¿Akʼoponojbal ta lek te artikuloetik yuʼun Te J-ilkʼinal ta toyol te mato jaluk slokʼelike? Ilawil teme ya xjuʼ ya awakʼbey sujtib te jojkʼoyeletik ini:

¿Bin-utʼil ya yakʼ ta ilel te Biblia te ya yaʼiy Dios te bin yaʼiyel ya kaʼiy jbatike?

Kʼalal te israeletik mosoinbilik ta Egipto, te Dios ma jaʼuknax snaʼoj te ayik ta wokole, jaʼnix jich la yaʼiy-euk te swokolike (Is. 63:9). Te joʼotike ya xjuʼ jich ya kaʼiy jbatik bitʼil ya yaʼiy sbaik te yantik, melel pasbilotik jich te bin-utʼil yilel stalel te Diose. Te Jehová ya yaʼiy te jwokoltik manchukme ya kaʼiytik te ma snujpʼuk te kʼuxotik ta yoʼtane (wp18.3, pajina 8 sok 9).

¿Bin-utʼil la skoltay Jesús te ants winiketik yuʼun ya xjil yuʼunik te pʼajawe?

Ta skʼajkʼalel te Jesús bayal judioetik ya xpʼajawanik. Te Cristo la yal te tulan skʼoplal te pekʼeluk koʼtantik sok te jkʼaxel ma lek te ya jpʼajtik te machʼatik yan stsʼumbalike. Te Jesús la yal te ya skʼan te talel kʼaxel ya yil sbaik jich bitʼil yermano sbaik te jnopojeletik yuʼune (w18.06, pajina 9 sok 10).

Te Dios ma la yakʼ ochuk te Moisés ta Kʼinal te albil skʼoplal ya yichʼike, ¿bin ya yakʼ jnoptik te bin yuʼun jich la spase?

Te Moisés yamigoinej sba ta lek sok te Jehová (Deut. 34:10). Te kʼalal nopol ya stsʼakajix-a te cuarenta jaʼbil la sbeentayik te jochol takin kʼinal te israeletik, jajchik ta wulwunel ta kʼop ta schebal buelta ta skaj te maʼyuk jaʼ. Te Dios la yalbey te Moisés te akʼa skʼopon te mukʼul ton, pero te Moisés la smaj. Te Jehová ilin ta stojol. ¿Binwan yuʼun? Ta skajniwan te maba la stʼun ta pasel te bin la yalbey sok te maba la yichʼ ichʼel ta mukʼ yuʼun te bitʼil snujpʼ ta swenta te milagro (Núm. 20:6-12). Te bin kʼax ta stojol te Moisés ya yakʼ jnoptik te kʼax tulan skʼoplal te ya jchʼuunbeytik skʼop te Jehová sok te jaʼ ya kakʼtik ta ichʼel ta mukʼe (w18.07, pajina 13 sok 14).

¿Bin ma lekuk ya xjuʼ ya jpastik teme ya xnailij ketik yuʼun te bin ya kiltik ta stojol yantike?

Ay oxchajp te ay bin ya yakʼ jnoptik ta stojol yantik, jaʼ te stsʼumbalik o snasionik, teme ay stakʼinik o maʼuk sok jayeb yaʼbilalik. Yame skʼan ya kiltik te yantik jich bitʼil ya yil te Jehová te ma xpʼajawan stukele (Hech. 10:34, 35) (w18.08, pajina 8 kʼalal ta 12).

¿Bin-utʼil ya xjuʼ xkoltaywanik ta kongregasionetik te ermanoetik te toyolix yaʼbilalike?

Te ermano te toyolix yaʼbilal te jil yaʼtele, ma xpejkʼaj skʼoplal ta yoʼtan Dios sok bayal ya xjuʼ ya skoltay te yantike. Ya xjuʼ ya sle ta lekxan te smamlal te ermanaetik te ma Testigoike, skoltayel te machʼatik yijkʼitayojik scholel skʼop Dios, yakʼel nojptesel yuʼun Biblia sok te yanyantik bin-utʼil ya scholik skʼop Dios (w18.09, pajina 8 kʼalal ta 11).

¿Bin aʼtejibaletik ay ta kit de enseñanza?

Cheʼoxeb aʼtejibaletik jaʼ te tarjetaetik yuʼun jw.org, te inbitasionetik, waxakeb tratadoetik te lek chajpanbilik sok te rebistaetik Te J-ilkʼinal ta toyol sok ¡Despertad! Jaʼnix jich ay cheʼoxeb foyetoetik, cheb libroetik yuʼun yakʼel nojptesel sok chaneb bideoetik te bayal ya xtuun kuʼuntik, jun bideo jaʼ ini ¿Bin yuʼun ya skʼan ya jnoptik te Bibliae? (w18.10, pajina 16).

¿Bin ya skʼan ya spas jtul j-abat yuʼun Dios swenta ya sman te smelelil kʼop bitʼil ya yal Proverbios 23:23?

Maba ya kakʼtik takʼin swenta ya kichʼtik te smelelil kʼope. Jaʼukmeto ya skʼan ya jlokʼestik tiempo sok te ya jpastik tulan yuʼun ya jtatik-a (w18.11, pajina 4).

¿Bin ya yakʼ jnoptik te bin la spas te Oseas ta stojol te yinam Gomer?

Te Gomer bayal buelta la yakʼ sba ta antsinel. Pero te Oseas la spasbey perdon sok maba la yijkʼitay. Teme ay jtul j-abat yuʼun Jehová te nujpunem ya yaʼiy antsiwej o antsinel, te mamlalil o inamil te maʼyuk smule ya xjuʼ ya spasbey perdon. Jaʼukmeto teme ya xlokʼ ta yoʼtan te ya schaʼta sba sok te machʼa la spas mulile, maba ya xjuʼ ya slajinbeyix-a te sjunal te snujpunelike (w18.12, pajina 13).