1. ¿Bintik-utʼil ya xjuʼ te ya jokin jbatik ta aʼtel sok Jehová?

KʼALAL la spasotik te Jehová jaʼ snopoj te ya jokin jbatik ta aʼtel sok. Manchukme ta ora ini jmulawilotik, teme jun koʼtantik ta stojol ya xjuʼ x-aʼtejotik sok ta jujun kʼajkʼal. Te Biblia ya yal te ya jokin jbatik ta aʼtel sok te Dios kʼalal ya jcholtik skʼop Dios sok ya kotsestik jnopojeletik (1 Cor. 3:5-9). Jaʼ mukʼul majtʼanil te ya yichʼotik ta wenta te Jpaswanej kuʼuntik ta spasel te yaʼtel te kʼax bayal skʼoplal ya yile. Pero ayme yan bintik-utʼil ya xjuʼ te ya jokin jbatik ta aʼtel sok Jehová. Ta articulo ini ya kiltik chaʼoxchajpuk, jaʼ te ya jkoltaytik te jfamiliatik sok te hermanoetik, te ya x-otseswanotik ta jnatik, te ya jap jbatik yuʼun ya jpastik aʼteliletik ta organisasion sok te ya jmukʼubtestik te kaʼteltik ta stojol Dios (Col. 3:23).

2. ¿Bin yuʼun ma skʼan ya jpajtik te kaʼteltik sok te yaʼtel yantike?

² Kʼalal ya jnoptik bael te articulo ini, mame jpajtik te kaʼteltik ya xjuʼ ya jpastik ta stojol Jehová sok te bin ya xjuʼ ya spasik te yantike. Mame xchʼay ta koʼtantik te ayotikniwan ta chamel, te ma pajal kaʼbilaltik, jkuxlejaltik sok te yanyantik bin ya jnaʼtik spasel. Ta swenta chʼul espiritu jich la yal te jpuk-kʼop Pablo: «Jtuhlutuhl acʼa stsahtay bin yilel yaʼtel, hich ya xhuʼ ya yal lec scʼoblal stuquel, ma haʼuc ya spaj yan» (Gál. 6:4).

3. ¿Bin yuʼun ya kaltik te jaʼ yakik ta aʼtel sok Jehová te machʼatik ya skanantayik te sfamiliaike?

³ Te Jehová ya skʼan te ya skanantay sfamiliaik te j-abatetik yuʼune. Jich bitʼil, te machʼatik ay ta swentaik yakʼbeyel te bin ya xtuun yuʼun te sfamiliaike, yananix skʼan ya x-aʼtejik-a, jaʼnix jich ay bayal antsetik ya xjilik ta snaik ta skanantayel te alaletik yuʼunike. Soknix ay hermanoetik te ya skanantayik te smeʼ statik te meʼel mamalikixe. Spisil-abi yananix skʼan pasel-a. Te Biblia jich ya yal: «Teme ay machʼa ma ba ya yaʼbe bin ya xtuhun yuʼun te machʼatic ay yuʼun, soc ha tulan xan scʼoblal te machʼatic ay yuʼun ta sna, la smuc te schʼuhunel yoʼtan soc cʼax hich chopol a te bin utʼil machʼa ma ba schʼuhunej te Diose» (1 Tim. 5:8). Teme jich ay ta jwentatik spasel maniwan ya xjuʼ x-abatinotik ta stojol Jehová te bitʼil ya jkʼantike. Pero mame xchebaj koʼtantik yuʼun, melel mero ya smulan te ya jkanantaytik te jfamiliatik (1 Cor. 10:31).

4. ¿Bin ya xjuʼ ya spasik te meʼil tatiletik swenta jaʼ nail ya yakʼ ta yoʼtanik te yaʼtel Dios, sok bin lek ya xlokʼ-a?

⁴ Te meʼil tatiletik ya x-aʼtejik sok te Jehová kʼalal ya stijbeyik yoʼtan te yal snichʼnabik te ayuk bin ya skʼan ya spasik ta stojole. Ta patil bael, kʼalal ya xmukʼubik te alaletike ay ya yakʼ sbaik ta abatinel ta stojol Dios ta spisil-ora sok ay namal ta stojol sfamilia ya xbajtʼik. Ay machʼatik ya x-abatinik ta misionero, yantik ya xbajtʼik ta abatinel ta precursor te banti maʼyuk bayal jcholkʼopetik sok ay yantik te ya x-aʼtejik ta Betel. Ta skaj te namal ayike, te meʼil tatiletik ma xjuʼ te spisil-ora ya yilik jich bitʼil ya skʼanike. Pero te meʼil tatiletik te ya slokʼes sba ta yoʼtanik, ya stijbeyik yoʼtan te yal snichʼnabik te ma xyijkʼitayik te banti yakik ta abatinele. ¿Bin yuʼun jich ya spasik? Jaʼ ta skaj te tseʼel yoʼtanik yuʼun te jaʼ nail yakʼoj ta skuxlejalik spasel yaʼtel te Diose (3 Juan 4). Bayal meʼil tatiletik jichniwan ya yaʼiy sbaik bitʼil te Ana te la yal te la yakʼbey smajan Jehová te Samuel. Te meʼil tatiletik-abi ya skʼan te jich ya yilik te jaʼ mukʼul majtʼanil te ya xjuʼ x-aʼtejik sok Jehová kʼalal ya skoltayik te yal snichʼnabik ta abatinel ta stojole (1 Sam. 1:28).

5. ¿Bintik-utʼil ya xjuʼ ya jkoltaytik te hermanoetik ta jkongregasiontik? (Ilawil te lokʼombaetik ta sjajchibal te articulo).

⁵ ¿Jaxan teme maʼyuk ta jwentatik swentainel jfamiliatik? Ya xjuʼ ya jkoltaytik te hermanoetik te ayix yaʼbilalik, te ayik ta chamel o te ya skʼanik koltayel. Jaʼnix jich ya xjuʼ ya jkoltaytik te machʼatik ya skanantayik te hermanoetik-abi. ¿Jaxan teme ya kiltik te ay machʼa ya xjuʼ ya jkoltaytik ta jkongregasiontik? Jnop kaʼiytik te jtul hermana yak ta skanantayel te spapa te mamalixe, ¿bin ya xjuʼ ya jpastik yuʼun ya jkoltaytik? Yame xjuʼ ya jkoltaytik ta skanantayel te spapa yuʼun jich te hermana ay bintikxan ya xjuʼ ya spas. ¿Bintikxan ya xjuʼ ya jpastik? Jaʼ te ay machʼa ya jkoltaytik yuʼun ya xjuʼ xbajtʼ ta tsoblej, ta manbajel o te ya kikʼtik bael ta hospital yuʼun ay machʼa ya xbajtʼ yulaʼtay. Teme jich ya jpastik, yakotikme ta tuuntesel yuʼun te Jehová ta sutbeyel skʼop te hermanoetik te la skʼanbeyik koltayele (kʼopona 1 Corintios 10:24).

6. ¿Bin smakoj skʼoplal te ya x-otseswanotik ta nae?

⁶ Te machʼatik ya x-aʼtejik sok te Dios naʼbil sbaik te ya x-otseswanik ta snaik. Ta Escrituras Griegas Cristianas te kʼop te ya yichʼ kʼasesel «ya xʼotseswanex ta anahic» te xchie, ya skʼan ya yal «yakʼel ta ilel slekil koʼtantik ta stojol te machʼatik ma jnaʼbeytik sba» (Heb. 13:2). Bayal machʼatik ya yalbey skʼoplal te Biblia te otseswanik ta snaik, jich ya yakʼ kiltik te jichnix ya skʼan ya jpastik (Gén. 18:1-5). Kʼaxme lek te ya xkʼayotik ta skoltayel te yantik ta jujun buelta ya skʼanik koltayel ya kiltike, chikan teme «pajal ay schʼuhunel coʼtantic soque» o teme maʼuke (Gál. 6:10).

7. ¿Bin yuʼun ya skʼan te ya kakʼbeytik yil slekil koʼtantik te machʼatik ayik ta abatinel ta spisil-ora te ya yulaʼtayik te jkongregasiontike?

 ⁷ Ya xjuʼ x-aʼtejotik sok te Dios kʼalal ya kakʼbeytik yil slekil koʼtantik te machʼatik yakik ta abatinel ta spisil-ora te ya yulaʼtayik te jkongregasiontike (kʼopona 3 Juan 5, 8). Te kʼalal ya yulaʼtayotike ya xjuʼ «te pajal ya yichʼ yip coʼtantic» (Rom. 1:11, 12). Kiltik te ejemplo yuʼun jtul hermano te Olaf sbiil. Ayix tal bayal jaʼbil kʼalal keremto-ae, ulaʼtayot skongregasion yuʼun jtul superintendente yuʼun circuito te maʼyuk yinam sok maʼyuk machʼa juʼ yuʼun te la yikʼ ta snae. Te Olaf la sjojkʼoybey te smeʼ stat te maba Testigoik teme ya xjuʼ xjil ta snaik. Albot te yake pero te ya xjil ta wayel ta siyon stukel te Olaf. Kʼax lek kʼot ta lokʼel te la yikʼ ta snae. Te Olaf ya xtal ta yoʼtan te kʼax leknax kʼax semana yuʼunik. Jich ya yal: «Te superintendente yuʼun circuito sok te joʼone jujun kʼajkʼal sab ya xjajchotik sok te kʼalal ya xweʼ uchʼotik ya xkʼopojotik ta swenta te bintik ay skʼoplal. Te bitʼil la jta yip koʼtan yuʼun-abi la stijbon koʼtan yuʼun ya x-ochon ta abatinel ta spisil-ora». Te cuarenta jaʼbil kʼaxix tale te Olaf abatinem ta misionero ta bayal nasionetik.

8. ¿Bin yuʼun ya skʼan ya kakʼtik ta ilel slekil koʼtantik manchukme ma xkichʼtik albeyel wokol yuʼun? Ala junuk ejemplo.

⁸ Ayme bayal bin-utʼil ya xjuʼ ya kakʼbeytik yil slekil koʼtantik te machʼatik ma jnaʼbeytik sba, manchukme ta sjajchibal maʼyuk skʼoplal ta yoʼtanik te bin ya jpastik ta stojolike. Kiltik jun ejemplo, jtul hermana ta España ya snojptes ta Biblia jtul ants te Yésica sbiil te Ecuador slumal. Jun buelta te kʼalal yakik ta snopel te Biblia jajch ta okʼel ta repentenax te antse. Te hermana la sjojkʼoybey bin yuʼun jajch ta okʼel. Te Yésica la yal te kʼalal mato xbajtʼ ta España jkʼaxel maʼyuk bin ay yuʼun-a, jun buelta malaj la sta bin ya sweʼik, te jipnax tojol jaʼ ya yakʼbey yuchʼ te stut yantsil ale. Te kʼalal yak ta swaytesel-a te yale jajch skʼopon Dios. Ta jtsʼin-nax-a chaʼtul hermanaetik kʼot stijbeyik te snae. Te Yésica ma la smulan te kʼotike sok la schʼiʼ te revista akʼbote. Jich la yal sok yilinba: «¿Jaʼbal ya kakʼbey sweʼ kal ini?». Te hermanaetik la spasik tulan yuʼun ya xlekub yoʼtan, pero ma juʼ yuʼunik. Bajtʼik, pero sujtik ta yakʼbeyel jilel weʼelil ta stiʼ sna. Manchukme jalix te jich kʼot ta pasele, ya xtijbot yoʼtan te ants kʼalal ya xjul ta yoʼtan te bin lek pasbot yuʼun te hermanaetik, pero ma lek ya yaʼiy sba kʼalal ya snaʼulan te maʼyuk skʼoplal kʼot ta yoʼtan te sutbot skʼop yuʼun te Diose. Pero ta yorail te yakix ta yichʼel nojptesel, snopoj ta yoʼtan te ya x-abatin ta stojol te Jehová. Jaʼ tijbot yoʼtan yuʼun te yutsil yoʼtan la yakʼik ta ilel te hermanaetik ta stojole (Ecl. 11:1, 6).

9, 10. 1) ¿Bin aʼteliletik la yichʼtiklan pasel ta namey Israel te banti la yichʼ kʼanel te ay machʼatik ya xkoltaywanike? 2) ¿Bintik aʼtelil ya xjuʼ ya spasik te hermanoetik ta kongregasion?

⁹ Ta namey Israel bayal buelta la yichʼ kʼanel te ayuk machʼa ya xkoltaywanik ta aʼtel (Éx. 36:2; 1 Crón. 29:5; Neh. 11:2). Ta ora ini jaʼnix jich ay bayal bin-utʼil ya xjuʼ ya jtuuntes te jtiempotik, te bin ay kuʼuntik sok te bin ya jnaʼtik spasel ta skoltayel te kermanotaktike. Teme jich ya jpastik, tseʼelme koʼtantik sok ya jtatik bayal bendision yuʼun.

¹⁰ Te sKʼop Dios ya stijbey yoʼtan te winiketik ta kongregasion te yakuk x-aʼtejik sok te Jehová, jich ya spasik kʼalal ya spasik tulan yuʼun ya x-ochik ta siervo ministerial o anciano (1 Tim. 3:1, 8, 9; 1 Ped. 5:2, 3). Te machʼatik jich ya spasike, jich yoʼtanik te ya yakʼbeyik koltayel ta swenta schʼuunel yoʼtanik te hermanoetik sok ta swenta te koltayel ya skʼanik ta skuxlejalike (Hech. 6:1-4). ¿Aybal kichʼojtik jojkʼoybeyel yuʼun te ancianoetik teme ya xjuʼ xkoltaywanotik ta acomodador, te ya jpuktik te junetik ta kongregasion o te ya jwentaintik yilel te territorio, te yakuk xkoltaywanotik ta slekubtesel te sNail Tsoblej o te ya jpastik yantik aʼteliletike? Te machʼatik ya spasik te aʼteliletik-abi, yame yalbotik te mero lek ya yaʼiy sbaik yuʼun te jich ya skoltayik te hermanoetike.

11. ¿Bin-utʼil koltayot jtul hermana yuʼun te yamigatak la sta kʼalal la sjokinlan ta spasel sNail Tsoblejetik?

 ¹¹ Te machʼatik ya xkoltaywanik ta spasel aʼteliletik yuʼun te organisasion ya sta yachʼil yamigotakik. Kiltik bin kʼot ta stojol te hermana Margie te 18 jaʼbil aʼtejem ta spasel sNail Tsoblejetik. Te jayeb jaʼbil aʼtejeme, snojptesoj ta aʼtel bayal hermanaetik te pekʼelxan yaʼbilalike. Te jujun buelta jich ya spas te hermana jich ya yil te jaʼ mero yorail yuʼun ya yichʼ yip schʼuunel yoʼtanik ta pajal (Rom. 1:12). Kʼalal te hermana staoj wokol, spisil te hermanaetik-abi te yamigainej, akʼbil bayal smukʼul yoʼtan yuʼun. Jaxan te jaʼate, ¿aybal ajapoj aba ta aʼtel ta spasel naetik yuʼun te organisasion? Yame xjuʼ xkoltaywanat manchukme ma jaʼuk awaʼtel spasel na.

12. ¿Bin-utʼil ya xjuʼ xkoltaywanotik kʼalal ya staik wokol te hermanoetike?

¹² Kʼalal ay ya xkʼax tulan wokol, jich bitʼil yikʼal jaʼal o yantikxan wokolil, te j-abatetik yuʼun Dios ya xjuʼ x-aʼtejik sok te Jehová kʼalal ya skoltayik te hermanoetik te la staik te wokole. Ya xjuʼ ya yakʼik takʼin yuʼun ya yichʼ koltayel te machʼatik la staik wokol (Juan 13:34, 35; Hech. 11:27-30). Jaʼnix jich ya xjuʼ xkoltaywanik ta stsobel te bintik jin jilel sok ya xjuʼ xkoltaywanik ta schaʼpasel sna te hermanoetik. Jtul hermana ta Polonia te Gabriela sbiil jkʼaxel laj jilel te sna ta snojel jaʼ. Pero xjamet kʼinal la yaʼiy kʼalal kʼot ta koltayel yuʼun hermanoetik te nopol skongregasionik tey-a. Jich ya yal te hermana: «Ma jkʼan ya kal te bin chʼay kuʼune, melel jaʼnax biluketik. Jaʼ ya jmulan yalel te bin la jta yuʼun te wokolile. Te bin kʼax kuʼun, la yakʼbon kil te jkʼaxel maʼyuk bin ya spaj te ochemotik ta organisasion yuʼun Jehová sok te mero ya yakʼbotik stseʼelil koʼtantik». Bayal hermanoetik te yichʼojik koltayel kʼalal staojik tulan wokol ya yalik te bayal bin snopojik jilel. Jaʼnix jich kʼax lek ya yaʼiy sbaik te hermanoetik te ya skoltayik ta aʼtel te Jehová kʼalal ya xkʼax wokolil (kʼopona Hechos 20:35; 2 Corintios 9:6, 7).

13. ¿Bin-utʼil ya stsakxan yip te skʼuxul koʼtantik ta stojol Jehová kʼalal ya jkoltaytik te hermanoetike? Ala junuk ejemplo.

¹³ Jtul hermana te Stephanie sbiil sok yantik hermanoetik tseʼel yoʼtanik te juʼ yuʼunik aʼtel sok te Jehová ta skoltayel hermanoetik te talik ta anel ta Estados Unidos ta skaj guerra ta snasionik. Koltaywanik ta sleel sok ta schajpanel  naetik banti ya xjilik te hermanoetike. Jich ya yal kaʼiytik: «Mero la stij koʼtantik te tseʼel yoʼtan te hermanoetik sok te mero la yalik wokol kʼalal la yilik te skʼuxul yoʼtan te hermanoetik ta swolol Balumilal. Te hermanoetik ya skuyik te la jkoltaylantike, pero ta melel jaʼ bayalxan bin la spasik ta jtojoltik, melel la yichʼ yip te skʼuxul koʼtantik ta stojol Jehová kʼalal la kiltik te skʼuxul yoʼtanik, te schʼuunel yoʼtanik sok te mero ay smukʼul yoʼtanik ta stojol Jehová. Ta swenta te bin la yakʼ kiltike, ayxan skʼoplal kʼot ta koʼtantik spisil te bin ya yakʼbotik te Jehová ta swenta te organisasion yuʼune».

14, 15. 1) ¿Bin yilel stalel la yakʼ ta ilel te j-alwanej Isaías? 2) ¿Bin-utʼil ya xjuʼ ya jnopbeytik stalel?

¹⁴ ¿Yabal jkʼantik te ya x-aʼtejotikxan sok te Jehová? ¿Yabal xlokʼ ta koʼtantik te ya xbootik te banti ya skʼanxan pasel aʼteliletik ta organisasion? Melelnix-a te maba sujbilotik yuʼun namal ya xbootik ta abatinel yuʼun ya kakʼtik ta ilel yutsil koʼtantik, pero ay hermanoetik te ya xjuʼ yuʼunik te namal ya xbajtʼik ta abatinel ta stojol Jehová. Te machʼatik jich ya spasike, jich stalelik bitʼil te j-alwanej Isaías. Jun buelta te Jehová jich la sjojkʼoy: «¿Machʼa ya jticon bahel? ¿Machʼa ya xbaht cuʼuntic?». Te Isaías jich la sjakʼbey skʼop: «Liʼ ayon, ticonawon bahel» (Is. 6:8). ¿Jichnixbal ya jkʼan ya kakʼtik ta ilel jtaleltik bitʼil te Isaías kʼalal ay bin ya skʼan pasel ta organisasion yuʼun Jehová sok te kʼalal ya xjuʼ kuʼuntik spasele? ¿Bintikxan ya skʼan pasel ta ora ini?

¹⁵ Ta swenta te aʼtelil yuʼun scholel skʼop Dios sok yotsesel jnopojeletik jich la yal te Jesús: «Bayel te sit awal-tsʼunubil, pero mayuc tsobol te jʼaʼteletique. Ha yuʼun cʼambeyahic te Yajwal awal-tsʼunubil te yacuc sticonlan jʼaʼteletic ta stsobel» (Mat. 9:37, 38). Jich yuʼun, ¿yabal xjuʼ xbootik ta abatinel ta precursor te banti bayalto territorio maba yak ta ilele? O ¿yabal xjuʼ ay machʼa ya jkoltaytik yuʼun jaʼ ya xbajtʼ? Bayal hermanoetik jich ya yaʼiyik te jaʼ ya yakʼik ta ilel te kʼux ta yoʼtanik te Dios sok te spatxujkik kʼalal ya xbajtʼik ta precursor te banti maʼyuk tsobol jcholkʼopetike. Jnop kaʼiytik, ¿aybal bin-utʼil ya xjuʼ ya jmukʼubtestik te kaʼteltik ta stojol Dios? Kʼaxme tseʼel koʼtantik teme jich ya jpastike.

16, 17. ¿Bintikxan ya xjuʼ ya spasik te machʼatik ya skʼan ya smukʼubtes yaʼtelik ta stojol Jehová?

¹⁶ ¿Yabal xlokʼ ta koʼtantik te ya xbootik ta abatinel ta Betel o ta spasel na chikan teme jun-nax tiempo ya xjuʼ kuʼuntik o cheʼoxebnax kʼajkʼal ta semana? Ta spisil-ora ya yichʼ kʼanel bayal hermanoetik te jich yoʼtanik te ya xbajtʼik ta abatinel chikan banti ya xtikunotik bael sok chikan bin aʼtelil ya x-akʼbot spasik. Kʼalal ya jap jbatik ta yakʼel koltayel, jaʼniwan ya kichʼtik akʼel te banti ya skʼanik koltayel, manchukme yan aʼtelil ya jnaʼtik sok jnopojtik spasel ta lek. Pero chikan banti ya kichʼtik tuuntesel, bayalme skʼoplal ta yoʼtan Jehová te machʼatik jun yoʼtanik ya yakʼ sbaik ta spasel biluk aʼtelil ya x-akʼbotike (Sal. 110:3).

¹⁷ Teme ya jkʼantik ya kichʼtikxan pʼijubtesel yuʼun ya x-abatinotik ta stojol Jehová yaniwan xjuʼ xbootik ta Pʼijubtesel ta swenta te Machʼatik yaʼtelinejik scholel skʼop Dios. Tey ya yichʼik chajpanel hermanoetik sok hermanaetik te tulan schʼuunel yoʼtanik te ya x-abatinik ta spisil-ora yuʼun ya xjuʼ bayalxan ya x-abatinik ta organisasion yuʼun Jehová. Te machʼatik ya skʼan ya xbajtʼik ta nojptesel ini, ya skʼan ya schʼuunik te banti ya xtikunotik bael kʼalal ya xlaj yoʼtanik ta pʼijubtesel. ¿Yabal jkʼantik te ya xbootik ta nojptesel ini sok te ya kichʼtikxan kaʼteltike? (1 Cor. 9:23).

18. ¿Bintik lekilal ya jtatik teme ya x-aʼtejotik sok Jehová ta jujun kʼajkʼale?

¹⁸ Te j-abatotik yuʼun Jehová ya jkʼantik te ayuk yutsil koʼtantik, te ya kakʼtik ta ilel skʼuxul koʼtantik, slekil koʼtantik soknix te yakuk jkoltaytik te yantik ta jujun kʼajkʼal. Jichme ya jtatik sbujtsʼ-oʼtanil, lamalkʼinal sok tseʼel-oʼtanil (Gál. 5:22, 23). Chikan bin yak ta kʼaxel ta jkuxlejaltik ya xjuʼ ya jtatik stseʼelil koʼtantik teme ya jnopbeytik te yutsil yoʼtan te Jehová sok teme ma jkom jbatik ta aʼtel ta stojol (Prov. 3:9, 10).