kʼax bayal yutsil te akʼel ta libre ta swenta te chʼul espiritu. Ya xjuʼ ya smulanbey yutsil-euk te machʼa mosoinbil o ay ta chukel (Génesis 39:20-23). Jich la yaʼiy ta skuxlejal te hermano Harold King. Jalaj bayal jaʼbil ta karsel ta skaj te schʼuunel yoʼtane. Yame xjuʼ ya anaʼbey sba sok ya xjuʼ ya awaʼiy stojol te bin kʼax ta skuxlejal ta kanal JW Broadcasting (VIDEOETIK > ENTREVISTA SOK EXPERIENCIA > LA STAIK WOKOLIL). Pero ta ora ini, kiltik bin-utʼil ya xjuʼ ya kakʼtik ta ilel te mukʼ skʼoplal kuʼuntik te akʼbilotik ta libre sok bin ya xjuʼ ya jpastik swenta lek ya jtuuntestik.

6. ¿Bin-utʼil la yakʼik ta ilel te israeletik te maʼyuk skʼoplal ta yoʼtanik te libre ayike?

⁶ Kʼalal ay machʼa ya yakʼbotik jun majtʼanil ya kalbeytik bayal wokol yuʼun. Te Jehová la yakʼbey jun majtʼanil te israeletik kʼalal la slokʼes tal ta Egipto, jaʼ te la yakʼ ta libre. ¿Bin-utʼil la yilik te israeletike? Cheʼoxebnax u ta patil te lokʼik tal ta mosoinel ta Egipto jajch snaʼulanik te weʼel uchʼelil yuʼun te lum-abi, sok jajchik ta wulwulkʼop ta swenta te bin ya x-akʼbotik yuʼun te Jehová. Lato yalbeyik te ya skʼan ya sujtik bael ta Egipto. Maʼyuk skʼoplal kʼot ta yoʼtan te israeletik te libre ayik ta yichʼel ta mukʼ te Jehová, jaʼ bayalxan skʼoplal kʼot ta yoʼtanik te weʼelil jich bitʼil te chay, pepino, sandía, tux-ak, seboya sok te axux. Ya xkʼot ta koʼtantik te snujpʼnanix-a te ilin te Jehová ta stojolik (Números 11:5, 6, 10; 14:3, 4). Ayme bin kʼax tulan skʼoplal ya jnoptik yuʼun.

7. 1) ¿Bin-utʼil la spas ta skuxlejal te Pablo te tsitsel te jaʼnix la yakʼ te ay ta 2 Corintios 6:1? 2) ¿Bin-utʼil ya xjuʼ te jaʼnix jich ya jpastik te joʼotike?

 ⁷ Te jpuk-kʼop Pablo la yalbey te jchʼuunjeletik te ayuk skʼoplal ta yoʼtanik te yakʼojotik ta libre te Jehová ta swenta te sNichʼan Jesucristo (kʼopona te 2 Corintios 6:1). Taluk ta koʼtantik te jkʼaxel ma lek ya yaʼiy sba te Pablo ta skaj te mosoinbil yuʼun te mulil sok te lajele. Jaʼukmeto, jaʼnix la spas ta skuxlejal te tsitsel la yakʼ sok la yal: «¡Wocol yal Dios, ta scuenta te Cajwaltic Jesucristo!». ¿Bin yuʼun te jich la yale? Jaʼnix la schol kaʼiytik: «Como te ley yuʼun te Espíritu te ya yacʼ cuxlejal ta scuenta Cristo Jesús la yacʼonix ta libre yuʼun te ley yuʼun te mulil soc te lajele» (Romanos 7:24, 25; 8:2). Jaʼnix jich te joʼotike yame skʼan te ma biluknax skʼoplal kuʼuntik te akʼbilotik ta libre yuʼun Jehová ta swenta te lajel sok te mulile. Ta swenta te stojol kolele, ya xjuʼ kuʼuntik smulanel te ya x-abatinotik ta stojol Jehová te maʼyuk bin chopol ya yalbotik koʼtantik (Salmo 40:8).

8, 9. 1) ¿Bin tsitsel la yakʼ te jpuk-kʼop Pedro ta swenta te bin-utʼil ya jtuuntestik te bitʼil libre ayotike? 2) ¿Bintik ya xjuʼ ya sloʼlayotik ta ora ini?

⁸ Ma tikʼuknax te ya kaltik wokol, yame skʼan ya jtsajtay jbatik yuʼun ma chopol ya jtuuntestik te bitʼil libre ayotik ta stael ta nopel bin ya jpastik. Te jpuk-kʼop Pedro la sjultes ta koʼtantik te maba libre ayotik ta spasel te bin chopol ya skʼan te koʼtantike (kʼopona te 1 Pedro 2:16). Te bin la yal te Pedro ya sjultes ta koʼtantik te bin la spasik te israeletik ta jochol takin kʼinal. Ta ora ini, tulan skʼoplal te ya kichʼtik ta mukʼ te tsitsel la yakʼ te Pedro, ta melel jaʼ tulanxan skʼoplal te ya jchʼuuntik ta ora ini. Te Satanás sok te balumilal yuʼun ta jujun kʼajkʼal bayalxan bin ya yakʼik ta ilel te ya yikʼ koʼtantik jich bitʼil kʼuʼul pakʼal, weʼel uchʼelil, bin ya jkʼasestik kʼajkʼal-a sok yantikxan. Kʼalal ay bin ya yakʼik ta ilel ta jtojoltik yuʼun ya jmantik, ya stuuntesik machʼatik tʼujbilik swenta ya schʼuun koʼtantik te ya skʼan ya jmantik te bin ma puersauke. Yame xjuʼ ya kichʼtik loʼlayel ta oranax sok te ma lek ya jtuuntestik te bitʼil libre ayotike.

⁹ Te tsitsel la yakʼ te jpuk-kʼop Pedro jaʼnix jich ya skoltayotik kʼalal ay bin tulanxan skʼoplal ya jpas ta jkuxlejaltik, jich bitʼil snopel teme ya jnoptikxan jun o bin aʼtelil ya jpastik. Te achʼix keremetik ya yichʼik tenel yuʼun ya x-ochik ta universidad. Ya x-albotik te ya staik kʼax lek yaʼtelik te bayal ya yichʼik tojel teme toyem la snopik june. Jaʼnix jich ya xpajbot yilik te jaʼ bayalxan ya spasik ganar te machʼatik ya xlokʼik ta universidad. Spisil ini, ya xjuʼ ya yikʼbey yoʼtan te achʼix keremetik te ya skʼan ya staik ta nopel bin ya skʼan ya spasik ta smelelil ta skuxlejalik. ¿Bin ya skʼan ya xjul ta yoʼtan te achʼix keremetik sok te smeʼ statike?

10. ¿Bin ya skʼan ya kichʼtik ta wenta kʼalal ay bin ya jtatik ta nopel te ya jpastik ta jkuxlejaltike?

¹⁰ Te bitʼil jujuntul ya skʼan ya jtatik ta nopel teme ya jnoptikxan jun o bin aʼtelil ya jpastik, ayniwan machʼatik ya yalik te libre ayotik ta spasel te bin ya jkʼantik teme maʼyuk bin chopol ya yalbotik koʼtantik yuʼun. Yaniwan xtal ta yoʼtanik te bin la yal te jpuk-kʼop Pablo ta stojol te corintoetik ta swenta te weʼel uchʼelil: «¿Bin yuʼun ya quichʼ ichʼel ta cʼop ta scaj te naʼetel yuʼun te yane, te bin utʼil libre ayon te hoʼone?» (1 Corintios 10:29). Ta melel, libre ayotik ta stael ta nopel bin carrera ya jkʼan ya jtsaktik sok bin ya jpas ta jkuxlejaltik. Pero mame skʼan ya xchʼay ta koʼtantik te aynax banti kʼalal libre ayotik sok te aynanix bin ya xtal ta jtojoltik ta swenta te bin ya jpastike. Jaʼ yuʼun te jpuk-kʼop Pablo jich la yal: «Libre ayon ta spasel spisil, pero ma spisiluc lec. Libre ayon ta spasel spisil, pero ma spisiluc ya xlecubteswan» (1 Corintios 10:23). Te texto ini ya skoltayotik ta yilel te jkʼaxel ma jaʼuk tulanxan skʼoplal te bin ya jkʼantik te joʼotik kʼalal ay bin ya jtatik ta nopel te ya jpastike.

11. ¿Bin yuʼun yakʼojotik ta libre te Jehová?

¹¹ Kʼalal te jpuk-kʼop Pedro la yalbotik te maba chopoluk ya jtuuntestik te bitʼil libre ayotike, jaʼnix jich la yal te jaʼ stojil ya jtuuntestik kʼalal jich ya xkuxinotik bitʼil «aʼbatetic yuʼun Dios». Jich yuʼun, te Jehová la yakʼotik ta libre yuʼun te ley yuʼun te mulil sok te lajel ta swenta te Jesús, yuʼun jaʼ ya xbajtʼ koʼtantik ta abatinel ta stojol.

12. ¿Bin ejemplo la yakʼbotik jilel te Noé sok te sfamilia?

¹² Swenta ma chopoluk ya jtuuntestik te libre ayotike, ¿bin-utʼil lekxan ya xjuʼ ya jtuuntestik te jich maba ya kakʼ jbatik ta mosoinel yuʼun te bin ya skʼan koʼtantik sok te bin xbikʼet yoʼtan yuʼun te balumilale? Jaʼ te jkʼaxeluk baem koʼtantik spasel yaʼtel te Jehová (Gálatas 5:16). Kiltik te ejemplo yuʼun te Noé sok te sfamilia. Manchukme kuxinik ta yolil ants winiketik te kʼax chopolik sok te ya spasbey sbaik mulil ta sbakʼetalik, maba la yakʼ sbaik ta monbeyel yoʼtanik yuʼun te bin chopol ya skʼan sok ya spas te ants winiketike. ¿Bin-utʼil juʼ yuʼunik? Jaʼ ta swenta te bajtʼ ta yoʼtanik spasel spisil te bin albotik yuʼun te Jehová jich bitʼil spasel te arka, stsobel sweʼelik sok sweʼel te chambalametik sok yalbeyel yaʼiy te ants winiketik te ya yichʼ lajinel te chopolik. Te Biblia jich ya yal: «Te Noé la spas spisil hich te bin utʼil pasot ta mandar yuʼun Dios» (Génesis 6:22). Te bin la staik yuʼun, jaʼ te kol jilel te Noé sok te sfamilia (Hebreos 11:7).

13. ¿Bin mantalil yakʼojbotik te Jehová?

¹³ ¿Bin mantalil yakʼojbotik te Jehová? Te jnopojelotik yuʼun Jesús jnaʼojtik te ya yalbotik ta mantal te akʼa jcholbeytik te sKʼope (kʼopona te sjun Lucas 4:18, 19). Ta ora ini, jteb ma spisiluk te ants winiketik makal sitik yuʼun te Satanás sok mosoinbilik yuʼun te relijionetik, te niwak chonbajel sok manbajel sok yuʼun te bitʼil schapoj skuxlejal te ants winiketik (2 Corintios 4:4). Te joʼotik jtaojtik tʼujbil majtʼanil, melel ya xjuʼ ya jtʼuntik te ejemplo yuʼun te Jesús sok te ya jkoltaytik ta snaʼbeyel sba te Jehová sok te ya x-abatinik ta stojol te jaʼ Dios te ya x-akʼawan ta libre (Mateo 28:19, 20). Ma kʼunuk ta pasel te aʼtelile sok bayal bin ya jsitintaytik. Ay  nasionetik te banti te ants winiketik maʼyuk skʼoplal ta yoʼtanik Dios sok ay ya x-ilinik kʼalal ya jcholbeytik yaʼiyik te skʼop Diose. Jich yuʼun ya xjuʼ jich ya jojkʼoybey jbatik, ¿yabal xjuʼ jtuuntesxan ta lek te bitʼil libre ayon swenta ya x-aʼtejon ta stojol te Wentainel yuʼun te Diose?

14, 15. ¿Bin staojik ta nopel spasel bayal j-abatetik yuʼun Jehová? (Ilawil te lokʼombaetik ta sjajchibal te articulo).

¹⁴ Ya stij koʼtantik te bayal j-abatetik yuʼun Jehová te kʼalal staojik ta ilel te kʼax nopolix ya xtal te Armagedón, ya spasik tulan yuʼun ma sle bayal sbilukik swenta ya xjuʼ x-abatinik ta spisil-ora ta stojol Dios (1 Corintios 9:19, 23). Ay machʼatik yakik ta abatinel ta skongregasionik, ay yantik baemik ta yan lugaretik te banti ya skʼanik koltayel ta scholel skʼop Dios. Te organisasion staoj ta ilel te kʼaxem ta 250,000 hermanoetik te ochemik ta precursor regular ta joʼeb jaʼbil kʼaxeltoe. Ta ora ini ay 1,100,000 precursor regular ta spisil. ¡Kʼax lek bin kʼoem ta lokʼel ta skaj te snaʼojik stuuntesel te libre ayik, melel ayik ta abatinel ta stojol Jehová! (Salmo 110:3).

¹⁵ ¿Bin-utʼil juʼem yuʼunik stuuntesel ta lek te bitʼil libre ayike? Kiltik te ejemplo yuʼun te John sok te Judith. Ta treinta jaʼbil te kʼaxemixe abatinemik ta bayal nasionetik. Yato xjul ta yoʼtanik te kʼalal jajch te Pʼijubtesel yuʼun Spasel yaʼtel Dios ta swenta Precursor ta jaʼbil 1977 ya yichʼ tijbeyel yoʼtan te precursoretik te bajtʼukik te banti maʼyuk bayal jcholkʼopetik. Te John ya yal te bayal buelta la sjel yaʼtel swenta ma jaʼuk ya xbajtʼ yoʼtan ta aʼtel sok te ya xjuʼ x-abatin ta precursor. Ta patil bael bajtʼik ta abatinel ta yan nasion. ¿Bin koltayotik ta sitintayel te wokoliletik jich bitʼil snopel yan kʼopil, te ya xkʼayik ta yan lugar o te ya xkʼayik te banti bayal sik o mero kʼux kʼajkʼal? Jaʼ te skʼoponel Dios sok te ya smukʼulin yoʼtanik te ya xkoltayotik yuʼune. ¿Bin ya yalik ta swenta te jayeb jaʼbil abatinemik ta stojol Jehová? Te John jich ya yal: «Jich ya kaʼiy te jaʼ baem ta koʼtan pasel te aʼtel te lekxan jtaoje. Mero nopol ay ta jtojol Jehová ya kaʼiy jich bitʼil jtul tatil te mero ya xkʼuxultaywane. Ta ora ini, ya xkʼotxan ta koʼtan bin ya skʼan ya yal te Santiago 4:8 te ya yal: “Nohpojanic ta stojol Dios, hich ya xnohpoj ta atojolic”. Jnaʼoj te la jta te bin yakon ta sleele, jaʼ te tseʼeluk koʼtan ya xkuxinon sok te ayuk swentail te jkuxlejale».

16. ¿Bin-utʼil stuuntesojik bayal ta mil hermanoetik te libre ayike?

¹⁶ Ay hermanoetik te jaʼnax ya xjuʼ x-abatinik ta precursor jun tiempo. Ay yantik te ya sjap sbaik yuʼun ya xbajtʼik ta aʼtel ta spasel naetik te banti ya yichʼ ichʼel ta mukʼ te Jehová ta swolol Balumilal. Jich bitʼil, ayniwan 27,000 hermanoetik aʼtejik ta spasel te yachʼil lugar banti ya yichʼ ilel te kaʼteltik ta swolol Balumilal te ay ta Warwick (Nueva York). Ay machʼatik aʼtejik tey-a cheb semana, yantik bayal u, ay machʼatik jun jaʼbil sok kʼaxem-a. Ay machʼatik bayal bin la yijkʼitayik ta skuxlejalik swenta ya xjuʼ xkoltaywanik ta aʼtel. Spisilik kʼax tʼujbil ejemplo la yakʼik ta ilel ta stuuntesel ta lek te libre ayik yuʼun te Jehová swenta ya yalbeyik yutsil skʼoplal sok te ya yichʼik ta mukʼ.

17. ¿Bin mukʼul majtʼanil ya x-akʼbotik te machʼatik ya snaʼik stuuntesel ta lek te libre akʼbilik yuʼun te Diose?

¹⁷ Ya kalbeytik bayal wokol te Jehová yuʼun te ya jnaʼbeytik sba sok te ya jmulanbeytik yutsil te libre ayotik ta swenta te ya kichʼtik ta mukʼ. Akʼame kakʼtik ta ilel ta swenta te bin ya jpastik te mukʼ skʼoplal kuʼuntik te libre ayotike. Mame kixtalantik o te ma lekuk ya jtuuntestike, akʼame jtuuntestik ta abatinel ta stojol Dios te bitʼil lekxan ya xjuʼ kuʼuntike. Teme jich ya jpastik, yame xjuʼ smukʼulin koʼtantik te ya kichʼtik te bendisionetik te jich yaloj ta jamal: «Ha nix hich te bin pasbile ya xʼacʼot ta libre yuʼun te mosohil yuʼun te ya xcʼaʼ, yuʼun pajal ya yichʼ yutsilal soc te al-nichʼanetic yuʼun Dios» (Romanos 8:21).