ARTIKULO YUʼUN ESTUDIO 14
¿Yakotikbal ta spasel ta lek te kaʼteltik ta swenta Dios?
«Puca bahel te lec yachʼil cʼop, huʼtesa spisil te awaʼtele» (2 TIM. 4:5).
KʼAYOJIL 57 sjj-S Predicamos a toda clase de personas
¿BIN YA XBAJTʼ KILBEYTIK SKʼOPLAL? *
Kʼalal chaʼkuxajemix-a te Jesuse, la stsob te jnopojeletik yuʼun sok la yakʼtiklanbey ta mantal te akʼa bajtʼukik ta yotsesel jnopojeletik. (Ilawil te parrafo 1).
1. ¿Bin ya jkʼantik spasel jpisiltik te j-abatotik yuʼun Dios sok bin yuʼun? (Ilawil te lokʼomba ta yelaw te rebista).
TE Jesucristo jich la yalbey ta mantal te jnopojeletik yuʼun: «Bahanic, otsesahic ta jnopojel spisil te nacionetic» (Mat. 28:19). Spisil te j-abatotik yuʼun Dios, ya jkʼan jnoptik spasel ta lek te aʼtelil akʼbil ta jwentatike (2 Tim. 4:5). Ta melel, maʼyuk yan aʼtelil te kʼax mukʼ skʼoplal sok te ya skʼan pasel ta orae. Jaʼukmeto, wokolniwan ya kaʼiytik yakʼbeyel bayal tiempo te bitʼil ya jkʼantike.
2. ¿Bintik yuʼun ay wokol ya kaʼiytik spasel te kaʼteltik ta swenta Dios?
2 Ay yantik aʼteliletik te mukʼik skʼoplal te bayal ya slajin kiptik sok jtiempotik. Yaniwan skʼan te sjunal kʼajkʼal ya x-aʼtejotik swenta ya kakʼbeytik te bin ya xtuun yuʼun te jfamiliatik. Ayniwan bin ay ta jwentatik spasel ta jfamiliatik, ayniwan chamel, depresion o ay bin kʼux ya kaʼiytik ta skaj te ayix kaʼbilaltike. ¿Bin-utʼil ya xjuʼ ya jpastik ta lek te kaʼteltik ta swenta Dios manchukme yakotik ta sitintayel wokoliletik?
3. ¿Bin ya yakʼ jnaʼtik te bin la yal te Jesús ta Mateo 13:23?
3 Ma skʼan ya xchebaj koʼtantik teme maʼyuk bayal tiempo ya kakʼtik ta spasel te aʼtelil ta swenta Dios ta skaj te bintik tulan ya xkʼax ta jkuxlejaltike. Te Jesús snaʼoj-a te ma pajal te bitʼil ya sitinotik ta kaʼteltik yuʼun te Wentainele (kʼopona Mateo 13:23). Te Jehová kʼax bayal skʼoplal ya yil spisil te bin ya jpastik ta abatinel ta stojol teme ya jpastik sok spisil koʼtantike (Heb. 6:10-12). Jaʼnix jich, ayniwan ya jnoptik te ya xjuʼ kuʼuntik te bayalxan bin ya jpastike. Ta artikulo ini ya kiltik bin ya xjuʼ ya jpastik swenta jaʼ nail ya kakʼ ta jkuxlejaltik te aʼtelil ta swenta Dios, te jaʼuknax ya jletik te bin-nix ya xtuun kuʼuntik, te ya jlekubtestik te bitʼil ya jcholtik skʼop Dios sok te bitʼil ya xnojpteswanotike. Pero nail ya kiltik bin ya skʼan ya yal te ya jpastik ta lek te kaʼteltik ta swenta Dios.
4. ¿Bin ya skʼan ya yal te ya jpastik ta lek te kaʼteltik ta swenta Diose?
4 Te bin ya skʼan ya yal te ya jpastik ta lek te kaʼteltik ta swenta Diose, jaʼ te ya jcholtik skʼop Dios sok ya xnojpteswanotik te ban kʼalal ya xjuʼ kuʼuntike. Te Jehová ma jaʼuknax ay skʼoplal ta yoʼtan jayeb tiempo ya kakʼtik ta spasel te aʼtelil ta stojole, jaʼnix jich ay skʼoplal ta yoʼtan bin yuʼun te ya jpastike. Teme jaʼ ya stij koʼtantik te skʼuxul koʼtantik ta stojol Dios sok ta stojol te jpatxujktike, ya jpastik sok spisil koʼtantik te aʼtelil ta swenta Dios * (Mar. 12:30, 31; Col. 3:23). Jaʼ ini ya skʼan ya yal te ya jtuuntestik spisil kiptik. Teme jaʼ jun mukʼul majtʼanil ya kiltik te scholel skʼop Diose, ya jpastik tulan ta scholbeyel bayal ants winiketik te lek yachʼil kʼope.
5, 6. Cholbeya skʼoplal sok jun ejemplo bitʼil ya xjuʼ yuʼun jtul ants winik te jaʼ nail ya yakʼ ta skuxlejal te aʼtelil ta swenta Dios manchukme maʼyuk bayal tiempo yuʼun.
5 Nopa awaʼiy te ay jtul kerem te bayal ya smulan stijel guitarra, spisil-ora ya stij te kʼalal jochole. Ta patil, ya sta yaʼtel ta stijel ta jujun sabado sok domingo. Pero ma xlokʼ-a te jayeb ya spas ganare, jaʼ yuʼun ya x-aʼtejxan ta jun tienda ta lunes kʼalal ta biernes. Manchukme jaʼ bayalxan tiempo ya x-aʼtej ta tienda, te bin-nix ya smulan-ae jaʼ te stijel musikae. Yoʼtan ya snopxan stijel ta lek te guitarra sok jaʼ ya skʼan ya x-aʼtej-a. Jaʼ yuʼun, te kʼalal jochol jtebuke ya stij te guitarra manchukme jtsʼin-nax.
6 Pajal sok-abi, te joʼotike maniwan xjuʼ te bayal tiempo ya kakʼtik ta scholel skʼop Dios te bitʼil ya jkʼantike. Pero jaʼ te bin-nix ya jmulantik spasel-ae. Ya jpastik tulan te yakuk xkʼotxan ta yoʼtan te ants winiketik te lek yachʼil kʼop yuʼun te Wentainele. Pero te bitʼil bayal bin ya smakotike, yaniwan jojkʼoybey jbatik bin-utʼil ya xjuʼ te jaʼ nail ya kakʼ ta jkuxlejaltik te aʼtelil ta swenta Diose.
¿BIN YA XJUʼ JPASTIK SWENTA JAʼ NAIL YA KAKʼ TA JKUXLEJALTIK TE AʼTELIL TA SWENTA DIOSE?
7, 8. ¿Bin-utʼil ya xjuʼ jtʼunbeytik stalel te Jesús ta swenta te scholel skʼop Diose?
7 Te stalel te Jesús ta swenta te scholel skʼop Diose jaʼ kʼax lekil ejemplo kuʼuntik. Te bin bayal skʼoplal ta yoʼtane, jaʼ te ya scholbey skʼoplal te Wentainel yuʼun Diose (Juan 4:34, 35). Bayal ta cien kilometro been ta scholbeyel skʼop Dios te jayeb ants winiketik juʼ yuʼune. Spisil-ora la scholbey skʼop Dios te ants winiketik, chikan teme ta snaʼ o ta jun lugar banti bayal ya xkʼax ants winiketik. Jaʼ bajtʼ ta yoʼtan spasel ta skuxlejal te aʼtelil ta swenta Dios.
8 Ya xjuʼ jtʼuntik te ejemplo yuʼun Cristo kʼalal ya kalbeytik skʼoplal te Wentainel yuʼun Dios chikan bin-ora sok chikan banti. Ya xlokʼ ta koʼtantik yijkʼitayel te bitʼil leknax kuxinemotik swenta ya kakʼ jbatik ta spasel te aʼtelil ini (Mar. 6:31-34; 1 Ped. 2:21). Ta kongregasion ay machʼatik ya xjuʼ ya x-ochik ta prekursor espesial, regular o auksiliar. Ay machʼatik snopojik yan kʼopil o baemik ta nainel ta jun lugar banti ya skʼanik koltayel ta scholel skʼop Dios. Jaʼnix jich te publikadoretik, bayal ya spasik te aʼtelil ini soknix ya spasik tulan te ban kʼalal ya xjuʼ yuʼunike. Chikan bin aʼtelil yakotik ta spasel te joʼotike, te Jehová ma skʼanbotik te bin ma xjuʼ kuʼuntik spasele. Yoʼtanuk te ya jmulantik te aʼtel ta stojole, te ya jpuktik ta alel «te tʼujbil lec yachʼil cʼop yuʼun te Dios te bayel yutsil» (1 Tim. 1:11; Deut. 30:11).
9. 1) ¿Bin-utʼil juʼ yuʼun te Pablo te jaʼ bajtʼ ta yoʼtan scholel skʼop Dios manchukme aʼtej? 2) ¿Bin ya yakʼ jnaʼtik te Hechos 28:16, 30, 31 ta swenta stalel te Pablo ta scholel skʼop Diose?
9 Te jpuk-kʼop Pablo jaʼnix jich kʼax lekil ejemplo. Ta schebal buelta te la sbeentay te lumetike, ta Corinto la skʼan te aʼtej ta spasel nailpakʼ, melel maʼyuk lek stakʼin. Jaʼukmeto, ma jaʼuk bayalxan skʼoplal la yil te aʼtel ini. Aʼtej yuʼun ya sta te bin ya xtuun yuʼun swenta ya xjuʼ ya spuk ta alel te lek yachʼil kʼop ta stojol te ants winiketik ta Corinto yuʼun jich ma jaʼuk ya yakʼik te bin ya xtuun yuʼun te Pabloe (2 Cor. 11:7). Manchukme ya x-aʼtej-a, maba la skom sba ta scholel skʼop Dios, jich ya spas ta jujun sabado. Kʼalal ma aʼtejix-ae, jkʼaxel jaʼ bajtʼix ta yoʼtan-a te scholel skʼop Diose. Jaʼ «yaʼtelinej yalel scʼop Dios [...], yac yalbebel te judíohetic te ha Cristo te Jesús» (Hech. 18:3-5; 2 Cor. 11:9). Ta patil, kʼalal cheb jaʼbil chukul ta sna ta Roma, la scholbey skʼop Dios te machʼatik ulaʼtayot sok la stsʼibay kartaetik (kʼopona Hechos 28:16, 30, 31). Yakʼoj ta yoʼtan te maʼyuk bin ya xmakot ta spasel te aʼtel ta swenta Dios. Jich la stsʼibay: «Ha yuʼun te bin utʼil quichʼojcotic te aʼtel ini [...], ma xpehcʼaj coʼtancotic» (2 Cor. 4:1). Jich bitʼil te Pablo, ya xjuʼ te jaʼ nail ya kakʼ ta jkuxlejaltik te aʼtelil yuʼun te Wentainel yuʼun Dios manchukme ya x-aʼtejotik.
Ay bayal ta chajp te bitʼil ya xjuʼ ya jpastik ta lek te kaʼteltik ta swenta Diose. (Ilawil te parrafo 10 sok 11).
10, 11. ¿Bin-utʼil ya xjuʼ ya jpastik ta lek te kaʼteltik ta swenta Dios teme ayotik ta chamele?
10 ¿Bin ya xjuʼ ya jpastik teme ma xjuʼ kuʼuntik te bayal tiempo ya jcholtik skʼop Dios ta nanatik ta skaj te ayix kaʼbilaltik o ayotik ta chamele? Ay yantik bitʼil ya xjuʼ ya jcholtik skʼop Dios. Te jchʼuunjeletik ta sbabial siglo ya scholbeyik skʼop Dios te ants winiketik chikan banti ayik. Ya spasik tulan ta scholbeyel skʼoplal te smelelil kʼop ta nanatik, te banti ay bayal ants winiketik sok bayuk banti ayik (Hech. 17:17; 20:20). ¿Jaxan teme ma xjuʼ bayal ya xbeenotike? Teme jiche, ya xjuʼ xnajkajotik te banti ya xkʼax ants winiketik sok ya jkʼoponlantik. Jaʼnix jich ya xjuʼ ya jcholtik skʼop Dios ta telefono, ta karta sok chikan banti ayotik. Ay bayal publikadoretik te ma xjuʼix lek yuʼunik, pero tseʼel yoʼtanik sok lek ya yaʼiy sbaik yuʼun te jich ya scholik skʼop Diose.
11 Jaʼ yuʼun, ya xjuʼ ya jpastik ta lek te kaʼteltik ta swenta Dios manchukme ayotik ta chamel. Kalbeytikxan skʼoplal te ejemplo yuʼun te jpuk-kʼop Pablo. Jich la yal: «Scuenta yuʼun ya xchicnaj te ha nix yuʼun Dios te yutsil yuʼel, te ma cuʼuncoticuc» (2 Cor. 4:7). Tuun yuʼun te yuʼel Dios kʼalal tsakot ta chamel kʼalal yak ta sbeentayel te lumetike. Jich la yalbey te ants winiketik ta lum Galacia: «Ta scaj chamel te la jcalbeyex awaʼiyic ta shahchibal te lec yachʼil cʼope» (Gál. 4:13). Jaʼnix jich ya xjuʼ ya jpastik te joʼotike, teme ayotik ta chamel ya xjuʼ ya jcholbeytik yaʼiyik te Wentainel yuʼun te Dios te doktoretik, te enfermeroetik sok yantikxan jpoxtaywanejetik. Bayal machʼatik yakik ta aʼtel-a te kʼalal ya xkʼaxotik ta snaike.
¿BIN YA JPASTIK SWENTA JAʼUKNAX YA JLETIK TE BIN-NIX YA XTUUN KUʼUNTIK-AE?
12. ¿Bin ya skʼan ya yal te lek jsitike?
12 Te Jesús jich la yal: «Te asit ha ya yacʼ sacubuc qʼuinal ta abaqʼuetal. Ha yuʼun teme lec te asite, ay ta sacal qʼuinal scohtol abaqʼuetal» (Mat. 6:22). ¿Bin ya skʼan ya yal te lek jsitike? Ya skʼan ya yal te jaʼuknax ya jletik te bin ya xtuun kuʼuntike, te jun-nax banti ya xbajtʼ koʼtantik, te maʼyuk bin ya schʼaytes koʼtantik. Jaʼnix la yakʼ ta ilel te Jesús kʼalal jaʼ bajtʼ ta yoʼtan te scholel skʼop Dios sok la snojpteslan te jnopojeletik yuʼun te jaʼuk ya xbajtʼ ta yoʼtanik te abatinel ta stojol Jehová sok te Wentainel yuʼune. Ya jtʼunbeytik stalel te Jesús kʼalal jaʼ ya xbajtʼ ta koʼtantik te aʼtelil ta swenta Dios, te jaʼ nail ya jletik «te cuentahinel yuʼun Dios soc te bin stojil ta pasel yuʼun» (Mat. 6:33).
13. ¿Bin ya xjuʼ skoltayotik swenta jaʼ ya xbajtʼ ta koʼtantik te aʼtelil ta swenta Dios?
13 Jun te bitʼil jaʼ ya xbajtʼ ta koʼtantik te aʼtelil ta swenta Dios jaʼ teme ma jletikxan bayal jbiluktik swenta jaʼ bayalxan tiempo ya kakʼtik ta skoltayel yantik ta snaʼbeyel sba te Jehová sok kʼuxuk ya yaʼiy ta yoʼtanike. * Jun ejemplo, ¿yabal xjuʼ ya jeltik yorail te bitʼil ya x-aʼtejotik yuʼun jich bayalxan ya jcholtik skʼop Dios ta semana? ¿Yabal xjuʼ ya jpejkʼanbeytik stiempoil te bin ya jkʼasestik kʼajkʼal-ae te bayalniwan tiempo ya slajine?
14. ¿Bin la spas jtul ermano sok yinam swenta bayalxan tiempo ya scholik skʼop Dios?
14 Kiltik bin la spas jtul ansiano te Elías sbiil sok te yiname. Jich ya schol: «Ta yorail-abi ma xjuʼ x-ochotik ta prekursor-a, pero ay bin ya skʼan xjajch jpastikix-a. Jaʼ yuʼun ay bin la jpastik te maʼyuk lek skʼoplal yilel swenta bayalxan tiempo ya jcholtik te skʼop Dios. La jpejkʼantik te jayeb takʼin ya jlajintik, te stiempoil yuʼun te bin ya jkʼasestik kʼajkʼal-ae, melel la jtatik ta ilel te bayal tiempo ya xkʼax kuʼuntik-a, sok ta kaʼteltik la jkʼantik te ma bayal ora ya x-aʼtejotik. Te bitʼil jich la jpastike, juʼ kuʼuntik te ya xlokʼotik ta scholel skʼop Dios ta mal kʼajkʼal, yakʼel nojptesel yuʼun Biblia sok te ya jcholtik skʼop Dios cheb kʼajkʼal ta yolil semana ta jun u. Kʼax tseʼel koʼtantik yuʼun-a».
¿BIN-UTʼIL LEKIL PʼIJUBTESWANEJ YA XKʼOOTIK?
Kʼalal ya jpastik te bintik ya jnoptik ta tsoblej ta olil semana ya skoltayotik ta slekubteselxan te bitʼil ya jcholtik skʼop Dios sok te bitʼil ya xnojpteswanotike. (Ilawil te parrafo 15 sok 16). *
15, 16. Jich bitʼil ya yal 1 Timoteo 4:13, 15, ¿bin-utʼil ya xjuʼ jlekubtestik te bitʼil ya jcholtik skʼop Dios sok te ya kakʼtik nojptesele? (Ilawil-euk te rekuadro « Te bintik ya xjuʼ jpastik te ya skoltayotik ta spasel ta lek te kaʼteltik ta swenta Dios»).
15 Yanxan te bitʼil ya jpastikxan ta lek te kaʼteltik ta swenta Dios, jaʼ te ya jlekubtestikxan te bitʼil ya xpʼijubteswanotike. Ay ants winiketik te pʼijubenik ya xkʼanbotik te yakuk yichʼikxan nojptesel swenta ya xpʼijubikxan ta spasel ta lek te yaʼtelike. Jaʼnix jich te joʼotike, ya skʼan ya jnoptikxan ta lek yakʼel pʼijubtesel (Prov. 1:5; kʼopona 1 Timoteo 4:13, 15).
16 ¿Bin-utʼil ya xjuʼ kuʼuntik spasel? Jaʼ te ya jchʼam kaʼiytik ta lek te nojptesel ya kichʼtik akʼbeyel ta jujun semana ta tsoblej Jkuxlejaltik sok Kaʼteltik ta swenta Dios. Tey ya kichʼtik lekil pʼijubtesel te ya skoltayotik ta scholelxan ta lek te skʼop Diose. Jich bitʼil kʼalal te presidente yuʼun te tsoblej ya yal banti ya skʼan x-aʼtej te machʼatik la skʼasesik jun asignasion, kaʼiytik te bin ya yal swenta ya skoltayotik-euk ta slekubtesel te kaʼteltike. Ta patil, akʼa jpastik kʼalal ay machʼa ya jcholbeytik te smelelil kʼope. Yanxan te bin ya xjuʼ ya jpastike jaʼ te ya jkʼanbeytik te superintendente yuʼun grupo te yakuk skoltayotik o te ya xlokʼotik sok ta scholel skʼop Dios. Jaʼnix jich ya xjuʼ ya jkʼanbeytik yantik publikadoretik te ya snaʼikix ta leke, jtul prekursor o te superintendente yuʼun sirkuito. Spisil ini ya skoltayotik ta stuuntesel ta lekxan te aʼtejibaletik te ayik ta kit de enseñanza. Jich ya jmulantikxan te aʼtelil ta scholel skʼop Dios sok nojpteswanej.
17. ¿Bin yaʼiyel ya kaʼiy jbatik kʼalal ya jpastik ta lek te kaʼteltik ta swenta Dios?
17 Jaʼ jun mukʼul majtʼanil te ya yakʼ jokintik ta aʼtel sok te Jehovae (1 Cor. 3:9). Kʼalal kʼoem ta koʼtantik te bin bayalxan skʼoplal sok te jaʼ ya xbajtʼ ta koʼtantik te kaʼteltik ta swenta Dios, ya x-abatinotik sok sbujtsʼ koʼtantik ta stojol Jehová (Filip. 1:10; Sal. 100:2). Te j-abatotik yuʼun Dios jnaʼojtik ta lek te jaʼ ya yakʼbotik kiptik te ya xtuun kuʼuntik swenta ya jpastik te kaʼteltik ta stojol chikan bin ya smakotik o bin wokolil ay ta jtojoltik (2 Cor. 4:1, 7; 6:4). Chikan teme bayal o jtebnax ya xjuʼ ya jcholtik skʼop Dios ta swenta te bitʼil ay te jkuxlejaltike, te abatinel ta stojol Dios sok spisil koʼtantik ya yakʼ bayal stseʼelil koʼtantik (Gál. 6:4). Kʼalal ya jpastik ta lek te kaʼteltik ta swenta Dios, ya kakʼtik ta ilel skʼuxul koʼtantik ta stojol Jehová sok ta stojol te jpatxujktike. ¿Bin ya xlokʼ-a? Te Biblia jich ya yal: «Teme hich yac apase, hich ya xcolat a soc te machʼatic ya yaʼiybat te acʼope» (1 Tim. 4:16).
KʼAYOJIL 58 sjj-S Voy a buscar a los amigos de la paz
^ parr. 5 Te Jesús la yalbotik ta mantal te ya jcholtik skʼop Dios sok te ya kotsestik jnopojeletik. Te artikulo ini ya yalbey skʼoplal bitʼil ya xjuʼ jpastik ta lek te kaʼteltik ta swenta Dios manchukme tulan te jkuxlejaltike. Jaʼnix jich ya jnoptik bin-utʼil lekil jpʼijubteswanej ya xkʼootik sok bin-utʼil ya jmulantikxan te scholel skʼop Diose.
^ parr. 4 ¿BIN YA SKʼAN YA YAL?: Kʼalal ya kalbeytik skʼoplal te aʼtelil ta swenta Dios, jaʼ yakotik ta yalbeyel skʼoplal te bayal ta chajp bitʼil ya yichʼ cholel te skʼop Dios sok te yakʼel nojptesel, te spasel sok slekubtesel naetik te ya jtuuntestik ta yichʼel ta mukʼ te Dios sok te skoltayel te ermanoetik kʼalal ya staik wokol (Hech. 11:29; 2 Cor. 5:18, 19).
^ parr. 13 Ilawil jukchajp te bin ya xjuʼ ta pasel te ay ta rekuadro «¿Bin ya skʼan ya jpastik swenta maba ya xbajtʼ koʼtantik ta sleel bayal biluketike?», te lokʼ ta Te J-ilkʼinal ta toyol yuʼun julio 2016, pajina 12.
^ parr. 62 TE BIN YA XCHIKNAJ TA ILEL TA LOKʼOMBAETIK. Pajina 6:Jtul ermana yak ta yakʼel ta ilel bin-utʼil ya spas jun rebisita ta tsoblej yuʼun olil semana. Ta patil, ya stsʼibay cheʼoxeb te bin ya yal te presidente yuʼun tsoblej ta foyeto Skʼoponel jun sok pʼijubteswanej. Ta slajibal semana ya stuuntes ta scholel skʼop Dios te bin la snope.
