ARTIKULO YUʼUN ESTUDIO 33
«Te machʼatic ya yaʼiybat te acʼope» yame xkolik
«Tsahtaya aba soc tsahtaya te bin yac awacʼ ta nopele; oʼtantaya, como teme hich yac apase, hich ya xcolat a soc te machʼatic ya yaʼiybat te acʼope» (1 TIM. 4:16).
KʼAYOJIL 69 «Jpuktik ta alel te Wentainel»
¿BIN YA KILBEYTIK SKʼOPLAL? *
1. ¿Bin ya jkʼantik te yakuk spas te jfamiliatike?
JTUL ermana te Pauline * sbiile, jich ya yal: «Kʼalal la jnop te smelelil kʼope, la jkʼan te ya jokinlan spisil te jfamilia ta Nichimal Kʼinal. Te bin ya jkʼanxan-ae jaʼ te yakuk x-abatin ta stojol Jehová te jmamalal te Wayne sbiile sok te jchʼin kereme». Teme ay jfamiliatik te mato snaʼbeyik sba sok mato kʼux ta yoʼtanik te Diose, jichniwan ya kaʼiy jbatik te bitʼil ya yaʼiy sba te ermanae.
2. ¿Bin jojkʼoyeletik ya kakʼbeytik sujtib ta artikulo ini?
2 Ma xjuʼ ya jsujtik te jfamiliatik ta schʼuunel te smelelil kʼope. Pero ya xjuʼ ya jkoltaytik swenta ya schʼam yaʼiyik ta lek te skʼop Diose (2 Tim. 3:14, 15). ¿Bin yuʼun ya skʼan ya kalbeytik yaʼiyik te skʼop Dios te jfamiliatike? ¿Bin yuʼun ya skʼan ya xkʼot ta koʼtantik te bin yaʼiyel ya yaʼiy sbaike? ¿Bin ya xjuʼ ya jpastik swenta kʼux ya yaʼiy ta yoʼtanik te Jehová jich bitʼil kʼux ta koʼtantik te joʼotike? ¿Bin-utʼil ya xjuʼ ya skoltayotik te ermanoetik ta kongregasion?
¿BIN YUʼUN YA SKʼAN YA KALBEYTIK YAʼIYIK SKʼOP DIOS TE JFAMILIATIKE?
3. Jich bitʼil ya yal 2 Pedro 3:9, ¿bin yuʼun ya skʼan ya kalbeytik yaʼiyik skʼop Dios te jfamiliatike?
3 Te Jehová nopolix ya slajin te balumilal yuʼun te Satanase. Jaʼnax ya xkolik jilel te machʼatik jich yoʼtanik te ya xkuxinik ta sbajtʼelkʼinal (Hech. 13:48, TNM). Kʼalal ya jcholbeytik skʼop Dios te ants winiketik ta jlumaltik, ya kakʼ bayal jtiempotik sok kiptik, jaʼ yuʼun ya jkʼantik-euk te ya x-abatinik ta stojol Jehová te jfamiliatike. Te jTatik Jehová te kʼuxotik ta yoʼtan «ma scʼan te ay machʼa chʼayel ya xbaht, ha ya scʼan te yacuc suhtes yoʼtanic spisilic» (kʼopona 2 Pedro 3:9).
4. ¿Bin-a te ma skʼan ya jpastik te kʼalal ya jcholbeytik skʼop Dios te jfamiliatike?
4 Ya skʼan ya jnaʼtik te ay lek o ay ma lek te bitʼil ya jcholtik te skʼop Diose. Kʼalal ya jcholbeytik skʼop Dios te machʼatik ma jnaʼbeytik sbae yaniwan jtsajtaytik ta lek te bitʼil ya kalbeytik yaʼiyike, pero teme jaʼ te jfamiliatike ayniwan ma jtsajtaytik stukel te bitʼil ya jcholbeytik yaʼiyike.
5. ¿Bin ya skʼan ayuk ta koʼtantik kʼalal ya jcholbeytik skʼop Dios te jfamiliatike?
5 Kʼalal ya jultes ta koʼtantik te sbabial buelta la jcholbeytik skʼop Dios te jfamiliatike, yaniwan kaltik te ma lek te bitʼil la jpastike sok yaniwan jnoptik te juʼ kuʼuntik spaselxan ta leke. Te jpuk-kʼop Pablo la yakʼbey te jchʼuunjeletik te tojobtesel ini: «Machʼauc a te yax cʼopojex soque, lecuc me ya yaʼiyic te acʼopique. Ayuc me yutsil acʼopic te ya awalique. Naʼbeyaic me swentail te bitʼil ya scʼan ya asujtʼesbeyic scʼop te jujutule» (Col. 4:5; 4:6, El Nuevo Testamento en Tzeltal de Oxchuc). Ya skʼan ayuk ta koʼtantik te tojobtesel ini kʼalal ya xkʼopojotik sok te jfamiliatike. Teme ma jichuk ya jpastike, maniwan ya smulanikix yaʼiyel te smelelil kʼope.
¿BIN YA XJUʼ YA JPASTIK SWENTA YA JKOLTAYTIK TE JFAMILIATIKE?
Teme ya xkʼot ta koʼtantik te bin yaʼiyel ya yaʼiy sbaik sok lek jtaleltike, ya kakʼtikxan ta nopel-a te smelelil kʼope. (Ilawil te parrafo 6 kʼalal ta 8). *
6, 7. Ala jun ejemplo te ya yakʼ ta naʼel te mukʼ skʼoplal te ya xkʼot ta yoʼtan te j-abat yuʼun Dios te bin yaʼiyel ya yaʼiy sba te sjoy te ma Testigoe.
6 Kʼotuk ta koʼtantik te bin yaʼiyel ya yaʼiy sbaike. Te Pauline te la kalbeytik skʼoplal ta sjajchibale, jich ya yal: «Ta sjajchibal jaʼnax ya jkʼan ya kalbey skʼop Dios te jmamalale, maʼyuk yan bin ya kalbeytik skʼoplal-a». Pero te Wayne ma snaʼbey lek swentail te Biblia sok ma xkʼot ta yoʼtan te bin ya xcholbot yuʼun te yiname. Jich la yaʼiy te jaʼnax baem ta yoʼtan srelijion te Pauline. La sxiʼ teme och ta jun secta sok teme yak ta loʼlayel yuʼune.
7 Te Pauline ya yal te jaʼnax baem ta yoʼtan sjokinel te ermanoetik ta tibiltik sok ta slajibal semana, jich bitʼil ta tsoblejetik, ta scholel skʼop Dios sok yantikxan. Jich ya yal: «Ay baeltik te kʼalal ya xjul ta na te Wayne, maʼyuk machʼa xjul sta, stukel ya yaʼiy sba-a». Stalelnanix-a te ya snaʼ te yinam sok te snichʼane. Jaʼnix jich maba ya snaʼbey sba te ants winiketik te ya sjokinlan te yiname, jich yuʼun kaj snop te jaʼ bayalxan skʼoplal ta yoʼtan te yachʼil yamigotake. Jaʼ yuʼun la yal te ya yijkitay te yiname. ¿Labal yakʼ ta ilel te Pauline te ya xkʼot ta yoʼtan te bin yaʼiyel ya yaʼiy sba te smamalale?
8. Jich bitʼil ya yal 1 Pedro 3:1, 2, ¿bin ya staikxan ta ilel te jfamiliatike?
8 Kakʼtik ta ilel lekil ejemplo. Bayal buelta, te jfamiliatik jaʼ ya staikxan ta ilel te bintik ya jpastik ma jaʼuk te bin ya kaltike (kʼopona 1 Pedro 3:1, 2). Kʼalal kʼax bael te tiempoe, jich la sta ta ilel te Pauline. Jich ya yal: «Jnaʼoj te kʼuxotik ta yoʼtan te Wayne sok te manix ya skʼan ya yijkitayon-ae. Pero te bin la yale, la yakʼbon kil te ya skʼan ya kakʼ ta ilel lekil talelil jich bitʼil ya yal ta mantal te Jehovae. Ya skʼan ya kakʼbey yil lekil ejemplo ma jaʼuk te bayal ya xkʼopojone». Jaʼ yuʼun maba la sujix te smamalal ta yaʼiyel te bin ya yal te Bibliae, jaʼ kaj yalbey skʼoplal te bin yilel ya xkʼax yuʼunik te kʼajkʼale. Te Wayne la sta ta ilel te jelon stalel te yiname, te ayix slekil yoʼtan sok te lekxan kaj yakʼ ta ilel stalel te snichʼane (Prov. 31:18, 27, 28). Kʼalal la yil bitʼil yak ta aʼtel te Biblia ta skuxlejal te sfamiliae, la smulan yaʼiyel te skʼop Diose (1 Cor. 7:12-14, 16).
9. ¿Bin yuʼun ma skʼan ya xlujbotik?
9 Mame xlujbotik. Te Jehová ya yakʼ kiltik te ejemplo yuʼune. Bayal buelta ya yakʼbey snop te ants winiketik te lek yachʼil kʼop sok te yakuk staik te skuxlejalik ta sbajtelkʼinal (Jer. 44:4). Te jpuk-kʼop Pablo la yalbey te Timoteo te manchuk ya skom sba ta skoltayel te yantik swenta ya sta skolel soknix te machʼatik ya x-aʼiybot te skʼope (1 Tim. 4:16). Jich bitʼil kux ta koʼtantik te jfamiliatike, ya jkʼantik te yakuk snopik te smelelil kʼop ay ta Bibliae. Te bin la spas te Pauline sok te bin-utʼil kʼopoje, ay bin lek lokʼ yuʼun-a te sfamiliae. Ta ora ini tseʼel yoʼtan yak ta abatinel ta stojol te Jehová sok te smamalal, schebal ochemik ta prekursor sok jaʼ ansiano yuʼun kongregasion te Wayne.
10. ¿Bin yuʼun ya skʼan te ayuk slamalil koʼtantike?
10 Ayuk slamalil koʼtantik. Kʼalal ya xkaj jpas ta jkuxlejaltik te mantaliletik yuʼun te Diose, te jfamiliatik chajpniwan ya xkaj yilik te bin ya jchʼuuntik sok te bin yilel jkuxlejaltike. Jaʼniwan nail ya staik ta ilel te ma jokintikix ta spasel kʼinetik sok te ma jchʼikix jbatik ta politikae. Ta sjajchibal ayniwan ma lek ya yilik sok yaniwan yilintayotik (Mat. 10:35, 36). Pero ma skʼan ya jnoptik te jkʼaxel maʼyuk bin-ora ya sjeltay stalelik. Teme ya jkom jbatik ta skoltayel yuʼun ya xkʼot ta yoʼtanik te bintik jchʼuunejtike, jich kʼoem te yakotik ta yichʼel ta kʼop sok joʼotik yakotik ta yalel te ma snujpʼuk te ya sta te skuxlejalik ta sbajtelkʼinale. Pero te Jehová jaʼ yakʼbeyoj yaʼtel te Jesús ta Jchajpanwanej, ma joʼotikuk ay ta jwentatik (Juan 5:22). Teme lamal koʼtantik ta stojol te jfamiliatike, yaniwan xkaj smulanik yaʼiyel te skʼop Diose (ilawil te rekuadro « Jtuuntestik te pajina kuʼuntik ta Internet»).
11-13. ¿Bin ya jnoptik yuʼun te bin la spas te Alice ta stojol te smeʼ state?
11 Jamaluk ya xkʼopojotik pero sok slekil koʼtantik (Prov. 15:2). Kiltik te ejemplo yuʼun te Alice. La snop te smelelil kʼop kʼalal ma sjokinej ta kuxinel-a te smeʼ stat te ma schʼuunejik te ay Dios sok schʼikoj sbaik ta politika. Kʼot ta yoʼtan te ya skʼan ya scholbey yaʼiyik ta ora te bintik lek yak ta snopele. Jich ya yal te Alice: «Teme maba ya awalbey ta ora te afamilia te bintik yachʼil yakat ta snopel sok te bin ya apase, kʼaxtoxan ma smulanik-a». Jaʼ yuʼun la stsʼibaybey kartaetik te smeʼ state swenta ya sjojkʼoylanbey bin ya snopik ta swenta temaetik te ayik ta Biblia te yaniwan smulanike, jich bitʼil te kʼuxul oʼtanile (1 Cor. 13:1-13). La yalbey wokol te smeʼ stat yuʼun te chʼitesot sok kanantayot soknix ya yakʼbey smajtʼanik. Kʼalal ya xbajt yulaʼtay te smeʼ state ya spas tulan yuʼun ya skoltay ta aʼtel te smamae. Pero ta sjajchibal, maba lek la yaʼiyik te smeʼ stat te kʼalal la scholbey te bintik schʼuuneje.
12 Kʼalal ay sok-a te smeʼ state, maba la skom sba ta skʼoponel te Biblia ta jujun kʼajkʼal. Te Alice ya yal te bitʼil jich la spase, jaʼ akʼbot yil te smama te kʼax mukʼ skʼoplal ta yoʼtan te sKʼop Diose. Jaʼnix jich te spapae kaj snop jtebuk te bin ya yal te Biblia swenta ya xkʼot ta yoʼtan te bin yakal ta snopel te yantsil nichʼan sok yuʼun ya sle teme ay ma smeleliluk te bin ya yal te Bibliae. Te Alice ya yal: «La kakʼbey jun Biblia sok ay bin la jtsʼibaybey bael tey-a». ¿Bin kʼot ta pasel? Te spapae la yil te smelelil spisil te bin ya yal te Bibliae, chajpnax la yaʼiy-a te bin la skʼopone.
13 Jamal ya skʼan ya xkʼopojotik pero sok slekil koʼtantik manchukme ya jtatik prueba yuʼun (1 Cor. 4:12b). Jich bitʼil te Alice la stsʼik te tenel yuʼun te smamae, jich ya yal: «Kʼalal la kichʼ jaʼ, te jmama la yalbon te ma lekil alnichʼanone». ¿Bin la spas te Alice? Jich ya schol kaʼiytik: «Maba la jkom jba ta yalbeyel sok slekil koʼtan te jnopojix ta lek te ya x-ochon ta testigo yuʼun Jehová sok te maba ya jsut jkʼope. La jpas tulan ta yakʼbeyel yil te kʼux ta koʼtane. Jchebal okʼotik sok la jpasbey bujtsʼan weʼelil. Teyto-abi, te jmamae jajch ta kʼoel ta yoʼtan te jaʼ la slekubtesbonxan jtalel te Bibliae».
14. ¿Bin yuʼun ma skʼan ya kakʼ jbatik ta tsalel yuʼun te tenel ya yakʼ te jfamiliatike?
14 Maniwan ora ya xkʼot ta yoʼtan te jfamiliatik te tulan skʼoplal ta koʼtantik spasbeyel yaʼtel te Jehovae. Kʼalal te Alice och ta prekursora sok ma la stsak jun karrera te ya skʼan te smeʼ state, te smamae okʼ yan buelta. Pero te Alice ma la sjel te bin snopoj ya spase. Jich ya yal: «Teme ya apas te bin ya skʼanike, ya xjuʼ ya awichʼxan tenel yuʼun te afamiliae. Pero, kʼalal sok slekil awoʼtan ya acholbey skʼoplal ta lek te bin achʼuuneje, ya xjuʼ te ya schʼam yaʼiyik te akʼope». Jaʼ jich kʼot ta pasel ta stojol te Alice. Ta ora ini te smeʼ stat jaʼix prekursoretik sok jaʼ ansiano te spapae.
¿BIN-UTʼIL YA XJUʼ YA SKOLTAYOTIK TE ERMANOETIK TA KONGREGASION?
¿Bin-utʼil ya yichʼik koltayel yuʼun te ermanoetik ta kongregasion te jfamiliatik te maba Testigoike? (Ilawil te parrafo 15 sok 16). *
15. Jich bitʼil ya yal Mateo 5:14-16 sok 1 Pedro 2:12, ¿bin-utʼil ya xjuʼ ya xkoltayot te jfamiliatik te lekil aʼteliletik yuʼun te ermanoetike?
15 Te Jehová ya stuuntes te lekil aʼtelil ya spas te j-abatetik yuʼun swenta ya yikʼ tal ta stojol te ants winiketike (kʼopona Mateo 5:14-16; 1 Pedro 2:12). Teme maba Testigo te ajoye, ¿yabal snaʼbeyix sba te ermanoetik ta kongregasione? Te Pauline te la kalbeytik skʼoplal ta sjajchibale, la yikʼ ta sna ermanoetik swenta ya snaʼbey sba-a te Wayne. Te Wayne ya xjul ta yoʼtan te koltayot yuʼun jtul ermano swenta ya yil te bin-nix yilel stalelik-a te Testigoetike. Jich ya yal: «Te ermanoe la skʼan permiso ta yaʼtel swenta ya sjokinon ta yilel tajimal ta telebision. Jich la jta ta ilel te ma jaʼuknax baem ta yoʼtan srelijionik te Testigoetike».
16. ¿Bin yuʼun ya skʼan ya jpastik inbitar ta tsoblejetik te jfamiliatike?
16 Jun te bin-utʼil ya xjuʼ ya jkoltaytik te jfamiliatike, jaʼ te ya jpastik inbitar swenta ya sjokinotik ta tsoblejetik (1 Cor. 14:24, 25). Te sbabial buelta kʼot ta tsoblej te Wayne, jaʼ ta Snaʼojibal slajel te Jesús, melel la yichʼ pasel te kʼalal lajix yoʼtan ta aʼtel-ae sok maba jalaj te tsobleje. Jich ya schol: «Maba kʼot ta koʼtan spisil te bin la yichʼ alel tey-ae, pero jaʼ ma xchʼay ta koʼtan te slekil yoʼtan la yakʼik ta ilel ta jtojole. Noptsajik tal ta jtojol sok la spatbonik koʼtan. La jta ta ilel te yuʼun-nix lekil ants winiketik-ae». Kʼalal te Wayne la sta ta nopel te ya snop ta lek te bintik schʼuunej te Pauline, la skʼanbey jtul ermano ta kongregasion te yakuk x-akʼbot kurso yuʼun Biblia. Te ermano-abi sok te yinam jaʼik te machʼatik la skoltayik te Pauline sok te schʼin kerem ta tsoblejetik sok ta scholel skʼop Dios.
17. 1) ¿Bin-a te ma skʼan ya jnoptik te jaʼ jmultike? 2) ¿Bin yuʼun maʼyuk bin-ora ya skʼan ya jkom jbatik ta skoltayel te jfamiliatike?
17 Ya jkʼantik te ayuk bin-ora spisil te jfamiliatik ya x-abatinik ta stojol te Jehová. Pero manchukme ya jpastik tulan ta skoltayel te jfamiliatike, maniwan ayuk bin-ora ya x-ochik ta j-abat yuʼun Dios. Teme ay jich ya xkʼot ta jtojoltike, mame jnoptik te jaʼ jmultik teme ma skʼan ya x-ochik ta j-abat yuʼun Diose. Melel maʼyuk machʼa ya xjuʼ ya jsujtik ta schʼuunel te bintik jchʼuunejtike. Pero mame xchʼay ta koʼtantik te ya xjuʼ ya xkoltayotik kʼalal ya yilik te yakotik ta abatinel sok stseʼelil koʼtantik ta stojol te Jehovae. Jkʼopontik Dios ta stojolik, sokuk slekil koʼtantik ya kalbeytik yaʼiyik te smelelil kʼope sok mame jkom jbatik ta skoltayel (Hech. 20:20). Akʼa smukʼulin koʼtantik te Jehová te ya yakʼbey bendision te bintik ya jpastike. Teme ya schʼam yaʼiyik te bintik ya kalbeytik te jfamiliatike, yame sta skolelik yuʼun.
KʼAYOJIL 57 Ya jcholbeytik skʼop Dios spisil ants winiketik
^ parr. 5 Jaʼ ya jkʼantik te ya snaʼbeyik sba Jehová te jfamiliatike, pero jaʼiknix ya snopik teme ya x-abatinik ta stojol Jehová o teme maʼuke. Ta artikulo ini, ya kiltik bin ya xjuʼ ya jpastik swenta ya schʼam yaʼiyik te bin ya kalbeytik te jfamiliatike.
^ parr. 1 Ay yichʼoj jelel te biililetike.
^ parr. 53 TE BIN YA XCHIKNAJ TA FOTO: Jtul jchʼiel ermano yak ta skoltayel spapa te maba Testigo ta spasel te skarroe. Kʼalal ya xjuʼ ta pasel ya yile, ya yakʼbey yil jun bideo yuʼun te pajina jw.org®.
^ parr. 55 TE BIN YA XCHIKNAJ TA FOTO: Jtul ermana ya schʼam yaʼiy te bin ya yal te smamalal te maba Testigo kʼalal yak ta yalel bin yilel kʼax yuʼun te kʼajkʼale. Ta patil ya sjokin jtsʼinuk te smamalal sok te yale.
^ parr. 57 TE BIN YA XCHIKNAJ TA FOTO: Te ermana la yikʼ ta sna te ermanoetik ta kongregasion. Te ermanoetik ya snaʼbeyikxan sba ta lek te smamalal te ermanae. Ta patil, te smamalal te ermana kʼot ta Snaʼojibal slajel te Jesús.
