Ta 2 Corintios 12:2, 3 te Pablo la yalbey skʼoplal jtul winik «te icʼot mohel cʼalal ta yoxcajal chʼulchan». ¿Machʼa-a? Ta karta ini te la stsʼibay ta stojol te kongregasion yuʼun Corinto, la yakʼ ta naʼel ta jamal te akʼbil yaʼtel yuʼun Dios ta jpuk-kʼop (2 Cor. 11:5, 23). Tey la yalbey skʼoplal «nahalsitiletic soc te bintic la yacʼ ta naʼel te Cajwaltique». Te kʼalal jaʼ kʼopoj yuʼun maba la sta ta alel yantik ermanoetik. Jich yuʼun snujpʼ te ya kaltik te jaʼnix te Pablo te winik te akʼbot yil najalsitiletik sok te ay bintik akʼbot snaʼ (2 Cor. 12:1, 5).

Jaʼ yuʼun te winik «te icʼot mohel» ta «yoxcajal chʼulchan» sok ta «paraíso» jaʼ te Pablo (2 Cor. 12:2-4). Kʼalal te Pablo la yal «ya calbe scʼoblal [...] te bintic la yacʼ ta naʼel te Cajwaltique» ya yakʼ ta ilel te akʼbot snaʼ bin ya xkʼot ta pasel ta pajel chaʼbej.

¿Bin-a te «yoxcajal chʼulchan» te la yil te Pablo?

Ta Biblia te kʼopil chʼulchan bayal bin ya xjuʼ ya skʼan ya yal. Ay jaʼ ya yalbey skʼoplal te mero yaxal chʼulchan (Gén. 11:4; 27:28; Apoc. 19:17). Ay jaʼ ya yalbey skʼoplal te ajwaliletik ta balumilal (Dan. 4:20-22). Jaʼnix jich ay jaʼ ya yalbey skʼoplal te yaʼtel Jehová ta mantalteswanej, jich bitʼil ta swenta te Wentainel yuʼun te Diose (Apoc. 21:1).

Jich yuʼun, ¿bin yak ta yalbeyel skʼoplal-a te Pablo kʼalal la stuuntes te kʼopil «yoxcajal chʼulchan»? Te Biblia ay oxebto buelta ya yal jpʼal kʼopil yuʼun ya yakʼ ta ilel te kʼax tulan skʼoplal o te ma biluk bin-nax-a (Is. 6:3; Ezeq. 21:27; Apoc. 4:8). Jich yilel te kʼalal te Pablo la yalbey skʼoplal te «yoxcajal chʼulchan» yak ta yakʼel ta naʼel te ay jun wentainel te jkʼaxel lekxan ta stojol te yantike, jaʼ te Wentainel yuʼun Dios te ay ta skʼab te Jesucristo sok te 144,000 te tsabilik te ya sjokinik ta mantalteswanej (ilawil te libro Perspicacia para comprender las Escrituras, volumen 1, pajina 473 sok 476). Kʼalal te jpuk-kʼop Pedro la yal te yakotik ta smaliyel «te yachʼil chʼulchan» te yaloj ta jamal Dios te ya xtal, jaʼ yak ta kʼop yuʼun te Wentainel yuʼun te Diose (2 Ped. 3:13).

Jaxan te «paraíso» te la yalbey skʼoplal te Pablo, ¿bin-a?

Jaʼnix jich te kʼopil paraíso ya xjuʼ bayal bin ya skʼan ya yal. Ta sbabial, jaʼniwan ya yalbey skʼoplal te Nichimal Kʼinal te ya x-ayin ta Balumilal. Snujpʼ te jich ya kaltik, melel te sbabial ants winik ayin ta jun nichimal kʼinal. Ta schebal, jaʼniwan ya yalbey skʼoplal te lamalkʼinal ya xbajtʼ smulanik te j-abatetik yuʼun Dios ta achʼ balumilal. Ta yoxebal, jaʼniwan ya yalbey skʼoplal te yutsilal te kuxlejalil ta chʼulchan, jaʼ te «yutsil tsʼunubil qʼuinal yuʼun Dios» te ya x-albot skʼoplal ta Apocalipsis 2:7 (ilawil te La Atalaya 15 yuʼun julio 2015, pajina 8, parrafo 8).

Kʼalal te Pablo la yal ta 2 Corintios 12:4 te bin kʼot ta stojol, jaʼniwan yak ta yalbeyel skʼoplal-a te oxchajp bin ya skʼan ya yal te kʼopil «paraíso».

Jich yuʼun te bin ya xlokʼ jnopbeltik jaʼ ini:

Te «yoxcajal chʼulchan» te ya yichʼ albeyel skʼoplal ta 2 Corintios 12:2 jaʼniwan te Wentainel yuʼun Dios te ay ta skʼab te Jesucristo sok te 144,000 te jaʼik «te yachʼil chʼulchan» (2 Ped. 3:13).

«Yoxcajal chʼulchan» ya yichʼ albeyel, melel maʼyuk yan mantaltesel te lekxan bitʼil te Wentainel yuʼun te Dios.

Te «paraíso» banti «icʼot mohel» te Pablo ta najalsitil oxchajpniwan bin ya skʼan ya yal: 1) te Nichimal Kʼinal te ya x-ayin ta Balumilal, 2) te lamalkʼinal ya xbajtʼ smulanik te j-abatetik yuʼun Dios ta achʼ balumilal te kʼaxtoxan-a te bitʼil yakik ta smulanel ta ora ini, 3) te «yutsil tsʼunubil qʼuinal yuʼun Dios» ta chʼulchan. Te oxchajp ya xbajtʼ ayinuk ta achʼ balumilal.

Jich yuʼun te bin yak ta talel smakoj skʼoplal te «yachʼil chʼulchan» soc te «yachʼil bahlumilal». Yachʼil ya xjajch spisil, tey ochem skʼoplal-a te Wentainel yuʼun te Dios soknix te ants winiketik te ya x-abatinik ta stojol Jehová ta Nichimal Kʼinal liʼ ta Balumilal.