1. ¿Bin yuʼun ya kaltik te yakotik ta kuxinel ta tiempo te maʼyuk jich kʼaxeme?

YAKOTIK ta kuxinel ta tiempo te maʼyuk jich kʼaxeme. Jich bitʼil albil ta Biblia, te Jehová yak ta stsobel ipal ants winiketik te «talemic ta spisil ta chahp nacionetic, tsʼumbaliletic, pueblohetic soc cʼopiletic». Spisil kʼoemik «ta jun nación te ay yip», melel kʼaxem ta ocho miyon ta tul te tseʼel yoʼtanik yakik ta abatinel ta stojol te Dios, «cʼahcʼal ahcʼabal ayic ta aʼbatinel ta templo yuʼun» (Apocalipsis 7:9, 15; Isaías 60:22). Maʼyuk jich kʼoem ta pasel te ay bayal machʼatik kʼux ta yoʼtanik te Dios soknix te spatxujkike.

2. ¿Bin kʼuxul oʼtanil te ma stojiluk ya yakʼ ta ilel te ants winiketik te ma schʼuunejik te Diose? (Ilawil te lokʼomba ta sjajchibal te articulo).

² Pero te Biblia jaʼnix jich ya yal te ma stojiluk te skʼuxul yoʼtan te ants winiketik te ma schʼuunejik te Dios ta slajibal kʼajkʼale, la yal te jaʼnax ya x-ayin skʼuxul yoʼtanik te ay sbikʼtal yoʼtane. Te jpuk-kʼop Pablo la stsʼibay te «ta slajibal cʼahcʼal» bayal machʼatik «ha nix cʼux ya yaʼiy sbahic», «xbiqʼuet ta yoʼtanic taqʼuin» sok te «jaʼ nax baem ta yoʼtanic sleel te bila jelawen yutsil sbujtsʼ ta yoʼtanique. Ma jaʼuc baem ta yoʼtanic te bila swenta te Diose» (2 Timoteo 3:1-3; 3:4, XCD). Te kʼuxul oʼtanil te ay sbikʼtal yoʼtan skontrainej sba sok te kʼuxul oʼtanil ta stojol te Diose. Te machʼatik  jaʼnax baem yoʼtanik ta sleel te bin ya skʼanike ma sta stseʼelil yoʼtanik te yoʼtanuk ya staike. Te kʼuxul oʼtanil te ay sbikʼtal yoʼtan jaʼnax ya stijbey yoʼtan yantik yuʼun ya xbikʼtaj yoʼtanik-euk sok chujkʼultik sba skuxlejalik yuʼun.

3. ¿Bin ya kiltik ta articulo ini, sok bin yuʼun?

³ Te Pablo snaʼoj te bayal machʼatik ya xbajtʼ ayinuk skʼuxul yoʼtanik te ay sbikʼtal yoʼtan sok te ya xjuʼ ya yutsʼinotik te j-abatotik yuʼun Dios. Jaʼ yuʼun te Pablo la stsitsotik te ma jokintik te machʼatik jich stalelik (2 Timoteo 3:5). Ta melel, ma xjuʼ te jkʼaxel maba ya jokintik te ants winiketik te jich stalelike. Jich yuʼun, ¿bin ya xjuʼ ya jpastik yuʼun maba ya jnopbeytik stalelik sok te ya jpastik tulan te lekuk ayukotik ta stojol Jehová, te jaʼ Dios yuʼun kʼuxul oʼtanil? Kiltik banti maba pajal te kʼuxul oʼtanil ya skʼan Jehová te ayuk kuʼuntik sok te kʼuxul oʼtanil te ya yalbey skʼoplal te 2 Timoteo 3:2-4. Yame skoltayotik ta yilel bin-utʼil ayotik sok ta yakʼel ta ilel te kuxul oʼtanil te lek ya kaʼiy jbatik yuʼun sok te ya yakʼ stseʼelil koʼtantike.

4. ¿Bin yuʼun ya jnaʼtik te ma chopoluk te kʼuxuk ya kaʼiy jbatik te bitʼil snujpʼnanix ta pasel-ae?

⁴ Jich bitʼil la kiltikix, te Pablo jich la stsʼibay: «Ay machʼatic te ha nix cʼux ya yaʼiy sbahic». ¿Yabal skʼan ya yal-abi te ma lekuk te kʼuxuk ya kaʼiy jbatike? Maʼuk. Stalel sok jichnanix ya skʼan pasel-a te kʼuxuk ya kaʼiy jbatike. Jich spasojotik te Jehová. Te Jesús jich la yal: «Cʼux me xawaʼiy ta awoʼtan apat-axuhc hich te bin utʼil cʼux yac awaʼiy aba te haʼate» (Marcos 12:31). Teme maba kʼux ya kaʼiy jbatike ma xjuʼ te kʼux ya kaʼiy ta koʼtantik te jpatxujktike. Jaʼnix jich te Biblia ya yal: «Te winiquetic, cʼux me acʼa yaʼiy ta yoʼtanic te yihnamic hich te bin utʼil cʼux ya yaʼiyic stuquel te sbaqʼuetalique. Te machʼa cʼux ya yaʼiy te yihnam, ha nix cʼux ya yaʼiy sba, como mayuc machʼa ya spʼaj te sbaqʼuetal, ya smacʼlin soc ya scanantay» (Efesios 5:28, 29). Jich yuʼun, lekme te kʼuxuk ya kaʼiy jbatik te bitʼil snujpʼ ta pasele.

5. ¿Bin yilel stalelik te machʼatik jaʼnix kʼax kʼux ya yaʼiy sbaike?

⁵ Te machʼatik jaʼnix kʼux ya yaʼiy sbaik te bitʼil ya yal te 2 Timoteo 3:2 ma jichuk ya skʼan pasel sok ma lekuk, ma stojil kʼuxul oʼtaniluk sok ay sbikʼtal yoʼtan. Te machʼatik jaʼnix kʼax kʼux ya yaʼiy sbaike kʼax jich mukʼ ya skuy sbaik-a te bin-utʼil ya skʼane (kʼopona te sjun Romanos 12:3). Jaʼ bayalxan ya smel yoʼtanik ta stojoliknix te bitʼil ta stojol te yantike. Te kʼalal ay ya xchʼayike, ya yakʼbeyik smulin yantik, maba ya yalik te jaʼ smulik-euke. Jtul winik te ya stʼunbey skʼoplal te Biblia la yal ta stojol te machʼatik jaʼnix kʼux ya yaʼiy sbaik te jich kʼoemik bitʼil jkojt chambalam te erizo sbiil te «ya skʼol sba, jich jaʼ ya xjil ta yutil te stsotsil te kʼun sok te kʼixine», pero jaʼ «ya yakʼ jilel ta spat te schʼixale». Te machʼatik jaʼnix kʼux ya yaʼiy sbaik maba tseʼel yoʼtanik ta smelelil.

6. ¿Bin lek ya xlokʼ kʼalal te ants winiketik kʼux ta yoʼtanik te Diose?

⁶ Ay machʼatik te ya stʼunbeyik skʼoplal te Biblia ya yalik te aylaj bin yuʼun jaʼ nail la yalbey skʼoplal te Pablo te stalel te machʼatik jaʼnix kʼux ya yaʼiy sbaik. Ya yalik te jaʼ ta swenta te ya xchiknaj ta ilel te chopol taleliletik te la yalbey skʼoplal ta patil kʼalal ay machʼa jaʼnix kʼux ya yaʼiy sbae. Yan stukel te machʼatik kʼux ta yoʼtanik te Jehová ya yakʼik ta ilel lekil taleliletik. Te Biblia ya yal te snitojbey sba skʼoplal te skʼuxul koʼtantik ta stojol Jehová sok te sbujtsʼ-oʼtanil, te lamalkʼinal, te ya xkujch yuʼun, te yutsil oʼtanil, te lekil oʼtanil, te chʼuunel oʼtanil, te manso oʼtanil sok te ya xjuʼ yuʼun skomel sba (Gálatas 5:22, 23). Jtul te machʼa la stsʼibay jun salmo jich la yal ta kʼayoj: «¡Bayel me yutsil te pueblo te ha Dios yuʼun te Jehová!» (Salmo 144:15). Te Jehová jaʼ Dios te tseʼel yoʼtane, te j-abatetik yuʼune ya yakʼik ta ilel te stalele. Jaʼnix jich te j-abatetik yuʼun Jehová tseʼel yoʼtanik, melel ay bin ya yakʼik ta skoltayel te yantike, ma pajaluk stalelik sok te machʼatik jaʼnix kʼux ya yaʼiy sbaik sok te jaʼnax ya skʼanik te ay bin ya x-akʼbotike (Hechos 20:35).

7. Teme ya jkʼan ya jnaʼtik bin-utʼil ay te skʼuxul koʼtantik ta stojol te Diose, ¿bin ya skʼan ya jpastik?

⁷ ¿Bin-utʼil ya xjuʼ ya jnaʼtik teme ma jaʼuk kʼux-xan ya kaʼiy jbatik te bitʼil te Jehová? Jnop kaʼiytik te  tsitsel ay ta Filipenses 2:3, 4 te jich ya yal: «Ma me ayuc bin yac apasic ta scuenta te bin ya scʼan awoʼtanic atuquel o ta scuenta toybahil, peqʼueluc xawacʼ abahic; hich me xapʼis te toyol xan ay te yantic te bin utʼil te haʼate. Ma me atuqueluc nax yac ale awutsil alequil, ha me xalehic te haʼuc nix hich ay yutsil slequilic te yantique». Yame xjuʼ jich ya jojkʼoybey jbatik: «¿Yabal jpas ta jkuxlejal te tsitsel ini? ¿Yanixbal kakʼbey yipal ta spasel te skʼanojel yoʼtan te Diose? ¿Yabal jle bin-utʼil ya xjuʼ ya jkoltay te yantik ta kongregasion sok ta scholel te skʼop Diose?». Ay wokol ya kaʼiytik te ay bin ya kakʼtike. Yaniwan skʼan jpastik tulan sok te ma jaʼuk ya jpastik te bin ya jmulantike. Pero maʼyuk bin ya yakʼbotikxan stseʼelil koʼtantik jich bitʼil snaʼel te lek ya yilotik te Mukʼul Ajwalil ta chʼulchan sok ta Balumilal.

8. Ta skaj te skʼuxul yoʼtanik ta stojol Dios, ¿bin spasojik chaʼoxtul j-abatetik yuʼun?

⁸ Ta skaj te kʼux ta yoʼtanik te Dios sok te ya skʼan ya x-abatinikxan ta stojol ay chaʼoxtul j-abatetik yuʼun Dios yijkʼitayojik scarreraik te bantiniwan ya spasik ganar bayal takʼin te jichuke. Jtul hermana te Ericka sbiil jaʼ doktora, jaʼukmeto maba la sle te mukʼ skʼoplal ya xkʼot ta swenta te aʼtelil ya snaʼ spasele. Te bin la spase, jaʼ te och ta precursora regular sok abatin sok smamlal ta bayal pam nasionetik. Jich ya yal: «Bayal bintik jtaojtik te bitʼil yakotik ta abatinel ta yan lumetik sok jtaojtik bayal kamigotaktik. Spisil-abi, yakʼoj stseʼelil koʼtantik ta jkuxlejaltik. Yato x-aʼtejon ta doktora, jaʼukmeto te bin smelelil ya yakʼbon stseʼelil sok sbujtsʼ koʼtane, jaʼ te jteb ma spisiluk te jtiempo sok kip ya jtuuntes ta spoxtayel kʼoem te ants winiketik ta swenta skʼop Dios sok ta skoltayel te kongregasion».

9. ¿Bin yuʼun ma xjuʼ te ay stseʼelil yoʼtanik te machʼatik kʼux ta yoʼtanik te takʼine?

⁹ Jaʼnix jich te Pablo la yalbey skʼoplal te machʼatik «xbiqʼuet ta yoʼtanic taqʼuin». Ayix tal cheʼoxeb jaʼbil, jtul precursor ta Irlanda la scholbey yaʼiy skʼop Dios jtul winik. Te winike la slokʼes yawil stakʼin, la stsak lokʼel chaʼoxlejch billete sok jich la yal sok stoybail yoʼtan: «Jaʼme jdios ini». Manchukme bayal machʼatik ya skuyik te ma jichuk stalelik bitʼil te winike ya yakʼik ta ilel te jichnix ya snopik-euke. Kʼux ta yoʼtanik te takʼin sok te bin ya xjuʼ ta manel soke. Pero te Biblia jichme ya yal: «Te machʼa cʼux ta yoʼtan te taqʼuine, mayuc bin ora ya yal te ticʼ a; te machʼa cʼux ta yoʼtan te cʼulejalil, mayuc bin ora ya yal te tiqʼuix a» (Eclesiastés 5:10). Te machʼatik kʼux ta yoʼtanik te takʼine ma tikʼuk ya yaʼiyik te sbilukike, te jayeb kʼajkʼal kuxulike jaʼ ya yoʼtantayik stael. Pero jaʼnax ya sta swokolik yuʼun (1 Timoteo 6:9, 10).

10. ¿Bin la yal te Agur ta swenta te kʼulejalil sok te pobreile?

¹⁰ Ta melel, jpisiltik ya jkʼantik takʼin, ya jnaʼtik te ya xtuun kuʼuntike (Eclesiastés 7:12). Pero, ¿yabal xjuʼ te tseʼel yoʼtan te machʼa jaʼnax ay yuʼun te bin ya stuuntes ta jujun kʼajkʼale? Yak (kʼopona te sjun Eclesiastés 5:12). Te Agur te jaʼ snichʼan te Jaqué, jich la skʼanbey te Diose: «Ma me xawacʼon ta pobre o ta jcʼulej, ha nax me xawaʼbon te weʼelil te ya xtuhun cuʼune». Ma wokoluk ya xkʼot ta koʼtantik bin yuʼun ma skʼan te pobree. La yal te ma skʼan te ya x-ikʼbot yoʼtan ta elekʼ, melel ya yakʼ ta bolkʼoptayel te Dios teme jich ya spase. Pero, ¿bin yuʼun la skʼanbey Jehová te manchuk ya x-akʼbot skʼulejal yuʼune? Jichme la yalbey: «Yuʼun teme ya xnoj jchʼuht ya wan jmucat ta coʼtan, soc hich wan ya cal: ¿Machʼa a te Jehová? xchihon» (Proverbios 30:8, 9). Yaniwan jnaʼbeytik sba ants winiketik te jaʼ smukʼulinej yoʼtanik te skʼulejalik, ma jaʼuk te Diose.

11. ¿Bin la yal te Jesús ta swenta te takʼine?

¹¹ Te machʼatik kʼux ta yoʼtanik te takʼine ma xjuʼ te lek ya x-ilotik yuʼun te Diose. Te Jesús jich la yal: «Mayuc machʼa ya xhuʼ ya yacʼ sba ta aʼbatinel yuʼun cheb ajwaliletic; como ya me yihlay te jtuhle soc cʼux ta yoʼtan te yane, o jun yoʼtan ta stojol te jtuhle, soc ya spʼaj te yane. Ha nix hich, ma xhuʼ yac awacʼ abahic ta aʼbatinel yuʼun Dios soc yuʼun te cʼuhlejalile». Te Jesuse lajeltonax yalbel-a: «Ma me xatsob acʼuhlejalic ta bahlumilal te banti ya xjochʼob soc ya xchuxub, soc ta banti ya xʼoch jʼeleqʼuetic. Ha me xatsob acʼuhlejalic ta chʼulchan te banti ma xjochʼob soc ma xchuxub, soc te banti ma xʼoch jʼeleqʼuetic» (Mateo 6:19, 20, 24).

12. ¿Binwan yuʼun ya xjuʼ te kʼunxan ya kaʼiytik abatinel ta stojol Jehová teme maʼyuk bayal jbiluktike? Ala junuk ejemplo.

 ¹² Bayal machʼatik staojik ta ilel te kʼalal maʼyuk bayal sbilukik te ma jaʼuknax tseʼelxan yoʼtanik, jaʼnix jich ayxan tiempo yuʼunik ta abatinel ta stojol Jehová. Jtul hermano ta Estados Unidos te Jack sbiil ay sna te kʼax mukʼ sok ay snegosio, pero la schon yuʼun ya x-och ta precursor jich bitʼil te yinam. Jich ya yal: «Wokol la kaʼiytik schonel te jnatik te kʼax tʼujbile sok te jkʼinalkotike. Pero, ta melel bayal jaʼbil ma lek ya kaʼiy jba kʼalal ya sujton ta jna ta skaj te bayal wokol ya jta ta kaʼtel. Yan stukel te kinam te ochem ta precursora spisil-ora tseʼel yoʼtan ya kil-a. Jich ya yalbon-a: “Jaʼ yakon ta aʼtel sok te patron te lekxane”. Jich bitʼil ochonix ta precursor-euk, jchebalkotik jun-nax te machʼa yakotik ta aʼtel ta stojole».

13. ¿Bin ya skoltayotik ta snaʼel bin-nix yilel ya kiltik-a te takʼine?

¹³ ¿Bin ya skoltayotik ta snaʼel bin-nix yilel ya kiltik-a te takʼine? Yame skʼan te jich ya jojkʼoybey jbatik ta jamal: «¿Yabal kakʼ ta ilel ta jkuxlejal te ya jchʼuun ta smelelil te bin ya yal te Biblia ta swenta te takʼine? ¿Jaʼbal tulanxan skʼoplal kuʼun spasel ganar takʼin? ¿Jaʼbal ayxan skʼoplal ta koʼtan te biluketik te bitʼil te bin yilel ya yilon Jehová sok te machʼatik ayik ta joyobale? ¿Yabal smukʼulin koʼtan ta smelelil te ya yakʼbon Jehová te bin ya xtuun kuʼune?». Ya xjuʼ schʼuun koʼtantik te maʼyuk bin-ora ya yijkʼitay Jehová te machʼatik jaʼ ya smukʼulin yoʼtanik (Mateo 6:33).

14. ¿Bin-utʼil ya skʼan ya kiltik te bin ay ta mulanele?

¹⁴ Jich bitʼil albil skʼoplal, ta ora ini bayal machʼatik «jaʼ nax baem ta yoʼtanic sleel te bila jelawen yutsil sbujtsʼ ta yoʼtanique». Jich bitʼil maba chopol skʼoplal te lek ya kil jbatik joʼotiknixe sok te lek ya kiltik te takʼine, jaʼnix jich maba chopol skʼoplal te ya jmulanbeytik yutsilal te kuxlejalil jaʼnax teme ma xbajtʼ koʼtantik tey-ae. Ay chaʼoxtul ants winiketik te ya skuyik te ya skʼan ya kijkʼitaytik spisil te bin ay ta mulanel sok te bintik lek ay yuʼun te kuxlejalile. Jaʼukmeto ma jichuk ya yal te Jehová. Te Biblia jich ya yalbey spisil te j-abatetik yuʼun Dios te jun yoʼtanik ta stojole: «Bahan, tseʼeluc me awoʼtan ya xweʼat, soc tseʼeluc me awoʼtan yac awuchʼ te vino awuʼune» (Eclesiastés 9:7).

15. ¿Bin ya skʼan ya yal te «jaʼ nax baem ta yoʼtanic sleel te bila jelawen yutsil sbujtsʼ ta yoʼtanique» te xchie?

¹⁵ Kʼalal te 2 Timoteo 3:4 ya yalbey skʼoplal te  machʼatik jaʼnax baem ta yoʼtanik sleel te bin jelawen yutsil sbujtsʼ ta yoʼtanike jaʼikme te machʼatik maʼyuk ta yoʼtanik te Diose. Te versiculo mame xyal te jaʼ kʼux-xan ta yoʼtanik te bin jelawen yutsil sbujtsʼ ta yoʼtanik te bitʼil te Diose, melel te jichuke ya yakʼ ta naʼel te kʼux ta yoʼtanik jtebuk te Diose. Jichme ya yal: «Jaʼ nax baem ta yoʼtanic sleel te bila jelawen yutsil sbujtsʼ ta yoʼtanique. Ma jaʼuc baem ta yoʼtanic te bila swenta te Diose». Ta skʼop jtul winik te ya stʼunbey skʼoplal te Biblia te versiculo-abi «malaj skʼan ya yal te kʼux ya yaʼiy ta yoʼtanik jtebuk te Diose. Ya skʼan ya yal te jkʼaxel maba kʼux ta yoʼtanike». Jaʼ-abi ayme bin ya yakʼbey snaʼ te machʼatik kʼax kʼux ta yoʼtanik te bintik ay ta mulanele. Te kʼopil «jaʼ nax baem ta yoʼtanic sleel te bila jelawen yutsil sbujtsʼ ta yoʼtanique» ya yalbey skʼoplal ta lek te machʼatik «ya xtenotic yuʼun [...] te bitic ya smulanic spasele» (Lucas 8:14, XCD).

16, 17. ¿Bin-utʼil la yil te Jesús te smulanbeyel yutsil te kuxlejalile?

¹⁶ Te Jesús la yakʼ kiltik bin ya skʼan ya yal te ya jnaʼtik stsajtayel bantito kʼalal lek te ay bin ya jmulanbeytik yutsilale. Kʼot ta jun kʼin kʼalal «ayin nuhpunel» sok kʼot te kʼalal la yichʼ pasbeyel lekil weʼelil (Juan 2:1-10; Lucas 5:29). Kʼalal laj te vino ta yorail te kʼin yuʼun nujpunel, la spas jun milagro, la skʼatpʼun ta vino te jaʼe. Ta yan buelta kʼalal maba lek skʼoplal albot yuʼun te ya xweʼ x-uchʼ, te Jesús la yal ta jamal te ma stojiluk te bin ya snopik te machʼatik jich la yalike (Lucas 7:33-36).

¹⁷ Manchukme jich-abi, te Jesús ma jaʼuk bajtʼ ta yoʼtan smulanbeyel yutsil te kuxlejalile. Jaʼ tulanxan skʼoplal la yil spasel yaʼtel te Jehová sok la spas tulan ta skoltayel te yantike. Lato skʼan laj ta jijpanel ta teʼ swenta bayal machʼatik ya xjuʼ xkolik-a. Jichme la yal ta stojol spisil te jnopojeletik yuʼune: «Bayel me awutsilic teme hoʼon ta jcuenta te ya yixtaʼcʼoptayex, ya yutsʼinex, soc ya yalic spisil ta chahp cʼopetic ta lot ta atojolic. Tseʼeluc me awoʼtanic soc ayuc me yutsil awoʼtanic yuʼun, como mucʼ amahtan yac awichʼic ta chʼulchan, como hich nix la yutsʼinic te jalwanejetic te nahil ay awuʼunique» (Mateo 5:11, 12).

18. ¿Bin jojkʼoyeletik ya skoltayotik ta snaʼel jayebto skʼoplal kuʼuntik te bin ay ta mulanele?

¹⁸ ¿Bin ya skoltayotik ta snaʼel jayebto skʼoplal ta koʼtantik te bin ay ta mulanele? Jojkʼoybey jbatik ini: «¿Jaʼbal tulanxan skʼoplal kuʼun te bin ya jkʼases kʼajkʼal-a te bitʼil te tsoblejetik sok te scholel skʼop Diose? ¿Jichbal ya skʼan koʼtan te ay bintik ya kijkʼitay spasel yuʼun ya jkʼan x-abatinonxan ta stojol te Diose? Te kʼalal ya jle te bin ya jkʼases kʼajkʼal-a, ¿yabal jojkʼoybey jba teme lek ya yil te Jehová?». Teme kʼux ta koʼtantik ta smelelil te Jehová, maba ya jpastik te bin jnaʼojtik te ma lek ya yil, pero jaʼnix jich te bin maniwan ya smulan ya kaʼiytike (kʼopona te sjun Mateo 22:37, 38).

19. ¿Machʼatik ma xjuʼ x-ayin stseʼelil yoʼtanik ta melel?

¹⁹ Ayixniwan seis mil jaʼbil te ayik ta wokol te ants winiketik ta skaj te balumilal yuʼun te Satanase. Jich bitʼil ayotikix ta slajibal kʼajkʼal nojel te Balumilal ta ants winiketik te jaʼnax kʼux ya yaʼiy sbaik ta stukelik, xbikʼet ta yoʼtanik takʼin sok jaʼnax baem ta yoʼtanik smulanbeyel yutsil te kuxlejalile. Jaʼnax ay ta yoʼtanik te bin ya smulanik sok te bin ya xjuʼ ya staike. Te machʼatik jich stalelike maʼyuk bin-ora tseʼel yoʼtanik ta melel. Yan stukel te Biblia jich ya yal: «Bayel me yutsil te machʼa ya xcoltayot yuʼun te Dios yuʼun Jacob, te ha smucʼulinej yoʼtan te Jehová te Dios yuʼun» (Salmo 146:5).

20. ¿Bin-utʼil ataoj stseʼelil awoʼtan yuʼun te kʼux ta awoʼtan te Diose?

²⁰ Ta jujun kʼajkʼal te j-abatotik yuʼun Dios kʼux-xan ya kaʼiytik ta koʼtantik te Jehová. Jaʼnix jich ta jujun jaʼbil, bayalxan machʼatik ya snaʼbeyik sba sok kʼux ya xjajch yaʼiyik ta yoʼtanik. Jich ya xchiknaj ta ilel te yakix ta aʼtel te Wentainel yuʼun Dios sok te kʼax nopolix ya yakʼbotik bendisionetik te ma xjuʼ ya jnaʼtik ta ora ini jayebto te yutsilale. Kʼalal ya jpastik te skʼanojel yoʼtan te Jehová sok ya jnaʼtik te yakotik ta spasel te bin lek ya yile, ya xjuʼ te tseʼel koʼtantik ta melel ta ora ini sok ta sbajtʼelkʼinal. Ta yan articulo yame kiltik bin chopol taleliletik ya xchiknaj ta ilel ta skaj te kʼuxul oʼtanil te ay sbikʼtal yoʼtan sok bin lekil taleliletik ya yakʼik ta ilel te j-abatetik yuʼun te Jehová.