1. ¿Bin yuʼun kʼax tulan skʼoplal te ichʼ-jaʼe? (Ilawil te lokʼomba ta sjajchibal te articulo).

JUJUN jaʼbil bayal ta mil te machʼatik yakik ta nojptesel ta Biblia ya yichʼik jaʼ. Bayal ta tul jaʼ achʼix keremetik sok alaletik. Laniwan yichʼik chʼitesel yuʼun meʼil tatiletik te schʼuunejik Jehová. Jaxan te jaʼate, ¿labal awichʼix jaʼ? Kʼax lek teme jich la apasixe. Te ichʼ-jaʼ jaʼme jchajp bin ya skʼan ya spas spisil te j-abatetik yuʼun Dios sok mero tulan skʼoplal yuʼun ya xkolotik-a (Mateo 28:19, 20; 1 Pedro 3:21).

2. ¿Bin yuʼun ma skʼan ya axiʼ te ya awakʼ aba ta stojol te Jehová?

² Ta swenta te ichʼ-jaʼe bayal bendision ya jtatik, jaʼukmeto jaʼnix jich ay yaʼtelul. ¿Bin yuʼun? Melel te kʼalal la awichʼ jaʼe, jich la awichʼ jojkʼoybeyel: «Ta swenta te schʼuunel awoʼtan yuʼun te la yakʼ sba ta lajel te Jesuse, ¿labal asujtesix awoʼtan ta swenta te amule sok labal awakʼix aba ta stojol Jehová yuʼun jich ya apasbey te skʼanojel yoʼtane?» te jaʼate, laj xchiat ta sutel. Te kʼalal la awichʼ jaʼe la awakʼ ta ilel te la awakʼ aba ta stojol te Jehovae, te jaʼ ya skʼan ya yal te la  awalbey ta jamal te kʼux ya awaʼiy ta awoʼtan sok te jaʼ tulanxan skʼoplal ya xkʼot ta akuxlejal spasel te skʼanojel yoʼtane. ¿Yabal skʼan ya asut akʼop ta swenta te la awakʼ aba ta stojol te Jehovae? Maʼuk, melel maʼyuk bin-ora ma lekuk skʼoplal te ya kakʼ jbatik ta stojol te Diose. Sok teme maba ya awakʼ aba ta abatinel ta stojol te Diose, jaʼme ya x-ayinat ta skʼab te Satanás te jkʼaxel ma skʼan te ya ata akolele. Jaʼ yoʼtanuk te ya awakʼ aba ta stojol sok te ya apʼaj te Wentainel yuʼun te Jehová te jich ya xchʼay awuʼun te kuxlejalil ta sbajtʼelkʼinal.

3. ¿Bin bendisionetik ataoj ta swenta te la awakʼ akuxlejal ta stojol te Jehová?

³ Nopa awaʼiy te bendisionetik ataoj ta swenta te la awakʼ aba ta stojol te Jehová sok te la awichʼ jaʼe. Jich bitʼil awakʼojix aba ta stojol Jehová, ya xjuʼ te jich ya awal ta jamal: «Sjoquinejon te Jehová; ma xiwon. ¿Bin ya xhuʼ ya spasbon te winique?» (Salmo 118:6). Maʼyuk yan majtʼanil te ya spaj te jaʼ ayotik sok te Dios soknix te lek ya yilotike.

4, 5. 1) ¿Bin yuʼun ya kaltik te jujuntul ay ta jtojoltik te ya kakʼ jbatik ta stojol te Jehová? 2) Chikan jayeb kaʼbilaltik, ¿bin ya jtatik jpisiltik te j-abatotik yuʼun Dios?

⁴ Teme awichʼojix jaʼ, yame skʼan te jaʼatnix ya apas tulan ta yamigoinel te Jehová, mame xa anop te jich kʼoem bitʼil te kʼinal ya yakʼbat jilel te ameʼ atate. Manchukme ayat-to ta sna te ameʼ atate, jaʼatnixme ay ta atojol sleel te akolele, mame jaʼuk te ameʼ atate. ¿Bin yuʼun kʼax tulan skʼoplal te ayuk ta awoʼtan spisil-orae? Melel, ma xa anaʼ bin wokoliletik ya asitintay ta pajel chaʼbej. Jich bitʼil, laniwan awichʼ jaʼ te kʼalal tutat-to-ae, pero teme jchʼiel achʼix kerematixe, yan-niwan bin ya awaʼiyix ta awoʼtan sok te tenel ya xkʼot ta atojole. Jtul achʼix jich la schol: «Te kʼalal tutotikto-ae maniwan jkʼextik te ya kichʼtik naʼbeyel jbatik bitʼil testigo yuʼun Jehová kʼalal ma jweʼtik pastel ta jun cumpleaño ta eskuela. Pero kʼalal ya xkʼax bael te jaʼbile sok tulan ya awaʼiy te ya akom aba yuʼun awoʼtanuk ay machʼa ya ajokin ta wayele, ya skʼan te achʼuunej sok spisil awoʼtan te jaʼ lekxan te schʼuunel te leyetik yuʼun te Diose».

⁵ Ta melel, ma jaʼuknax te achʼix keremetik yachʼil bin ya xjajch sitintayik ta skuxlejalik. Jaʼnix jich te machʼatik mukʼikix te ya yichʼik jaʼe, ya yichʼ tsajel te schʼuunel yoʼtanik te ma snaʼojik te jich ya xkʼot ta stojolike. Jaʼniwan ta nujpunel yuʼunik, ta skaj chamel o ta yaʼtelik. Ta melel, chikan jayeb kaʼbilaltik jpisiltik ya yichʼ tsajel te bitʼil jun koʼtantik ta stojol te Jehovae (Santiago 1:12-14).

6. 1) ¿Bin ya skʼan ya yal te maʼyuk bin ya akʼanbey sujtel te Jehová yuʼun te la awakʼ aba ta stojole? 2) ¿Bin ya yakʼbat anop Filipenses 4:11, 12 sok Isaías 12:2?

⁶ Ya xjuʼ ya skoltayat te jun awoʼtan ta stojol Jehová ta spisil-ora teme ya anaʼulan te maʼyuk bin ya akʼanbey sujtel yuʼun te la awakʼ aba ta stojole. Te bin ya skʼan ya yale jaʼ te awalbeyoj ta jamal te Ajwalil yuʼun spisil bin pastiklanbil te maʼyuk bin-ora ya awijkʼitay aba ta abatinel ta stojol chikan bin ya xkʼot ta pasel, manchukme ya yijkʼitayik Jehová te ameʼ atate (Salmo 27:10). Chikan bin ya xkʼot ta pasel, yame xjuʼ ya akʼanbey te yakuk yakʼbat awip te Jehová yuʼun ya akʼotes ta pasel te bitʼil awakʼoj akuxlejal ta stojole (kʼopona te sjun Filipenses 4:11-12 sok Isaías:12:2).

7. ¿Bin ya skʼan ya yal te ya awaʼtelin stael akolel ta swenta xiwel sok nijkʼel?

⁷ Te Jehová ya skʼan te ya awamigoine. Jaʼukmeto, swenta spisil-ora ya awamigoin sok ya awaʼtelin stael te akolele yame skʼan te ya apas tulan. Te Filipenses 2:12 jich ya yal: «Ayuc me scʼoplal ta awoʼtanic te acolelique. Xiwanic me, soc nijcʼuc me awoʼtanic». Te bin ya skʼan ya yal te versiculo-abi jaʼ te ya anop ta lek bin ya apas yuʼun ya akanantay te bitʼil awamigoinej aba sok te Jehová sok te jun awoʼtan ya awakʼ aba ta stojol manchukme ay  awokol. Mame jichuk ya awal te juʼemix awuʼune. Naʼame te ay machʼatik chʼayik manchukme bayal jaʼbil jun yoʼtan abatinik ta stojol te Jehová. Jich yuʼun, ¿bin ya skoltayat yuʼun ya awaʼtelin stael te akolele?

8. 1) ¿Bin smakoj te snopel ta jtukeltik te Bibliae? 2) ¿Bin yuʼun kʼax tulan skʼoplal?

⁸ Swenta ya xjuʼ ya kamigointik te Jehová yame skʼan te ya jchʼam kaʼiytik sok te ya jkʼopontik. Te bin-utʼil ya jchʼam kaʼiytik ta lek te bin ya yalbotike jaʼ te kʼalal ya jnoptik te Biblia ta jtukeltike. Jaʼ-abi smakoj skʼoponel te sJun Dios sok te junetik lokʼemik ta Biblia soknix te ya jnopilan ta koʼtantik. Te skʼoponel te Biblia ma jaʼuknax yuʼun ay bin ya xjil ta joltik jich bitʼil kʼalal ya jchajpan jbatik yuʼun ya jpastik examen ta eskuela. Jaʼme jich kʼoem te ay banti ya xbootik, te ay bin ya xjuʼ jle kiltik sok te ay bin yachʼil ya jnoptik ta stojol Jehová. Teme jich ya apase, yame xnoptsajatxan ta stojol, jaʼnix jich te Dios ya xnoptsajxan ta atojol-euk (Santiago 4:8).

9. ¿Bintik skoltayejat ta snopel te Biblia ta atukel?

⁹ Te organisasion yuʼun Jehová bayal koltayel yakʼojbotik yuʼun chajpanbiluk ta lek bitʼil ya jnoptik te Bibliae. Kiltik chaʼoxchajp bin ya xjuʼ ya ata ta pajina jw.org. Ta seccion «Jóvenes» ya ata te «Actividades para estudiar la Biblia» te ya xjuʼ ya skoltayat yuʼun ay bin ya anop ta swenta te bintik kʼoem ta pasel ta namey te ya yalbey skʼoplal te Bibliae. Teynix ta seccion ya ata te «¿Qué enseña realmente la Biblia?» te ya skoltayat yuʼun ya yichʼxan yip te schʼuunel awoʼtan sok ya anaʼ scholel ta lek te bintik achʼuuneje. Jaʼnix jich ta revista ¡Despertad! yuʼun abril 2009 yame ata bintik yan ya xjuʼ ya apas yuʼun ya anop ta atukel te sKʼop Dios ta articulo «Los jóvenes preguntan. ¿Cómo disfrutar la lectura de la Biblia?». Te snopel te Biblia sok snaʼulanel ta koʼtantik kʼax tulan skʼoplal ta yaʼtelinel stael te akolele (kʼopona te sjun Salmo 119:105).

10. ¿Bin yuʼun kʼax tulan skʼoplal te ya skʼopon Dios te machʼa yichʼojix jaʼe?

¹⁰ La jnoptikix te ya jchʼam kaʼiytik te Jehová kʼalal ya jnoptik te Biblia. Pero teme ya jkʼan ya xkʼopojotik soke yame skʼan te ya jpastik orasione. Te j-abatotik yuʼun Dios ma skʼan te yanax jkʼopontik yuʼun jich kʼayemotik ta spasel o yuʼun-nax ya jkʼantik te ay bin lek ya xkʼot ta lokʼel kuʼuntike. Te skʼoponel Dios jaʼ te bitʼil ya xjuʼ ya jkʼopontik te Jpaswaneje.  Te Jehová yoʼtan ya yaʼiybat te akʼope (kʼopona te sjun Filipenses 4:6). Kʼalal ay bin ya amel awoʼtan yuʼun, juluk ta awoʼtan te jich ya yalbat te Biblia: «Aʼbeya Jehová te bin ay awocol yuʼun» (Salmo 55:22). ¿Yabal achʼuun ta melel te ya xjuʼ ya skoltayate? Bayal miyon ta tul hermanoetik ya xjuʼ ya yalbat ta jamal te koltaybilik yuʼun te skʼoponel Diose. Jaʼnixme jich ya xjuʼ ya skoltayat te jaʼate.

11. ¿Bin yuʼun ya skʼan te spisiluk-ora ya awalbey wokol te Jehová?

¹¹ Yame skʼan te spisiluk-ora ya jkʼopontik te Jehová, mame jaʼuknax te kʼalal ya jkʼantik te ya skoltayotik. Te Biblia jich ya yal: «Naʼahic me yalel wocol» (Colosenses 3:15). Ayniwan te jkʼaxel ya jmel koʼtantik yuʼun te jwokoltik te ya xchʼay ta koʼtantik te bendisionetik kichʼojtike. ¿Jaxan teme jich ya apas te jujun kʼajkʼal ya awalbey wokol te Jehová yuʼun oxchajp o bayalxan bendisionetik ya yakʼbate? Te Abigail jchʼiel achʼix te 12 yaʼbilal-a te la yichʼ jaʼ, jich ya yal: «Kʼoem ta koʼtan te maʼyuk yan machʼa ta chʼulchan sok ta balumilal te snujpʼxan te ya kalbeytik wokol jich bitʼil te Jehová. Spisil-ora ya skʼan ya kalbeytik wokol yuʼun te bin yakʼojbotike. Ya jmulan snaʼulanel te bin la kaʼiy jun buelta: “Jnop kaʼiytik te kʼalal ya xjajchotik ta wayel te jaʼnax ay kuʼuntik te bin la kalbeytik wokol yuʼun te Jehová te wojeye. ¿Bintiknax ya x-ayin kuʼuntik-abi?”». *

12, 13. ¿Bin yuʼun tulan skʼoplal te ya anop ta awoʼtan bin-utʼil awiloj ta akuxlejal te lek yoʼtan te Jehovae?

¹² Te Jehová la skoltay te ajwalil David ta sitintayel tulan wokoliletik. Jaʼ yuʼun ta swenta te bin kʼax ta stojole, jich la yal: «Pasahic prueba, ilawilic te ha lec yoʼtan te Jehová. ¡Bayel yutsil te machʼa ya smucʼulin yoʼtan!» (Salmo 34:8). Te versiculo-abi ya yakʼ ta naʼel te tulan skʼoplal te jaʼatnix ya awil ta akuxlejal te lek yoʼtan te Jehová. Kʼalal ya akʼopon te Biblia sok te junetik lokʼemik tey-ae, sok te kʼalal ya xbaat ta tsoblejetik, yame awaʼiybey skʼoplal ants winiketik te koltaybilik yuʼun Dios te jun yoʼtanik ta stojol te ya yakʼbat yip awoʼtane. Jaʼukmeto te kʼalal ya stsakxan yip te schʼuunel awoʼtane, yame skʼan te ya awil bael te koltayel yuʼun Jehová ta akuxlejale. ¿Bin-utʼil awiloj ta akuxlejal te lek yoʼtan te Jehovae?

¹³ Te j-abatotik yuʼun Dios ay jchajp bitʼil kilojtik ta jkuxlejaltik te lek yoʼtan te Jehová. Jaʼ la yikʼotik te ya xnoptsajotik ta stojol sok ta stojol te sNichʼane. Te Jesús la yal: «Mayuc machʼa ya xhuʼ ya xtal ta jtojol teme ma ba icʼbil tal yuʼun te Jtat te la sticonon tale» (Juan 6:44). ¿Achʼuunejbal te jaʼ ikʼbilat tal yuʼun te Jehovae? Ayniwan jtul achʼix kerem te jich ya snope: «Te Jehová jaʼ la yikʼ talel te jmeʼ jtate, te joʼone jaʼnax jtʼunoj te bin ya spasike». Pero te kʼalal la awakʼ aba ta stojol Jehová sok te la awichʼ jaʼe, la awakʼ ta ilel te tulan skʼoplal awuʼun te awamigoinej aba soke. Ta ora ini, ya snaʼbatix aba ta melel. Te Biblia jich ya yalbotik ta jamal: «Te machʼa cʼux ya yaʼiy ta yoʼtan te Diose, naʼbibil sba yuʼun stuquel» (1 Corintios 8:3). Pasa tulan te mukʼuk skʼoplal awuʼun te bitʼil ayat ta organisasion yuʼun te Jehová.

14, 15. ¿Bin yuʼun ya xjuʼ ya yakʼbey yip schʼuunel awoʼtan te scholel skʼop Diose?

¹⁴ Jaʼnix jich ya ata ta ilel ta akuxlejal te lek yoʼtan te Jehová kʼalal ya awil bin-utʼil ya skoltayat ta yakʼel ta ilel te schʼuunel awoʼtan te kʼalal ya xlokʼat ta scholel skʼop Dios sok te kʼalal ayat ta eskuela. Ay machʼatik wokol ya yaʼiyik scholbeyel skʼop Dios te sjoʼtakik ta nop jun ta skaj te ma snaʼik bin ya x-albotik yuʼunike. Ayniwan jich awaʼiyoj aba. Jaʼniwan tulanxan ya awaʼiy teme ya xkʼopojat ta stojol  tsobol ajoʼtak. Jaʼukmeto, ¿bin ya xjuʼ ya skoltayat?

¹⁵ Nopa awaʼiy nailuk bin yuʼun ya awal te smelelil te bintik achʼuuneje. Ta jw.org ay bayal koltayel te lokʼem ta bayal ta chajp kʼopil te ya xjuʼ ya skoltayat ta snopel bin achʼuunej, bin yuʼun te jich achʼuuneje sok bin-utʼil ya xjuʼ ya acholbey yaʼiy yantik. ¿Jaxan teme ya alokʼes atiempo ta sleele? Teme kʼoem ta awoʼtan te jaʼ smelelil te bintik achʼuuneje sok teme lek ya achajpan abae, awoʼtanuk ya akʼan ya awalbey skʼoplal te Jehová (Jeremías 20:8, 9).

16. ¿Bin ya xjuʼ ya apas yuʼun maba ya axiʼ yalbeyel skʼoplal yantik te bintik achʼuuneje?

¹⁶ Jaʼukmeto, manchukme ya achajpan aba ta lek jichniwan te yato xiwat ta yalbeyel skʼoplal te bin achʼuuneje. Jtul chʼiel achʼix te 18 yaʼbilal ta ora ini, te 13 yaʼbilal-a te la yichʼ jaʼ, jich la yal ta jamal: «Ya jnaʼ te bin jchʼuuneje, pero ay wokol ya kaʼiy te ya kalbey te yantike». ¿Bin ya spasix-abi? Ya laj spas tulan yuʼun jichnix ya xkʼopoj bitʼil kʼayeme. Jich ya yal: «Te joʼtak ta nop jun ma skom sbaik ta yalel te bin ya skʼanike. ¿Mabal jichuknix ya skʼan ya jpas te joʼone? Jaʼ yuʼun kʼalal ay bin yakon ta yalbeyel yaʼiyik jich ya kalbey: “Te yan kʼajkʼal yakon ta nojpteswanej ta Biblia sok...”. Ta patil ya kalbeyxan yaʼiyik te bin yakon ta yalel-ae. Manchukme maba jaʼ yakotik ta yalbeyel skʼoplal te Biblia, ay machʼatik ya smulanik te bin ya kal sok ay ya sjojkʼoybonik bin ya jpas kʼalal ya kakʼ nojptesel ta Biblia. Te kʼalal jich ya jpasxane, jaʼ kʼunxan ya kaʼiy te ya xkʼopojon sok te joʼtak ta nop june. Kʼax lek ya kaʼiy jba kʼalal ya kalbey skʼoplal te smelelil kʼope».

17. ¿Bin yuʼun ma skʼan te ya xiwotik ta yalbeyel skʼoplal te bin jchʼuunejtike?

¹⁷ Teme ya awichʼ ta mukʼ te yantik sok ay skʼoplal awuʼun, jichniwan ya awichʼ ilel-euk. Ilawil bin ya snop-a te Olivia te 17 yaʼbilal, te la yichʼ jaʼ kʼalal tut-to-ae: «Spisil-ora jxiʼoj te ya yalik te yantik te jaʼnax baem ta koʼtan relijion teme ya kalbey skʼoplal te Biblia kʼalal yakotik ta kʼop». Pero ta patil jajch ta jelonel te bin ya snop. Ma jaʼuk bajtʼix ta yoʼtan te bin ya sxiʼe, jich la snop: «Bayal achʼix keremetik maʼyuk bin ya snaʼik ta stojol te testigoetik yuʼun Jehová, ma snaʼbeyik sba yan Testigoetik, joʼotiknax. Jaʼ yuʼun, ta swenta te bin yilel jtaleltik yaniwan smulanik o maʼuk te bin ya jcholbeytike. Teme jkʼaxel ya xkʼexawotik ta kʼop te maba ya kalbeytik yaʼiyik te bin jchʼuunejtik o sok xiwel ya kalbeytik, yaniwan skuyik te ya jkʼextik te Testigootike. Maniwan skʼanik snopel te bin jchʼuunejtik ta skaj te ya xiwotike. Yan stukel teme ya kakʼbeytik yilik te jchʼuunejtik te jaʼ smelelil te bin jnopojtik sok ya jcholbeytik yaʼiyik te bitʼilnix ya xkʼopojotike, jichniwan ya yichʼotikxan ta mukʼ-a».

18. ¿Bin ya skʼan ya apas yuʼun ya awaʼtelin stael te akolele?

¹⁸ La jnoptikix te kʼax tulan skʼoplal te jaʼatnix ya awaʼtelin stael te akolele. Swenta ya xjuʼ ya apas, ya skʼan te ya akʼopon te Biblia sok ya anopilan ta awoʼtan, te ya akʼopon te Diose sok te ya anaʼulan te bendisionetik yakʼojbate. Spisil-abi yame skoltayat yuʼun schʼuunej ta lek awoʼtan te awamigoinej te Jehovae. Jichme ya stijbat awoʼtan ta yalbeyel skʼoplal te bintik achʼuuneje (kʼopona te sjun Salmo 73:28).

19. ¿Bin yuʼun ya skʼan ya jpastik tulan ta stael te kolele?

¹⁹ Te Jesús jich la yal: «Teme ay machʼa ya scʼan ya stʼunon, acʼa sloqʼues sba ta yoʼtan, acʼa sqʼuech bahel scruz [«steʼ», TNM] soc acʼa stʼunon» (Mateo 16:24). Swenta ya jtʼuntik te Jesuse yame skʼan ya kakʼ jbatik ta stojol te Jehová sok te ya kichʼtik jaʼe. Bayalme bendisionetik ya xjuʼ ya kichʼtik yuʼun sok ya xjuʼ ya jtatik te kuxlejalil ta sbajtʼelkʼinal ta achʼ balumilal te yaloj ta jamal te ya yakʼbotik te Diose. Jich yuʼun, pasame bantito kʼalal ya xjuʼ awuʼun ta yaʼtelinel stael te akolele.