¿Akʼoponojbal ta lek te articuloetik yuʼun Te J-ilkʼinal ta toyol te mato jaluk slokʼelike? Ilawil teme ya xjuʼ ya awakʼbey sujtib te jojkʼoyeletik ini:

¿Bin yuʼun te meʼil tatiletik te talemik ta yan nasion ya skʼan ya yichʼik ta wenta bin kʼopil ya xkʼopojik te yal snichʼnabik yuʼun ya skoltayik ta stael yip te schʼuunel yoʼtanik?

Te alnichʼanetik yaniwan snopik te kʼopil ta lugar banti yakik ta nainel kʼalal ya xbajtʼik ta eskuela o te kʼalal ya sjokinik yantik ants winiketik. Teme ya snaʼik cheʼoxeb kʼopil, bayal bin lek ya staik yuʼun. Te meʼil tatiletik ya skʼan ya staik ta nopel teme ya xbajtʼik ta jun kongregasion ta kʼopil yuʼun te lugare o ta kongregasion ta skʼopiknixe. Ya skʼan ya yilik ta lek bin kʼopil ya xkʼotxan ta yoʼtan te yal snichʼnabik yuʼun ya snopik te smelelil kʼope sok banti ya stsakxan yip te schʼuunel yoʼtanike. Te meʼil tatiletik te schʼuunejik Dios ya skʼan te jaʼ nail ya yakʼik te bin ya xtuun yuʼun te yal snichʼnabik, ma jaʼuk te bin ya skʼanik stukelike (w17.05, pajina 10 kʼalal ta 12).

Te Jesús la sjojkʼoybey te Pedro: «¿Cʼax bal hich cʼuxon ta awoʼtan a te bin utʼil te yantic ini?». ¿Bin-a «te yantic ini» te la yale? (Juan 21:15)

Jich yilel te jaʼ yak ta yalbeyel skʼoplal te chayetik la stsakike o jaʼniwan te yaʼtel ta jtsakchay. Te kʼalal laj te Jesús chaʼaʼtej ta stsakel chay te Pedroe. Te j-abatetik yuʼun Dios ya skʼan ya yilik teme ma jaʼuknax baem yoʼtanik ta aʼtel (w17.05, pajina 21 kʼalal ta 23).

¿Bin la spas te Elias Hutter yuʼun ya skoltay ta lek te machʼatik la yakʼbey snop hebreo kʼop?

Te Hutter yoʼtanuk te ya snopik yilel ta lek te machʼatik la spʼijubtes banti ay yisim te jpʼal kʼop ta hebreo sok te ya snaʼik yilel banti ay te prefijo sok te sufijo. La spas imprimir ta ijkʼ te jujun jpʼal yisim te kʼope, yan stukel te prefijo sok te sufijo ma la sbontiklan ta ijkʼ. Te notaetik te ay ta yeʼtal te pajinaetik yuʼun te Traducción del Nuevo Mundo de las Santas Escrituras (con referencias) jteb ma pajaluk sok te bitʼil la spas te Hutter (wp17.2, pajina 11 sok 12).

¿Bin ya skʼan ya yichʼ ta wenta jtul j-abat yuʼun Dios teme ya skʼan ay stujkʼ yuʼun ya skoltay sba ta stojol yantike?

Te Jehová chʼultesbil ya yil te skuxlejal te ants winiketike. Te Jesús la yalbey te jnopojeletik yuʼun te akʼa sle yespadaik, jaʼukmeto ma yuʼunuk ya skoltay sbaik sok-a (Lucas 22:36, 38). Te j-abatetik yuʼun Dios «ya scʼatpʼunic ta azadonetic te espadahetic yuʼunic». Te skuxlejal te ants winiketike jaʼ bayalxan skʼoplal te bitʼil te biluketike. Ya skʼan ya kichʼtik ta mukʼ te bin ya yal yoʼtan te yantike sok te ya jpastik tulan yuʼun ejemplo ya xkʼootik ta stojolik (2 Corintios 4:2) (w17.07, pajina 31 sok 32).

¿Bin yuʼun ma pajaluk te bin ya yal te sjun Mateo sok te sjun Lucas ta swenta te Jesús te kʼalal tut-to-ae?

Te sjun Mateo jaʼ ya yalxan te bintik kʼot ta pasel ta stojol te José. Ya schol kaʼiytik bin la snop kʼalal la yaʼiy stojol te swoloj yal te María sok bin la spas kʼalal jtul chʼul-abat la yalbey te akʼa anuk bael ta Egipto sok ta patil te akʼa sujtuk talele. Yan stukel te sjun Lucas jaʼ ya yalxan te bintik kʼot ta pasel ta stojol te María. Ya yal bin kʼot ta pasel kʼalal bajtʼ yil te Elisabet sok bin la yal kʼalal jil ta templo te Jesús (w17.08, pajina 32).

¿Bin wokoliletik kʼaxem ta stojol te Bibliae?

Te kʼopetik la yichʼ tuuntesel kʼalal la yichʼ tsʼibayel te Biblia jelon ta patil te bin ya skʼan ya yale. Jaʼnix jich ta skaj te ay bintik jelon ta nasionetik, jelon skʼop-euk te ants winiketike. Sok yichʼoj kontrainel yuʼun ya yichʼ kʼasesel ta yan kʼopiletik (w17.09, pajina 19 kʼalal ta 21).

¿Bin-utʼil ya yichʼ akʼel ta ilel ta tsʼakal te kʼuxul oʼtanile?

Jaʼ te kʼalal lokʼem skʼoplal ta swenta te bintik smelelil ya xtojobteswan te ayik ta Biblia. Te kʼuxul oʼtanil te agápe ya yichʼ alel ta griego kʼop jaʼ te bitʼil tsʼakal ya yichʼ akʼel ta ilel te kʼuxul oʼtanile. Te kʼuxul oʼtanil ini ma jaʼuknax ya kaʼiy ta koʼtantik, jaʼ ya xchiknajxan ta ilel-a kʼalal ay bin ya jpastik ta stojol yantik te maʼyuk bin ya jmaliytik sujtel yuʼune (w17.10, pajina 7).