TE STSELAJAN yip océano Atlántico ya smaj sba ta spat te barko te yak ta bael ta Europa. Tey yak ta bael-a te George Young te mero tseʼel yoʼtan ya snaʼulan te bin juʼ spasbel ta stojol Dios ta Brasil. * Pero te kʼalal yak ta kʼubelxan ochel, jajch snop te yachʼil aʼtelil ay ta stojol te ya xbajtʼ spas ta España sok Portugal te banti ma yichʼoj cholel ta lek te lek yachʼil kʼope. Te kʼalal ya xkʼote snopoj te ya spuk 300,000 tratadoetik sok te ya schap yorail te ya xkʼot yakʼ discursoetik te hermano Joseph F. Rutherford.

Te hermano Young kʼot ta Lisboa, Portugal ta 1925. Ta yorail-a ay bin tulan yak ta kʼaxel ta lum-abi. Te revolución republicana de 1910 la slajinbey skʼoplal te jaʼnax ta jun familia ya xlokʼ tal te ajwaliletike sok bayal bin chʼay yuʼun te Iglesia Católica te ay ta skʼab spasel ta nail tale. Te ants winiketik tey-a yakik ta smulanel te librexan ayike, jaʼukmeto ma junuk yoʼtan ayik ta spamal nasion.

Kʼalal te George Young chapal ayix yuʼun ya yakʼ jun discurso te hermano Rutherford, te ajwalil la yakʼ tulan ley, melel te yajwal nasion kʼan sjach sbaik ta skontrainel te ajwalile. Te secretario yuʼun te Sociedad Bíblica Británica y Extranjera la yalbey te hermano Young te yananix sitintay tulan kontrainel-a. Manchukme jich-abi te hermano la skʼan permiso yuʼun ya stuuntes te gimnasio yuʼun te Escuela Secundaria Camões, akʼbot ta majanel.

Kʼot skʼajkʼalel te discurso ta 13 yuʼun mayo. Te pancartaetik te lapʼal ta naetik sok te periodikoetik la spukbeyik skʼoplal te discurso te yichʼoj sbiil «Cómo vivir en la Tierra para siempre», bayal machʼatik yak smaliybelik-a te bin ya xkʼot ta pasele. Te jkontrainwanejetik ta relijion oranax ay bin la spukbeyik skʼoplal ta speriodikoik yuʼun ya yakʼbeyik snaʼ te ants winiketik te julelto «lotil j-alwanejetik» tey-a. Jaʼnix jich ta ochibal yuʼun te gimnasio la spukik bayal ta mil foyetoetik banti la yalik te ma jichuk te bin tal yakʼ ta nopel te hermano Rutherford.

Manchukme jich kʼot ta pasel ayniwan dos mil ta tul ants winiketik la snojesik te lugar-abi sok jichniwan yipal ma ochikix-a. Ay machʼatik te mero yoʼtan ya yaʼiyik skʼoplal te moik ta eskaleraetik te pasbil ta laso te ay ta jujunxujk te gimnasio, ay yantik la sjujkan sbaik ta sba te bintik ya stuuntesik ta spasel ejercicio.

Pero ay machʼatik kʼotik ta utsʼinwanej. Te jkontrainwanejetik kʼotik juyetel tey-a sok la skʼasik te sillaetike. Pero te hermano Rutherford lamalnax yoʼtan la yakʼ sba sok la stejkʼan sba ta ba mesa yuʼun ya x-aʼiyot ta lek-a. Jteb ma olil ajkʼabalix-a kʼalal laj yakʼbel te discurso, kʼaxem ta mil doscientos machʼatik la yakʼ sbaik ta tsakel sbiilik sok banti nainemik yuʼun ya xtikunbotik junetik yuʼun sKʼop Dios. Ta yan kʼajkʼal lokʼ skʼoplal te discurso ta periodiko O Século.

Ta septiembre yuʼun 1925 jajch ta pukel ta Portugal te revista La Torre del Vigía ta kʼopil portugués te yakix ta pukel ta nail tal-a ta Brasil, te revista-abi  La Atalaya sbiil ta ora ini. Ta yorail-a jtul te Machʼatik la snopik te Biblia te nainem ta Brasil te Virgílio Ferguson sbiil jajch schajpan sba yuʼun ya xbajtʼ ta nainel ta Portugal yuʼun ya xkoltaywan ta scholel skʼop Dios. Te Virgílio sok te George Young pajal aʼtejik ta nail tal ta tut sucursal ta Brasil yuʼun te Machʼatik la snopik te Biblia. Te Virgílio sok te yinam te Lizzie sbiil ora bajtʼik ta Portugal yuʼun ya xkʼot staik tey-a te Young. Kʼax lek te bajtʼike, melel ma jaluk ta patil te hermano Young bajtʼ ta yan lugaretik ta scholel skʼop Dios jich bitʼil ta Unión Soviética.

Kʼalal te soldadoetik la yotsesik ajwalil te stukelnax ya yichʼ te mantaltesele, kʼaxtoxan batsʼej-a te kontrainele. Pero te hermano Ferguson jun yoʼtan la yakʼ sba. Ay bin la spas swenta ya skanantay te tut jtsojb te Machʼatik la snopik te Biblia sok yuʼun ya stsakxan yip te yaʼtelike, jaʼnix jich la skʼan permiso yuʼun ya spasik te tsoblejetik ta sna. Ta octubre yuʼun 1927 te j-aʼtej patanetike la yakʼbeyik permiso.

Ta sbabial jaʼbil aʼtej te ajwalil-abi, cuatrocientos cincuentaniwan ta tul machʼatik la skʼanik te spisiluk-ora ya yichʼik tikunbeyel bael te revista La Torre del Vigía. Jaʼnix jich ta swenta te tratadoetik sok foyetoetik kʼot te smelelil kʼop ta Angola, las Azores, Cabo Verde, Goa (India), Madeira, Mozambique sok Timor Oriental te jaʼ lumetik te swentainej te Portugal.

Ta jaʼbil 1929 kʼot ta Lisboa jtul winik te pekʼel skʼoplal te yaʼtel te talem ta Portugal te Manuel da Silva Jordão sbiil te ya x-aʼtej ta jardinero. Kʼalal nainem ta Brasil-a la yaʼiy jun discurso te la yakʼ te hermano Young. Ora kʼot ta yoʼtan te jaʼ te smelelil kʼop sok tijbot yoʼtan yuʼun ya xbajtʼ skoltay te hermano Ferguson ta yakʼbeyel snaʼ te ants winiketik ta Portugal te lek yachʼil kʼop yuʼun te Wentainel yuʼun te Diose. Jaʼ yuʼun och ta colportor te jich sbiil ta nail tal te precursoretike. Jich bitʼil te mero chajpanbil ta lek te spasel sok te spukel te junetik, ora mo yajtalul te achʼ kongregasion ta Lisboa.

Te hermano Ferguson sok te yinam sujtik ta Brasil ta 1934. Pero tsʼunbilix jil-a te sbakʼ te smelelil kʼop ta Portugal. Manchukme maʼyuk lamalkʼinal ta Europa ta skaj te guerra civil española sok te 2 Guerra Mundial, te hermanoetik ta Portugal te mero jun yoʼtanik ta stojol Dios maba laj yip te schʼuunel yoʼtanike. Jun tiempo te hermanoetik jich kʼotik bitʼil akʼal te maʼyukix skʼajkʼalel, pero la schaʼtsakxan skʼajkʼalel ta 1947 kʼalal kʼot te sbabial misionero te yichʼoj pʼijubtesel ta Galaad, jaʼ te John Cooke. Jaʼto tal-abi, jajch ta moel yajtalul te jcholkʼopetike. Maba kejchaj ta moel manchukme la yichʼ makel te kʼateltik tey-a ta 1962. Ta diciembre yuʼun 1974 te kʼalal la yichʼ akʼbeyel registro yuʼun te ajwalil te testigoetik yuʼun Jehová bitʼil relijion, kʼaxemix ta trece mil-a te jcholkʼopetik ta spamal te nasione.

Ta ora ini kʼaxem ta cincuenta mil jcholkʼopetik ya spukik ta alel te lek yachʼil kʼop yuʼun te Wentainel yuʼun te Dios ta Portugal sok ta bayal islaetik banti ya xkʼopojik ta portugués, jich bitʼil ta las Azores sok ta Madeira. Ay jcholkʼopetik te jaʼ smeʼ statik te machʼatik kʼot yaʼiyik te discurso la yakʼ te hermano Rutherford ta 1925 te ma xchʼay ta oʼtanile.

Ya kalbeytik wokol te Jehová sok te hermanoetik-abi te ma xiwik ta stsʼunel ta sjajchibal te sbakʼ te lek yachʼil kʼop yuʼun te Wentainel yuʼun te Diose, sok te ay yaʼtelik kʼotik yuʼun Jesucristo ta stojol te jyanlumetik jich bitʼil la yal te Pablo (Rom. 15:15, 16). (Te bintik ay ta archivo kuʼuntik ta Portugal).