1. ¿Bin-utʼil ya jnaʼtik te ay yutsil yoʼtan te Jehová ta swenta te bintik spasoje?

KʼALAL te Jehová jajch spas spisil te bintik aye, stukelnax ay-a. Jaʼukmeto la snop te ay machʼatik ya yakʼbey skuxlejalik ta chʼulchan sok ta Balumilal. Te Jehová jaʼ «te Dios te tseʼel yoʼtane», sok ya smulan yakʼel te bintik leke (1 Tim. 1:11, TNM; Sant. 1:17). Jich bitʼil te ya skʼan te tseʼeluk koʼtantik-euk, ya snojptesotik ta yakʼel ta ilel yutsil koʼtantik (Rom. 1:20).

2, 3. 1) ¿Bin yuʼun ya yakʼ stseʼelil koʼtantik te ay bin ya kakʼtik sok yutsil koʼtantik? 2) ¿Bin ya kiltik ta articulo ini?

² Kʼalal te Dios la spas te ants winiketik jich la spas te bitʼil yilel stukele (Gén. 1:27). Te bin ya skʼan ya yale, jaʼ te jich la spasotik te ya xjuʼ ya kakʼtik ta ilel taleliletik te ay yuʼune. Jaʼ yuʼun teme ya jkʼantik te tseʼeluk koʼtantik sok te ayuk swentail te jkuxlejaltike yame skʼan te ya jtʼuntik te ejemplo yuʼune, te ayuk bayal skʼoplal ta koʼtantik te jpatxujktik sok te ayuk yutsil koʼtantik ta stojolik (Filip. 2:3, 4; Sant. 1:5). ¿Bin yuʼun? Jaʼ ta skaj te jich la spasotik te Diose. Manchukme jmulawilotik ya xjuʼ ya kakʼtik ta ilel yutsil koʼtantik jich bitʼil te Jehová.

³ Te Biblia ya snojptesotik ta yakʼel te bin ay kuʼuntik sok yutsil  koʼtantik. Ta articulo ini ya kilbeytik skʼoplal te bin ya yal te sKʼop Dios ta swenta te utsil-oʼtanile. Yame kiltik te ya skoltayotik yuʼun lek ya yilotik te Jehová sok yuʼun ya xjuʼ jpasbeltik te aʼtelil yakʼoj ta jwentatike. Jaʼnix jich yame kiltik bin-utʼil stsakoj sba skʼoplal te utsil-oʼtanil sok te tseʼel-oʼtanil, sok bin yuʼun ma skʼan ya jkom jbatik ta yakʼel ta ilel.

4, 5. ¿Bin-utʼil yakʼojik ta ilel yutsil yoʼtanik te Jehová sok te Jesús?

⁴ Te Jehová ya skʼan te ya jnopbeytik yoʼtan, jaʼ yuʼun tseʼel yoʼtan kʼalal ay yutsil koʼtantik ta stojol yantik (Efes. 5:1). Chikan ta ilel te yoʼtanuk te tseʼel koʼtantike. Jich ya jnaʼtik ta swenta te kʼax lek la spasotike sok te la yakʼbotik tʼujbil Balumilal te chapal ta lek yuʼun ya jmulanbeytik yutsil (Sal. 104:24; 139:13-16). Ya kichʼtik ta mukʼ te Jehová kʼalal ya jpastik tulan te tseʼeluk yoʼtanik te yantike.

⁵ Te smelelil j-abatotik yuʼun Dios ya jkʼayinbeytik stalel te Jesús te la yakʼ ta ilel ta jamal bantito kʼalal ya xjuʼ ya yakʼ ta ilel yutsil yoʼtanik te ants winiketike. Jaʼnix te Jesús jich la yal: «Te Nichʼanile ma jaʼuc talem yuʼun te ay machʼa ya yabatine. Jaʼ talem yuʼun te ya yacʼ sba ta abatinel, soc te ya yacʼ sba ta lajel swenta stojol scolel tsobol ta jtul» (Mat. 20:28, XCD). Jaʼ yuʼun te jpuk-kʼop Pablo jich la yal ta stojol te j-abatetik yuʼun Dios: «Hichuc me awoʼtanic te bin utʼil yoʼtan te Cristo Jesús [...] la sloqʼues sba ta yoʼtan, la yichʼbe stalel aʼbat, pajal yilel soc ants-winiquetic cʼoht» (Filip. 2:5, 7). Jich yuʼun, lek te jich ya jojkʼoybey jbatike: «¿Yabal xjuʼ ya jtʼunxan ta lek te ejemplo yuʼun te Jesuse?» (kʼopona 1 Pedro 2:21).

6. ¿Bin la yakʼ jnoptik te Jesús ta lokʼombakʼop yuʼun te samaritano winik? (Ilawil te lokʼomba ta sjajchibal te articulo).

⁶ Yame xjuʼ te lek ya yilotik te Jehová teme ya jkʼayintik te lekil ejemplo yakʼojbotik sok te sNichʼane. Swenta ya xjuʼ jpasbeltik ya skʼan ya jlebeytik yutsil slekil te yantik sok te ya kiltik bin-utʼil ya xjuʼ ya jkoltaytik. Te Jesús la yakʼ ta ilel ta jamal ta lokʼombakʼop yuʼun te samaritano winik bin ya skʼan ya jpastik te jnopojelotik yuʼune, jaʼ te ya jpastik tulan ta skoltayel te yantik bantito kʼalal ya xjuʼ kuʼuntik chikan banti talemik (kʼopona Lucas 10:29-37). ¿Bin yuʼun la yal te Jesús te lokʼombakʼop ini? Jaʼ yuʼun te jich jojkʼoybot yuʼun jtul judío: «¿Machʼa a te jpat-xuhque?». Te bin la sutbey te Jesús la yakʼ ta ilel te ya skʼan jichuk ya xlokʼ ta koʼtantik te ya kakʼtik ta ilel yutsil koʼtantik bitʼil te samaritano winik swenta lek ya yilotik-a te Diose.

7. ¿Bin-utʼil stsakoj sba skʼoplal te yakʼel ta ilel utsil-oʼtanil sok te kʼop la sjach te Satanás ta Edén?

⁷ Te j-abatotik yuʼun Dios bayal bin yuʼun ya skʼan ayuk yutsil koʼtantik. Jun swentail jaʼ te stsakoj sba skʼoplal sok te kʼop la sjach ta stojol Dios te Satanás ta tsʼumbil kʼinal Edén. ¿Bin yuʼun te jich ya kaltike? Te Satanás la yal ta jamal te jaʼ lek ya xkʼot skuxlejal te Adán, Eva sok te yal snichʼnabik teme jaʼnax ya sle yutsil slekilik sok te jaʼ ya spasik te bin ya skʼan yoʼtanik, ma jaʼuk te ya schʼuunbeyik smantal te Dios. Te Adán sok te Eva la yakʼik ta ilel sbikʼtal yoʼtanik, melel te Eva yoʼtanuk te pajal ya xkʼot sok te Diose, te Adán jaʼ la spas te bin lek yoʼtan yuʼun te yinam, ma jaʼuk te bin lek yoʼtan yuʼun te Jehová (Gén. 3:4-6). Jpisiltik ya jtatik ta ilel te jkʼaxel ma lek lokʼ te bin la spasike. Te bikʼtal-oʼtanil ma xyakʼ stseʼelil koʼtantik, ta melel ma lek ya xkʼootik yuʼun. Jich yuʼun teme ay yutsil koʼtantik ya kakʼtik ta ilel ta jamal te jchʼuunejtik sok spisil koʼtantik te jaʼnanix lek ta pasel-a te bin ya yakʼ jnoptik te Jehová.

8. ¿Bin yuʼun la skʼan ay machʼatikxan la yichʼik ta wenta te Adán sok te Evae?

⁸ Manchukme stukel ayik ta tsʼumbil kʼinal Edén te Adán sok te Eva, la skʼan ayuk  machʼatikxan la yichʼik ta wenta yuʼun ya slebeyik yutsil slekilik kʼalal albotik yuʼun Dios bin ya spasik. Akʼbotik bendision yuʼun te Dios sok albotik te pʼolukik, te akʼa snojesik te Balumilal sok te ya swentainike (Gén. 1:28). Te Jpaswanej mero ay skʼoplal ta yoʼtan te bin spastiklanoje, jaʼ yuʼun te Adán sok te Eva la skʼan te jaʼ ya spasik te bin ya x-akʼbot stseʼelil yoʼtanik te yal snichʼnabike. Swenta ya smulanbeyik yutsil te nichimal kʼinal te yal snichʼnabike, ya skʼan te ya skʼatpʼunik ta nichimal kʼinal swolol te Balumilale. Swenta jich ya xkʼot ta pasel ya skʼan ya yotses skʼab spisil te yal snichʼnabike.

9. Te lajuk skʼatpʼunik ta nichimal kʼinal swolol te Balumilal te ants winiketik, ¿bin yuʼun la sta stseʼelil yoʼtanik te jichuke?

⁹ Te lajuk smukʼubtesik bael te tsʼumbil kʼinal te ants winiketike mero jun aʼtejik sok te Jehová ta skʼotesel ta pasel te skʼanojel yoʼtan te jichuke, jich juʼ ochik ta kux-oʼtanil yuʼun te Diose (Heb. 4:11). Jnop kaʼiytik bin-nax yutsil la yaʼiyik te jichuke. Te kʼotuk ta pasele, akʼbotik bendision yuʼun Jehová yuʼun te yutsil yoʼtanik sok te la slebeyik yutsil slekil te yantike.

10, 11. ¿Bin-utʼil ya juʼtestik te aʼtelil yuʼun scholel skʼop Dios sok yotsesel jnopojeletik?

¹⁰ Ta ora ini te Jehová yakʼojbey yaʼtel te j-abatetik yuʼun, jaʼ te scholel te skʼope sok te ya yotsesik jnopojeletik. Swenta ya xjuʼ ya jpastik ya skʼan te jichuk koʼtantik te ya jlebeytik yutsil slekil te yantike. Jaʼnaxme ya xjuʼ ya jlajintik spasel te aʼtelil teme jaʼ ya stijbotik koʼtantik te skʼuxul koʼtantik ta stojol Dios sok ta stojol te jpatxujktike.

¹¹ Ta sbabial siglo te jpuk-kʼop Pablo la yal: «Joc jbahcotic ta aʼtel soc Dios». ¿Bin yuʼun jich la yal? Melel jaʼnix sok yantik jchʼuunjeletik ya stsʼunik sok ya yakʼbeyik yaʼlel kʼoem te sbakʼ te smelelil kʼop yuʼun te Wentainel yuʼun Diose (1 Cor. 3:6, 9). Jaʼnixme jich ta ora ini ya xjuʼ ya jokin jbatik ta aʼtel sok Dios teme sok yutsil koʼtantik ya kakʼ jtiempotik, jtakʼintik sok kiptik ta spasel te aʼtelil yakʼoj ta jwentatik te Diose. Ta melel, ¡jaʼ mukʼul majtʼanil!

12, 13. ¿Bintik lek ya jtatik ya awal yuʼun te ya kotsestik jnopojeletike?

¹² Ya yakʼ stseʼelil koʼtantik yakʼel sok yutsil koʼtantik te jtiempotik sok kiptik ta scholel skʼop Dios. Bayal hermanoetik te juʼem yuʼunik yakʼel nojptesel yuʼun Biblia ya yalik te maʼyuk bayal bin jich ya yakʼ te lek ya yaʼiy sbaike. Kʼax lek ya kaʼiy jbatik kʼalal ya kiltik ta sit yelaw te ants winiketik te ya xkʼot ta yoʼtanik te smelelil kʼope, te ya xchʼi te schʼuunel yoʼtanike, te ya sjeltay te skuxlejalike sok te ya scholbeyik yaʼiy yantik te bin yakik ta snopele. Te Jesús akʼbot stseʼelil yoʼtan te kʼalal la yil te sok «bayel yutsil yoʼtanic a suhtic tal» ta scholel skʼop Dios te 70 ta tul jnopojeletik ta swenta te lek bin lokʼ yuʼunike (Luc. 10:17-21).

¹³ Ta swolol Balumilal te jcholkʼopetik ya sta stseʼelil yoʼtanik kʼalal ya yilik te ya xkoltayotik ta skuxlejalik te ants winiketik te bin ya yal te Biblia. Jnop kaʼiytik ta swenta te  Anna te jaʼ tul achʼix te bajtʼ ta nainel ta jun lugar yuʼun Europa oriental banti maʼyuk lek jcholkʼopetik. * Jich la stsʼibay: «Kʼax lek ya kaʼiy te bayal ants winiketik ya skʼan ya snopik te Biblia. Bayal ya yakʼbon stseʼelil koʼtan te scholel skʼop Dios. Kʼalal ya sujton ta jna ma xtalix ta koʼtan snopel te bintik yak ta kʼaxel ta jtojol. Jaʼ baem ta koʼtan te machʼatik ya kakʼbey nojptesel yuʼun Biblia, te swokolike sok te bin ya x-akʼotik ta mel-oʼtan yuʼune. Ya jle bin-utʼil ya jkoltaylan sok ya kakʼbey smukʼul yoʼtanik. Kʼoem ta koʼtan te “ha bayel xan yutsil te machʼa ay bin ya yacʼ te bin utʼil ay bin ya yichʼ”» (Hech. 20:35).

14. ¿Bin-utʼil ya xjuʼ ya kaʼiytik sbujtsʼ koʼtantik ta scholel skʼop Dios manchukme maʼyuk tsobol machʼatik ya smulanik?

¹⁴ Manchukme ma skʼanik, lekme ya kaʼiy jbatik yuʼun te la kakʼbeytikix yaʼiyik te lek yachʼil kʼope. Ta melel, te kaʼteltike jteb ma pajal sok te aʼtelil akʼbot spas te j-alwanej Ezequiel. Jich albot yuʼun te Jehová: «Ya me awalbe yaʼiyic te jcʼope, chican teme ya yaʼiyic o teme ma scʼan ya yaʼiyic» (Ezeq. 2:7; Is. 43:10). Manchukme ay machʼatik maʼyuk skʼoplal ta yoʼtanik te bin ya jcholbeytik yaʼiyike, bayal skʼoplal ta yoʼtan stukel Jehová te ya jpastik tulane (kʼopona Hebreos 6:10). Jtul jcholkʼop la yal: «La kaʼiytikix tsʼunbajel, la kakʼbeytikix yaʼlel sok la jkʼopontikix sok smukʼul koʼtantik te Jehová te jaʼ ya stijbey yoʼtan te ants winiketik ta smulanel te skʼope» (1 Cor. 3:6).

15. ¿Jaʼnaxbal ya skʼan ya kakʼbeytik yil yutsil koʼtantik te machʼatik ya yichʼik ta wentae? Cholbeya skʼoplal.

¹⁵ Te Jesús ya skʼan te tseʼeluk koʼtantike. Jaʼ yuʼun jich la yal kaʼiytik: «Aʼbeyahic, hich me ya xʼaʼbotex: lec spʼisojbil, tembil, yuqʼuilambil soc buen tʼocol yac awichʼic. Como te hich smucʼul yac apʼis, hich nix yac awichʼ pʼisbeyel» (Luc. 6:38). Ay bayal machʼatik lek stalelik ya yakʼik ta ilel kʼalal ya kakʼbeytik yil yutsil koʼtantik. Ta melel, ma spisiluk te ants winiketik ya yichʼik ta wenta te ya kakʼbeytik yil slekil koʼtantik, pero te machʼatik yake ya xtijbot yoʼtanik ta yakʼel ta ilel yutsil yoʼtanik-euk sok ya yakʼbeyik snop yantik. Jaʼ yuʼun, manchukme maʼyuk skʼoplal ta yoʼtan yilel te ants winiketike, mame skʼan ya jkom jbatik ta yakʼel ta ilel yutsil koʼtantik.  Mame jnaʼtik te bin lek ya xjuʼ xkʼot ta lokʼel ta swenta te yutsil koʼtantike.

16. ¿Machʼatik ya skʼan ya kakʼbeytik yil yutsil koʼtantik, sok bin yuʼun?

¹⁶ Te machʼa ay yutsil yoʼtan ta smelelil, maba ay ta yoʼtan te ya skʼan ay bin ya x-akʼbot sujtel yuʼune. Jich ay ta yoʼtan te Jesús kʼalal la yal: «Teme yac apas bayel weʼelil, ha me xawicʼticlan te pobrehetic, nolcʼabetic, coxoʼetic soc tsʼoʼsitetic; hich me bayel awutsil ya xcʼohat, como ma xhuʼ yuʼunic sjeltayel stuquel» (Luc. 14:13, 14). Te Biblia ya yal te ya sta bendision te machʼa lek yoʼtan ta stojol yantik sok te bayal «yutsil te machʼa ay ta yoʼtan te pobre» (Prov. 22:9; Sal. 41:1). Yuʼun-nix jich-a, ya kakʼtik ta ilel yutsil koʼtantik, melel bayal yutsil skoltayel te yantike.

17. ¿Bintik ya xjuʼ ya kakʼtik yuʼun tseʼel koʼtantik-a?

¹⁷ Kʼalal te Pablo la yal te bin yalojix ta nailal-a te Jesús te «ha bayel xan yutsil te machʼa ay bin ya yacʼ te bin utʼil ay bin ya yichʼ», ma jaʼuknax la yalbey skʼoplal takʼin o biluketik, jaʼnix jich la yakʼ ta naʼel te ya skʼan ay machʼa ya kakʼbeytik smukʼul yoʼtan, te ya jtojobtestik ta swenta te Biblia sok te ya jkoltaytike (Hech. 20:31-35). Te jpuk-kʼop Pablo la yakʼ kiltik ta swenta te bin la yal sok ta yaʼtelul te ya skʼan ya kakʼbeytik yantik te jtiempotik, kiptik, te ayuk skʼoplal ta koʼtantik sok te kʼuxuk ta koʼtantike.

18. ¿Bin staojik ta ilel bayal machʼatik ya snopbeyik skʼoplal stalel te ants winiketike?

¹⁸ Te machʼatik ya snopbeyik skʼoplal stalel te ants winiketike staojik ta ilel te ya yakʼ stseʼelil koʼtantik te ay bin ya kakʼbeytik te yantike. Jun articulo te la stsʼibayik la yakʼ ta naʼel te jaʼ tseʼelxan yoʼtanik te ants winiketik kʼalal ay bin lek ya spasik ta stojol te yantike. Jaʼnix jich ya yalik te kʼalal ay machʼa ya jkoltaytik ay swentail te jkuxlejaltik ya kaʼiytik. Te winiketik-abi ya yalik te swenta ma stsakotik bayal chamel sok te ayxan stseʼelil koʼtantik, ayuk bin ya jpastik ta skoltayel yantik te maba ya jkʼantik stojole. Ma chajpuk ya kaʼiytik-abi, melel te jkʼuxul-oʼtanil Jpaswanej kuʼuntik Jehová, yalojnanix-a te ya yakʼ stseʼelil koʼtantik te ay bin ya kakʼtike (2 Tim. 3:16, 17).

19, 20. ¿Bintik yuʼun ya skʼan te ayuk yutsil koʼtantike?

¹⁹ Wokolniwan ya kaʼiytik te ya kakʼtik ta ilel yutsil koʼtantik, melel joytaybilotik ta ants winiketik te ay sbikʼtal yoʼtanike. Jaʼukmeto te Jesús la yalbey skʼoplal te chaʼchajp mantaliletik te mukʼxan skʼoplalike, jaʼ te kʼuxuk ya kaʼiytik te Jehová ta spisil koʼtantik, jkuxlejaltik, jpʼijiltik sok ta spisil kiptik, sok te kʼuxuk ya kaʼiytik te jpatxujktik jich bitʼil kʼux ya kaʼiy jbatik (Mar. 12:28-31). Jich bitʼil la kiltikix ta articulo ini, te machʼatik kʼux ta yoʼtanik te Jehová ya spasik tulan ta snopbeyel yoʼtan. Te Jehová sok te sNichʼan ay yutsil yoʼtanik sok ya skʼanbotik te jichukotik-euk, melel jich ay stseʼelil koʼtantik ta smelelil-a. Ya kichʼtik ta mukʼ te Jehová kʼalal ya jpastik tulan ta yakʼbeyel yil yutsil koʼtantik soknix te jpatxujktike, jaʼnix jich ya jta jlekiltik sok ya sta slekil te yantike.

²⁰ Ta melel yakniwan jpasbeltikix tulan ta skoltayel te jpatxujktik sok kʼax jich-a ta stojol te machʼatik pajal schʼuunel koʼtantik soke (Gál. 6:10). Teme maba ya jkom jbatike, ayniwan machʼatik ya yalbotik wokol sok ya xtal skʼuxul yoʼtanik ta jtojoltik, jaʼ-abi ya yakʼ stseʼelil koʼtantik. Te Proverbios 11:25 ya yal: «Te machʼa ma pʼisbiluc nax ya yacʼ, ya xpʼohl bintic ay yuʼun; te machʼa ya yabe te yane, ha nix ya xʼaʼbot». Ta jkuxlejaltik sok ta kaʼteltik ta stojol Dios bayal bin-utʼil ya xjuʼ ya kakʼtik ta ilel yutsil koʼtantik sok slekil koʼtantik te ma yuʼunuk ay bin ya jkʼantik sujtele. Ta yan articulo ya kiltik chaʼoxchajpuk.