Te organisasion kuʼuntik ya yakʼ ta stojol te ants winiketik junetik te lokʼem ta Biblia te maba tojbil, jaʼ yuʼun ay machʼatik ya skuyik te ya xjuʼ slokʼtayik sok te ya yakʼik ta yantik pajina ta Internet o ta redes sociales. Pero te machʼa jich ya spas ya skʼaxuntay te Términos y Condiciones de Uso * yuʼun te pajinaetik kuʼuntik, ayme jtaojtikix tulan kʼop yuʼun. Te Mantaliletik te ya skʼan chʼuunel ta swenta te pajina kuʼuntik ya yal te maʼyuk machʼa ay spermiso «ta spukel te lokʼombaetik, junetik te ay ta electrónico, marcaetik yuʼun, musika, fotoetik, videoetik o yantikxan ta yan pajina ta Internet (ni jaʼuk ta redes sociales o ta pajinaetik te banti ya yichʼ akʼel videoetik sok archivos yuʼun ya yilik yantik)». ¿Bin yuʼun te jich ya yichʼ alel te ma xjuʼ ta pasele?

Spisil te bin ay ta pajinaetik kuʼuntik jaʼnax ay sderecho ta swentainel te machʼa la spase. Te machʼatik yijkʼitayoj schʼuunel te Jehová sok yantik te ya skontrainotik yoʼtan ya yakʼik te junetik kuʼuntik ta pajinaetik yuʼunik ta Internet yuʼun ya smonbeyik yoʼtan te testigoetik yuʼun Jehová sok yantik ants winiketik. Pero jaʼnix jich ay bintik yakʼojik ta pajinaetik yuʼunik te chajpanbil ta lek yuʼun ya yutsʼin schʼuunel koʼtantik (Salmo 26:4; Proverbios 22:5). Ay machʼatik stuuntesojik te bin ay ta junetik kuʼuntik sok te slokʼombail te jw.org yuʼun ay bin ya spukbeyik skʼoplal, ay ya yakʼik ta biluketik te ya schonik sok ay ya yakʼik ta aplicacionetik yuʼun selular sok tablet. Jich bitʼil yaloj ta jamal te organisasion te jaʼnax ay sderecho ta stuuntesel te machʼa yuʼun te bin ay ta pajina kuʼuntik sok te ma xyakʼ ta tuuntesel te marcaetik yuʼune, ya xjuʼ ya skoltay sba ta ley yuʼun ma xyichʼ pasel te bin ma yakʼoj permiso (Proverbios 27:12). Te yakuk yakʼ permiso te organisasion te ay machʼatik manchukme Testigoetik ya yakʼik ta yan pajinaetik te bin ay ta pajinaetik kuʼuntik o te yakuk yakʼ ta tuuntesel te slokʼomba te jw.org ta biluketik te ya yichʼ chonel, maniwan ya skʼan ya skoltayotikix te mukʼul jchajpanwanejetik  kʼalal ya jlebeytik smul te machʼatik yijkʼitayoj schʼuunel te Jehová sok te machʼatik ya stuuntesik ta chonbajel te bin kuʼuntike.

Ay bin kʼax chopol ya yichʼ tael teme ay machʼa ya spas descargar te junetik kuʼuntik ta yan pajina te ma jaʼuk te jw.org. Te Jehová jaʼnax yakʼoj «te aʼbat te jun yoʼtan soc pʼij» yuʼun ya smakʼlinotik ta swenta te sKʼope (Mateo 24:45). Te «aʼbat» ini ya yakʼbotik te weʼelil-abi jaʼnax ta pajinaetik te jaʼnix yuʼune, jaʼ te jw.org, tv.pr418.com sok wol.pr418.com. Jichnix, jaʼnax yakʼojbotik oxeb aplicación yuʼun selular sok tablet, jaʼik ini: JW Language^®, JW Library^® sok te JW Library Sign Language^®. Ya xjuʼ ya smukʼulin koʼtantik te ma yichʼoj anunsio yuʼun chonbajel te aplicacionetik-abi sok te pajinaetik kuʼuntik, sok te ma bolobtesbil skʼoplal yuʼun te balumilal te ay ta skʼab te Satanás. Pero teme yan banti ya jtsaktik te weʼelil ta swenta skʼop Dios, ma xjuʼ ya jnaʼtik ta jamal teme ma yichʼoj jelel o bolobtesel skʼoplal (Salmo 18:26; 19:8).

Jaʼnix jich teme ay machʼa ya yakʼ junetik kuʼuntik ta pajinaetik te banti ay machʼatik ay bin ya xjuʼ stsʼibayik, te machʼatik yijkʼitayoj schʼuunel te Jehová sok te machʼatik ya slabanotik ya xjuʼ ay bin ya yalik yuʼun ma xkakʼtik smukʼul koʼtantik ta swenta te organisasion yuʼun te Jehová. Ay hermanoetik te ochemik ta pajinaetik yuʼun ya sten sbaik ta kʼop sok yantik, jich ya yichʼ bolobtesbeyelxan skʼoplal te Jehová. Te pajinaetik yuʼun Internet te la yichʼix albeyel skʼoplale, ma jaʼuk te banti lekxan ya xjuʼ jkoltaytik sok yutsil koʼtantik te machʼatik ya xkontrainwanik (2 Timoteo 2:23-25; 1 Timoteo 6:3-5). Jaʼnix jich yichʼoj tael cheʼoxeb cuenta ta redes sociales sok lotil pajinaetik ta Internet te yichʼojbey sbiil te organisasion kuʼuntik, te Jtsojb Jwolwanejetik sok sbiil jujuntul hermanoetik te ay yaʼtelik ta Jtsojb Jwolwanejetik. Pero ta melel, ni jtuluk hermano te yichʼoj yaʼtel ta Jtsojb Jwolwanejetik ay pajina yuʼun ta Internet sok ma ochem ta jun red social.

Kʼalal ya kakʼbeytik yil te ants winiketik te pajina jw.org ya xkoltaywanotik ta scholel te «lec yachʼil cʼop» (Mateo 24:14). Spisil te aʼtejibal kuʼuntik ta electrónico te ya jtuuntestik ta scholel skʼop Dios yakme ta lekubteselxan. Ta melel, ya jkʼantik te spisil te ants winiketik ya xtuun yuʼunik. Jaʼ yuʼun jich bitʼil ya yal te Mantaliletik te ya skʼan chʼuunel, ay permiso yuʼun ya jtikuntik jun libro o yan junil ta correo electrónico o te ya jtikunbeytik te banti ya xjuʼ ya spas descargar ta pajina kuʼuntik. Kʼalal ya kakʼbeytik yil te pajinaetik yuʼun te organisasion kuʼuntik te ants winiketik te ya smulanik te skʼop Dios, ya kakʼbeytik snaʼik machʼa-a «te aʼbat te jun yoʼtan soc pʼij» te jaʼnax ya yakʼ te smelelil weʼelil ta swenta skʼop Dios.