¿AYBAL jun aʼtelil ta kongregasion te ya jkʼan ya jpastik pero ma xjuʼ kuʼuntik spasel ta ora ini? Jaʼniwan jun aʼtelil te ya spas yan ermano o jun aʼtel te ay ta jwentatik spasel-ae. Jaʼniwan ya smakotik te ayix kaʼbilaltik, te chamel, te maʼyuk jtakʼintik o te ya jwentaintik te jfamiliatike. O jaʼniwan yuʼun te ay bin la yichʼ jeltayel ta organisasion te jich la kijkitaytik te aʼtelil te bayal jaʼbil la jpastike. Chikan bin yuʼun, yaniwan jnoptik te maba bayal bin yakotik ta spasel ta stojol Jehová te bitʼil ya jkʼantike. Kʼalal jich ya xkʼax ta jtojoltike, stalelnanix-a te ay baeltik ma lek ya kaʼiy jbatik yuʼune. Pero ¿bin ya xjuʼ ya jpastik yuʼun maba ya xchebaj koʼtantik, maba ya jmel koʼtantik o ya jkʼej ta koʼtantik te bin kʼax ta jtojoltike? ¿Bin ya skoltayotik yuʼun ma xchʼay te stseʼelil koʼtantike?

Te ejemplo yuʼun te Juan J-akʼ-ichʼ-jaʼ ay bin ya yakʼ jnoptik. Te j-abat yuʼun Dios ini akʼbot jun aʼtelil te maʼyuk machʼa yan jich akʼbote. Pero maniwan la snop te jaʼ bayalxan tiempo ya xkʼax yuʼun ta karsel te bitʼil la spas yaʼtele. Manchukme kʼax swokol, maʼyuk bin-ora chʼay stseʼelil yoʼtan te jayeb kʼajkʼal kuxule. ¿Bin koltayot yuʼun? ¿Bin ya skʼan ya jpastik yuʼun ma xchʼay te stseʼelil koʼtantik kʼalal ay bin ma lek ya xkʼax ta jtojoltik?

Ta abril yuʼun te jaʼbil 29 te kʼalal jaʼix jkʼajkʼaleltik-ae, te Juan jajch schajpanbey yoʼtan te ants winiketik ta smaliyel te Mesías, jich bitʼil albot ta mantal yuʼun te Jehovae. Jich la spuk ta alel: «Suhtesa awoʼtanic, como nopolix yorahil te cuentahinel yuʼun te chʼulchane» (Mat. 3:2; Luc. 1:12-17). Bayal machʼatik la schʼuunik. Bayal ants winiketik talik ta namal yuʼun ya yaʼiyik te bin ya scholbey skʼoplal sok bayal machʼatik la sujtes yoʼtanik sok la yichʼik jaʼ. Te Juan jaʼnix jich la yalbey ta jamal te jchebal-oʼtan jwolwanejetik yuʼun relijion te kastigo ya staik teme ma sjeltay stalelike (Mat. 3:5-12). Te bin mukʼxan skʼoplal la spase, jaʼ te la yakʼbey yichʼ jaʼ te Jesús ta oktubre ta jaʼbil 29. Jaʼto tal-abi, la stijbey yoʼtan te ants winiketik ta stʼunel te Jesús, te jaʼ te Mesías albil skʼoplal ya xtale (Juan 1:32-37).

Ta swenta te aʼtel la spas te Juan, te Jesús jich la yal: «Spisil machʼatic alataybilic yuʼun ants, mayuc chicnajem te cʼax hich scʼoblal a te bin utʼil Juan te Jʼacʼ-ichʼ-haʼ» (Mat. 11:11). Te Juan ay skʼoplal ta yoʼtan spisil te bin la spas ta stojol te Jehová sok akʼbot stseʼelil yoʼtan te bendisionetik la yichʼ  akʼbeyele. Jich bitʼil te Juan, te j-abatetik ta kʼajkʼal ini te ya x-abatinik sok spisil yoʼtanik ta stojol te Jehová smulanojik bayal bendisionetik. Jich bitʼil te ermano Terry, kʼaxemix ta cincuenta jaʼbil ay ta abatinel ta tiempo kompleto sok te yinam te Sandra sbiile. Te Terry jich ya yal: «Ay bayal tʼujbil aʼtelil kichʼoj akʼbeyel. Kʼaxon ta prekursor regular, betelita, prekursor espesial sok superintendente yuʼun sirkuito sok distrito, ta ora ini yan buelta ayon ta prekursor espesial». Kʼalal ya kichʼtik akʼbeyel j-asignasiontik jich bitʼil ini bayal ya yakʼ stseʼelil koʼtantik. Pero te ejemplo yuʼun Juan, ya yakʼ jnoptik te ma jaʼuk ay stseʼelil koʼtantik yuʼun te j-asignasiontike sok te ya skʼan ya jpastik tulan te manchuk ya xchʼay te stseʼelil koʼtantike.

Jun rason te bin yuʼun maba chʼay stseʼelil yoʼtan te Juan J-akʼ-ichʼ-jaʼ, jaʼ te spisil-ora la yal wokol yuʼun te aʼteliletik la spase. Jun ejemplo jaʼ te kʼalal la yichʼ jaʼ te Jesús, te Juan kaj ta pejkʼajel yajtalul te jnopojeletik yuʼune, pero te Jesús jaʼ bayalxan kaj ta pʼolel yuʼun. Jaʼ yuʼun la smel yoʼtanik te jnopojeletik yuʼun Juan, jich kaj yalbeyik: «Ayix ta yaqʼuel ichʼ-haʼ, soc spisilic yaquic ta bahel ta stojol» (Juan 3:26). Jich la sjakʼ te Juan: «Te machʼa macbil yuʼun te achʼix, ha nix te querem ya xnuhpun soque; yan te yamigo te querem ya xnuhpun, ha te machʼa ay ta stsʼehl soc yac yaʼiybel te scʼop, mero tseʼel yoʼtan yuʼun cʼalal ya yaʼiybe scʼop te quereme. Ha scuentahil te mero tseʼel coʼtan yuʼun» (Juan 3:29). Te Juan ma jichuk la yil te yak ta tsalel yuʼun te Jesuse sok maba la snop te maʼyuk skʼoplal te yaʼtele, manchukme jaʼ mukʼxan skʼoplal yaʼtel te Jesuse. Te Juan tseʼel yoʼtan yuʼun spisil te bin la spase, melel bayal skʼoplal ta yoʼtan te jaʼ yamigo sba sok te kerem ya xnujpune.

Te lekil talel yuʼun te Juan jaʼ koltayot yuʼun ay stseʼelil yoʼtan manchukme tulan ta pasel te yaʼtele. Te bitʼil nasareo ayine, ma xjuʼ ya yuchʼ bino (Luc. 1:15). Te Jesús jich la yal ta swenta te skuxlejale: «Te Juan [...] ma ba weʼ uchʼ». Yan stukel te Jesús sok te jnopojeletik yuʼune ma jichuk skuxlejalik te bitʼil te nasareoetike (Mat. 11:18, 19). Jaʼnix jich, manchukme te Juan maʼyuk bin-ora la spas milagroetik, snaʼoj-a te ya xjuʼ yuʼunik spasel stukel te jnopojeletik yuʼun te Jesuse, te chaʼoxtul jnopojeletik ini jaʼik te machʼatik la yichʼ tʼunel yuʼun ta naile (Mat. 10:1; Juan 10:41). Pero te Juan ma jaʼuk bajt ta yoʼtan te bintik ma juʼ yuʼun spasele, jaʼ bajt ta yoʼtan spasel te aʼtel akʼbot yuʼun te Jehovae.

Teme jichnix ay skʼoplal ta koʼtantik te bin ya jpastik ta stojol te Jehová ta ora ini, ma xchʼay te stseʼelil koʼtantik. Te Terry te la kalbeytikix skʼoplale, jich ya yal: «La kakʼ koʼtan ta spasel te jujun asignasion la kichʼ akʼbeyele». Te kʼalal ya snop bin yilel te skuxlejal te bitʼil ya x-abatin ta tiempo kompleto, jich ya yal: «Maʼyuk bin-ora ya jnop te maʼyuk skʼoplal te bin la jpase. Ay ta koʼtan spisil te bintik lek kʼax kuʼune».

Ya yakʼxan bayal stseʼelil koʼtantik teme jaʼ ya jnopilan ta koʼtantik bin yuʼun mukʼ skʼoplal jun asignasion o jun aʼtelil, te jaʼ jun majtanil te ya jokintik ta aʼtel te Diose (1 Cor. 3:9). Kaltik jun ejemplo. Teme ya jkanantaytik ta lek jun biluk te la kichʼtik akʼbeyel jilel yuʼun te jfamiliatike, manchukme ya xkʼax bael te tiempoe ma xchʼay te stʼujbilale. Jaʼnix jich teme ya jnopilan ta koʼtantik te stʼujbilal te abatinel ta stojol te Diose, ma jaʼuk ya xbajt ta koʼtantik snopel te bin ya yakʼ chʼayuk stseʼelil koʼtantike. Mame jpajtik te bin ya jpastik sok te bin ya spas te yantike sok mame jnoptik te maʼyuk lek skʼoplal te kaʼteltik te bitʼil te yaʼtel te yantike (Gál. 6:4).

Te Juan snaʼojniwan-a te maba bayal tiempo ya xjalaj te yaʼtele, pero maniwan la snop te oranax jich ya xkʼot ta pasele (Juan 3:30). Ta jaʼbil 30, te ajwalil Herodes la yakʼ ta chukel, wakebtonax u la yakʼbey yichʼ jaʼ-a te Jesuse. Manchukme jich-abi, la spasxan tulan ta scholel te skʼop Diose (Mar. 6:17-20). ¿Bin koltayot swenta ma chʼay te stseʼelil yoʼtan manchukme jelon te skuxlejale? Jaʼ koltayot te la yakʼ yoʼtan-a te bintik mukʼ skʼoplal ta stojol te Diose.

Te kʼalal ay ta karsel-a te Juane la snaʼ stojol spisil te aʼtel yak ta spasel te Jesuse (Mat. 11:2; Luc. 7:18). Snaʼoj ta lek te jaʼ Mesías te Jesuse, pero laniwan sjojkʼoybey sba teme ya skʼotes ta pasel spisil te bintik tsʼibaybil jilel te ya spas te Mesiase. Jun ejemplo, jich bitʼil te ya x-och ta ajwalil, ¿oranaxbal ya xjajch ta wentainwanej? ¿Yabal xlokʼesot ta karsel yuʼun?  Te Juan la skʼan snaʼ ta lek te bintik ya xbajt spas te Jesús, jaʼ yuʼun la stikun chaʼtul jnopojeletik yuʼun swenta jich ya sjojkʼoybeyik: «¿Haʼat bal te machʼa talel yac, o ya to bal jmahliycotic yan?» (Luc. 7:19). Kʼalal sujtik tal, te Juan laniwan schʼam yaʼiy ta lek te bintik albot yaʼiy ta swenta te milagroetik la spas te Jesús sok te sujtib akʼbote: «Ya yiliquix qʼuinal tsʼoʼsitetic, ya xbeheniquix coxoʼetic, ya yichʼiquix lecubtesel jcʼaʼel-chameletic, ya yaʼiyiquix qʼuinal cohquetic, ya yichʼic cuxajtesel machʼatic chamenic soc yaquix ta halbeyel yaʼiyic te lec yachʼil cʼop te pobrehetique» (Luc. 7:20-22).

Ta melel te Juan, akʼbot bayal yip yoʼtan spisil te bin la yaʼiye. Te jaʼ ya yakʼ ta ilel te yak ta skʼotesel ta pasel Jesús te bin albil skʼoplal ya spas te Mesiase. Manchukme maba ya xlokʼesot ta karsel yuʼun te Jesuse, te Juan snaʼoj-a te maba tojolnax te aʼtel la spase. Manchukme yak ta kʼaxel swokol-a, bayal bin akʼbot stseʼelil yoʼtan yuʼun.

Teme jichnix ya jpastik bitʼil te Juan sok teme jaʼ ya xbajt ta koʼtantik te bintik mukʼ skʼoplal ta stojol Dios, ya xjuʼ kuʼuntik stsʼikel sok stseʼelil sok slamalil koʼtantik (Col. 1:9-10; 1:11, TNM). Skʼoponel te Biblia sok snopilanel ta koʼtantik ya skoltayotik, melel jaʼ ya sjultes ta koʼtantik te maba tojolnax te aʼtel ya jpastik ta stojol te Diose (1 Cor. 15:58). Te Sandra te la kalbeytikix skʼoplal, jich ya yal: «Skʼoponel jun kapitulo te Biblia jujun kʼajkʼal skoltayejon yuʼun ya xnoptsajonxan ta stojol te Jehová sok te jaʼ ay ta koʼtan spisil-ora te Diose, ma jaʼuk te joʼone». Jaʼnix jich ya xjuʼ ya kiltik te jayeb aʼtel yak ta pasel ta swenta te Wentainel yuʼun Diose. Teme jich ya jpastik, ma jaʼuknax ya xbajt ta koʼtantik bin yilel ay te jkuxlejaltike, jaʼ ya xbajt ta koʼtantik te bintik yak ta spasel te Jehovae. Te Sandra jich ya yalxan: «Ta swenta te programaetik ta jujun u te ya xlokʼ ta kanal JW Broadcasting^®, nopolxan ya kaʼiy jbatik ta stojol te organisasion sok ma xchʼay te stseʼelil koʼtantik ta j-asignasiontike».

Te Juan J-akʼ-ichʼ-jaʼ la «spajbey yoʼtan soc yip [...] te jʼalwanej Eliase» kʼalal la spas te yaʼtele. Jichnix bitʼil te Elías, te Juan wokol la yaʼiy spasel-euk te yaʼtel jich bitʼil te joʼotike (Luc. 1:17, XCD; Sant. 5:17). Teme ya kaltik wokol sok teme jaʼ ya xbajt ta koʼtantik te bintik mukʼ skʼoplal yuʼun Dios jich bitʼil la spas te Juan, jaʼnixme jich ma xchʼay te stseʼelil koʼtantik ta spasel te aʼtelil ta swenta te Wentainel yuʼun Dios chikan bin ya xkʼot ta pasel ta jtojoltik.